O Le Feagai ma le Olaga ma Luitau o le Faatuatua
Faigalotu i le Lalolagi Atoa mo Talavou Matutua
Aso Sa, 19 Novema, 2023
Elder Quentin L. Cook: A o ma iloiloina ma Mary ia le fesili o le feagai ai ma luitau o le olaga ma le faatuatua, sa ma iloaina ai e feagai tupulaga uma ma tulaga e mafai ona tata’i atu ai i se luitau o lo latou faatuatua. Ina ua ma suesue i tusitusiga paia ma iloilo fesootaiga a le Atua ma Ana fanau, e lua autu o loo faamamafaina.
Muamua, ona e i ai le faafeagai i mea uma ma o loo i ai se fili e le manao tatou te faatuatua i le Atua, e manaomia e tupulaga taitasi ona iloa ma maua lo latou lava malamalama ma molimau i le Atua.
Lua, e manaomia e tupulaga taitasi ona malamalama pe o ai i latou ma lo latou faasinomaga faavavau. E taufai faigata ona iloatino nei mea e lua ona e le manao le fili e i ai so outou malamalama manino i le Atua le Tama ma Iesu Keriso ma la La’ua fuafuaga o le fiafia mo oe ma lou sootaga ia i La’ua.
I le vaitau o le 1960, sa ma talavou matutua ai ma Mary. Sa ou faauu mai le A’oga Faaloia a Stanford ma amata ona faigaluega i le tulafono. Sa aoga Mary mo lona faailoga maualuga i Stanford ma sa o se tina talavou. Sa ese luitau o le olaga ma le faatuatua ma faaagafesootai, ae sa talitutusa lava ma mea o feagai nei ma talavou matutua.
Mary, o a ni luitau sa i ai i lena taimi?
Sister Mary Cook: Sa patipatia se aganuu tele o fualaau faasaina, aemaise i le Eria o le Faga o San Francisco i le mea sa tatou nonofo ai. Sa o se mea masani le taua’imisa ma solotetee i mataupu faaagafesootai. O le auai o le Iunaite Setete i feteenaiga i Viatename sa matua le ta’uta’ua lava, ma o tetee a tamaiti aoga na taofia ai iunivesite. Ma o le lu’itau na ou aafia tele ai, nai lo o musika masani malie e faafesaga’i lelei ai ulugalii pe a sisiva, na suia. Sa malolosi ma leoleoa--ma sa sisiva valavala tagata.
I le salafa o le lalolagi, o nisi o nei luitau ma le tele o isi, sa tele ina faaaoga e osofa’i lautele ai lotu ma talitonuga i le Atua.
Elder Cook: I le aso 8 o Aperila, 1966, o le Time magazine lea sa maualuga le aufaitau i na aso, na filifilia e fai ma ana talamua le ulutala faatausuai ma le le mafaufau: “Pe Ua Maliu le Atua?”
I le tusi amata mai le lomitusi o le mekasini, na ia ta’ua ai faapea, na oo mai lea manatu ona o le “atugaluga faatupula’ia o le ‘au faimanatu e uiga i le Atua ma le lalolagi faasalamausau i le ogatotonu o le 1960.”1 O le aano o le tusiga e faalelalolagi ma e le’i faaaofia ai talitonuga faalelotu po o le faatuatuaga i se ala faamalieloto.2
Ioe, o fesili i le faatuatua sa le na ona tulai mai i le vaitau o le 1960 po o le asō. Sa i ai lava i taimi uma. Ina ua asiasi atu le Aposetolo o Paulo i Atenai, na ia taumafai e aoao atu le Toetu o Iesu Keriso. Tatou te faitau i ana taumafaiga i le Galuega, “Aua ua leai se isi mea ua faia e tagata Atenai uma atoa ma tagata ese e aumau ai, na ona tala atu ma faalogo mai sina tala faatoa iloa.”3
Pe le faapena ea le lalolagi o faasalalauga faaagafesootai i le asō?
Ina ua iloa e le motu o tagata le natura faigofie faalelotu na faavae i le faatuatua o le savali a Paulo, e aofia ai lana molimau ia Iesu Keriso, na latou teenaina.
E le gata i le faatuatua i le Atua, na luitauina foi le popolega e uiga i lo tatou faasinomaga moni i le talafaasolopito atoa. Matou te le o faamoemoe e talanoaina faafitauli uma e tusa ai ma le faasinomaga i nei ona po. Ae o le tali lava e tasi. O i tatou o fanau agaga a le Tama Faalelagi alofa e tasi. Sa talanoaina e Peresitene Russell M. Nelson lenei mea i se auala mamana. Sa ia faamamafaina ni tautinoga tumau se tolu: “o se atalii ma se afafine o le Atua,” “o se tama o le feagaiga” ma se “soo o Iesu Keriso.”4
Na ia fautuaina foi i tatou e aua ne’i faailogaina i tatou lava po o isi. O le tele o faafitauli tatou te feagai o le a foia pe a tatou iloaina i tatou lava o fanau a se Tama Faalelagi alofa.
O i latou e mananao e faaumatia le faatuatua e tele ina faapea mai ua le o toe moomia le faatuatua. E faaseseina lo latou manao i faamoemoega patino e tusa ai ma faafitauli faaagafesootai o taimi e suia ai faaaliga ma poloaiga na tuuina mai e le Atua. Latou te manatu ma faapea ua toatele tagata e tutusa o latou faamoemoega faaagafesootai ma ua le o toe faamaoni.
Mo lo outou silafia, e le o sili atu le aofaiga o talavou laiti ma matutua e le o toaaga mai ma tuua le Ekalesia, nai lo le tuanai, e pei ona faasalalauina. Ua matuai faateleina le aofai o faifeautalai ua valaauina. O loo faaalia pea le agai i luma o le pasene o le auai o le tupulaga faia’e i le lotu.5 E le gata i lea, ua faateleina foi le aofai o talavou matutua e auai i le inisitituti.
Faamolemole ia malamalama ou te le o faitioina i latou o i ai masalosaloga; peitai, o loo ou fautuaina le taua o le ala tou te fetaia’i ai. O le tali i lea luitau, o le talalelei a Iesu Keriso. Ou te folafola atu: Afai tou te faitauina faamaoni tusitusiga paia, tatalo, ma i ai matauga faalelotu i o outou olaga, o le a outou maua tali i a outou fesili ma foia masalosaloga e ono tulai mai.
O se tasi o tala faatusi paia ou te fiafia i ai, e maua i le evagelia a Mareko, i se tamā sa manao e lavea’i lona atalii mai se agaga leaga. I le tala, sa fesili ai le Faaola i le tamā pe talitonu e mafai ona faamaloloina lona atalii. Sa fai atu le tamā, ma loimata, “Le Alii e, ua ou faatuatua; ia e fesoasoani i lo’u le faatuatua.”6 Sa talia lea tala e le Alii, ma sa Ia vaoia le agaga ma faamalolo i le atalii.
O le lesona ia aua nei tuua le masalosalo po o le le talitonu e faatoilalo lo tatou faatuatua. O le suesue ma le filiga i tusitusiga paia, tatalo ma le loto faamaoni, tausiga faalelotu ma le filiga, ma mulimuli i fautuaga a le perofeta a le Alii o le a mafai ai ona e faatoilaloina luitau o le faatuatua.