O Le Alofa ma le Avea ma Ni Ō
Faigalotu i le Lalolagi Atoa mo Talavou Matutua
Aso Sa, 19 Novema, 2023
Elder Quentin L. Cook: O le fesili e uiga i le alofa ma le avea ma ni o, e fesootai vavalalata lava ma luitau o le fetaiai ma le olaga ma le faatuatua. Mary, e mafai ona e talanoaina lenei fesili taua?
Sister Mary Cook: O i tatou uma o fanau a le Atua, ma o ni ō o le Ekalesia toefuataiina a Iesu Keriso o le Au Paia o Aso e Gata Ai. E le afaina o tatou tulaga eseese, o i tatou uma o ni ō.
Ua manino i tusitusiga paia e faapea, e alofa le Atua i Ana fanau agaga uma ma e tutusa uma i le Atua ma o ni ō le Atua.
I le 2 Nifae 26:33 o loo faitauina, se vaega, “Ua ia valaauina i latou uma ia o mai ia te ia ma taumamafa i lona agalelei; ma e le teena e ia se tasi e sau ia te ia, e uliuli pe pa’epa’e, e pologa pe saoloto, o tane ma fafine; … ma ua tutusa tagata uma i le Atua.”
Ona o i tatou uma o ni fanau agaga a le Atua, ua i ai so tatou faasinomaga faaleagaga, ma ua tatou lagiina lena mea i le “O A’u o se Atalii o le Atua.”1
I tausaga ua mavae, sa matou nonofo ai i le Eria o le Faga o Kalefonia, sa pepese ai ma auai talavou matutua ma talavou laiti i le faaaliga a le Malumalu o Oakland Kalefonia sa faaigoaina o le “And It Came to Pass.” O le tasi o pese sa faatatau i lo matou faasinomaga faaleagaga. Sa faaigoaina “Who Am I?” E fai ai fesili “Aisea ua tatou i ai iinei?” ma le “O fea tatou te o i ai?”
E faaiu le pese i le tali mamana lenei:
O lo’u tagata lenei.
Sa ola lo’u agaga faatasi ma le Tama a o le’i faia le lalolagi.
Sa ou filifilia le ala e mulimuli ai ina ua mae’a la’u uluai esetete.
Sa ou sau i le lalolagi mo se tino sa foafoaina e pei o lo’u Tama
E faatasi ai ma lo’u agaga ma le tino ina ia paia ai lo’u tagata.
O lo’u tagata lenei:
O au o se atalii o lo’u tama … i le lagi.
O lo’u tagata lenei. …
O au o se atalii o le Atua.
O tagata uma na auai ai, sa i ai se molimau a le Agaga e faapea sa o latou lagiina le mea moni.
Elder Cook: O le masina talu ai, sa ma i ai ma Mary i Efeso i Take faatasi ai ma taitai misiona mo le tele [o le itu] Europa. O iina sa soifua ai ma aoao atu ai le Aposetolo o Paulo. O se tasi o ana tusi i Efeso, o loo i ai se tautinoga mamana: “O lenei, e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua.2
O i tatou uma o ni ō le aiga o le Atua!
Sister Cook: Na tusia e A.A. Milne se tusi i se urosa auro-e fiafia i le hani sa igoa o Winnie-the-Pooh.
I se savalivaliga ma lana uo o Piglet, sa fesili Piglet ia Pooh, “E faapefea ona sipela le alofa?” Sa tali Pooh, “E te le sipelaina. E te lagonaina.”
I le polokalama e suesue ai tusitusiga paia i le Potutusi o le Talalelei, o le vaaiga aoao i le “Alofa” ua faitauina, “O le alofa o se faalogona o le tuuto loloto, popolega, ma le agaalofa. O le faataitaiga silisili o le alofa o le Atua mo Lana fanau o loo maua i le Togiola lē iu a Iesu Keriso. O le alofa mo le Atua ma tagata o se uiga lea o soo o Iesu Keriso.”3
I le Ioane 3:16 tatou te faitau ai, “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”
Ina ua afio mai Iesu Keriso i le lalolagi, i le taulotoaiga o taimi, sa Ia aoao mai i tatou:
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi le lona lua, E te alofa atu i le lua te tuaoi, ia pei o oe lava ia te oe.”4
E faaali atu lo tatou alolofa mo le Atua le Tama ma Iesu Keriso i le tausia o La poloaiga. O la tatou galuega lenei.
Tatou te faaalia lo tatou alolofa i fanau uma a le Atua e ala i le auauna atu ia i latou ma ia ola atoatoa i le talalelei—e ala i le faia o galuega faafaifeautalai a o tatou alolofa, faasoa, ma valaaulia isi e “o mai ia Keriso.” Tatou te faaalia lo tatou alofa mo le aiga e ala i le tausia o a tatou feagaiga o le malumalu ma le faia o galuega i le malumalu mo o tatou augatuaa.
Ia faamaoni ia te oe lava ia. Fesili: Pe o faaalia i a’u faatinoga lo’u alofa mo le Tama Faalelagi ma Iesu Keriso? O o’u fesoasoani i isi o siomia a’u ina ia talitonu? Pe a tu’ua’ia a’u i le avea ai o se Kerisiano, mata e lava ni faamaoniga o la’u amio faaKeriso?
O le solo “Outwitted” na tusia e Edwain Markham e faitauina faapea:
Sa ia tusia se li’o na tuu ai a’u i fafo—
Le talitonu, tetee, o se mea e le ano moni i ai.
Peitai sa ia i ma’ua ma Alofa le poto e manumalo ai:
Sa ma tusia se li’o sa tuu ai o ia i totonu!
Ia avea i tatou o ni soo moni ma ni e faatupuina le filemu. Ia i ai le alofa mama o Keriso i o tatou loto a o tatou faaalia i a tatou faatinoga lo tatou alolofa i le Atua ma Lona Alo Pele, o Iesu Keriso.
Elder Cook: Ua ou talosagaina Elder ma Sister Gilbert e talanoaina isi fesili e lua:
Muamua, E mafai faapefea ona tatou faamalolosia le fuafuaina o le olaga ma le faapaleniina o le olaga? Ma le lona lua, E faapefea ona tatou tutu atu mo le mea moni i nei taimi faigata?