Taula Faaleagaga
Faasalalauga Faaletausaga a le S&I ia Ianuari 2024
Aso Faraile, 26 Ianuari, 2024
Sa ola a’e lo’u toalua o, Kristi, e lata i le gataifale o Kalefonia i Saute, ma sa fiafia i le sami i taimi uma. O se tasi o mea e sili ona fiafia i ai o le asiasi i fale o moli o le ava. E ui ua nonofo mamao nei mai le sami, ae ua 15 fale o moli o le ava ua ma asiasi faatasi i ai, ma ua ou iloa ai foi le ala e matuai fiafia ai o ia i na mea. Ou te ootia lava i le ata o se moli o le ava o loo tu malosi mai matagi ma galu ona o loo matua taulaina loloto i le faavae papa ma ua matuai malupuipuia e ui i afa malolosi, e leai se mea e mafai ona aveesea mai le faavae ua mausali. I se ala foi faapena, tatou te faamoemoe ia mafai ona tetee atu o tatou tamaiti a’oga i soo se afa e afea o latou olaga. Faafetai atu mo le saunia o le taula faaleagaga latou te manaomia e fesoasoani e fausia ai o latou faavae ia Iesu Keriso.
Ona o a outou taumafaiga maoae i tausaga e lua ua tuanai, ua faatupulaia ia le inisitituti i le 57,000 tamaiti aoga ua faaopoopo, ma ua oo foi le lesitala o le seminare i le 22,000 e ui e toalaiti ni tamaiti e mafai ona lesitala. Ua tatou i ai nei i le pasene pito maualuga o tamaiti aoga seminare ua lesitala ua tatou lipotia. Faafetai mo le tali atu i le valaaulia a Peresitene Nelson e fesoasoani e ao mai se tupulaga. E pei ona ia aoao mai, soo se taimi e te faia ai se mea e fesoasoai ai i se tasi e osia ma tausia a latou feagaiga ma le Atua, ua e fesoasoani e faapotopoto Isaraelu.1 E faaopoopo i lesitala ua faateleina, o le tausaga na te’a nei e silia ma le 25,000 uo o isi tapuaiga sa auai i vasega ma e 9,000 i latou na papatisoina.
Faafetai atu mo a outou valaaulia patino, mo le galulue ai ma taitai o le Ekalesia ma matua, ma mo le uuna’ia o a outou tamaiti a’oga e valaaulia a latou uo. O mea o outou faia ua faia ai se eseesega ofoofogia, ma ua le na o ni lesitala i numera. O le eseesega moni ua i ai i le aafiaga ua outou faia. O aso uma, e suia ai olaga a o latou auai i a outou vasega, a o latou lagona lou alofa ma le faatuatua, ma a o latou taliaina lau valaaulia e suesue i tusitusiga paia ma faalogo i le siufofoga o le Atua. Faafetai i le faaaogaina o lo outou faatuatua ua manuia ai le tele ma tele o fanau a le Tama Faalelagi a o outou saunia se taula faaleagaga latou te matua manaomia.
I se taumafaiga ia saga maua nisi auala ma lelei atu e faamanuia ai o tatou tamaiti a’oga, i nai tausaga ua mavae sa tatou tofotofoina ai se kosi fou o le seminare. Sa tatou aoaoina tamaiti a’oga seminare tausaga muamua mo se semesa, se voluma toeteuteu o le kosi inisitituti o le O Faavae e Suesue Ai Tusitusiga Paia. Ina ua mavae le semesa e tasi, sa matuai mamao i luma tamaiti aoga o na vasega nai a latou tupulaga i lo latou tomai ia anoa le suesue patino o tusitusiga paia, ma ia saofaga i talanoaga i potuaoga. Pe tusa o le taimi lava lea, sa matuai manuia ai foi se polokalama sa faaigoaina o le Faamanuiaina i le Aoga, na fesoasoani ai i tamaiti aoga ia lelei atili i le aoga ma ia sili ona saunia mo avanoa faaleaoaoga i le lumanai. O na aafiaga uma e lua na tosina i ai le gauai a Elder Gilbert, ma sa amata ai ona ia fautuaina malosi i tatou e mafaufau i mea sa aoao mai e le Alii ia i tatou.
A o tupu lenei mea, na amata talanoaga ma tagata o le Matagaluega a Faifeautalai e uiga i ni isi mea e mafai e le seminare ona fai e fesoasoani ai e saunia faifeautalai o le lumanai. Na fai isi talanoaga ma tagata o le Matagaluega o Malumalu e uiga i le fesoasoani i tagata ulu i le malumalu mo le taimi muamua, ia maua se aafiaga anoa ma ia malamalama i feagaiga o le a latou osia. Sa talanoa isi sui o le Matagaluega mo Auaunaga o le Uelefea ma le Ola Tutoatasi e uiga i le fesoasoani e faafetaia’ia se manaoga faatupula’ia mo le malosiaga faalelagona ma le tutoatasi. O le taimi foi lea, sa talanoaina ai se manaoga ua loa ona taofiofia o le toatele e taulai atu i aoaoga a perofeta o ona po nei.
E pei o matavai e tafe atu i se vaitafe, e tele manatu na tuufaatasia lea na foliga uma mai e faasino atu ai i matou i se itu e tutusa. A o matou mafaufau i mea e mafai ona fai, sa matou iloa ai ua i ai le seminare i se tulaga uiga ese. O isi tagata lelei, e pei o faufautua o a’oga po o taulasea o aiga, e mafai ona fesoasoani e talanoaina autu o manaoga ma e mafai foi ona aoga, ae e tulagaese i tatou i lo tatou tomai e talanoaina na autu e ala i vaaiga o le talalelei a Iesu Keriso. Na matou iloaina ai foi e tulagaese i tatou i totonu lava o le Ekalesia ona o le aofaiga o taimi tatou te mafuta ai ma o tatou talavou i vaiaso taitasi.
Ua tatou i ai foi i se tulaga uigaese i totonu o lo tatou lava talafaasolopito. Talu mai le faaaogatusaina o la tatou faasologa ma le Sau, Mulimuli Mai ia te A’u, ua tatou suesueina nei le tusi lava lea o tusitusiga paia, o ni tagata taitoatasi, aiga, ma isi vasega a le Ekalesia. O le mea lea tatou te mafaufau ai pe mafai ona tatou faaavanoa ni taimi aoga e talanoa tuusa’o ai autu i totonu o le matalalaga o a tatou suesuega o tusitusiga paia. Faatasi ai ma nei matavai uma o loo tafe atu i o tatou vaitafe o mafaufauga, tatou te maupipii ai pea i ni nai manatu faalefaavae. Tatou te tuuto atu pea lava e faatotonugalemu ia Keriso, faavae i tusitusiga paia, ma taulai atu i le tagata aoao. O le a tatou taumafai malosi pea lava e valaaulia le Agaga Paia ma taulai atu i la tatou manulauti o le faalolotoina o le liua ia Iesu Keriso ma Lana talalelei toefuataiiina.
A o matou mafaufau ma le agaga tatalo po o a sootaga o nei mea uma ma a tatou taumafaiga e faamanuiaina ai le autalavou, na faamanatu mai ai na aoao mai e Elder David A. Bednar le taua o le suesue o tusitusiga paia i ni auala se tolu: faalefaasologa, faalemataupu, ma faaleautu. Sa ia aoao mai:
“O leFaitauina o se tusi o tusitusiga paia mai le amataga i le iuga e faamaite ai le tafe mai o le vai ola i o tatou olaga e ala i le folasia mai ia i tatou o tala taua, aoaoga faavae o le talalelei, ma mataupu faavae e faavavau. …
“… O le suesueina e ala i autu e faateleina ai le loloto o lo tatou iloa.”
Na faaopoopo mai e Elder Bednar:
“O le saili ma le filiga ia iloa fesootaiga, mamanu, ma autu o se vaega o le uiga lea o le ia ‘fiafia’ i afioga a Keriso. O lenei auala e mafai ona tatalaina ai faitotoa o le punavai faaleagaga, faamalamalamaina ai lo tatou malamalama e ala i Lona Agaga, ma maua ai se agaga loloto o le faafetai mo tusitusiga paia, ma se tulaga o le tuuto faaleagaga lea e le mafai ona mauaina i se isi lava auala. O lea ituaiga sailiiliga e mafai ai ona tatou fausia i luga o le papa o lo tatou Faaola, ma onosaia matagi o le amioleaga i nei aso e gata ai.”2
O le iloa ai tatou te manaomia le tumau faamaoni i lo tatou talafaasolopito ua loa ma faapelepele o le aoao atu faalefaasologa o tusitusiga paia ma le faaauau ona manuia mai lo tatou faaogatusaina ma le Sau, Mulimuli Mai ia te A’u, ma le iloa ai foi e i ai luitau patino a o tatou talavou, ma le manaomia ona saunia mo o latou lumanai, na tatou tuuina atu ai le fautuaga lenei i le Fono a le Aufaatonu o A’oga. Ou te faitauina atu nei mai minute a le aufaatonu.
Ua fautuaina mai e le pulega o Seminare ma Inisitituti o Mataupu Faalelotu le fatuina o mataupu aoaoina i le seminare e aoao atu ai le Sau, Mulimuli Mai ia te A’u i le ala faalefaasologa i tusitusiga paia i le 3-4 aso i vaiaso taitasi, ma lesona faaleautu e faa 1-2 i vaiaso taitasi, e atia’e mai autu e pei o le misiona, malumalu, ma tapenaga faaleaoaoga; tomai mo le suesueina o tusitusiga paia; malosiaga faalelagona; tomai o le olaga; ma aoaoga a perofeta o aso e gata ai. O le a tamauina foi lesona faaleautu i tusitusiga paia, ma taulai atu i mataupu faavae o le talalelei toefuataiina a Iesu Keriso.”
Sa faamaonia ma le naunautai le fautuaga ina ia faatinoina i le lalolagi atoa e amata mai ia Ianuari o le 2025.
Faamolemole manatua o vaiaso taitasi o le a faaauau ai pea ona tatou aoao atu faalefaasologa ia tusitusiga paia. E taua le faaauau pea ona tatou fesoasoani i o tatou tamaiti a’oga ia mautinoa lo latou tomai e suesue ai ma malamalama i tusitusiga paia ma ia iloa ma ola i mataupu faavae o loo aoao mai ai. O le a faaauau pea foi ona tatou fesoasoani i le autalavou e sue tali ia latou fesili e ala i mataupu faavae o le mauaina o le malamalama faaleagaga ma ia maua faamanuiaga o le atamai faaleaoaoga faavae. O lesona fou faaleautu, e faasino i ai o “lesona e tapena ai le olaga,” o le a faaopoopo foi i mataupu aoaoina fou. O nei lesona o le a talanoaina ai manaoga patino o o tatou tamaiti aoga seminare i ni ala o le a faaauau ai pea ona faatotonugalemu ia Keriso, faavae i tusitusiga paia, ma taulai atu i le tagata aoao.
O nei lesona o le a mafai ai e oe ona faaaoga tomai, poto masani, ma meaalofa na e faaaogaina o ni faiaoga faalefaasologa o tusitusiga paia. E le o se mea toe amata lenei. Matou te le o fai atu ia avea outou o ni tagata tomai faapitoa i se tasi o nei autu fou. O le mea moni, matou te faamoemoe e leai se tasi o outou o le a faatinoina le matafaioi o se matua po o se taulasea, faufautua, po o se tagata poto faapitoa. Ua na ona matou talosaga atu ia outou tumau mausali i aoaoga a Iesu Keriso e pei ona otooto atu i nei anomea fou ua tuufaatasia ma ua faamaoniaina.
Ina ia fesoasoani ia e saunia mo le 2025, o le a auina atu anomea fou ia te oe ia Iulai o le 2024, lea o le a aofia atu ai ia lesona o le Sau Mulimuli Mai ia te A’u ma tapenaga o le olaga. Matou te fautuaina oe ia iloilo nei lesona i lena taimi ma fautuaina foi oe, ia amata ona faasoa atu lenei faasilasilaga i matua, taitai i le lotoifale, ma taitai o aoga e fesoasoani ai e fautuaina ni isi talavou e lesitala i le seminare. O le tuufaatasia o auala o le suesueina faalefaasologa ma le faaleautu o tusitusiga paia, matou te faamoemoe ai ia tatalaina se punavai faaleagaga e le pei o se isi lava ua tatou vaai i ai muamua.
O lo matou faamoemoe ia fesoasoani i se tupulaga o talavou ia iloa le ala e suesue ai tusitusiga paia ma ia tamau i aoaoga a perofeta soifua. O se tupulaga o talavou e malolosi faalelagona, o e e i ai tomai ma le gafatia e faamanuiaina ai i aoga ma avea ma tama ma tina amiotonu, ma o le a ta’ita’i i le Ekalesia ma i o latou nuu. O lo matou faamoemoe ia fesoasoani i se tupulaga ia saunia ia malamalama i feagaiga o le malumalu, o e ua tuuto loloto atu ia tausia, ma se tupulaga o faifeautalai e agavaa, ta’uaogaina, malolosi faaleagaga, ma ua saunia e avea ma sui o le Faaola i le valaauliaina o le lalolagi e o mai ia te Ia.
O lo matou faamoemoe ia saunia se tupulaga o so’o o Iesu Keriso o e ua loloto lo latou liua ia te Ia ma Lana talalelei toefuataiina i o latou olaga atoa. Toe faafetai atu mo le faapotopotoina o se tupulaga ma mo lo outou aafiaga matagofie ia i latou. Matou te iloa ua tele na’ua mea ua talosagaina mai ia te outou. Faafetai mo mea uma ua matua lelei ona outou faia. A o faaauau pea ona outou faaaoga lo outou faatuatua, ou te talitonu o le a outou vaai i vavega, ua saunia le Alii e faamalolosia ma puipuia a outou tamaiti a’oga, ma faasagatau atu i afa o nei aso e gata ai. O le a faaauau pea ona fesoasoani le Alii ia te outou. O le mea lena Na Te faia. O Ia lena. Ou te molimau atu ia te Ia i le suafa paia o Iesu Keriso, amene.