![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F60%2Fb4%2F60b4cf3b45fdc1fce74e03e9e05e3ef3c46affcc%2F60b4cf3b45fdc1fce74e03e9e05e3ef3c46affcc.jpeg/full/!250,/0/default)
Seminary, Institute, ug Ubang mga Butang nga Epektibo
S&I nga Tinuig nga Sibya 2023
Biyernes, Enero 27, 2023
Presidente Steven J. Lund: Dako kaayo ang kalipay nako nga gihangyo sa paghatag sa akong pagpamatuod nganha kaninyo, nga gidayeg kaayo nako, karon ug mamulong taliwala niining duha ka bantogang mga magtutudlo nga akong nailhan, tingali, dinhi sa Simbahan.
Karong bag-o nakatambong ko og pagpanudlo ni Arthur Brookes, ang propesor sa Harvard. Ug siya miingon, “Kahibalo mo, atong gipresyur pag-ayo ang atong mga magtutudlo; gisugo nato sila sa pag-usab sa dagan sa kasaysayan sa tawo.” Wala siya masayod kon unsa kana ka tinuod. Gawas, sa inyong bahin, dili ang kasaysayan sa tawo ang atong gikabalak-an; kondili ang mga kahangtoran. Mao nga kami nagpaabot og daghan gikan ninyo ug nagpasalamat kinsa kamo ug unsay inyong nabuhat ug nagmakanunayon niana nga sangpotanan.
Sa akong miaging pakigpulong sa kinatibuk-ang komperensiya, namulong ko nga gusto nga mobutang sa akong mga kamot sa mga abaga sa usa ka sinsero nga mouliay nga misyonaryo ug ipatuhop ngadto sa iyang kalag ang mga impresyon sa akong kasingkasing. Niini nga buluhaton sa pagpamulong nganha kaninyo miabot ang sugyot nga buhaton nako kana nga matang dinhi—nga akong ibutang kintahay ang akong mga kamot sa inyong abaga ug motan-aw ninyo sa mga mata ug mopadayag sa akong mga pagbati mahitungod sa inyong mga oportunidad ug mahitungod sa inyong mga hagit. Hinoon, dili kaayo kita magkaduol og ingon niana, apan, tingali, base sa unsay akong gibati mahitungod kaninyo, kon buhaton nato, unsay gusto nako nga madungog mao kanang anaa sa inyong mga kasingkasing nga kinahanglan nakong mahibaloan.
Usa ako ka produkto sa sayo sa buntag nga seminary, nga sa kasagaran gitudlo diha sa usa ka gamay nga mabalhin-balhin nga klasrom tupad sa usa ka junior college sa California. Gitudloan mi sa usa ka Swedish nga kinabig nga asawa sa usa ka sakop sa among bishopric ug dayon sa ulahing mga katuigan sa sunod-sunod nga parisan sa apohang mga babaye nga nagpangidaron og kapitoan—ang tanang tulo nahimong kwalipikado sa pagbuhat niini tungod sa lawom nga mga pagbati sa pagpahinungod nga maoy nakapahimo nila nga mobangon sa alas 5:00 sa buntag ug tungod sa ilang bug-os nga kombiksyon mahitungod sa katinuod sa Pagpahiuli. Kadaghanan sa unsay akong nahibaloan mahitungod sa ebanghelyo, ug literal gyod nakong ipasabot—kadaghanan sa unsay akong nahibaloan mahitungod sa ebanghelyo, akong nakat-onan sa seminary. Ug kadaghanan sa bag-ong mga butang nga akong nakat-onan karon mahitungod sa ebanghelyo mao lang ang pagdiskobre pag-usab sa unsay ilang gipaningkamotan nga itudlo kanako kaniadto.
Mao nga atong sugdan uban sa labing importante nga mga pulong nga akong magamit: salamat kaninyo sa unsay inyong gibuhat ug unsa kamo. Salamat sa inyong pagkaandam sa pagbuhat sa dako kaayo nga trabahoon nga gikinahanglan sa pag-usab sa inyong kurikulom, sa inyong mga plano sa leksiyon, ug sa inyong kalendaryo aron mapahiangay ngadto sa Dali, Sunod Kanako. Dili daghan diha sa Simbahan ang hingpit nga nakakita sa unsay gihangyo kaninyo. Salamat ninyo sa paghimo og dugang nga paningkamot aron moepekto kini nga kausaban, nakahibalo ko nga kamo nagpadayon sa pagpanindot sa kurikulom. Ang inyong mga paningkamot nagsugod sa pagpamunga.
Usa ka sulat ang miabot sa among mga opisina nga nagsulti sa usa ka komon nga istorya. Kini mabasa, “Kon pasultihon ko sa tinuod, ang akong pamilya dili kanunay maghimo og mga family home evening. Dili kaayo mi mobasa sa among mga kasulatan sa among kaugalingon o isip usa ka pamilya o magdungan sa pagtuon sa ebanghelyo. Aktibo mi sa Simbahan, hinoon, karong bag-o, sukad nga ako mitambong sa seminary, nakahimo ko sa pagpaambit sa mga butang nga akong nakat-onan gikan sa seminary ngadto nila. Nagtuo ko nga ang seminary nagtabang sa pag-impluwensya nako sa pagbasa sa akong mga kasulatan apan usab nagtabang nako sa pag-impluwensya usab sa akong pamilya.”
Bitaw, kana mao ang gilaoman, dili ba? Ang pagsuporta sa Simbahan modagayday balik ngadto sa paglig-on sa panimalay nga maoy gisentro sa Simbahan. Kana nga proseso kabahin sa nagpadayon nga Pagpahiuli, ug kini usa ka protocol nga epektibo. Ang Simbahan naningkamot pag-ayo sa pagsabot unsa ang epektibo ug unsa ang dili. Kamo sa tinuod anaa sa sentro sa daghang butang nga nahibaloan namo nga makahimo og malungtaron nga mga koneksyon uban sa Ginoo.
Mao nga samtang ang akong mga kamot anaa sa inyong mga abaga—o libot sa inyong mga liog, sumala sa sitwasyon—mahimo ba nakong ipasabot ang pipila ka butang nga among nahibaloan nga epektibo aron nga kamo makahibalo asa ang labing importante nga butang sa inyong pagtudlo? Miingon sila nga ang unang sangkap sa kalamposan mao ang pagtambong. Sa kasagaran, ang kabatan-onan nga motambong sa seminary sa kataposan adunay mas maayo nga mga sangpotanan sa kinabuhi. Sila mas lagmit mahimong matugahan, mas lagmit makaserbisyo og mga misyon, mas lagmit maminyo diha sa templo. Kadtong motambong og upat ka tuig sa seminary makaangkon og koneksyon ngadto sa ebanghelyo nga talagsa ra maputol. Ikaduha, kon ang kabatan-onan mobayad og hingpit nga ikapulo, sila nagporma og sumpay ngadto sa Langitnong Amahan nga magpabilin. Matag higayon nga sila mosunod niana nga sugo ug mohimo niana nga pagbayad, usa ka bag-o nga talikala sa sakripisyo ug koneksyon ang naporma.
Manghinaot ko nga ang matag magtutudlo sa seminary ug institute kanunay nga mopalambo sa paagi sa ilang pagtudlo sa nagsumpay nga gahom sa ikapulo. Ang akong kaugalingon nga amahan sa makausa nangutana nako sa dihang ako nag-edad og 10 anyos kon kanunay ba akong mibayad sa akong ikapulo. Akong gihimo. Gamay ra kadto nga butang, tungod kay wala kaayoy komersyo nga nahitabo diha sa dili espaltado nga dalan diin kami nagpuyo. Apan siya mipadayon sa pagsulti, “Kahibalo ka, kon ikaw mohukom, ikaw makapuyo sa imong kinabuhi nga hingpit niana.” Miingon siya, “Usa sa akong mga pagmahay”—kini mao ang akong amahan—“mao nga sa dihang diha pa ako sa Navy sa usa ka barko sulod sa pipila ka bulan walay dapit didto nga kabayran sa ikapulo ug ako wala na magbayad. Hingpit akong nagbayad sa ikapulo sukad masukad. Apan ako naulaw niana nga higayon nga ako wala magbayad. Kon ikaw mohukom nga buhaton kini, ikaw mahimong hingpit niini.” Busa, ang inyong mga estudyante makahimo usab.
Ang ikatulo nga butang nga akong itudlo kaninyo nga epektibo gayod mao ang komperensiya sa AKK [FSY]. Kini nga mga komperensiya sa FSY talagsaon. Niining miaging ting-init, daghan, o kadaghanan, sa 200,000 nga nag-edad og 14 hangtod 18 anyos sa tibuok kalibotan miuli uban ang mas buhong ug mas makadasig nga pagsabot kon kinsa sila ug ngano nga ang Ginoo misugo sa unsay Iyang gisugo. Ang FSY malamposon kaayo nga kinahanglan namong pangutan-on ang among kaugalingon, unsay nakapahimo sa FSY nga malamposon kaayo? Unsa ang epekto sa FSY?
Bitaw, kabahin niini mao ang pagbutang sa mga partisipante sa usa ka kahimtang nga layo sa ilang matag adlaw nga mga makapabalda sulod sa usa ka semana, nga nakapahimo nila nga matudloan pag-ayo, nakapokus pag-ayo sa hunahuna. Ug samtang ang matag usa kanila malinawon nga naghambin sama sa usa ka bata diha sa panimalay, sila kinahanglan nga moatubang ninyo, sa mga magtutudlo ug mga direktor sa sesyon, kadaghanan gikan sa mga seminary ug institute, samtang kamo motudlo og putli nga doktrina nga makahimo nila sa pagpamalandong ug makadasig nila nga makabaton og kausaban sa kasingkasing.
Kamo naghatag nila og mga himan nga ilang gikinahanglan sa panahon sa Sabado nga sila moadto sa dapit nga puno sa kawalay kasegurohan ug kasamok sa ilang mga kinabuhi. Ang inyong mga leksiyon ug mga ehemplo ug ang matag pagpamulong makahatag nila og mga kahanas sa ilang pag-atubang sa lain-laing sitwasyon sa ilang kinabuhi. Alang sa pipila kanila, ang FSY tingali mao ang ilang kataposan nga labing maayong kahigayonan nga makig-uli sa ilang kaugalingon ug ngadto sa Dios. Salamat kaninyo sa inyong pasalig sa paghatag kanila sa inyong labing maayong espiritu, salabotan, ug mga kahanas sa pagtudlo. Ang atong paniksik sa Simbahan nagkompirma nga usa sa labing gamhanan nga pag-aghat og tibuok kinabuhi nga pagkadisipulo mao ang mga relasyon uban sa matinud-anong mga hamtong sama ninyo kinsa nakahibalo na unsaon sa pag-atubang sa mga hagit sa kinabuhi ug pagkaplag og kamaya diha ni Kristo.
Mga usa ka bulan ang milabay si Presidente Bonnie H. Cordon ug ako gihangyo sa pagreport ngadto sa Unang Kapangulohan bahin sa programa sa FSY ug sa unsang paagi kini gipaila niining miaging ting-init sa Estados Unidos ug sa Canada. Nahuman mi sa among presentasyon ug mitubag sa pipila ka makapahunahuna nga mga pangutana mahitungod sa among mga plano sa paghimo og dugang nga mga kauswagan, ug ang miting ingon og mahuman na. Apan sa dihang nagsugod na mi sa pagbarog gikan sa among mga lingkoranan, si Presidente Nelson miakbo, ug siya miingon, “Kinahanglan nga tudloan nato sila sa pag-ampo.” Dihadiha mibalik dayon mi sa paglingkod. Miingon siya, “Kinahanglan nga tudloan nato sila sa pag-ampo, ug sa pinulongan sa pag-ampo.” Ug dayon mipadayon siya sa pagsulti nga siya nabalaka nga basin kita nahimong kaswal ra kaayo sa paagi nga kita nakigsulti sa Langitnong Amahan. Ug dayon gisubli niya ang hugpong sa mga pulong “kinahanglan nga tudloan nato sila sa pag-ampo, ngadto kang Kinsa sila mag-ampo, ug sa pinulongan sa pag-ampo.” Mao nga tudloan nato sila sa pag-ampo. Matag higayon nga kita mag-ampo, kita nagdapit sa Langitnong Amahan sa pagpanginlabot sa atong mga kinabuhi. Ang matag pag-ampo usa ka pag-ampo alang sa usa ka milagro. Bisan ang mga pag-ampo sa pasalamat naglaom sa pagpalig-on sa atong mga relasyon sa balaan.
Mao nga maghisgot kita og laing instrumento sa pagpalambo og pagpamatuod. Ang Alang sa Kalig-on sa mga Kabatan-onan nga giya. Pasayloa ko—Alang sa Kalig-on sa mga Kabatan-onan: Usa ka Giya sa Paghimo og mga Pagpili, nga nagtudlo nato sa pagpuli sa atong pagpokus diha sa mga lagda ngadto sa pagpokus sa atong relasyon uban sa Manluluwas ug pagkahimong sama Kaniya. Ang karaan nga panultihon nga “Unsay Buhaton ni Jesus?” nagpabilin gihapon nga talagsaong lagda sa kinabuhi. Ang backdrop nga maoy atong gisaligan nga mohimo sa atong mga desisyon dili na usa ka booklet; hinoon, kini mao ang hinatag sa Dios nga misyon.
Si Presidente Nelson nagsulti og balik-balik nato nga ang labing importante nga butang nga nahitabo niini nga kalibotan ug ang rason nga kita gipatunhay nga moanhi niini nga kalibotan niining panahona mao ang pagpundok sa Israel. Mao nga samtang kita maghimo og mga desisyon kon unsaon nato sa pagpahigayon ang atong mga kinabuhi kita kinahanglan nga madasig sa pangutana nga, Kini ba nga desisyon makatabang o makapugong sa akong abilidad sa pagtuman sa akong mortal nga mga katuyoan?” Samtang kita maningkamot sa pagpuyo sa matang sa kinabuhi nga takos sa mga batalyon sa Ginoo, paningkamotan nato nga ang mga pagpili sa atong kinabuhi mahisubay sa misyon sa atong kinabuhi.
Ang pangutana alang sa matag usa kanato mao “Kita ba motuo ni Kristo samtang Siya mopadayag sa atong balaan nga mga katuyoan pinaagi sa Iyang mga propeta?” Tungod kay kon kita motuo Kaniya, gusto kita nga mohimo og importanteng mga desisyon. Kamong mga magtutudlo ug mga lider sa S&I mga hanas sa pagtabang kanila sa pagtubag niana nga pangutana. Sa usa ka nagkausab nga kalibotan, ang usa ka lista sa mga restriksiyon dili makapanalipod nato, apan ang mga baroganan sa ebanghelyo ang makapanalipod.
Ang bag-o nga Alang sa Kalig-on sa mga Kabatan-onan nga giya alang sa paghimo og mga desisyon naghangyo sa atong kabatan-onan nga magbansay sa pag-atubang sa kinabuhi pinaagi sa mga lente sa ilang espirituhanong pagkasensitibo kay sa pinaagi sa ilang gituohan pag-ayo nga pagkasensitibo sa kultura. Kining bag-ong FSY nga giya usa ka butang nga lahi sa gibalik-balik nga paagi sa mga hamtong nga nakigsulti ngadto sa kabatan-onan mahitungod sa mga hiyas. Hinoon, kini mao ang pag-usab sa paagi sa ilang pag-atubang sa ilang mga kinabuhi samtang nagkat-on sila sa ilang tinuod nga pagkatawo isip mga anak nga lalaki ug mga anak nga babaye sa Dios—usa ka Dios kinsa adunay buhat alang kanila nga buhaton, kinsa mipadala nila dinhi alang sa piho nga mga katuyoan nga mohatag sa ilang mga kinabuhi og makadasig kaayo nga kahulogan. Ang ilang mga kinabuhi lig-on nga matukod diha sa ebanghelyo.
Kining bag-o nga giya alang sa paghimo og mga pagpili kabahin sa milungtad na sa usa ka dekada nga gipadayag nga sumbanan nga nag-aghat nato ngadto sa mas lawom nga pagka-espirituhanon; mao kini ang labing bag-o nga gihatag sa usa ka taas nga arko sa pagpahiuli nga naglakip sa pagtudlo sa ward nga malamposong giusab ngadto sa pagtudlo sa panimalay ug dayon ngadto sa pagpangalagad—sa family home evening imbes sa gabii sa pamilya, sa matag miyembro nga usa ka misyonaryo sa pagpataas sa sumbanan sa pagbayaw sa sinag-ulo nga misyonaryo nga mga panaghisgotan ngadto sa Isangyaw ang Akong Ebanghelyo, ug pagpuli sa scouting ug sa Personal nga Kauswagan alang sa Kabataan ug Kabatan-onan—diin ang kabatan-onan gisugo sa pagkontrolar sa ilang espirituhanon nga mga kinabuhi.
Ang bag-ong mga gikinahanglan nga basahonon alang sa seminary nagkatukma uban niining gibase sa baroganan nga gigiyahan sa Espiritu nga paagi. Kita padayon nga nag-usab og daghan pa ngadto sa mas maayo ug mas balaan nga mga pamaagi sa paghimo og desisyon nga naaghat sa espirituhanong paagi. Nagkadako ang kaimportante nga ang atong kabatan-onan ug ang atong kaugalingon, makat-on sa paghukom unsaon nato sa paglihok pinaagi sa pagsunod sa balaan nga mga baroganan kay sa pagsunod sa piho nga mga gidili. Ang atong kabatan-onan nag-atubang na og moral nga mga pangutana nga dili gani mga pangutana sa milabay nga usa ka dekada o tulo. Kon sila wala makaseguro karon sa paghukom mahitungod sa mga patik, nan, paghulat lang nga makita kon unsa pa nga mga pagpamugos ug pagpangusog ang ipahamtang sa kalibotan kanila.
Si Presidente Russell M. Nelson mipasabot unsaon sa paghimo niadto nga mga desisyon. Kamo dili lamang makatsek sa usa ka lista. Siya mitudlo “Mosaad ako kaninyo nga kon sinsero ug kanunay kamong mobuhat sa espirituwal nga buhat nga gikinahanglan sa pagpalambo sa importante, espirituwal nga kahanas sa pagkat-on unsaon sa pagkadungog sa mga paghunghong sa Espiritu Santo, makadawat kamo sa tanang direksyon nga gikinahanglan ninyo sa inyong kinabuhi.”1
Ang istorya nga mikatap mahitungod sa usa ka 14 anyos nga misulti sa iyang inahan sa adlaw human sa kinatibuk-ang komperensiya nga ang bag-ong booklet wala magdili og daghang pagpatusok, mao nga siya buot nga modugang og pipila ka ariyos sa iyang mga dalunggan sa Huwebes. Ang inahan miginhawa og lawom ug misulti kaniya, “Buyno, kahibalo ka unsa ang among mga pagbati mahitungod niana, apan dili kini mahitungod unsay gusto namo nga imong buhaton; kini imong kahigayonan sa pagpangutana unsa ang gusto sa Langitnong Amahan nga imong buhaton. Kinahanglan kang molihok, mosiksik, mag-ampo mahitungod niini, ug maghulat alang sa tubag.” Hinoon, ang 14 anyos nakakita sa iyang tubag, ug ang inahan miusab sa iyang kinabuhi.
Human ako makauli gikan sa akong misyon ako miapil sa Kasundalohan sa Estados Unidos. Usa ka adlaw miadto ko ngadto sa Oakland Induction Center, diin ako giproseso ngadto sa akong bag-ong pamilya sa militar. Ang bag-o nakong mga higala lahi gikan nako ug gikan sa usag usa sama sa inyong posibling mahunahuna. Apan paglabay sa 24 oras, kaming tanan nakadawat og pareha og mga tupi, nagsinina og pareha nga mga uniporme. Ug samtang kami naglakaw padulong sa among mga barak nianang giabhiona, kaming tanan makita nga mora og mga tag-iya sa Clean One. Sa misunod nga mga bulan sa dungan nga pagbansay, ako dili gayod makahimo sa pagsulti kinsa kanila diha sa nagkalain-laing mga tawo ang anaa sa induction center. Kami nagbansay og dungan ug nagbagulbol og dungan ug misalig sa usag usa, ug walay lahi nga mga grupo sa mga tawo diha namo. Nakakat-on ko og tibuok kinabuhi nga leksiyon mahitungod sa kaimportante sa mga uniporme: unsay atong isul-ob makapabahin o makapahiusa. Ang mga sinina magsulti asa kita nga habig ug unsay mapaabot gikan sa nagsul-ob.
Bag-o lang kong nakabasa bahin sa usa ka Marine medic kinsa diha sa usa ka gubat sa Middle East kinsa midala og pipila ka samaran nga mga Marine ngadto sa bakwitanan nga helicopter ug dayon mibalik ngadto sa panggubatan ug mibalik dala ang laing samaran nga sundalo. Pipila ka lokal nga alyansa nga mga sundalo mitamay niya: “Hoy, Marine”—ug gituyo nila nga kana usa ka insulto—“Hoy, Marine, wala ka ba makamatikod nga ang imong gidala usa ka kaaway?” Siya yanong miingon, “Hoy, ako usa ka Marine; wala ba kamo makamatikod nga siya samaran usab?” Ang iyang uniporme nagpakita og butang nga talagsaon.
Ang propeta midapit niini nga kabatan-onan ngadto sa mga batalyon sa Ginoo. Kon kamo moapil sa kasundalohan, kamo mosul-ob og uniporme. Kon adunay kakuyaw o katalagman, ang uniporme sa batalyon magsulti sa populasyon nga ang tabang miabot na, ang matarong nga mga kasundalohan moluwas sa dinaog-daog, ang mga bulak iitsa sa ilang agianan, adunay mga paghilak, ang tabang miabot na. Ang mga misyonaryo nagsul-ob og mga uniporme; ang kasundalohan sa Dios makahimo og labing maayo kon sa unsa sila gipadala kon malahi kini og gamay gikan niadtong mga tawo nga ilang bayawon ug luwason.
Ang tamdanan nga basahon nag-ingon, “Siya nasayod”—naghisgot bahin sa Langitnong Amahan—“Siya nasayod nga kamo makahimo og kalainan sa kalibotan, ug kana nagkinahanglan, sa daghang kahimtang, nga mahimong lahi gikan sa kalibotan.”2
Samtang diha pa sa Kasundalohan, ang akong higala nga si Rich ug ako mi-leave ug miabot didto sa Jerusalem. Ug samtang naglakaw diha sa kadalanan sa Jerusalem nga nagsul-ob og Levis ug mga sinina sa golf, usa ka tindero sa tindahan nga Arabo mikomentaryo nga kami kauban sa BYU Jerusalem Center. Giingnan namo siya nga kami dili; nga kaming duha mga sundalo nga Amerikanhon.
“Oo, apan kamo uban usab sa Jerusalem Center.”
“Unsay nakapahunahuna nimo niana?”
“Kami nakakita og timailhan diha ninyo bisan gikan sa layo.”
Nagtinan-away mi sa usag usa; kami pareha tan-awon sa Israeli Defense Force Soldiers nga nanglakaw labay namo nga nagsul-ob og pareha nga mga sinina nga among gisul-ob, pareha og mga tupi, pareha tanan. Apan tataw nga adunay usa ka butang nga lahi.
Sa tibuok panahon, ang mga sumusunod sa Ginoo sa kasagaran nagpuyo taliwala sa ubang tawo nga adunay lahi nga mga kultura ug mga hiyas ug mga prayoridad. Mao nga unsaon nato sa pagtahod ang atong mga silingan samtang tuyo usab nga mosunod sa talagsaong kultura sa ebanghelyo? Kita gisugo nga mahimong kahayag ngadto sa kalibotan samtang ang Ginoo mopundok sa Israel niining kataposang higayon agig pagpangandam alang sa Iyang pagbalik. Ang mga miyembro sa Simbahan sa kanunay nagdala og kahayag nga dili makita sa atong mga kaugalingon apan mamatikdan sa uban. Ako nagtuo nga kini ang Kahayag ni Kristo nga ilang makita, usahay awop, apan segurado nga nagdan-ag pinaagi sa atong napukan nga kaugalingon. Si Kristo, human sa tanan, mao ang kalig-on sa kabatan-onan. Ang bisan unsa nga atong buhaton nga makabalda o makapakunhod o makalingla o makatago niana nga kahayag makapugong sa mga katuyoan sa pagkatawo niining higayona.
Ang Alang sa Kalig-on sa mga Kabatan-onan nga giya makatabang nato sa pagdala niana nga kahayag samtang kita magtinguha og inspirasyon kon sa unsa nga paagi nga ang atong talagsaon nga balaanong gitudlo nga mga katuyoan matuman sa labing maayo pinaagi sa atong mga desisyon sa kinabuhi ug sa atong mga desisyon sa estilo sa kinabuhi. Ang pagpadala nganhi aron mobarog nga pinili nga katawhan sa Dios usa ka pagdayeg. Kini mahimong magpasabot nga maglahi gikan sa pundok sa mga tawo samtang atong ipahayag pinaagi sa atong mga pagpili kon kinsa ang atong gisunod. Ang atong buluhaton sa Edukasyon sa Simbahan ug sa programa sa Kabataan ug Kabatan-onan ug sa gingharian sa Dios dinhi sa yuta dili lamang ang pagpugong niini nga henerasyon nga mawad-an sa ilang hugot nga pagtuo ug sa pagpuyo og mga estilo sa kinabuhi nga dili takos niini; ang propeta nagtawag sa mga batan-ong lalaki ug mga batan-ong babaye nga adunay kapasidad sa pagbag-o sa kalibotan.
Ang propeta sa Ginoo nagtawag sa mga babaye kinsa makabarog ug makagiya sa usa ka kalibotan sa daghang babaye kinsa sa tukma nga paagi mangusog sa pagkuha sa ilang saktong dapit sa kalibotan, nagtinguha nga mahimong mahinungdanon ug epektibo, apan alang sa kadaghanan kansang pagkarelihiyoso ingon og nagpakita og nga supak sa ilang makahuluganon nga mga pangindahay. Ug sa gihapon, ang mga babaye sa Zion mosul-ob sa ilang mga kaugalingon sa gahom sa pagkadiosnon ug mobalhin sa tunga.
Ug Siya nagkinahanglan nga kita molig-on sa mga lalaki nga adunay dakong gahom, mag-angkon sa tanang mga hiyas sa mga anak nga lalaki sa Dios nga gihulagway sa kasulatan. Ang kinabuhi ba sa yuta makaangkon lang og usa ka Kapitan Moroni? Dili kana mao ang akong nadunggan ni Presidente Russell M. Nelson nga nag-ingon sa dihang siya namulong bahin niining halangdong henerasyon. Siya misulti ngadto kanila nga “Gireserba sa atong Langitnong Amahan ang daghan sa Iyang labing halangdong mga espiritu—tingali … ang labing nindot Niya nga team—alang niining kataposang hugna. Kadtong halangdon nga mga espiritu—kadtong labing maayo nga mga magdudula, kadtong mga bayani—mao kamo!”3
Mao nga salamat pag-usab alang sa inyong gikinahanglan kaayo nga kusog paingon sa inyong malungtarong pagkakabig alang sa kabatan-onan niini nga Simbahan ug gingharian sa Ginoo. Diha sa ngalan ni Jesukristo, amen.