Taitaiga Faaperofeta

Faigalotu i le Lalolagi Atoa mo Talavou Matutua

Saunia e Quentin L. Cook

O Le Korama a Aposetolo e Toasefululua

Aso Sa,19 Novema, 2023

O le liliu atu ia maua le taitaiga faaperofeta, ou te molimau atu o Russell M. Nelson o le perofeta filifilia a le Alii e taialaina Lana Ekalesia i ona po nei. Ua faatele ona ou talanoa e uiga i lo’u alofa ma le talisapaia o ia.¹

Na ta’ua e Peresitene Spencer W. Kimball, a o saunoa e uiga i le taitaiga faaperofeta: “E ui lava i mea uma … ae e tatau ona sili atu lo tatou agaga faafetai i le aso [mo] ona o le tatalaina mai pea o le lagi, ma o le ekalesia toefuataiina a Iesu Keriso ua faavaeina i luga o le papa o faaaliga. E moni lava o faaaliga faifai pea o le toto ola lea o le talalelei a le Alii ma le Faaola soifua o Iesu Keriso.”²

Na muai vaai le perofeta o Enoka i aso ua tatou ola ai nei. Sa ia vaai i le amioleaga tele o le a matua salalau ma valoia mai “puapuaga e tele” o le a tutupu. Ae ui o lea, sa folafola mai le Alii, “ae o le a ou faasaoina lo’u nuu; Ma o le a Ou auina atu i lalo mai le lagi le amiotonu; ma o le a Ou auina atu le upumoni i fafo mai le eleele, e molimau atu i la’u Toatasi na Fanaua.”³ O le oo mai o le Tusi a Mamona o le faataunuuga lea o le folafolaga na faia e le Alii ia Enoka.

Na maua e le Perofeta o Iosefa Samita lea faaaliga ma lea faaaliga. E tele ua faasaoina mo i tatou i totonu o le Mataupu Faavae ma Feagaiga. O tusitusiga faavae uma o le Ekalesia o loo i ai le mafaufau ma le finagalo o le Alii mo i tatou i lenei tisipenisione mulimuli.⁴

E faaopoopo atu i nei tusitusiga paia faavae maoae, ua faamanuiaina i tatou i faaaliga faifai pea i perofeta soifua. O perofeta o “sui tofia o le Alii, ua faatagaina e saunoa mo Ia.”⁵

E pei ona sa faatele ona ou fai atu ai muamua, Ou te tautino atu ma le paia atoa o faaaliga faifai pea ua maua ma o loo maua pea e ala mai i auala ua faavaeina e le Alii.

Ua ou galue o se Aposetolo i lalo o le taitaiga a perofeta e toatolu: Peresitene Gordon B. Hinckley, Thomas S. Monson, ma Russell M. Nelson. Ou te molimau atu o i latou uma na taliina faaaliga mo o tatou taimi.

Ou te faamautinoa atu ia te outou o le taitaiga faafaaaliga e mafai ona maua e i tatou taitoatasi a o tatou galulue i le tovine a le Alii. O le tele o la tatou taitaiga e sau mai le Agaga Paia. O nisi taimi ma mo nisi o faamoemoega, e sau sa’o mai le Alii. Ou te molimau patino atu e moni lenei mea. O le taitaiga mo le Ekalesia atoa, e na o le Peresitene ma le perofeta o le Ekalesia e oo mai ai.

Sa ou toe faaupuina atu muamua le mea sa saunoa i ai Uilifoti Uitilafi e uiga i le Perofeta o Iosefa Samita; e tutusa lona moni ia Peresitene Russell M. Nelson. Ua ou vaai “i galuega a le Agaga o le Atua ia te ia, atoa ai ma faaaliga a Iesu Keriso ia te ia ma le faataunuuina o na faaaliga.”⁶ O ia o le perofeta a le Alii.

I le avea ai o se Aposetolo a le Alii o Iesu Keriso, ou te tuuina atu la’u molimau mautu i le paia o le Faaola ma le moni a’ia’i o Lana Togiola. O Ia o lo tatou Faaola, ma lo tatou Togiola. I le suafa o Iesu Keriso, amene.