Tu Atu mo le Mea Moni
Faigalotu i le Lalolagi Atoa mo Talavou Matutua
Aso Sa, 19 Novema, 2023
Sister Christine Gilbert: O le isi fesili na tuu mai ma te talanoaina o le ala e tu atu ai mo le mea moni i se vaitau o le tele o le fenumia’i.
E toafia outou e i ai filifili o feau tusitusia e fefaasoaai ai ma uo ma aiga? Atonu o i tatou uma, e sa’o? I se tasi o a’u mau vaega fetusia’i, e i ai nisi e matua’i tuuto lava i le talalelei ma isi o tauivi ma faafitauli i le Ekalesia. E i ai se isi o outou e masani ai? Le a le mea e tupu pe a fai atu e se tasi e te alofa i ai se mea e te iloa e le moni?
Elder Clark G. Gilbert: Ua matou faalogo i tala faapena mai talavou matutua i le salafa o le Ekalesia. Matou te iloa ua outou lagonaina lenei mea.
A o tatou oo atu i lenei autu, ou te matauina ua matou faasoaina le tulaga i le asō ma ni amepasa se toalua o loo faata’ita’ia lenei mea ma faaali ia i tatou le ala e mafai ona e tu atu ai ma le agalelei ma talitonuga maumaututu.
Sa alaala Elder ma Sister Cook i le Itu o le Faga o San Francisco i le tele o lo la’ua soifua faapolofesa. Sa a’oga Elder Cook i le Aoga Faaloia a Stanford, sa faauluulu i ai se kamupani loia i le Itu o le Faga ma se polokalama tele o le tausiga o le soifua maloloina. Sa galulue le au Cook ma soifua faatasi ma le tele o paaga o e sa le’i faasoaina o latou uiga tausili. Ae sa la maua ni ala e tutu atu ai mo le mea moni a o avea pea o ni uo lelei ma ni tuaoi lelei. Sa ou vaai i lenei mea a o faatasi ai ma le au Cook i le maimoaga o le Malumalu o Uosigitone D.C. faatasi ma se vaega o le au tusitala iloga ma taitai faitofā. Sa ou maofa i le ala na faasoa manino atu ai e le au Cook upumoni o le talalelei, e aofia ai le taua o le faaipoipoga i le malumalu, amioga mama, ma le tausia o feagaiga, e faia nei mea uma a o fausia sootaga o le malamalama i isi tagata.
Sa ou maua foi isi avanoa e aoao ai le ala e tu atu ai ma le alofa i le mea moni. I tausaga na te’a nei, sa ou maua ai se telefoni mai ia Peresitene Oaks. Na ia fai mai, “Elder Gilbert, ou te lauga i se faigalotu o loma nei, ma ou te manao e fai oe ma a’u soa failauga. Pe tou te auai faatasi ma a’u i o’u autafa mai le tulaga ao matou talanoa faatasi e talanoaina nisi o faafitauli faigata o le aso?” Sa ia fai mai o le a matou talanoaina atugaluga LGBTQ, faafitauli o ituaiga, ma valoaga sese. Ona ia fautua mai lea, “Aua tatou te talanoa mai se laupepa. Sei o tatou felafolafoa’i ma fefaasoaai mai.” Sa vave ona ou tali atu “Ou te talitonu o le a lelei lea mo ana saunoaga, ae mo le manuia o le Ekalesia atoa, e ono sili atu pe a tusia mea o le a ou tautala atu ai.”
I ana saunoaga, sa otooto mai ai e Peresitene Oaks ni ala se lima e mafai ona tatou tutu atu ai ma le alofa i le mea moni.1
O le mea muamua o le aloese mai le soona fefinauai. E pei ona aoao mai e Elder Neil L. Andersen, “E i ai taimi pe a avea o se e faatupuina le filemu, o lona uiga tatou te teena le uunaiga e tali atu, ma nai lo le faia o lena, tatou te fifilemu ma le mamalu.”2
O le lona lua o le alofa i isi, ia maua ni tulaga tutusa e tusa lava pe tatou te le malilie i ai.
O le lona tolu o le taofimau i le upumoni, e oo lava i lo tatou aapa atu. E i ai se faaosoosoga i nisi taimi e savavali ese mai mea ua tatou iloa i a tatou taumafaiga e faaali atu ai le alofa. Tatou te le tau faafitia mea ua tatou iloa e moni.
O le lona fa ia avea o se malamalama ma se uo ma se auaunaga i isi, ma le mulimuli ia tumau ona taula ia Iesu Keriso.
Sister Gilbert: I le konafesi aoao talu ai, sa saunoa ai Elder Cook e uiga i le faafitauli o le tu atu mo le mea moni e aunoa ma le faamatuu atu i uunaiga o le lalolagi: “O soo toafilemu o Keriso e le [malolo mai le upumoni, e le toilalo foi e alolofa i isi]. O i tatou o ni tagata faauō, ma toaaga o nuu o loo tatou nonofo ai. Tatou te alolofa [foi], faasoa atu, ma valaaulia fanau uma a le Atua e mulimuli i aoaoga a Keriso.”3
Ou te manatu o le mea lea sa aoao mai e Peresitene Nelson i lana valaaulia mo i tatou ia avea ma e faatupuina le filemu.4 E le manao o ia tatou te savavali ese mai le upumoni, ae e manao o ia ia tatou faia ma le alofa o le Faaola.