Avefeau o le Tala Fiafia
Faasalalauga Faaletausaga a le S&I mo le 2023
Aso Faraile, 27 Ianuari, 2023
Brother Chad H Webb: I aso anamua, sa manatu ai o se mamalu maualuga le filifilia e avea o se avefeau o le tala fiafia, aemaise le avefeau o le manumalo i se taua. I le 490 TLM, sa filifilia ai se taulealea e igoa ia Pheldippides e faamamaluina mo le tauaveina o le talafou i tagatanuu atuatuvale o Eleni e faapea, ua faasaoina e a latou vaegaau lo latou atunuu ina ua latou faatoilaloina osofa’iga a Peresia. E tusa ai ma le talatuu e faapea, na tamo’e Pheidippides i le auala atoa mai le Vanu o Marafoni e oo i Atenai e manu le tala fiafia. E silia ma le 2,500 tausaga mulimuli ane, o tagata i ni tulaga e sili atu nai lo a’u, o loo faaauau pea ona latou faamanatuina lena tamo’ega i lo latou taufetuli ia latou lava marafoni.
Sa ta’ua e Isaia le manatu o le avea ma avefeau o tala fiafia ina ua ia fai mai:
“Ma o i latou ia o e na latou talai atu le filemu, o e na latou aumai tala e lelei o mea lelei, o e na latou talai atu le olataga; ma fai atu ia Siona: Ua nofotupu lou Atua! …
“… Ma ua matagofie naua o latou vae i luga o mauga!
“Ma … ua matagofie naua i luga o mauga vae o i latou o loo latou talai atu pea le filemu?”1
Na suia e na fuaiupu o mau mea uma mo a’u a’o avea a’u o se faifeautalai talavou, ma’imanatu, ma lotovaivai. Na tatala e le agaga o na fuaiupu lo’u loto ma le mafaufau i le mea moni e faapea, sa faatuatuaina a’u e avea ma avefeau o le tala fou aupito silisili e mafai e le lalolagi ona faalogo i ai. Sa suia le lotovaivai ma le alofaifo ia te a’u lava, i le faamoemoe ma le lotofaafetai, ma e le galo lava ia te a’u lena taeao ina ua ou uluai malamalama e ala i le Agaga Paia e tatau ona ou suitulaga i le Faaola i le auina atu o le tala fiafia o Lona alofa e lē mafaatusalia, Lana taulaga togiola, ma Lona manumalo i le agasala ma le oti.
O aso uma e te savali atu ai i totonu o se potua’oga, o outou o avefeau o tala fiafia o le talalelei a Iesu Keriso. Faafetai mo le talaiina atu o le filemu i se lalolagi o fevaevaea’iga ma le fevataua’i ma mo le aumaia o le malamalama ma le upumoni i se lalolagi lea e mafai ona lagona ai le pogisa ma tumu i le lē mautonu. O le Ekalesia moni lenei a Iesu Keriso. Ua uma ona saunia outou ma filifilia e avea ma avefeau o le filemu i le autalavou ma talavou matutua o le Ekalesia a le Alii. Se faamamaluga ina a telē o le avea ma sui o Iesu Keriso, e aoao atu Lana talalelei, ma taumafai malosi e aoao atu i Lana ala!
O le tausaga na te’a nei na tatou maua ai le avanoa e aoao mai ai ia Elder Dieter F. Uchtdorf a o ia folasia mai le tusitaulima fou o le Aoao Atu i le Ala a le Alii. Ou te fiafia lava ona o lenei tusitaulima fou o loo taulai atu i le faataitaiga a Iesu Keriso o le Faiaoga o Faiaoga. Na saunoa Elder Uchtdorf, “O le ala silisili e avea ai ma se faiaoga lelei atu o le avea lea ma se soo lelei atu o Iesu Keriso.”2
O le i ai o le Aoao Atu i le Ala a le Faaola,” o le a tatou le toe faaaogaina ai le Tusitaulima o le Aoao Atu ma le Aoao Mai o le Talalelei. O le Aoao Atu i le Ala a le Faaola e le o faamoemoe e avea o se punaoa e fai ai aoaoga faamasani; o lona faamoemoega o le avatu ai lea o faauigaga ma faamalamalamaga ’anoa o le aoaoina mai ma le aoao atu. Ua i ai ma o le a faaauau pea ona gaosia punaoa e fai ai aoaoga faamasani, e fesoasoani ai ia te outou e faaaoga mataupu faavae o loo aoao atu i le Aoao Atu i le Ala a le Faaola. O nei punaoa e aofia ai ni nai elemene o le Tusitaulima o le Aoao Atu ma le Aoao mai o le Talalelei ia ua autausagā o faamanuiaina ai tagata a’oa’o.
Ou te iloa o le toatele o outou ua faaaluina le tele o taimi e suesue ai le Aoao Atu i le Ala a le Faaola ma mafaufau loloto i fesili iloilo faaletagata lava ia. Faafetai atu mo mea uma o loo outou faia e avea ia ma faiaoga e faapei o Keriso o le talalelei toefuataiina.
Ina ia faaleleia atili a tatou anomea mo aoaoga faamasani, ou te fia faasilasila atua se fetuunaiga i le faamatalaga aloaia o le faamoemoega o Seminare ma Inisitituti. Ae ou te lei faasoa atua le faaupuga fou o la tatou faamatalaga o le faamoemoega, sei ou tuuina atu ni nai manatu faavae. I le lua tausaga talu ai, sa matou tulimatai atu ai i le saunia o aafiaga o se tagata a’oa’o lea e taitai atu ai i le liuaina, talafeagai, ma avea ma ni o, ma le faaavanoaina o na aafiaga i le toatele o talavou ma talavou matutua. E taua lo tatou iloa o nei mataupu faavae e le tutusa lo latou taua. O le faamoemoega laualuga lava o le saunia o aafiaga ia e valaaulia ai o tatou tagata a’oa’o e aoao le talalelei ma ia faalolotoina lo latou liua ia Iesu Keriso.
O le talafeagai ma le avea ma ni o, e taua, ae ua o ni taunuuga e le tuusa’o ia. Ua o ni auala ia i se taunuuga, ma a faaaogaina lelei, e mafai ona tau atu ai i la tatou sini tuusa’o o le liua. O le talafeagai lea e tau atu i le liua, e sili atu i le na o le talanoa e uiga i mea e fiafia i ai ma a tatou tagata a’oa’o. E leai se mea e sili atu ona talafeagai mo lo tatou alualu i luma ma le fiafia e faavavau nai lo Iesu Keriso ma Lana talalelei toefuataiina. O le ata o le faaolataga o le fuafuaga lea a le Atua mo Ana fanau uma. E i ai lona talafeagai i le taimi nei lava ma le taua e faavavau i fanau taitoatasi a le Atua.
O le talafeagai e tau atu i le liua e faatuina a o fesoasoani le Agaga Paia i tagata a’oa’o ia malamalama i le fuafuaga a le Atua, le matafaioi tupito a Iesu i lena fuafuaga, ma le taua o le talalelei i o tatou olaga i aso taitasi. O le talafeagai e tau atu i le liua, e fesoasoani i tagata a’oa’o ia iloa pe faapefea ona fesootai tusitusiga paia ma aoaoga a perofeta o aso nei i o latou tulaga ma manaoga. E fesoasoani latou te iloa ai le ala e tali ai e le talalelei ia fesili o o latou agaga. E tupu pe a latou lagona le musuia o i latou e galulue ma le faatuatua ia Iesu Keriso ma iloa ai le faataunuuina o faamanuiaga folafolaina a le Tama Faalelagi. O le talafeagai lena e tau atu i le liua.
E moni foi, o le avea ma ni o lava ia, e le o le sini mulimuli lea. O le mea moni, talu ai o le upu avea ma ni o e tele naua auala e faaaoga ai, o nisi taimi e mafai ona malamalama sese ai i le uiga o le avea ma ni o i se manatu faavae faaletalalelei. E toatele i tatou ua lagonaina le avea ma ni o i ni auala eseese. I le tuputupu a’e, na tupu lena mea ia te a’u i ’au afeleti. O tagata o le matou ’au o a’u uo aupito vavalalata, ma sa ou lagona le mautinoa o lo’u tuuto atu i lo matou faamoemoe ia manuia. O lena ituaiga o le avea ma ni o, e lelei ma e taua foi. Ae e tele isi mau mea i le avea ma ni o, lea e tau atu i le liua.
Na aoao mai Elder D. Todd Christofferson, i le konafesi aoao talu ai nei e faapea, o le aoaoga faavae autu o le avea ma ni o, e tolu ona vaega: o le faapotopotoina o le nuu o le feagaiga a le Alii, auauna atu ma le ositaulaga, ma le totonugalemu o Iesu Keriso i le avea ma ni o.3 O nei manatu faavae ua i ai i le fatu o mea ua tatou faauigaina pe a tatou faapea o le avea ma ni o, lea e tau atu i le liua. E moni, o le avea ma ni o e aofia ai le fealaofani ma le faaaloalo o le tasi i le isi. E aofia ai foi mataupu faavae ia e aumaia ai i tatou i le Faaola ma punoua’i ai i Lona faamoemoega a o tatou fesoasoani le tasi i le isi e savavali i le ala o le feagaiga e foi atu ai ia te Ia.
O faamanuiaga o le avea ma ni o e totonugalemu i le talalelei, e aofia ai foi sootaga faalefeagaiga. O le avea ma ni o e pei ona faamatalatalaina e ala i tioata o le talalelei toefuataiina, e fesoasoani ia i tatou ia iloa ai lo tatou faasinomaga moni ma la tatou sootaga faavavau ma lo tatou Tama i le Lagi. Ua faia ia maua a tatou feagaiga ona o Lona alofa mo i tatou ma faafesootai ai i tatou ia te Ia, i o tatou aiga, ma i se nuu o e talitonu o e ua folafola atu e tauamo avega a isi. O lea ituaiga o le avea ma ni o, e tau atu i le liua ia Iesu Keriso ma Lana talalelei toefuataiina.
Se’i ou toe foi la i tua i le suiga o le faaupuga o lo tatou faamoemoega, lea na faamaonia e le Fono Faatonu o Aoga a le Ekalesia. I se taumafaiga e faatulaga le liua e avea ma faamoemoega tuusa’o o o tatou aafiaga uma o le aoao atu ma le aoao mai, o le a faitauina nei faapenei le faamatalaga o lo tatou faamoemoega, “O lo tatou faamoemoega o le fesoasoani lea i le autalavou ma talavou matutua e faalolotoina lo latou liua ia Iesu Keriso ma Lana talalelei toefuataiina, ia agavaa mo faamanuiaga o le malumalu, ma ia saunia i latou lava, o latou aiga, ma isi mo le ola e faavavau faatasi ma lo latou Tama oi le Lagi.” O le a fesoasoani lea fetuunaiga tatou te faatulaga ai a tatou aoaoga faamasani ma taumafaiga e fatufatu ni aafiaga e aoaoina ai, ma le faamoemoe e mafai ona tatou fesoasoani i tagata a’oa’o ia avea ma soo o Iesu Keriso i le olaga atoa. O matafaioi ua faailoaina o se faiaoga i le Aoao Atu i le Ala a le Faaola o le a tumau ona fesoasoani ia sili atu lo tatou malamalama i le matafaioi a se faiaoga e fesoasoani ai i tagata a’oa’o ia faaloloto pe faamalolosia lo latou liua. Ua uma foi ona matou faafoua ia parakalafa o le Ola, Aoao Atu, ma le Auauna Atu ia e faiā ma lo tatou faamoemoe, lea e mafai ona e maua i le uepisaite a le S&I.
Po o a lava mea atonu ua suia pe faamamafaina i a tatou taumafaiga e aoao lelei atu ai le talalelei, a o le mea e le mafai lava ona suia o lo tatou faatototonugalemu lea ia Keriso, tulimatai i le tagata a’oa’o, ma faavae i tusitusiga paia. Ma o le a tatou taumafai pea lava ia faatumulia a tatou aafiaga o le aoao atu ma le aoao mai i musumusuga ma le molimau a le Agaga Paia. O mea uma tatou te faia e ao ona faaloloto ai lo tatou liua ia Iesu Keriso ma Lana talalelei toefuataiina ona o Ia le tali i o latou luitau ma fesili. O Ia o le Atua o lo latou lavea’iga ma le togiola.
I le taimi nei, ou te fia faia ai se isi faasilasilaga o se isi faamaoniga ua faia e le Fono Faatonu o Aoga a le Ekalesia. Ou te toe fai atu, ou te manao e faatomua lena faaaliga i ni nai manatu faavae, i le taimi lenei e faaaoga ai se mataupu faavae na aoao mai e le Faaola. Na ou matauina talu ai nei le faataoto o le tagata lulu saito, na fetalai ai Iesu e faapea, o nisi fatu na fua mai ta’iselau, ta’ionogafulu, ma ta’itolugafulu. O le mea sa taua ia te au i lenei faitauga, e faapea o nei mea taitasi na tutupu mai i le mea sa ta’ua e le Faaola o le eleele lelei. E le o tafāala, vaega gaoā, po o fatu na pauu i mea matuitui, a o le eleele lelei.
Na afua ai ona ou manatunatu pe o le faiga o tatou faia ai nei tulaga manaomia mo togi o le kosi, e faatusa i le na o le aloaiaina o i latou e fua mai ta’iselau, ae le aloa’ia ai ma faafetaia taumafaiga ma sāo a i latou e fua mai ta’ionogafulu ma ta’itolugafulu. E tofu le tagata a’oga ma se maualuga e ese o le lagolago faaleaiga, malamalama i le talalelei, ma le tuuto faaletagata lava ia. E moni lava, e tatau ona i ai o tatou faamoemoega maualuluga, ae e tatau foi ona tatou faaeteete ia aua ne’i faalotovaivaia i latou o e faia le mea sili latou te mafai i tulaga o latou i ai.
O nei fuaiupu na matou tomanatu ai pe sa mafai ona faatumauina tulaga maualuluga ma sue auala e faapatino ai le faiga. Pe mafai ona tatou faia ni auala e faamalosiau ma aloa’ia ai le tuputupu a’e ma le alualu i luma i vaega uma o le ala o feagaiga ma fesoasoani ai i a tatou tagata a’oa’o uma ia manuia? Pe mafai ona tatou lagolagoina i latou ia latou taumafaiga e suesue i tusitusiga paia ma aoao le talalelei ma ni sini e mafaufauina e le tagata a’oa’o lava ia ma faaosofia ai le atina’e o mausa ma mamanu o le a tumau i talaatu o o latou taimi i a tatou vasega?
O le manatua ai o lena mea, ou te fia faasilasila atu ai mea nei mo le seminare: o le iloiloga o le aoaoina o le a suia mai le iloiloga o tagata taitoatasi i se iloiloga faalevaega, lea o le a mautinoa ai na aoaoina e tagata a’oga ’anotusi na tuuina atu. O i latou ua ausia ’anotusi e mafai ona fesoasoani i isi ina ia tuuina atu i tagata uma le avanoa e faaloloto ai lo latou malamalama. O vaega o le iloiloga e faatatau i le talitonuga ma le faaaogaaga, o le a tumau pea ona avea o se faatinoga a le tagata lava ia e faamoemoe ai e fatufatu se avanoa mo le tagata lava ia e manatunatu loloto ai. O faitauga manaomia foi ua suia ma e le o toe manaomia ai le 75 pasene o aso e faitau ai i kuata taitasi.
O le agai i luma, ina ia mafai ai ona maua togi o le kosi mo le faauuga, o le a manaomia ai tagata aooga o le seminare e faitau ia fuaitau filifilia mai le tusi o mau i kuata taitasi. Mo se faataitaiga, i le kuata muamua o le Mataupu Faavae ma Feagaiga--Talafaasolopito o le Ekalesia, o le a faitau ai e tagata a’oga le Iosefa Samita---Talafaasolopito. Ona faatonuina lea o i latou e faatu se sini faaopoopo a le tagata lava ia faatasi ai ma ni faamoemoega maualuga mo le tuputupu a’e i luga. O nei sini patino e ao ona atagia ai tomai o se tagata a’oga ma aloaia ai taumafaiga ma le alualu i luma o le tagata lava ia.
O le a fautuaina foi e faiaoga ia tagata a’oga e tulitulitatao le alualu i luma o a latou sini taitasi ma mulimulita’ia. O le a latou fautuaina tagata a’oga e faitau ia mau fuaitau ua atofaina atu mo le Sau, Mulimuli Mai ia te A’u i le vaiaso seminare, pe taitoatasi pe faatasi ma o latou aiga. Latou te fautuaina foi tagata a’oga e suesue e le aunoa le tagata lava ia i le Tusi a Mamona, pe suesue faatasi ma o latou aiga. I se taimi e le o toe mamao, ona auina atu lea o nisi faamatalaga e faatatau i nei suiga uma, e aofia ai le faatinoina o auiliiliga ma taimi faasolo ma le uiga o lenei mea mo kuata talu ai pe afai e le’i ausia tulaga manaomia.
O le taimi nei, ou te fia faasoa atua se mea na saunoa i ai Peresitene Henry B. Eyring ina ua soalaupuleina lenei suiga. Na ia saunoa, “Ina ia faia lelei lenei mea o le a manaomia ai le gauai patino atili, taitoatasi mai faiaoga. O le a faaopoopo ai se avega, ae o se avega e tatau ona fiafia faiaoga e tauave, aua o la latou auaunaga patino e taua e pei foi o a latou aoaoga i le potuaoga. A i ai se tasi e mafai ona faia, o o outou faiaoga. E ofoofogia i latou.”
Ou te ioe faatasi ma Peresitene Eyring, e ofoofogia outou. Ua ou iloaina foi o le la’a ese mai tulaga lēfinaua’ia i sini taitoatasi o le a manaomia ai se taimi e tele atu ma le gauai mai ia te outou. Ae o le a se mea e mafai ona tatou faia e mafai ona manuia ai atili o tatou tagata a’oga nai lo le fesoasoani ia i latou e fatufatu se mausa a le tagata lava ia i aso taitasi o le suesueina o tusitusiga paia, lea e faaosofia e mafuaaga tonu?
O le mea mulimuli, o le a tumau i le mea e tasi tulaga manaomia o le auai. Faamolemole fesoasoani i tagata a’oga ia iloa o aafiaga latou te maua i le vasega, e faateleina ai lo latou malamalama i le talalelei ma faamalolosia ai lo latou faatuatua. O le mafuaaga lena latou te mananao ai e auai, e le na ona maua ai o se togi. O se tagata aoga e malamalama i lenei mea, o le a manao e i ai iina i le 100 pasene o le taimi.
I le inisitituti, o le a tatou faaauau pea tulaga manaomia o i ai mo togi, ae o le a faamamafaina mafuaaga faaosofia o le tagata lava ia mo le auai ma punoua’i i le gasologa o le aoaoina. O mafuaaga e pei o le faalolotoina o le faatuatua, faalatalata atili atu i le Faaola, ma le aoaoina o Lana aoaoga faavae e fesoasoani i tamaiti aoga ia malamalama i le mafuaaga, fesoasoani ia i latou e faatutu ni sini e faalatalata atili atu ai i latou ia te Ia, ma uunaia i latou e tali atu ia te Ia.
O le toatele o o tatou tagata a’oga ua faatoa amata la latou malaga ma o loo valaaulia, atonu mo le uluai taimi, e fai se avanoa mo le fatu o le faatuatua i o latou olaga. Nai lo le popole ona latou te le’i oo i mea uma ua iloa e se tagata a’oa’o ua matua atu, e tatau ona tatou faafetai mo lo latou naunau ia talitonu. Ma a latou vaai e lelei le fua, e tatau ona tatou olioli faatasi ma i latou ma patipatia lena meaalofa mai lo tatou Tama i le Lagi. Ona mafai lea ona tatou faatalitali faatasi ma le onosai mo lena aso e avea ai le fatu ma laau ua tupu a’e i le ola e faavavau.
Ou te valaaulia outou ia suesue pea ma le toto’a i le Aoao Atu i le Ala a le Faaola ma mafaufau pe o a isi mea e finagalo le Alii e aoao ai oe e uiga i le liuaina, talafeagai, ma le avea ma ni o. Faamolemole ia mafaufau foi ma le toto’a i mataupu faavae i tua atu o suiga i le faamatalaga o lo tatou faamoemoega ma tulaga manaomia o le kosi. Ia faaaoga ma le faautauta nei suiga i ala e musuia ai ma faamanuia ai o outou tagata a’oa’o uma.
Ma le mea mulimuli, ou te valaaulia outou ia faaauau pea ona tulimatai atu ia Iesu Keriso i a outou taumafaiga uma. Mafaufau ma le agaga tatalo pe mafai faapefea ona e aoao mai ia te Ia, aoao e mulimuli i Ana faataitaiga o le Faiaoga o Faiaoga, ma aoao e faalagolago atili i Lona alofa tunoa ma Lona alofa a o e taumafai malosi ia faamanuiaina i latou e te alofa i ai. Ou te molimau atu o Ia o le ala. I le suafa, o Iesu Keriso, amene.