Saunoaga Amata
Faigalotu i le Lalolagi Atoa mo Talavou Matutua
Aso Sa, 19 Novema, 2023
Faafetai lava, Peresitene Reese.
A o lei amataina o tatou manatu faaalia, ou te fia faailoa atu le tuumalo ai o Peresitene M. Russell Ballard i le Aso Sa ua tuanai—o la’u peresitene o le korama ma la’u uo pele. E momoli atu la’u faamaisega i lona aiga ma lo’u alofa ma le talisapaia o lona soifuaga o le ositaulaga ma le tuuto i le faamanuiaina o fanau uma a lo tatou Tama Faalelagi.
Ua ma fiafia lava ma Mary e auai faatasi ma Elder Clark G. Gilbert ma Sister Christine Gilbert e lauga atu ia te outou i lenei faigalotu i le lalolagi atoa mai le lotoa o le Iunivesite a Polika Iaga.
I le tapenaga mo lenei tofiga, sa matou aoina mai ai fesili mai talavou matutua i le salafa o le Ekalesia. Sa ma amata mai lotoa o le CES: Iinei i le BYU, sosoo ai ma BYU-Idado, BYU-Hawaii, ma le Kolisi o Ensign. Ona faalautele atu lea i le lalolagi i tamaiti aoga o le BYU-Pathway, ma i latou e auai i le inisitituti i Le Ekalesia a Iesu Keriso o le Au Paia o Aso e Gata Ai. Sa fono peresitene o nei a’oga ma isi taitai faatasi ai ma vaega o tamaiti aoga e filima’oti ai pe o a fesili e sili ona taua mo talavou matutua i lenei taimi. Sa o se faiga matagofie tele, ma sa ofoofogia fesili i le faaiuga.
Sa matua’i talitutusa uma o tou mafaufauga ma lagona; toatele naua outou sa faasoa maia fesili masani faaleagaga ma isi fesili o le olaga. Pe o se tamaitiiti a’oga inisitituti i Peru, se tamaitiiti a’oga enisinia i le lotoa o BYU-Idaho, se tasi o suesue e ala i le BYU-Pathway i Aferika i Sisifo, se tamaitiiti a’oga o mamanu faakalafi iinei i le lotoa o le BYU, po o se e faigaluega faapolofesa ae auai i le inisitituti i Europa, le Atu Filipaina, po o iinei i Iuta, ae ua soofaatasi talavou matutua uma o le Ekalesia i lo latou faatuatuaga ia Iesu Keriso ma tutusa o latou faanaunauga, faamoemoega, ma atugaluga. E ofoofogia outou ma o se vaega taua tele o le lumanai o lenei Ekalesia.
Ua matou tuufaatasia a outou fesili i ni faavasegaga se lima mo la matou tolaulauga i le asō:
-
O le feagai ai ma le olaga ma luitau o le faatuatua
-
O le alofa ma le avea ma ni ō
-
Fuafuaina o le olaga ma faapaleni le olaga
-
Tu atu mo le mea moni
-
Mauaina o faaaliga patino
-
Taitaiga faaperofeta
O le asō, matou te fia talanoaina ma outou nei fesili taitasi i se ala e utuvai mai ai o outou lava aafiaga patino, ma a outou matauga mai fegalegalea’iga ma talavou matutua i le salafa o le Ekalesia.
O le a ma talanoaina ma Sister Cook ia fesili muamua e lua e uiga i le olaga ma luitau o le faatuatua ma le alofa ma le avea ma ni ō. Ona faasoa mai ai lea e Elder ma Sister Gilbert o la aafiaga i le ala e faapaleni ai tiutetauave o le olaga. O le a o la talanoa foi i le uiga o le tu atu mo le mea moni i lenei taimi o le pagatia. Ona ou faasoa atu ai lea o ni nai manatu ma se fautuaga i le mauaina o faaaliga patino ma faaiu atu ai i ni mafaufauga i le taitaiga faaperofeta.