Usa ka Propeta dinhi sa Yuta: Kasamtangang Propetikanhon nga mga Empasis ngadto sa mga Young Adult

S&I nga Tinuig nga Sibya 2023

Elder Clark G. Gilbert

Sa Seventy

Enero 27, 2023

Pasiuna

Ngadto sa atong mga magtutudlo sa relihiyon, tugoti ko nga mopahayag sa akong pasalamat sa tanan ninyong gibuhat sa pag-agak sa kabatan-onan ug sa mga young adult sa tibuok Simbahan. Sa pagkatinuod, anaa kaninyo ang kaugmaon sa Simbahan diha sa inyong mga klase, ug ako nadasig sa paagi sa inyong pagserbisyo ug pag-atiman sa inyong mga estudyante.

Akong sugdan pinaagi sa pagpaambit ninyo og usa ka kasinatian nga akong nasinati niining tinglarag didto sa Malad Summit, ang kinatas-ang lugar sa pagbiyahe tunga-tunga sa Siyudad sa Salt Lake ug Rexburg, Idaho. Nagpadulong ngadto sa usa ka buluhaton sa Simbahan, nakadawat ko og klaro nga impresyon nga maminaw pag-usab sa debosyonal ni Presidente Russell M. Nelson alang sa mga young adult nga giulohan og “Mga Pagpili alang sa Kahangtoran.” Sa akong pag-abot sa kinaibabwan sa bungtod, mibati ko og duha ka klaro nga mga pagbati. Una, napuno ko sa pagbati og paghigugma alang sa mga young adult sa Simbahan. Ikaduha, mibati ko og katingala sa milagro sa usa ka buhing propeta nga gitawag aron sa pagtudlo niining mga young adult diha sa lisod nga mga panahon. Gipadaplin nako ang sakyanan aron isulat ang sayo nga mga impresyon nga sa kataposan nahimong mga pamahayag nga akong ipaambit ninyo karon.

Nagpuyo kita sa samok nga mga panahon, apan ang Ginoo namahayag, “Ako mohatag nganha kaninyo og sumbanan sa tanan nga mga butang, nga kamo dili malimbongan; kay si Satanas anaa sa tanan nga bahin niini nga yuta, ug siya naglihok aron sa paglimbong sa mga nasod.”¹ Apan sama sa gitudlo ni Sister Wendy Nelson, nga samtang si Satanas anaa sa tanan nga bahin niini nga yuta, kita usab adunay usa ka propeta dinhi sa yuta, kinsa kita mahimong motan-aw alang sa kamatuoran ug katin-awan niining ulahing mga adlaw.²

Karong gabhiona, akong ipasabot og maayo ang lima ka propetikanhon nga mga tema nga gihatagan og gibug-aton sa propeta ug apostoles, labi na ngadto sa mga young adult sa Simbahan. Kon mopasiugda ko og usa ka kurso sa Mga Pagtulon-an sa Buhi nga mga Propeta sa sunod nga semester, kini nga mga tema mao ang pokus sa syllabus. Bisan unsa pa ang kurso nga inyong gitudlo, manghinaot ko nga kamo motugot niini nga mga mensahe nga moimpluwensya sa inyong kurikulom ug sa paagi sa inyong pagtudlo ug pagpangalagad sa inyong mga estudyante.

Ang lima nga kasamtangang propetikanhon nga mga empasis nga gusto namo nga inyong pamalandongan naglakip sa:

Hibaloi ang inyong balaanong pagkatawo.
Pagbaton og kalig-on diha sa gahom ni Jesukristo ug sa inyong mga pakigsaad.
Ipatigbabaw ang Dios labaw sa tanan, ug mosunod sa Iyang propeta.
Itudlo ang kamatuoran uban sa gugma.
Pag-ako sa responsibilidad sa inyong pagpamatuod.

1. Hibaloi ang Inyong Balaanong Pagkatawo

Kon ako naningkamot nga masabtan ang propetikanhon nga empasis gikan sa propeta kalabot sa mga young adult karon, akong sugdan pinaagi sa iyang bag-ohay nga tibuok kalibotan nga pagpundok sa mga young adult ug sa iyang mensahe nga giulohan og “Mga Pagpili alang sa Kahangtoran.” Daghang young adult karon ang naglisod tungod kay wala sila makasabot sa ilang tinuod nga pagkatawo. Si Presidente Nelson nangutana:

Kinsa man kamo?

“Una ug labing importante, kamo anak sa Dios.

“Ikaduha, isip miyembro sa Simbahan kamo anak sa pakigsaad. Ug ikatulo, kamo disipulo ni Jesukristo.”³

Timan-i nga si Presidente Nelson nagtudlo uban sa pagsabot ug paghigugma, apan nagtudlo gihapon siya sa mahinungdanong kamatuoran mahitungod sa balaanong pagkatawo. Paminaw ngadto sa mosunod nga pakisayran gikan sa iyang pakigpulong.

[Start video]

Presidente Russell M. Nelson: “Adunay nagkadaiyang timaan nga mahimong importante kaayo kaninyo, siyempre. Palihog ayaw ko saypa sa pagsabot. Wala ako nagsulti nga ang ubang mga titulo ug mga timailhan dili mahinungdanon. Ako nag-ingon lamang nga kinahanglang walay timailhan ang motangtang, mohulip, o mag-una sa prayoridad niining tulo ka malahutayon nga mga titulo: ‘anak sa Dios,’ ‘anak sa pakigsaad,’ ug ‘disipulo ni Jesukristo.’

“Ang bisan unsang timailhan nga dili mobagay niining tulo ka sukaranan nga mga titulo makapasagmuyo kaninyo sa kataposan. Ang ubang mga timaan makapasagmuyo kaninyo sa paglabay sa panahon tungod kay kini walay gahom sa paggiya kaninyo paingon sa kinabuhing dayon diha sa celestial nga gingharian sa Dios.”⁴

[End video]

Ang unang propetikanhon nga empasis alang sa mga young adult nga atong gihisgotan mao ang pagtabang nila nga mahibalo sa ilang balaanong pagkatawo. Ako morekomendar gayod sa tibuok nga mga pamahayag ni Presidente Nelson diha sa “Mga Pagpili alang sa Kahangtoran” isip usa ka mahinungdanong kapanguhaan nganha ninyo isip magtutudlo sa relihiyon nga nagtrabaho uban sa mga young adult ug sa kabatan-onan sa Simbahan.

2. Pagbaton og Kalig-on diha sa Gahom ni Jesukristo ug sa Inyong mga Pakigsaad

Ikaduha, aron mapreserbar ang balaanong pagkatawo kita gikinahanglan gayod nga motudlo sa atong mga young adult sa pagbaton og kalig-on diha sa gahom ni Jesukristo pinaagi sa pagtuman sa ilang mga pakigsaad. Si Presidente Nelson nagtudlo: “Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos kanato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga kanato sa Iyang makaayo, makapalig-on nga gahom. Ug o, unsa kadako sa atong panginahanglan sa Iyang gahom sa mga adlaw nga umaabot.”⁵

Sa miaging tuig mihatag ko og debosyonal sa BYU nga giulohan og “Finding Christ’s Peace in Perilous Times [Pagkaplag sa Kalinaw ni Kristo diha sa Peligro nga mga Panahon],” diin mikutlo ko kang Presidente Nelson sa daghang higayon.⁶ Human sa debosyonal, usa sa among mga dean miingon nga ganahan siya sa kinutlo nga kanunay nakong gibalik-balik gikan ni Presidente Nelson. Akong gipasabot nga sa pagkatinuod adunay upat ka lainlaing mga kinutlo nga akong gigamit, ang tanan adunay susama nga pagkahan-ay.

Si Presidente Nelson migamit og hugpong sa duha ka linya sa mga pulong, diin sa walang bahin sa matag pamahayag siya mohisgot og kalisdanan, peligro, kahasol, ug kagubot sa ulahing mga adlaw. Sa tuo nga bahin sa duha ka linya sa mga pulong, siya mamahayag uban sa pagsalig ug paglaom nga pinaagi ni Jesukristo ug pagtuman sa atong mga pakigsaad diha Kaniya kita makabuntog niini nga mga hagit. Akong giihap nga dili mominos sa pito niining duha ka linya sa mga pulong ang makita diha sa mga mensahe ni Presidente Nelson sa kinatibuk-ang komperensiya gikan sa higayon nga siya nahimong propeta. Tan-awon nato ang duha lang niini gikan sa iyang pakigpulong nga “Ang Templo ug ang Inyong Espirituwal nga Pundasyon.”

Kinutlo #1: “Minahal nako nga mga kaigsoonan, kini mao ang ulahing mga adlaw. Aron kamo ug ako makasugakod sa umaabot nga mga katalagman ug mga kalisod, gikinahanglan nga kita adunay lig-on nga espirituwal nga pundasyon nga natukod diha sa lig-on nga sukaranan sa atong Manunubos, nga si Jesukristo.”⁷

Kinutlo #2: “Ang Ginoo namahayag nga bisan sa dili ordinaryo nga mga hagit karon, kadtong kinsa motukod sa ilang mga pundasyon diha kang Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsaon nga mga kabalaka niining panahona.”⁸

Usbon nako, sa duha ka pamahayag ang propeta nagsugod pinaagi sa pag-ila sa mga hagit nga atong atubangon sa ulahing mga adlaw. Dayon sundan niya og usa ka saad nga kita makabuntog niini nga mga hagit ug sa nag-uban niini nga mga kahasol kon kita modangop ngadto sa Manluluwas ug magkat-on sa pagbaton og kalig-on diha sa Iyang gahom.

Sa dihang una nakong nabantayan kini nga sumbanan, naghunahuna ko nga ang paghisgot kang Jesukristo nagpasabot nga kon akong iangkla ang akong pagpamatuod diha sa Manluluwas, ako makalahutay sa mga pagsulay nga moabot sa kataposang mga adlaw. Apan, sa hinay-hinay, nagtuo usab ako nga si Presidente Nelson nanawagan kanato nga mahimong sama sa Manluluwas.

Tingali mao kini ang gihisgotan ni Elder Jeffrey R. Holland sa dihang siya misugo nato nga “mahimong ‘usa ka Santos pinaagi sa Pag-ula ni Kristo ang Ginoo’” diha sa iyang mensahe ngadto sa mga young adult sa BYU.

[Start video]

Elder Jeffrey R. Holland: “Si Hari Benjamin mitudlo nga ang usa ka mahinungdanong katuyoan sa mortal nga kinabuhi—tingali ang mahinungdanong katuyoan sa mortal nga kinabuhi—mao ang mahimo nga ‘usa ka Santos pinaagi sa Pag-ula ni Kristo ang Ginoo,’ nga magkinahanglan kanato—sa iyang pagpadayon og sulti—nga mahimo nga ingon sa ‘usa ka bata, manunuton, maaghop, mapainubsanon, mapailobon, puno sa gugma, mauyonon sa pagtugyan sa tanan nga mga butang diin ang Ginoo makakita nga angay ipahamtang nganha kaniya bisan ingon sa usa ka bata nga motugyan sa iyang kaugalingon ngadto sa iyang amahan’ [Mosiah 3:19].”⁹

[End video]

3. Ipatigbabaw ang Dios Labaw sa Tanan, ug Mosunod sa Iyang Propeta

Aron matabangan ang mga young adult nga mahibalo sa ilang balaanong pagkatawo ug makabaton og kalig-on diha sa gahom ni Jesukristo, kita kinahanglang motudlo usab nila nga unahon ang Dios ug mosunod sa Iyang propeta. Walay laing dapit nga kini nga mensahe gitudlo sa mas gamhanang paagi kay sa diha sa sugo ni Presidente Nelson nga “ipatigbabaw ang Dios labaw sa tanan.” Morag nagpahigayon og usa ka interbiyo sa tibuok Simbahan, ang propeta nangutana nato sa mosunod nga unom ka pangutana:

“Andam ba kamo nga ipatigbabaw ang Dios labaw sa tanan diha sa inyong kinabuhi?
Andam ba kamo nga tugotan ang Dios nga maoy mahimong labing importante nga impluwensiya sa inyong kinabuhi?
Tugotan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensiya sa inyong buhaton matag adlaw?
Tugotan ba ninyo ang Iyang tingog nga maoy prayoridad kay sa bisan unsa pang uban?
Kamo andam ba nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon?
Andam ba kamo nga ipatuhop ang inyong kabubut-on ngadto sa Iyang kabubut-on?”¹⁰

Katuigan ang milabay, nasinati nako kon unsay ipasabot sa ipatigbabaw ang Dios labaw sa tanan sa akong kaugalingong kinabuhi. Human sa nag-unang akademik nga trabaho didto sa east coast, naklaro nga ang Ginoo nag-andam og lahi nga dalan nga modala nako ug sa akong pamilya ngadto sa Rexburg, Idaho. Nianang higayona mireklamo ko ngadto sa akong asawa, “Mibati ko nga morag ang batan-ong dato, nakahibalo lang ko kon unsay kataposan sa sambingay, busa mosunod ko sa dalan nga gipasubay kanato.”

Morag mao kadto ang labing maayo nga kinaiya nga tingali akong napili. Pagkasunod gayod nga buntag didto sa usa ka miting sa pagpangulo sa stake, usa sa mga mamumulong naghisgot sa sama nga sambingay nga akong gihisgotan sa akong asawa sa miaging gabii. Siya miingon nga naguol kaayo siya alang sa batan-ong dato, sama sa gihulagway diha sa painting ni Heinrich Hoffman bahin sa sambingay. Iyang gihulagway nga ang batan-ong dato daw nagtan-aw sa layo nga morag naghunahuna sa tanan nga kinahanglan niya nga biyaan. Kining mao gayod nga lihok sa pagtan-aw sa layo mao ang nakapugong niya nga makita ang mas maayo nga dalan nga gitudlo sa Manluluwas kaniya. Matag higayon nga atong ipatigbabaw ang Dios labaw sa tanan diha sa atong mga kinabuhi, atong gitugyan ang atong kinaiyanhon nga kaugalingon alang sa usa ka butang nga mas maayo diha ni Jesukristo.

Ang sumbanan sa pagpatigbabaw sa Dios labaw sa tanan nagkinahanglan usab nga kita magtinguha ug modawat og personal nga pagpadayag. Si Presidente Nelson mitudlo niini diha sa iyang mensahe nga “Pagpadayag alang sa Simbahan, Pagpadayag alang sa Atong mga Kinabuhi.”¹¹ Ang giya sa langit miabot dili lang diha sa iyang pagserbisyo sa Simbahan apan sa iyang mga pagpili sa kinabuhi kon asa mopuyo, iyang edukasyon, kinsa ang minyoan, iyang propesyonal nga trabaho, ug iyang pagkaginikanan. Ang pagkat-on niini nga sumbanan sa pagdawat og personal nga pagpadayag mao ang unang lakang sa pagpatigbabaw sa Dios labaw sa tanan diha sa atong mga kinabuhi. Makatabang usab kini sa atong mga young adult sa pagpangita ug pagdawat sa pagpadayag nga makapanalangin nila niining kritikal nga panahon.

4. Itudlo ang Kamatuoran uban sa Gugma

Kon nakakita kamo sa paagi sa pagtudlo sa atong mga propeta ug apostoles, inyong mamatikdan ang usa ka sumbanan sa pagtudlo sa kamatuoran, bisan nag-atubang og pagpanaway. Sila naghimo niini uban sa gugma, pagsabot, ug Kristohanon nga pagpakabana alang sa uban, apan nagtudlo gihapon sila sa mga kamatuoran nga gisugo kanila nga ilang itudlo. Si Presidente Nelson mipakita niini nga sumbanan sa pagtudlo sa kamatuoran uban sa gugma sa dihang nagtudlo siya sa kaimportante sa mahangtorong pagkatawo diha sa iyang tibuok kalibotan nga mensahe ngadto sa mga young adult.¹² Siya mihimo niini sa dihang nagtudlo siya mahitungod sa relasyon tali sa gugma ug sa mga balaod sa Dios.¹³ Si Presidente Dallin H. Oaks naghisgot bahin niini nga responsibilidad diha sa iyang pakigpulong ngadto sa mga young adult didto sa Ensign College sa miaging tuig.

[Start video]

Presidente Dallin H. Oaks: “Ang pagpakita og pagtahod wala magpasabot nga kita dili magpakabuhi sumala sa atong mga gituohan ug sa mahinungdanong doktrina bahin sa pamilya ug sa kaimportante niini ngadto sa plano sa Dios alang sa mahangtorong padulngan sa Iyang mga anak, sama sa gipadayag diha sa Pamahayag sa Pamilya.

“Palihog hinumdomi ang responsibilidad nga anaa kanamo nga mga sakop sa Unang Kapangulohan ug sa Korum sa Napulog Duha isip Apostoles ni Ginoong Jesukristo. Kami gikinahanglan nga mopahayag sa kamatuoran sa samang paagi nga ang Dios mipadayag niini. Dili kami gawasnon sa pagkuha ug pagpili kon asa sa mga kamatuoran ang among isangyaw ug panalipdan.”¹⁴

[End video]

Nianang sama nga pakigpulong, si Presidente Oaks mihulagway og lima ka paagi nga kita makatudlo sa kamatuoran uban sa gugma:

Likayi ang mga sitwasyon nga mosangpot sa grabeng panaglalis.
Higugmaa ang uban, pangita og butang nga parehas nga gituohan, bisan kon kita dili magkauyon.
Hupti ang kamatuoran, bisan diha sa atong pagpakigsandurot sa uban.
Magmahimong kahayag sa kalibotan.
Magpabiling nakaangkla diha ni Jesukristo.

Ang uban makiglalis nga sa paghigugma sa uban gikinahanglan nga dili kaayo nato hatagan og importansya ang kamatuoran sa Dios. Apan himatikdi ang tambag ni Presidente Oaks nga huptan ang kamatuoran bisan diha sa atong pagpakigsandurot. Sa ato pa, dili kini ingon nga magpili lamang kita og usa niini. Paminawa ang tambag ni Elder Holland bahin niini samtang namulong siya ngadto sa faculty ug mga kawani sa BYU bahin sa kaimportante sa tukmang pagbalanse niini.

[Start video]

Elder Holland: Mag-amping kita nga ang gugma ug pagsabot dili sabton isip pagkonsentir ug adbokasiya. O nga ang pagkamatinud-anon ug pagkamaunongon sa baroganan dili sabton nga dili mabination o dili maunongon ngadto sa mga tawo. Sa akong nahinumdoman, si Kristo wala gayod bisan kausa motago sa Iyang gugma ni bisan kinsa, apan Siya wala gayod usab bisan kausa mosulti ni bisan kinsa og, ‘Tungod kay gihigugma ko ikaw, wala kay labot sa pagsunod sa akong mga sugo.’ Kita gihatagan og buluhaton sa pagpaningkamot sa paghimo nianang sama ka sensitibo nga kinahanglanong pagbalanse sa atong mga kinabuhi.”¹⁵

[End video]

Kon kita mobaliwala sa mga kamatuoran sa Dios, kita sa tinuoray naghatag og limitasyon sa atong abilidad nga makapakita sa labing dako nga gugma ngadto sa Iyang mga anak. Si Elder D. Todd Christofferson mipasabot kon ngano ngadto sa mga young adult didto sa BYU:

“Ang pag-una sa unang sugo dili makapakunhod o malimitahan ang atong abilidad sa pagtuman sa ikaduha nga sugo. Hinuon, kini nagpadako ug nagpalig-on niini. Kini nagpasabot nga kita mopalambo sa atong gugma pinaagi sa pag-angkla niini diha sa balaanong katuyoan ug gahom. … Ang atong gugma sa Dios makapataas sa atong abilidad sa paghigugma sa uban sa mas tukma ug mas hingpit nga paagi tungod kay kita sa diwa nakig-uban sa Dios diha sa pag-amuma sa Iyang mga anak.”¹⁶

5. Pag-ako sa Responsibilidad sa Inyong Pagpamatuod

Ang kataposang propetikanhon nga empasis ngadto sa mga young adult nga akong hisgotan may kalabotan sa pag-ako sa responsibilidad sa inyong pagpamatuod. Kon kamo gusto nga mosunod sa propeta, tan-awa kon unsa ang iyang gibalik-balik, maminaw og maayo kon mogamit siya og mga pulong nga sama sa “Ako mangamuyo kaninyo.” Sa iyang pakigpulong sa kinatibuk-ang komperensiya nga giulohan og “Buntoga ang Kalibotan ug Pangita og Kapahulayan,” si Presidente Nelson namahayag: “Ako mopaabot ngadto sa mga miyembro sa tibuok Simbahan sa samang sugo nga akong gihatag sa atong mga young adult sa miaging Mayo. Ako miawhag kanila—ug ako mangamuyo kaninyo karon—sa pag-ako sa responsibilidad sa inyong pagpamatuod ni Jesukristo ug sa Iyang ebanghelyo.”¹⁷

Maminaw kita nianang sama nga sugo sa samang paagi nga kini gihatag ngadto sa mga young adult sa iyang pakigpulong nga “Mga Pagpili alang sa Kahangtoran.”

[Start video]

Presidente Nelson: “Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod.”¹⁸

[End video]

Ang pag-ako sa responsibilidad sa inyong pagpamatuod nagpasabot nga kita moawhag sa mga young adult nga magmatinud-anong motubag sa ilang mga pangutana. Ang usa ka sumbanan alang sa pagpangutana gilatid diha sa S&I nga Doktrinal nga Kahanas nga kapanguhaan nga pahina nga giulohan og “Pag-angkon og Espirituhanong Kahibalo.” Si Elder Lawrence E. Corbridge mihisgot niini nga hilisgotan, mipasabot sa kalainan tali sa nag-una ug ikaduha nga mga pangutana.¹⁹ Ang nag-una nga mga pangutana anaa sa kamahinungdanon sa usa ka pagpamatuod. Naglakip kini sa pagkaila nga ang Dios mao ang atong Amahan, si Jesus mao ang Kristo, ug ang Basahon ni Mormon tinuod. Ang ikaduha nga mga pangutana naglakip sa mga pangutana mahitungod sa mga detalye sa kasaysayan sa Simbahan, dinaghan nga asawa [polygamy], ug awtoridad sa pagkapari. Ang ikaduha nga mga pangutana mahimo ug gikinahanglan nga tubagon, apan wala kini kahumanan, ug talagsa ra nga mosangpot kini ngadto sa usa ka pagpamatuod kon walay kombiksyon sa nag-una nga mga pangutana.

Si Elder Robert S. Wood mipaambit sa iyang kaugalingong paningkamot sa paghatag og dakong importansya sa mga tubag sa nag-una nga mga pangutana samtang gitrabaho niya ang ikaduha nga mga pangutana.²⁰ Sa usa ka debosyonal nga gihatag ngadto sa mga estudyante sa BYU–Idaho, si Elder Wood mihulagway nga wala matulog sa tibuok gabii nga nagbasa sa Basahon ni Mormon ug nagbaton sa iyang unang klaro nga pagsaksi sa kamatuoran niini. Pagkasunod semana ang usa ka higala sa eskwelahan misulti niya nga siya adunay ebidensya nga ang Basahon ni Mormon dili tinuod, nagpakita og taas nga lista sa sayop nga kronolohiya sa mga panghitabo diha sa basahon. Si Elder Wood misulti sa iyang higala nga ulahi na kaayo siya ug nga siya nakabaton na og pagpamatuod. Sa ato pa, siya aduna nay tubag sa nag-una nga pangutana. Apan mitanyag siya nga kuhaon ang lista ug mangita og tubag sa mga pangutana. Ang uban niini nasulbad dihadiha dayon, ug ang uban dugay pa.

Sa samang higayon, si Elder Wood nagserbisyo sa Simbahan, naminyo sa templo, nakabaton sa iyang edukasyon ug mipadako sa iyang pamilya diha sa ebanghelyo. Pipila ka tuig human nga siya natawag isip usa ka General Authority Seventy, ang kataposang sayop nga kronolohiya sa panghitabo niana nga lista nasulbad pinaagi sa usa ka propesor didto sa Cornell University. Mahunahuna ba ninyo kon si Elder Wood naghulat pa nga matubag ang matag ikaduha nga pangutana sa wala pa mopadayon uban sa hugot nga pagtuo?

Si Presidente Nelson mipasabot ngadto sa atong mga young adult kon unsaon pagtubag sa ilang mga pangutana.

[Start video]

Presidente Nelson: “Kon kamo adunay mga pangutana—ug ako naglaom nga kamo aduna—pangita og mga tubag nga inubanan og mainiton nga tinguha nga motuo. Pagkat-on sa tanan nga inyong mahimo mahitungod sa ebanghelyo ug seguroha nga modangop ngadto sa mga tinubdan nga puno sa kamatuoran alang sa giya. Nagpuyo kita sa kapaigoan nga ‘walay [ma]tago‘ [Doktrina ug mga pakigsaad 121:28]. Mao nga, sa paglabay sa panahon, ang Ginoo motubag sa atong tanang pangutana.”²¹

[End video]

Panapos

Mga kaigsoonan, nagpuyo kita sa peligro nga mga panahon.²² Apan ang Ginoo nag-andam og usa ka sumbanan sa tanang butang aron kita dili malimbongan. Kabahin niana nga sumbanan mao ang presensya sa usa ka propeta dinhi sa yuta aron motudlo nato sa kamatuoran. Naminaw ba kita, ug nakaimpluwensya ba kini sa paagi sa atong pagtudlo ug pagpangalagad sa atong mga estudyante?

Karong gabhiona naglatid ko og lima ka bag-ong propetikanhon nga mga empasis nga gusto namo nga inyong pamalandongan diha sa inyong tahas isip mga magtutudlo sa relihiyon. Kini nga mga tema ug ang sukaranan nga mga pakigpulong niini gi-summarize diha sa mosunod nga tsart:

Kasamtangang Propetikanhon nga mga Empasis alang sa mga Young Adult	Sukaranan nga mga Pakigpulong
1. Hibaloi ang inyong balaanong pagkatawo.	Russell M. Nelson, “Mga Pagpili alang sa Kahangtoran” (tibuok kalibotan nga debosyonal alang sa mga young adult, Mayo 15, 2022), ChurchofJesusChrist.org
2. Pagbaton og kalig-on diha sa gahom ni Jesukristo ug sa inyong mga pakigsaad.	Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93–96 Jeffrey R. Holland, “A Saint through the Atonement of Christ the Lord” (debosyonal sa Brigham Young University, Ene. 18, 2022), speeches.byu.edu
3. Ipatigbabaw ang Dios labaw sa tanan, ug mosunod sa Iyang propeta.	Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92–95 Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 93–96
4. Itudlo ang kamatuoran uban sa gugma.	Dallin H. Oaks and Clark G. Gilbert, “Stand Fast with Love in Proclaiming Truth” (debosyonal sa Ensign College, Mayo 17, 2022), ensign.edu D. Todd Christofferson, “The First Commandment First” (debosyonal sa Brigham Young University, Mar. 22, 2022), speeches.byu.edu
5. Pag-ako sa responsibilidad sa inyong pagpamatuod.	Russell M. Nelson, “Mga Pagpili alang sa Kahangtoran” (tibuok kalibotan nga debosyonal alang sa mga young adult, Mayo 15, 2022), ChurchofJesusChrist.org Tan-awa sa Lawrence E. Corbridge, “Stand Forever” (debosyonal sa Brigham Young University, Ene. 22, 2019), speeches.byu.edu Tan-awa sa Robert S. Wood, “Be Ye Transformed by the Renewal of Your Mind” (debosyonal sa Brigham Young University–Idaho, Mayo 13, 2003), byui.edu/devotionals “Pag-angkon og Espirituhanong Kahibalo,” S&I nga Doktrinal nga Kahanas

Sa pagtino niini nga mga tema, kita nagpokus diha sa mahinungdanong mensahe sa propeta, “Mga Pagpili alang sa Kahangtoran.” Daghan sa uban pa nga mga mensahe gihatag diha sa mga sitwasyon diin ang mga propeta ug apostoles direkta nga namulong ngadto sa mga young adult sa tibuok Church Educational System. Matag usa niini nga mga tema gitino pinaagi sa mainampingong pagrebyo uban sa mga presidente sa unibersidad sa CES, lakip na sa tigdumala sa S&I, si Brother Chad Webb, ingon man sa mga lider sa Executive Committee sa Church Board of Education. Kami nag-awhag kaninyo sa pagtuon niining pakisayran nga sukaranang mga pakigpulong. Hibaloi kini. Iapil kini sa inyong pagtudlo ug sa inyong kurikulom. Mas importante, iapil kini nganha sa paagi sa inyong pagtubag sa mga pangutana ug pagpangalagad sa mga panginahanglan sa inyong mga estudyante.

Ako nasayod nga ang usa ka propeta sa Dios naggiya nato niining peligro nga mga panahon. Hinaot nga kita mosunod niini ug sa ubang propetikanhon nga tambag nga padayon natong madawat mao ang akong pag-ampo sa ngalan ni Jesukristo, amen.