Seminare, Inisitituti, ma Isi Mea e Aoga
Faasalalauga Faaletausaga a le S&I mo le 2023
Aso Faraile, 27 Ianuari, 2023
Peresitene Steven J. Lund: Se olioli ina a tele i le talosagaina e tuu atu la’u molimau ia te outou, o e ua ou matua faamemelo i ai i le aso, ma lo’u lauga tovā ai i nei faiaoga silisili ua ou iloa, atonu i totonu o le Ekalesia.
Sa ou auai talu ai i se aoaoga a Arthur Brookes, le polofesa mai Harvard. Ma sa ia fai mai, “Tou te iloa, ua tele naua le uunaiga tatou te tuu i o tatou faiaoga, tatou te faatonu i latou e sui le kosi o le talafaasolopito o le tagata. Na te lei iloaina le moni o lena mea. Vagana ai, ia te outou, e le o le talafaasolopito o le tagata lea tatou te popole i ai, ae o le faavavau. O lea la e tele naua mea matou te faamoemoe mai ia te outou ma talisapaia o outou faasinomaga ma mea o outou fai ma pulunaunau atu i lena taunuuga.
Ina ua ou lauga faaiu i se konafesi aoao, sa ou tautala i le manao e tuu o’u lima i luga o tau’au o se faifeautalai faamaoni ua toe taliu mai ma uunai i lona agaga lagona o lo’u loto. O lenei tofiga e lauga atu ia te outou na oo mai ai le fautuaga ia ou faia lena mea iinei—e tuu o’u lima i luga o outou tau’au ma tilotilo atu i o outou mata ma faailoa atu o’u lagona e uiga i o outou avanoa ma a outou lu’itau. Ia, o le a tatou le suamili faapena, ae atonu, i le faailoa atu o o’u lagona e uiga ia te outou, pe a tatou faia, o le mea ou te fia manao e faalogo i ai o mea o i totonu o o outou loto ia e ao ona ou iloa.
O a’u o se fua o seminare i le vaveao e aoaoina i le tele o taimi i se potuaoga feavea’i e sosoo ma se kolisi amata i Kalefonia. Sa faiaoga ia i matou le toalua o se tagata Suetena liliu mai, o se uso o le matou au epikopo ona sosoo lea i tausaga mulimuli ane o ni tina matutua se toalua ua ta’i fitusefulu o la tausaga—o le toatolu uma lea sa sili ona agavaa ona o lagona loloto o le faapaiaina na mafai ai ona feala a o le’i taina le 5:00 i le taeao, ma lo latou talitonuga maumaututu e uiga i le moni o le Toefuataiga. O le tele o mea ou te iloa e uiga i le talalelei—o le mea moni lava—o le tele o mea ua ou iloa e uiga i le talalelei, sa ou aoaoina i le seminare. O le tele foi o mea fou o loo ou aoaoina nei e uiga i le talalelei, ua na o ni toefafagu o mea sa latou taumafai e aoao ai a’u i na taimi.
O lea la tatou amata i upu aupito taua e mafai ona ou tomanatu ai: faafetai atu mo mea o outou faia ma o outou ituaiga o tagata. Faafetai i lo outou naunau e fai le galuega e le mafuatiaina o loo manaomia e suia ai au mataupu aoaoina, fuafuaga o au lesona, ma lau kalena ina ia ogatusa ma le Sau, Mulimuli Mai ia te A’u. E le toatele ni isi i le Ekalesia o iloa atoatoa mea ua talosagaina mai ia te outou. Faafetai atu mo le faalagolago malosi i taumafaiga e faatino lenei suiga, ma i le iloa ai o loo outou faaleleia atili pea mataupu aoaoina. Ua amata ona fua mai a outou galuega.
Na taunuu mai se tusigamanatu i lo matou ofisa o loo ta’u mai ai se tala masani. E faitauina, “Afai ou te faamaoni, e le masani ona fai ni afiafi faaleaiga a lo matou aiga. E le tele ona matou faitaua tusitusiga paia e i matou lava pe o se aiga pe fai faatasi foi ni suesuega o le talalelei. Matou te toaaga i le Lotu, peitai, lata mai nei, talu ona ou i ai i le seminare, ua mafai ona ou faasoa atu ia i latou mea ou te aoaoina mai le seminare. Ou te talitonu ua fesoasoani le seminare e tosina ai a’u e faitau a’u tusitusiga paia ae ua fesoasoani foi ou te faatosina ai lo’u aiga.
Ia, o le faamoemoe lena, a ea? O le lagolagosua a le Ekalesia o le a toe tafe mai e faamalolosia ai le faatotonugalemu o le aiga i le Ekalesia. O lena auala o se vaega o le Toefuataiga faifai pea, ma o se faiga e aoga. E taumafai le Ekalesia i le mea sili ia malamalama i le mea e aoga ma le mea e le aoga. O loo outou i ai moni i le totonugalemu o le tele o mea ua tatou iloa e fatufatu ai sootaga tumau ma le Alii.
A o i ai la o’u lima i luga o outou tau’au—pe o fusi ai outou ua, pe ā—pe mafai ona ou faamamafaina atu ni nai mea ua tatou iloa e aoga, ina ia mafai ai ona outou faalagolago i ai i mea e sili ona taua i lo outou aoao atu? Latou te fai mai o le ulua’i elemene i le manuia o le “faailoa atu i ai” o oe lava lea. O le averesi, o talavou e o mai i le seminare e uma ane ua sili atu taunuuga o o latou olaga. E ono maua o latou faaeega paia, e ono auauna atu i misiona, e ono faaipoipo foi i le malumalu. O i latou e auai i le fa tausaga o le seminare e maua se fesootaiga i le talalelei lea e seāseā ona motusia. Lua, a totogi atoa se sefuluai a talavou, latou te faatuina se so’oga e tumau ma le Tama Faalelagi. O taimi uma latou te usita’ia ai lena poloaiga ma totogi lena tupe, e fatuina ai se noataga o le ositaulaga ma le sootaga.
Ou te faamoemoe o faifaipea le faaleleia e faiaoga uma o le seminare ma le inisitituti le ala latou te aoao atu ai le mana fesootai o le sefuluai. Sa fesili mai lo’u lava tamā i se tasi taimi ina ua pe tusa o le 10 o o’u tausaga, pe o totogi la’u sefuluai e le aunoa. Na ou faia. Sa le o se tupe tele, aua sa faaleai ni pisinisi na faia i le auala palapala i le mea sa matou nonofo ai. Ae na ia fai mai, “E te iloa, afai e te filifili e fai, e mafai ona e ola i lou olaga ua atoatoa i lena mea. Fai mai a ia, “O se tasi o o’u faanoanoaga”—o lo’u tamā lea—“o le taimi na ou i ai i le Neivi i luga o se vaa mo ni nai masina, sa leai se mea e totogi i ai sefuluai ma sa ou le toe faia lea mea masani. Ua ou atoatoa talu mai lena taimi. Ae ou te maasiasi i lena vaitaimi ou te le’i faia ai. Afai e te filifili i ai, e mafai ona e atoatoa i lenei mea.” Ia, e mafai ona atoatoa foi au tamaiti a’oga.
O le mea lona tolu ou te fia fagua ai outou lea e aoga lava, o le konafesi o le MMA [FSY]. O nei konafesi MMA, e ofoofogia. O le taumafanafana na te’a nei, o le toatele pe o le toatele o le 200,000 o le 14 i le 18 tausaga le matutua i le salafa o le lalolagi, na taape ma se malamalama ua sili atu ona faaosofia i lo latou faasinomaga ma le mafuaaga e fesili mai ai le Alii i mea e fesili mai ai o Ia. Ua matuai faamanuiaina lava le MMA ma ua tatau ai ona tatou fesili ifo ia i tatou lava, O le a le mealilo lea ua manuia ai? O le a le aafiaga o le MMA?
Ia, o se vaega o lena mea o le tuu o i latou e auai i se si’omaga e aveese ai mai o latou faalavefau faiso’o mo se vaiaso, lea latou te maua ai se faava’a maualuga o le mafaufau e mafai ai ona aoao ma tulimata’i. Ma i le taimi atoa e taitasi i latou ma i ai i se malu e pei o i ai i le aiga, latou te fegalegaleai ma outou, ma faiaoga ma faatonu o sauniga, e tele lava mai seminare ma inisitituti, a o outou faamumuina o latou fai’ai i aoaoga faavae mama a’ia’i ma aoga e uunaia ai i latou ia faia se suiga o le loto.
Tou te saunia meafaigaluega latou te manaomia pe a foi atu i le Aso Toonai i siosiomaga e tumu i le le mautonu ma le fenumia’i o o latou olaga. O a outou lesona ma faataitaiga ma upu uma o le a fafao i a latou pusa meafaigaluega o tomai o o latou olaga. O nisi o i latou, o le MMA atonu o lo latou toe avanoa lea e faatoafilemu ai i latou lava ma le Atua. Faafetai atu mo lo outou tuuto e avatu ia i latou lo outou tulaga sili faaleagaga, atamai, ma tomai faafaiaoga. Ua faamautu mai e sailiiliga a la tatou Ekalesia e faapea o se tasi o ’amoti sili ona mamana o le avea ma soo i le olaga atoa o sootaga ia ma tagata matutua faamaoni e pei o outou, o e ua iloa le ala e faatautaia ai luitau o le olaga ma maua ai le olioli ia Keriso.
Pe tusa o se masina talu ai, na faatonuina ai Peresitene Bonnie H. Cordon ma a’u e lipoti atu i le Au Peresitene Sili e uiga i le polokalama o le MMA ma pe na faapefea ona faatino i le taumafanafana na te’a nei i le Iunaite Setete ma Kanata. Sa mae’a le ma folasaga ma tali atu i ni nai fesili ’anoa e uiga ia matou fuafuaga ina ia faaleleia atili ai, ma sa foliga ua mae’a le fonotaga. Ae a o amata ona ma se’e ese mai o ma nofoa, sa punou mai i luma Peresitene Nelson ma faapea mai, “E tatau ona tatou aoao i latou e tatalo.” Sa vave ona ma toe nonofo ifo i lalo. Na ia saunoa mai, “E tatau ona tatou aoao i latou ia tatalo, pe o ai latou te tatalo i ai, ma le gagana o le tatalo.” Ona ia toe saunoa mai lea e faaapea, e popole o ia ina ne’i o tatou faaleano tele i le ala tatou te faalagi ai le Tama Faalelagi. Ona ia toe ta’ua foi lea o le fasifuaitau “e tatau ona tatou aoao i latou ia tatalo, pe o ai latou te tatalo i ai, ma le gagana o le tatalo.” O lea la ia tatou aoao i latou ia tatalo. O taimi uma tatou te fai ai se tatalo, o loo tatou valaaulia le faaaofia ai o le Tama Faalelagi i o tatou olaga. O tatalo uma o se tatalo mo se vavega. E oo lava i tatalo o le lotofaafetai e faamoemoe e faalolotoina ai a tatou sootaga ma le lagi.
Tatou liliu loa la i se isi meafaigaluega o le molimau e aoga. O le taiala Mo Le Malosi o le Autalavou. Faamalie atu o le—Mo Le Malosi o le Autalavou:O Se Taiala mo le Faia o Filifiliga, lea e aoao mai ai i tatou e sui lo tatou taulai i tulafono, i se taulai atu i la tatou sootaga ma le Faaola ma le avea e faapei o Ia. O le faaupuga masani “Mata o le a se mea e fai e Iesu?” o loo tumau pea le avea o se tulafono matagofie o le olaga. O le ufi talātua lea o le a faia ai a tatou faaiuga ua le o toe ta’ua o se tamaitusi, ae, o la tatou misiona na tuuina mai e le Atua.
Ua toe ta’u mai e Peresitene Nelson ia i tatou e faapea, o le mea aupito taua o loo tupu nei i lenei lalolagi ma le mafuaaga na faapolopolo ai i tatou e o mai i lenei lalolagi i lenei taimi, o le faapotopotoina o Isaraelu. O lea la, a o tatou faia faaiuga pe faapefea ona tatou faatautaia o tatou olaga, e tatau ona ta’a’ina e le fesili “Pe o le a fesoasoani lenei faaiuga pe tuta’ia ai lo’u gafatia e faataunuu o’u faamoemoega i le olaga nei?” A o tatou taumafai malosi e ola i ituaiga olaga e agavaa ai mo ’autau a le Alii, tatou te taumafai e faia filifiliga i o tatou olaga ia ogatasi ma le misiona o le olaga.
O le fesili mo i tatou taitoatasi o le “Tatou te talitonu ia Keriso ao Ia faaalia e ala mai Ana perofeta o tatou faamoemoega paia?” Aua afai tatou te talitonu ia te Ia, o le a tatou mananao e fai faaiuga sili. Outou faiaoga ma taitai o le S&I, ua popoto faapitoa e fesoasoani ia i latou e tali lena fesili. I se lalolagi fesuisuia’i, o le a le puipuia i tatou e se lisi o fausaga, ae o mataupu faavae o le talalelei.
O le taiala fou o le Mo Le Malosi o le Autalavou mo le faia o faaiuga, o loo talosagaina ai o tatou talavou ia amata faataitai ona faamasani i le olaga e ala i a latou tioata maaleale faaleagaga nai lo tulaga maaleale maualuga masalomia faaleaganuu. O le taiala fou o le MMA o se mea e le gata e toe talanoa ai tagata matutua i talavou e uiga i mea e faatauaina. Ae, o se toe faatulagaina o le ala latou te taulima ai o latou olaga a o latou aoaoina lo latou faasinomaga moni o ni atalii ma ni afafine o le Atua—o se Atua o loo i ai se galuega mo i latou e fai, o le na auina mai i latou iinei mo ni faamoemoega patino o le a maua ai e o latou olaga se uiga olaola. O le a totoina o latou vae i luga o eleele o le talalelei.
O lea taiala fou mo le faia o filifiliga, o se vaega o se mamanu ua loa ona faaali mai e tata’i ai i tatou agai i se faaleagaga loloto atu; o le faapipiiga pito lata mai o se afali’o umi o le toefuataiga lea e aofia ai le aoao atu i uarota, ua manuia le se’e atu i aoaoga i aiga ona sosoo ai lea ma le auaunaga—o afiafi faaleaiga nai lo po faaleaiga, o tagata uma o le au paia o se faifeautalai, o le siita o le maualuga o le tulaga, o le siitia o le taulotoina o lesona faafaifeautalai i le Tala’i La’u Talalelei, ma le suia o le sikauti ma le Alualu i Luma o le Tagata Lava Ia i Tamaiti ma le Autalavou—lea ua talosagaina ai le autalavou e pulea o latou olaga faaleagaga.
O faitauga moomia fou mo le seminare ua ogatusa ma le mataupu faavae lenei e faavae i le faiga e taiala e le Agaga. Ua tatou la’a atili atu agai i se ala sili atu ona maualuga ma paia e faaosofia faaleagaga ai le faiga o faaiuga. Ua oo ina faateleina le taua o le aoaoina e o tatou talavou ma i tatou lava e filifili pe faapefea ona tatou faatino e ala i le tali atu i mataupu faavae paia nai lo le aga atu e mulimuli i ni faasāsā patino. Ua uma ona faafetaia’ia o tatou talavou i fesili e tatau ai, e le o ni fesili o se sefulu pe tolusefulu foi tausaga ua tuanai. Afai o le a latou le mautonu i le aso i se faaiuga e uiga i ta o pe’a, ia, faatalitali la sei vaai po o le a le mea o le a samala ai i latou e le lalolagi.
Na faamalamalama mai e Peresitene Russell M. Nelson le ala e fai ai na faaiuga. E le mafai ona na ona e makaina se lisi. Na ia aoao mai, “Ou te folafola atu ia te oe afai o le a e faia ma le loto faamaoni ma tumau ai pea lava i le galuega faaleagaga e manaomia e atina’e ai le tomai taua, faaleagaga o le aoao pe faapefea ona faalogo i musumusuga a le Agaga Paia, o le a e maua taitaiga uma o le taitaiga o le a e manaomia i lou olaga.”1
O loo feavea’i le tala e uiga i se 14-tausaga le matua na fai i lona tina i le aso na sosoo ma le konafesi aoao e faapea, e le o faasa maia i le tamaitusi fou le tele o ni faapūpū, o lea sa fuafua ai o ia e faaopoopo nisi i ona taliga i le Aso Tofi. Sa manava loloa le tina ma fai atu e tusa ai ia te ia, “Ua e iloa o matou lagona i lena mea, ae e le faapea o le mea matou te mananao e te faia, o lou avanoa lenei e fesili ai pe o le a le mea e finagalo le Tama Faalelagi e te faia. E tatau ona e faia le galuega, fai le sailiga, tatalo i ai, ma faatalitali mo se tali. Ia, na maua e le 14-tausaga lana tali, ma sa suia lona olaga e le tina.
Ina ua toe foi i le fale mai la’u misiona sa ou faatasi atu i le Ami a le Iunaite Setete. Sa ou lipoti atu i se tasi aso i le Nofoaga Autu e Suesueina ai tagata fou o le militeli i Oakland, lea na ou ulufale ai i lo’u aiga fou faamiliteli. O uo fou na atofa mai ia te au sa matuai eseese uma le tasi mai le isi. Ae i le 24 itula mulimuli ane, sa tutusa uma le ’otiina o o matou ulu ma tutusa foi toniga na matou ofua. Ma a o matou savavali atu i o matou potu i lena po, sa pei i matou uma o pule o le Kilini Tasi. I isi masina na sosoo ai, sa le mafai ona ou iloa po o ai lea i lena ofaga o tagata eseese o le nofoaga autu. Sa matou toleni faatasi ma faitio faatasi ma fefaasoaa’i, ma sa leai ni sā lafai ma ni sā lapai. Sa ou aoaoina se lesona mo le olaga atoa e uiga i le taua o toniga: o mea matou te ofuina e mafai ona vaevae ai e mafai foi ona lotogatasi ai. E tautala lavalava pe o ai le itu matou te i ai ma pe o a foi mea e ono faamoemoeina i le tau.
Faatoa ou faitau e uiga i se fomai o le Maligi sa i ai i se taua i Sasae Tutotonu, o le sa tasi’iina le tele o Marini manunu’a i se vaalele helikopa e la’u ese ai, ona toe foi ane foi lea i le malae ma alu atu ai ma se isi fitafita manu’a. Sa tauemu nisi o o latou fitafita ia te ia: “Ei, Maligi”—e faatiga ai ia te ia—“Ei, Maligi, e te le o iloa o loo e amoina se tasi o le fili?” Sa na ona ia fai atu, “Ei, o a’u o se Maligi, tou te le o vaai o la foi e manu’a o ia?” Sa tu atu lana toniga mo se mea faalelagi.
Ua valaaulia e le perofeta na talavou i autau a le Alii. Pe a e auai i se autau, e te ofuina se toniga. Pe a tulai mai se taufaamata’u po o se mala, e ta’u atu e se toniga a se autau i tagata ua taunuu se fesoasoani, e faasaoloto e le au amiotonu e mafatia, e tau’ai atu fugalaau i o latou ala, e i ai loimata, ua taunuu le fesoasoani. O faifeautalai e ofu a latou toniga; e mafai e le autau a le Atua ona faia le mea silisili i le mea e auina i ai, e tumatila teisi mai ia i latou e auina atu i ai e si’i a’e ma faasaloto.
Fai mai le tusitaulima, “Na te silafia”—o loo tautala e uiga i le Tama Faalelagi—”Na te silafia e mafai ona e faia se eseesega i le lalolagi, ma e manaomia ai, i le tele o tulaga, le ese mai le lalolagi.”2
A o i ai pea i le Ami, sa ma livi ma la’u uo o Rich ma faai’u ai i Ierusalema. Ma a’o ma savavali ai i magaala o Ierusalema i ofuvae Levi ma mitiafu faikola, sa fai mai se faatauoloa Arapi ma te o mai i le Nofoaga Tutotonu o le BYU i Ierusalema. Sa ma fai atu i ai e leai, ua na o i ma’ua o ni fitafita Amerika.
“Ioe, ae lua te o mai foi i le Nofoaga Tutotonu i Ierusalema.”
“O le a le mea ua e mafaufau ai faapena?”
“Matou te iloagofie tusa lava pe fai sina mamao.”
Sa ma fetilofa’i i le tasi ma le isi; sa pei uma lava i ma’ua o le Au Fitafita o le Puipuiga a Isaraelu sa pasi ane ia i ma’ua, sa ofuina foi lavalava sa ma ofua, tutusa le ’otiina o ulu, tutusa i mea uma lava. Ae e manino sa i ai lava se mea.
I le aluga o tausaga, o soo o le Alii sa tele ina ola faatasi ma isi tagata e eseese aganuu ma tulaga faatauaina ma mea e faamuamua. E faapefea la ona tatou faaaloalogia o tatou tuaoi a’o ola atoatoa i le aganuu tulagaese o le talalelei? Ua poloaiina i tatou ia avea o se malamalama i le lalolagi a o faapotopoto e le Alii ia Isaraelu i lenei taimi mulimuli e sauniuni ai mo Lona toe afoi mai. E tele ina tauaveina e tagata o le Ekalesia le malamalama e le mailoa ia i tatou lava, ae iloagofie i isi. Ou te manatu o le Malamalama o Keriso lea e mafai ona latou vaaia, o nisi taimi e mu itiiti, ae e susulu moni lava e ala atu i o tatou tagata pauu. Ae, o Keriso, o le malosiaga o le autalavou. Soo se mea tatou te fai e faalavefauina ai pe tuuitiitia ai pe faaufiufi ai pe nana lena malamalama, e taofia ai faamoemoega o le fanau mai i lenei taimi.
O le taiala o le Mo Le Malosi o le Autalavou e mafai ona fesoasoani tatou te tauaveina ai lena malamalama a o tatou sailia musumusuga i le auala e mafai ai e o tatou faamoemoega tulaga ese na atofa mai, ona faataunuu e ala i faaiuga ma ituaiga olaga tatou te ola ai. O le auina atu e tutu o se nuu tulaga ese o le Atua o se faamālō. E mafai ona faauigaina o le tu matila mai le motu o tagata a o tatou faasalalau atu e ala ia tatou filifiliga pe o ai lea tatou te mulimuli i ai. O la tatou galuega i aoaoga a le Ekalesia ma i le polokalama a Tamaiti ma le Autalavou ma i le malo o le Atua i le lalolagi, e le gata ia tausisia lenei tupulaga mai le mamulu atu o lona faatuatua ma le faase’e atu i ituaiga olaga e le talafeagai mo i latou, o loo valaau mai le perofeta mo alii talavou ma tamaitai talavou e i ai le gafatia e auai ai i le faafouga o le lalolagi.
O loo valaau mai le perofeta a le Alii mo tamaitai ina ia tutula’i ma ta’ita’i i se lalolagi o le mau tamaitai, o e o le a tauanaua faalelei le tutu i o latou tulaga tonu i le lalolagi, ma le faamoemoe ia talafeagai ma faaaafia ai ae mo le toatele o i latou e foliga mai o le talitonuga faalelotu e feteenai ma o latou faamoemoega anoa. Ma o le a faaofuina pea e tamaitai o Siona i latou lava i le mana o le faaleatua ma o le a faagaoioia le faatotonugalemuina.
Ma Na Te manaomia i tatou e fausia ni tagata o le mana tele, mauaina uiga faaleatua uma o atalii o le Atua o loo faamatala mai i mau. Pe na o le tasi se Moronae Ta’ita’i’au i le lalolagi? E le o le mea lena ua ou faalogo o fai mai ai Peresitene Russell M. Nelson ina ua ia saunoa e uiga i lenei tupulaga tautupu. Na ia alaga atu ia i latou e faapea “sa faapolopolo e lo tatou Tama Faalelagi Ana agaga aupito sili ona tamalii—atonu … o Lana ‘au aupito lelei—mo le vaega mulimuli lenei. O na agaga tamalii—na tagata taaalo silisili ona lelei, na toamanumanu—o outou!”3
O le mea lea, toe faafetai atu mo le malosiaga taua agai atu i le liuga tumau ua outou i ai, mo le autalavou a le Ekalesia a le Alii ma le malo. I le suafa o Iesu Keriso, amene.