Fuafuaina o le Olaga ma Faapaleni le Olaga
Faigalotu i le Lalolagi Atoa mo Talavou Matutua
Aso Sa, 19 Novema, 2023
Elder Clark G. Gilbert: Faafetai lava Elder ma Sister Cook, mo la oulua fautuaga matagofie. Ua ma fiafia lava ma Christine e talanoaina le fesili muamua lenei e faatatau i le fuafuaina o le olaga ma faapaleni le olaga.
Sister Christine Gilbert: E pisi lava lo matou aiga. Sa i ai lava i taimi uma faamoemoega o galuega faigata a lo’u toalua--o se polofesa i Harvard, CEO o se kamupani faasalalau, ma le peresitene o ni iunivesite e lua. I le taimi o na mea uma, sa ma taufai auauna foi i valaauga pisi o le Ekalesia. Ae o ma tiutetauave sili ona taua, o la ma faaipoipoga ma le fanau.
Elder Gilbert: Sa ou manatua lenei mea ina sa i ai se vaitau sa ou ta’ita’ia le Deseret News. E toafia outou talavou matutua e faitauina se nusipepa lolomi i aso uma? Sii mai tou lima. O lo’u manatu tonu lena--toe a leai se isi. Sa tuu mai le tiutetauave ia te au e fesoasoani e suia le Deseret News mai se nusipepa masani i le faatekinolosi. Sa o se vaitau faigata. I lena taimi, sa i ai le toafitu o le ma fanau e toavalu, ma sa ou tautua o se epikopo.
I se tasi aso, sa faafuasei lava, ona valaau mai Peresitene Boyd K. Packer ma fesili mai ia te a’u, Brother Gilbert, o loo ou fesili atu e uiga i lou aiga. O lava sou taimi mo lou toalua?” Sa ou malolo ma tali atu, “Ailoga.” Ona ia fai mai lea, “Uso Gilbert, o le a e ta’ita’ia le vaega faasalalau lenei mo se vaitau, ae o le a avea oe o se tane ma se tamā mo le faavavau.” Ona ia tuu mai lea o se tofiga e fai se ma po eva faalevaiaso ma Christine.
Ona fesili mai lea po o le a le taimi ou te moe ai, sa ou tali atu o le 1:00 po o le 2:00 i po uma. O lana tali sa feteenai ia te a’u. Sa ia fai mai, “E te manatu ua afua nei mea uma i au taumafaiga. E te le o talitonuina le Alii.” Na tuu mai e Peresitene Packer se vavao faaaposetolo ia te au, sa ou taumafai e tausia talu mai lena taimi.
Sister Gilbert: Afai la e i ai sau vavao ma se po eva faatulagaina faalevaiaso, e faapefea ona e taulimaina isi tiute taua?
E amata i le fuafuaina. I le popofou o le ma faaipoipoga, sa ma faia ma lo’u toalua i po uma o Aso Sa le ma kalena faalevaiaso. Mo i ma’ua, o se tautinoga lea ma te le misia lava tusa po o le a lava le pisi.
Lua, o le faapaleniina o tiute o le olaga e moomia ai foi sini faasoa. Tusa pe ma te valavala, e lagona lava lo ma tasi pe a i ai se faamoemoega faasoa. A malaga la lo’u toalua i le galuega pe ou te faiaoga seminare i le vaveao, pe alu o ia i se tiute faaleuarota, afai sa ma faakalenaina na tiutetauave ma ogatasi ma o ma faamoemoe, sa ma faatasi lava tusa pe ma te valavala.
Elder Gilbert: Ae, e i ai lava taimi e te moomia ai ona faamanino tuaoi i ni filifiliga patino.
Sa faasoa mai e Clay Christensen, o se uo pele mai Boston, le fesili a lona supavaisa pe sili le taeao o le Aso Sa po o le taeao o le Aso Toonai mo se fonotaga masani faalevaiaso ua faatulagaina a le aufaigaluega. Sa tali Clay, “I tausaga ua sola, sa tonu ia te au e tuuto le Aso Toonai i lo’u toalua ma le Aso Sa i le Atua, ae a e toe manao ai la, e tatau ona e talosaga sa’o lava ia i la’ua mo le la faatagana.”
E i ai tautinoga e le tatau ona fetuuna’ia i lou olaga. Mo lo matou aiga, e aofia ai le auai i le lotu i le Aso Sa, afiafi faaleaiga faalevaiaso, lotu i le taeao ma le afiafi, ma le taimi faatasi o se ulugalii i vaiaso taitasi.