Mga Mensahero sa mga Maayong Balita
S&I nga Tinuig nga Sibya 2023
Biyernes, Enero 27, 2023
Brother Chad H Webb: Sa karaang panahon, giisip nga kinatas-an nga kadungganan ang mapili nga mahimong mensahero sa maayong balita, ilabina nga mahimong mensahero sa kadaogan sa gubat. Sa BC 490, usa ka batan-ong lalaki nga gihinganlan og Pheidippides gipili alang sa kadungganan sa pagdala sa balita ngadto sa mabalak-on nga mga lungsoranon sa Greece nga ang ilang kasundalohan miluwas sa ilang nasod pinaagi sa paglupig sa mga manunulong Persia. Ang nabantog nga asoy nag-ingon nga si Pheidippides midagan sa tibuok agianan gikan sa Valley of Marathon hangtod sa Athens sa pagpahayag sa mga maayong balita. Kapin sa 2,500 ka tuig ang milabay, ang mga tawo nga anaa sa mas maayo nga kahimtang kay sa kanako nagpadayon sa paghandom niana nga pagdagan pinaagi sa pagdagan sa ilang kaugalingong mga marathon.
Gihisgotan ni Isaias ang ideya sa pagkamensahero sa maayong balita sa dihang siya miingon:
“Ug kini mao sila kinsa nagmantala og kalinaw, kinsa nakadala og maayo nga balita, sa pagkamatarong, kinsa nagmantala og kaluwasan; ug miingon ngadto sa Zion: Ang inyong Dios naghari! …
“… Unsa kaanindot sa ilang mga tiil diha sa mga kabukiran!
“Ug … unsa kaanindot sa mga tiil diha sa mga kabukiran niadtong … [sa gihapon nagmantala] sa kalinaw?”1
Kadto nga mga bersikulo sa kasulatan nakausab sa tanang butang alang kanako sa dihang ako usa pa ka batan-on nga misyonaryo, gimingaw, ug nawad-an og kadasig. Ang diwa niadto nga mga bersikulo mibukas sa akong kasingkasing ug hunahuna sa katinuod nga ako gisaligan nga mahimong mensahero sa labing talagsaong mga balita nga madunggan gayod sa kalibotan. Ang kawalay paglaom ug kaluoy sa kaugalingon gipulihan sa paglaom ug pasalamat, ug wala gayod ako makalimot nianang buntaga sa dihang una nakong nasabtan pinaagi sa Espiritu Santo nga ako kinahanglang morepresentar sa Manluluwas sa paghatod sa maayong mga balita sa Iyang walay ikatandi nga gugma, sa Iyang maulaon nga sakripisyo, ug sa Iyang kadaogan sa sala ug kamatayon.
Matag adlaw nga kamo mosulod sa klasehanan, kamo ang mga mensahero sa mga maayong balita sa ebanghelyo ni Jesukristo. Salamat sa pagmantala og kalinaw diha sa usa ka kalibotan nga nagkabahin-bahin ug nagkasumpaki ug sa pagdala og kahayag ug kamatuoran ngadto sa kalibotan nga mabati nga ngitngit ug puno sa kalibog. Kini mao ang tinuod nga Simbahan ni Jesukristo. Kamo giandam ug gipili aron mahimong mga mensahero sa kalinaw ngadto sa kabatan-onan ug mga young adult sa Simbahan sa Ginoo. Pagkadako nga dungog niini nga morepresentar ni Jesukristo, sa pagtudlo sa Iyang ebanghelyo, ug sa pagpaningkamot sa pagtudlo niini sa Iyang pamaagi!
Sa miaging tuig kita adunay oportunidad sa pagkat-on gikan ni Elder Dieter F. Uchtdorf samtang siya mipaila sa bag-ong tamdanan nga basahon nga Pagtudlo Sumala sa Pamaagi sa Manluluwas. Ganahan ko nga kining bag-ong tamdanan nga basahon nagtutok diha sa ehemplo ni Jesukristo isip ang Bantogang Magtutudlo. Sama sa gisulti ni Elder Uchtdorf, “Ang labing maayong paagi aron mahimong usa ka mas maayong magtutudlo mao ang pagkahimong mas maayo nga sumusunod ni Jesukristo.”2
Gamit ang pagkaanaa sa Pagtudlo Sumala sa Pamaagi sa Manluluwas, dili na kita mogamit sa Tamdanan nga Basahon sa Pagtudlo ug Pagkat-on sa Ebanghelyo. Ang Pagtudlo Sumala sa Pamaagi sa Manluluwas wala gituyo nga mahimong usa ka kapanguhaan sa pagbansay; ang katuyoan niini mao ang paghatag og mga kahulogan ug mga pagpasabot sa epektibong pagkat-on ug pagtudlo. Ang mga kapanguhaan sa pagbansay magpadayon nga isangkap sa pagtabang kaninyo nga magamit ang mga baroganan nga gitudlo diha sa Pagtudlo Sumala sa Pamaagi sa Manluluwas. Kini nga mga kapanguhaan naglakip og pipila ka mga elemento sa Tamdanan nga Basahon sa Pagtudlo ug Pagkat-on sa Ebanghelyo nga nakapanalangin sa mga estudyante sulod sa katuigan.
Ako nasayod nga daghan kaninyo ang nakagahin na og dakong panahon sa pagtuon sa Pagtudlo Sumala sa Pamaagi sa Manluluwas ug sa pagpamalandong sa mga pangutana sa personal nga pagtimbang-timbang. Salamat sa tanan ninyong gibuhat nga mahimong Kristohanon nga mga magtutudlo sa gipahiuli nga ebanghelyo.
Aron mas mapadayon ang paglambo sa atong mga materyal sa pagbansay, gusto usab nakong ipahibalo ang usa ka kausaban ngadto sa opisyal nga pamahayag sa katuyoan sa Seminaries and Institutes. Sa dili pa nako ipaambit kaninyo ang bag-ong pinulongan sa atong pamahayag sa katuyoan, tugoti ko nga mohatag og pipila ka konteksto. Kapin sa duha ka tuig nga milabay, among gitutokan ang paghatag sa mga tigkat-on og kasinatian nga mosangpot sa pagkakabig, kalambigitan, ug pagkahisakop, ug sa paghimo niadtong kasinatian nga mahibaloan sa mas daghang kabatan-onan ug mga young adult. Mahinungdanon nga atong ilhon nga kining mga baroganan dili managsama og bili. Ang labing dakong katuyoan mao ang paghatag og mga kasinatian nga magdapit sa atong mga estudyante sa pagkat-on sa ebanghelyo ug mapalawman ang ilang pagkakabig ngadto ni Jesukristo.
Ang kalambigitan ug pagkahisakop importante, apan kini dili direkta nga mga sangpotanan. Kini usa ka paagi sa katuyoan nga kon epektibong gigamit mahimong mosangpot ngadto sa atong direkta nga katuyoan sa pagkakabig. Ang kalambigitan nga mosangpot ngadto sa pagkakabig labaw pa kay sa yanong paghisgot kabahin sa mga kaikag sa atong mga estudyante. Wala nay labaw pa nga may kalabotan sa atong mahangtoron nga pag-uswag ug kalipay kay ni Jesukristo ug sa Iyang gipahiuli nga ebanghelyo. Ang plano sa kaluwasan mao ang plano sa Dios alang sa tanan Niya nga mga Anak. Kini adunay direkta nga kalabotan ug mahangtoron nga kamahinungdanon ngadto sa matag anak sa Dios.
Ang kalambigitan nga mosangpot ngadto sa pagkakabig maistablisar samtang ang Espiritu Santo motabang sa mga estudyante nga makasabot sa plano sa Dios, sa importante nga papel ni Jesus niana nga plano, ug sa kamahinungdanon sa ebanghelyo diha sa atong inadlaw-adlaw nga kinabuhi. Ang kalambigitan nga mosangpot sa pagkakabig makatabang sa mga estudyante nga makita kon sa unsa nga paagi ang mga kasulatan ug mga pagtulon-an sa mga propeta sa bag-ong panahon may kalabotan sa ilang mga kahimtang ug mga panginahanglan. Kini makatabang kanila nga makaila kon unsaon sa pagtubag sa ebanghelyo ang mga pangutana sa ilang kalag. Kini mahitabo kon sila mobati nga madasig sa pagbuhat inubanan sa hugot nga pagtuo ni Jesukristo ug makasinati ang katumanan sa gisaad nga mga panalangin sa Langitnong Amahan. Kana ang kalambigitan nga mosangpot ngadto sa pagkakabig.
Tinuod usab nga ang pagkahisakop, kana lang mismo, dili ang kataposan nga tumong. Sa pagkatinuod, tungod ang pulong nga pagkahisakop gigamit sa daghang paagi, kini usahay masaypan sa pagsabot sa unsay atong gipasabot sa pagkahisakop diha sa konteksto sa ebanghelyo. Daghan kanato mibati nga nahisakop sa nagkadaiyang mga kahimtang. Sa akong pagdako, kana nahitabo kanako diha sa mga team sa atleta. Ang akong mga kauban sa team mao ang akong labing suod nga mga higala, ug gibati gayod nako nga mohimo og daghang paningkamot sa among kawsa aron magmalamposon. Kana nga matang sa pagkahisakop piskay ug gani importante. Apan adunay daghan pa kaayo nga bahin o elemento sa pagkahisakop nga mosangpot sa pagkakabig.
Si Elder D. Todd Christofferson, sa labing bag-o nga kinatibuk-ang komperensiya, nagtudlo nga ang doktrina sa pagkahisakop adunay tulo ka bahin: ang pagpundok sa mga tawo sa pakigsaad sa Ginoo, ang serbisyo ug sakripisyo, ug ang pagbutang ni Jesukristo diha sa sentro sa pagkasakop.3 Kini nga mga konsepto mao ang labing importante sa unsay atong gipasabot kon kita mosulti nga ang pagkahisakop mosangpot ngadto sa pagkakabig. Dayag lang, ang pagkahisakop naglakip sa paghigugma ug pagtahod sa usag usa. Kini naglakip usab og mga baroganan nga magdala kanato ngadto sa Manluluwas ug moapil sa Iyang kawsa samtang kita magtinabangay sa paglakaw diha sa dalan sa pakigsaad balik ngadto Kaniya.
Ang mga panalangin sa tinuod nga pagkahisakop nga nakasentro sa ebanghelyo naglakip usab sa mga koneksiyon sa pakigsaad. Ang pagkahisakop sumala sa kahulogan sa gipahiuli nga ebanghelyo nagtabang kanato nga masayod sa atong tinuod nga pagkatawo ug sa atong mahangtoron nga relasyon sa atong Amahan sa Langit. Ang atong mga pakigsaad nahimo tungod sa Iyang gugma alang kanato ug nagkonektar kanato ngadto Kaniya, sa atong mga pamilya, ug sa usa ka kumunidad sa mga tumutuo nga misaad sa pagdala sa mga palas-anon sa usag usa. Kini nga matang sa pagkahisakop mosangpot ngadto sa pagkakabig ni Jesukristo ug sa Iyang gipahiuli nga ebanghelyo.
Karon, tugoti ko nga mobalik ngadto sa kausaban sa atong pamahayag sa katuyoan, nga naaprobahan sa Church Board of Education. Sa pagpaningkamot nga himoon ang pagkakabig nga mao ang direktang tumong sa tanan natong mga kasinatian sa pagtudlo ug pagkat-on, ang atong pamahayag sa katuyoan karon mabasa, “Ang atong katuyoan mao ang pagtabang sa kabatan-onan ug mga young adult nga mapalawman ang ilang pagkakabig ngadto kang Jesukristo ug sa Iyang gipahiuli nga ebanghelyo, mahimong sarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit.” Kini nga kausaban makatabang kanato sa pag-organisar sa atong pagbansay ug sa atong mga paningkamot sa pagmugna og mga kasinatian sa pagkat-on sa paglaom nga kita makatabang sa mga estudyante nga mahimong mga disipulo ni Jesukristo sa tibuok kinabuhi. Ang naila nga mga tahas sa usa ka magtutudlo diha sa Pagtudlo Sumala sa Pamaagi sa Manluluwas magpabilin nga makatabang kanato nga mas makasabot sa usa ka tahas sa magtutudlo sa pagtabang sa mga estudyante nga mapalawman ang ilang pagkakabig. Among gi-update usab ang Live, Teach, ug Administer nga mga parapo nga kauban sa atong direktiba, nga inyong makit-an diha sa website sa S&I.
Bisan unsa man ang kausaban o tingali hatagan og gibug-aton sa atong mga paningkamot aron epektibong matudlo ang ebanghelyo, ang dili gayod mausab mao nga kita nakasentro ni Kristo, nagtutok sa tigkat-on, ug nakabase sa kasulatan. Ug kita kanunayng maningkamot nga ang atong pagtudlo ug mga kasinatian sa pagkat-on ubanan sa pagdasig ug pagsaksi sa Espiritu Santo. Ang tanan natong buhaton kinahanglang makapalawom sa atong pagkakabig ngadto ni Jesukristo ug sa Iyang gipahiuli nga ebanghelyo tungod kay Siya mao ang tubag sa ilang mga hagit ug mga pangutana. Siya ang Dios sa ilang kaluwasan ug katubsanan.
Karon, gusto ko nga mohatag og laing pahibalo bahin sa lain nga pagtugot nga gihimo sa Church Board of Education. Usab, gusto nakong mopasiuna niana nga pahibalo uban sa pipila ka konteksto, niining higayona gamit ang usa ka baroganan nga gitudlo sa Manluluwas. Bag-ohay lang nakong nabatyagan nga diha sa sambingay sa magpupugas, miingon si Jesus nga ang uban nga mga binhi namunga og balig usa ka gatos ka pilo, ang uban balig saysinta ka pilo, ug ang uban balig traynta ka pilo. Unsa ang mahinungdanon ngari kanako niini nga pagbasa mao nga ang matag usa niini mitubo gikan sa unsay gipasabot sa Manluluwas nga maayong yuta. Dili kadto sa kilid sa agianan, sa yuta nga batoon, o ang binhi nga nahulog sa tunokon nga sagbot; kini mao ang maayo nga yuta.
Nakapahunahuna kini nako kon ang atong kasamtangang paagi sa mga kinahanglanon alang sa kredito sa kurso susama ba sa pag-ila lang niadtong namunga og gatosan ka pilo, samtang napakyas sa pag-ila ug magmapasalamaton sa mga paningkamot ug mga natampo niadtong namunga og saysenta ug traynta ka pilo. Ang matag estudyante adunay lahi nga ang-ang sa suporta sa pamilya, sa pagsabot sa ebanghelyo, ug sa personal nga pasalig. Dayag lang, kita kinahanglang magbaton og taas nga gilaoman, apan kinahanglan usab kita nga mag-amping nga dili makapawala og kadasig niadtong nagbuhat sa ilang labing maayo base sa mga kahimtang nga anaa sila.
Kini nga mga bersikulo nakapahunahuna kanamo kon posible ba ang pagbaton og taas nga mga sumbanan ug magkaplag og mga paagi sa pag-personalize sa atong paagi. Makapangita ba kita og mga paagi sa pag-awhag ug pag-ila sa paglambo ug pag-uswag sa matag ang-ang subay sa dalan sa pakigsaad ug motabang sa tanan natong mga estudyante sa paglampos? Makasuporta ba kita kanila sa ilang mga paningkamot sa pagtuon sa mga kasulatan ug pagkat-on sa ebanghelyo gamit ang dinasig sa natural nga paagi nga mga tumong aron ang mga estudyante makaugmad og mga pamatasan ug mga sumbanan nga magpabilin kanila og dugay lapas pa sa ilang panahon diha sa atong mga klase?
Uban niana nga hunahuna, gusto nakong ipahibalo ang mosunod alang sa seminary: ang pagsukod sa nakat-onan mobalhin gikan sa indibidwal nga pagsukod ngadto sa grupo nga pagrebyo, nga moseguro nga ang mga estudyante nakat-on sa sulod nga gipresentar. Kadtong kinsa nga nahimong hanas sa sulod tingali makatabang sa uban aron nga ang tanan mahatagan og oportunidad nga mapalawman ang ilang panabot. Ang mga porsiyon sa pagsukod nga may kalabotan sa tinuohan ug paggamit magpabilin gihapon nga indibidwal nga himoon nga gituyo aron sa pagmugna og oportunidad alang sa pagpamalandong sa kaugalingon. Ang kinahanglanon sa pagbasa mausab gihapon ug dili na magkinahanglan og 75 porsiyento sa mga adlaw sa pagbasa sa matag termino.
Sa pagpadayon, aron makadawat og kredito sa kurso hangtod sa paggradwar, ang mga estudyante sa seminary gikinahanglang mobasa sa pinili nga mga tudling gikan sa basahon sa kasulatan sa matag termino. Pananglitan, atol sa unang termino sa Doktrina ug mga Pakigsaad—Kasaysayan sa Simbahan, ang mga estudyante mobasa sa Joseph Smith—Kasaysayan. Sila hangyoon dayon sa pagtakda og dugang nga natural nga dinasig nga tumong sa personal nga pagbasa nga may taas nga mga gilaoman alang sa pasaka nga kalamboan. Kini nga personal nga mga tumong kinahanglang mopakita sa mga abilidad sa mga estudyante ug moila sa indibidwal nga paningkamot ug pag-uswag.
Ang mga magtutudlo moawhag usab sa mga estudyante sa pagsubay sa pag-uswag sa ilang indibidwal nga mga tumong ug moawhag nila nga padayonon kini hangtod mahuman. Sila moawhag sa mga estudyante sa pagbasa sa gisangon nga mga tudling sa kasulatan alang sa Dali, Sunod Kanako sa semana sa seminary, indibidwal man o uban sa ilang pamilya. Sila moawhag usab sa mga estudyante nga magmakanunayon sa pagtuon sa Basahon ni Mormon indibidwal man o uban sa ilang pamilya. Sa umaabot, dugang nga impormasyon ipadala diha kaninyo kalabot sa duha niining mga kausaban, lakip sa pagpatuman sa mga detalye ug sa gidugayon sa panahon ug unsa kaha ang gipasabot niini alang sa kanhi nga mga termino kon wala nakab-ot ang mga gikinahanglan.
Karon, ganahan ko nga mopaambit kaninyo og butang nga gisulti ni Presidente Henry B. Eyring sa dihang kini nga kausaban gihisgotan. Miingon siya, “Ang maayo nga pagbuhat niini magkinahanglan og dugang nga personal, indibidwal nga pagtagad gikan sa mga magtutudlo. Kini makadugang og palas-anon, apan kini usa ka palas-anon nga angay nga ikahimuot sa mga magtutudlo tungod ang ilang personal nga pagpangalagad ingon ka importante sa ilang instruksiyon sa lawak klasehanan. Kon mahimo kini ni bisan kinsa, ang inyong mga magtutudlo makahimo. Talagsaon sila.”
Ako mouyon ni Presidente Eyring; kamo talagsaon. Ako nakaamgo usab nga ang paglihok gikan sa estrikto nga mga sumbanan ngadto sa indibidwal nga mga tumong magkinahanglan og dugang nga panahon ug pagtagad gikan kaninyo. Apan unsa ang atong mahimo nga mas makapanalangin pa sa atong mga estudyante kay sa pagtabang kanila nga mag-ugmad og personal nga inadlaw-adlaw nga batasan sa pagtuon sa kasulatan nga gidasig sa matarong nga mga rason?
Sa kataposan, ang panginahanglan sa pagtambong magpabilin nga mao gihapon. Palihog tabangi ang mga estudyante nga makita nga ang mga kasinatian diha sa klase makadugang sa ilang pagsabot sa ebanghelyo ug makapalawom sa ilang hugot nga pagtuo. Mao kana kon nganong gusto silang motambong, dili lang modawat og kredito. Ang usa ka estudyante kinsa makasabot niini gustong maanaa didto 100 porsyento sa tanang higayon.
Sa institute, kita mopadayon uban sa samang mga kinahanglanon alang sa kredito, apan kita mohatag og gibug-aton sa natural nga dinasig nga mga rason alang sa pagtambong ug paglambigit diha sa proseso sa pagkat-on. Ang mga rason sama sa pagpalawom sa hugot nga pagtuo, pagpaduol ngadto sa Manluluwas, ug pagkat-on sa Iyang doktrina makatabang sa mga estudyante nga makasabot kon ngano, tabangi sila sa paghimo og mga tumong nga makapaduol nila ngadto Kaniya, ug awhaga sila sa pagbuhat sa ilang tulubagon ngadto Kaniya.
Daghan sa atong mga estudyante nagsugod pa lang sa ilang panaw ug gidapit, tingali sa unang higayon, sa paghimo og luna alang sa binhi sa hugot nga pagtuo diha sa ilang kinabuhi. Imbis mabalaka nga sila wala pa makasinati sa tanan nga naagian sa usa ka mas hingkod nga tigkat-on, kita kinahanglan gyod nga magmapasalamaton sa ilang tinguha nga motuo. Kon ilang makita nga maayo ang resulta, kita kinahanglang magmaya uban kanila ug mosaulog niana nga gasa gikan sa atong Amahan sa Langit. Ug dayon mag-uban kita nga mapailobon nga magpaabot alang sa panahon nga ang binhi mahimong punoan sa kahoy nga mogitib ngadto sa kinabuhing dayon.
Ako modapit kaninyo sa pagpadayon sa mainampingon nga pagtuon sa Pagtudlo Sumala sa Pamaagi sa Manluluwas ug sa pagkonsiderar kon unsa pa ang itudlo sa Ginoo kaninyo kabahin sa pagkakabig, kalambigitan, ug pakahisakop. Palihog usab hunahunaa og maayo ang mga baroganan nga nagpaluyo sa mga kausaban sa atong pamahayag sa katuyoan ug mga kinahanglanon sa kurso. Mahunahunaon nga ilakip kining mga kausaban sa mga paagi nga makadasig ug makapanalangin sa tanan ninyong estudyante.
Sa kataposan, dapiton ko kamo sa pagpadayon sa pagtutok kang Jesukristo diha sa tanan ninyong mga paningkamot. Mainampoon nga maghunahuna kon sa unsa nga paagi nga kamo makat-on gikan Kaniya, magkat-on sa pagsunod sa Iyang ehemplo isip ang Bantogang Magtutudlo, ug pagkat-on nga mas mosalig diha sa Iyang grasya ug sa Iyang gugma samtang kamo maningkamot sa pagpanalangin niadtong inyong gihigugma. Ako mopamatuod nga Siya ang dalan. Diha sa ngalan ni Jesukristo, amen.