![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F32%2Ff0%2F32f0ea123f6b64255c0aeec94a0d45b0213cda4e%2F32f0ea123f6b64255c0aeec94a0d45b0213cda4e.jpeg/full/!250,/0/default)
O Se Perofeta i le Laueleele: Faamamafa Faaperofeta o I Ai Nei i Talavou Matutua
Faasalalauga Faaletausaga a le S&I mo le 2023
27 Ianuari, 2023
O Le Faatomuaga
I o tatou faiaoga faalelotu, e fia momoli atu lo’u lotofaafetai i mea uma o outou faia e si’itia ai le autalavou ma talavou matutua i le Ekalesia atoa. Ua i ai ia te outou le lumanai moni o le Ekalesia i a outou vasega, ma e musuia pea a’u i le ala o loo outou auauna ma tausia ai au tagata aoga.
Ou te amata i lo’u aveina o outou faatasi ma a’u i se aafiaga sa ou maua i luga o le Tumutumu o Malata, o le vaega aupito maualuga e alu ai lau taavale i le va o le Aai o Sate Leki ma Rexburg, Idaho. A o ou malaga ai i se tofiga faale-Lotu, sa ou maua se uunaiga manino e toe faalogologo i le faigalotu a Peresitene Nelson mo talavou matutua sa faaigoaina o “Filifiliga mo le Faavavau.” Ina ua ou taunuu i le tumutumu, sa ou maua ni lagona manino se lua. Muamua, sa lofituina a’u i le lagona o le alofa mo talavou matutua o le Ekalesia. Lua, sa ou maua se lagona o le maofa i le vavega o le valaauina o se perofeta soifua e aoao nei talavou matutua i taimi faigata. Sa afe i tua la’u taavale e tusi i lalo uunaiga o le a tata’i i tala o le a ou faasoa atu i le asō.
Ua tatou ola i taimi ogaoga, ae ua folafola mai e le Alii, “O le a Ou tuu atu ia te outou se ata i mea uma, ina ia lē faaseseina outou; ona ua i ai Satani i le salafa o le laueleele, ma ua fealuai o ia e faasese i atunuu.”1 Ae pei ona sa aoao mai e Sister Wendy Nelson, e ui ina i ai Satani i le salafa o le laueleele, a ua i ai foi so tatou perofeta i le laueleele, ma e mafai ona tatou vaavaai atu ia te ia mo mea moni ma le manino i nei aso e gata ai.2
O le po nei, o le a ou faamamafaina autu faaperofeta ia na faamamafaina mai e perofeta, aemaise i talavou matutua o le Ekalesia. Afai ou te ta’ita’ia se kosi o le O Aoaoga a Perofeta Soifua i le isi semesa, o autu nei o le a taula i ai le silapasi. Po o le a lava le kosi patino o loo e aoao atu, ou te faamoemoe o le a outou faatagaina nei savali e tosina ai au mataupu aoaoina ma le ala tou te aoao atu ai ma auauna ia outou tamaiti a’oga.
O faamamafa faaperofeta o i ai nei e lima matou te mananao e te manatunatu i ai e aofia ai:
-
Ia iloa lou faasinomaga paia.
-
Utuvai mai le mana o Iesu Keriso ma au feagaiga.
-
Ia faamuamua le Atua, ma mulimuli i Lana perofeta.
-
Aoao atu upumoni ma le alofa.
-
Ma ia pulea lau molimau.
1. Ia Iloa Lou Faasinomaga Paia
Afai ou te taumafai ia malamalama i le faamamafa faaperofeta mai le perofeta e tusa ai ma talavou matutua i le taimi nei, o le a ou amata i lona faapotopotoina o talavou matutua i le lalolagi atoa ma lana savali sa faaautu i “Filifiliga mo le Faavavau.” E toatele talavou matutua i ona po nei o loo tautevateva ona latou te le malamalama i lo latou faasinomaga moni. Na fesili mai Peresitene Nelson:
“O ai oe?
“O le mea muamua lava ma le sili, o oe o se atalii ma se afafine o le Atua.
“Lua, i le avea ai ma se tagata o le Ekalesia, o oe o se tama o le feagaiga. Ma le tolu, o oe o se so’o o Iesu Keriso.”3
Matau e aoao mai Peresitene Nelson ma le lotomalamalama ma le alofa, ae e tumau lona aoao mai o le upumoni tutotonu e uiga i le faasinomaga paia. Faalogologo i se vaega lea mai lana saunoaga.
[Start video]
Peresitene Russell M. Nelson: “O loo i ai ni igoa valaau eseese atonu e taua tele ia te outou. Faamolemole aua ne’i malamalama sese mai ia te au. Ou te le o fai atu o isi faailoga ma igoa e iloa ai e le taua. E faigofie lava lau tala e leai se faailoga e tatau ona aveesea, suitulaga, pe faamuamua foi i lo nei faailoga tumau e tolu: ‘atalii/afafine o le Atua,’ ‘tama o le feagaiga,’ ma le ‘soo o Iesu Keriso.’
“Soo se igoa e iloa ai outou e le ogatusa ma nei faailoga autu e tolu o le a iu lava ina latou faatoilaloina outou. O isi igoa valaau o le a tou le fiafia ai i se taimi ona e le o ia i latou le mana e taitai atu ai outou e agai atu i le ola e faavavau i le malo selesitila o le Atua.”4
[End video]
O le faamamafa faaperofeta muamua mo talavou matutua ua matou faamamafaina, o le fesoasoani lea ia latou iloa lo latou faasinomaga paia. Ou te fautuaina atu malosi le saunoaga atoa a Peresitene Nelson i le “Filifiliga mo le Faavavau” e fai ma punaoa tutotonu ia te oe o se faiaoga faalelotu o loo galulue ma talavou matutua ma le autalavou o le Ekalesia.
2. Utuvai Mai le Mana o Iesu Keriso ma Au Feagaiga
Lua, ina ia faasaoina le faasinomaga paia e tatau ona tatou aoao a tatou talavou matutua e utuvai mai le mana o Iesu Keriso e ala i le tausia o a latou feagaiga. Na aoao mai Peresitene Nelson: “O mea uma o loo a’oa’oina i totonu o le malumalu, e ala i a’oa’oga ma e ala i le Agaga, e faateleina ai lo tatou malamalama ia Iesu Keriso. O Ana sauniga taua e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau. Ma ioe, oka so tatou manaomiaina o Lona mana i aso o i luma atu.”5
O le tausaga na te’a nei sa ou faia ai se faigalotu i le BYU sa faaigoa o le “Mauaina o le Filemu o Keriso i Taimi Faigata,” lea na ou ta’ua faafia ai Peresitene Nelson.6 Ina ua mae’a le faigalotu, sa fai mai se tasi o o tatou ta’ita’iulu, e fiafia i le upusii sa ou faaaogaina faafia mai ia Peresitene Nelson. Sa ou faamatala i ai e fa lava upusii sa ou faaaogaina, e talitutusa uma faaupuga.
Sa faaaogaina e Peresitene Nelson se fasifuaitau āilua, lea na ia talanoa ai i le itu agavale o faamatalaga taitasi e uiga i le faigata, matautia, popolega, ma fevesia’iga o aso e gata ai. I le itu taumatau o le fasifuaitau āilua, sa ia folafola mai ai ma le mautinoa ma le faamoemoe faapea e ala mai ia Iesu Keriso ma le tausiga o a tatou feagaiga e ala ia te Ia e mafai ai ona tatou faatoilaloina nei luitau. Ua ou faitauina e le i lalo ifo o le fitu nei fasifuaitau āilua i savali a Peresitene Nelson o konafesi aoao mai le taimi na avea ai o ia ma perofeta. Tatou vaavaai i le na o se lua o nei fasifuaitau mai lana saunoaga “O Le Malumalu ma Lou Faavae Faaleagaga.”
Upusii #1: “O’u uso e ma tuafafine pele, o aso nei e e gata ai. Afai e ao ia te oe ma a’u ona tetee atu i mea lamatia ma faatosinaga o loo agai mai, e taua tele le tofu maua e i tatou o se faavae faaleagaga mausali ua atia’e i luga o le papa o lo tatou Togiola, o Iesu Keriso.”7
Upusii #2: “Ua tautino mai e le Alii e faapea e ui i luitau faigata tele o nei aso, ae o i latou o ē atia’e o latou faavae i luga o Iesu Keriso, ma aoao i le auala e utuvai ai mai Lona mana, e lē manaomia ona lolo atu i lagona popolevale o lenei vaitau.”8
Toe fai atu, i faamatalaga uma ia e lua o loo amata le perofeta i le faailoaina o luitau o le a tatou feagai i aso e gata ai. Ona sosoo ai lea ma se folafolaga faapea e mafai ona tatou faatoilaloina nei luitau ma o latou popolega e o mai faatasi ai, pe a tatou liliu atu i le Faaola ma aoao e utuvai mai Lona mana.
Ina ua ou faatoa iloaina lenei mamanu, sa ou mafaufau o le faasino atu ia Iesu Keriso o lona uiga afai ou te taulaina la’u molimau i le Faaola, e mafai ona ou tatalia tofotofoga e oo mai i aso e gata ai. Ae, i se tulaga faateleina, ua ou talitonu ai foi o loo valaau mai Peresitene Nelson ia tatou faapei o le Faaola.
Atonu o le mea lea sa saunoa i ai Elder Jeffrey R. Holland ina ua ia uunaia i tatou ia “avea ‘o se tagata paia e ala i le Togiola a Keriso le Alii’” i lana savali i talavou matutua i le BYU.
[Start video]
Elder Jeffrey R. Holland: “Na aoao mai e le Tupu o Peniamina e faapea o se faamoemoega autu o le olaga faaletino—atonu o le faamoemoega autu lea o le olaga faitino—o le avea ma ‘se Tagata Paia e ala i le Togiola a Keriso le Alii,’ lea o le a manaomia ai i tatou—e pei ona ia saunoa mai ai—ia avea ‘e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai i mea uma ua silafia e le Alii e tatau ona faatiga ai i ona luga, e pei lava ona usitai atu se tamaitiiti i lona tama’ [Mosaea 3:19; faaopoopo le faamamafa].”9
[End video]
3. Ia Faamuamua le Atua, ma Mulimuli i Lana Perofeta
Ina ia fesoasoani i talavou matutua ia iloa lo latou faasinomaga paia ma utuvai mai le mana o Iesu Keriso, e tatau ona tatou aoao i latou e faamuamua le Atua ma mulimuli i Lana perofeta. E leai se isi mea na sili ona mamana le aoao mai ai e lenei savali nai lo le poloaiga a Peresitene Nelson ia “faamuamua le Atua.” E pei o le faatautaia o se faatalanoaga ma le Ekalesia atoa, e fesili mai le perofeta ia i tatou i fesili nei e ono:
-
“Pe o e loto e faamuamua le Atua i lou olaga?
-
O e loto e avea le Atua ma faatosinaga sili ona taua i lou olaga?
-
Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi?
-
Pe o le a e faatagaina Lona siufofoga ia faamuamua i lo se isi lava leo?
-
O e loto e faataga soo se mea o finagalo o Ia e te faia ia faamuamua i lo isi faamoemoega uma?
-
O e loto e tofatumoanaina lou loto i Lona finagalo?”10
I tausaga ua mavae, sa ou oo ai i le mea e uiga o le tuu patino ia faamuamua le Atua i lo’u olaga. I le mavae ai o se uluai matātā faaakatemia i le talafatai i sasae, na oo ina manino sa saunia e le Alii se ala e ese mo lo matou aiga lea o le a i’u ai ina ta’ita’i atu i matou i Rexurg, Idaho. I le taimi na ou tagitu’i ai i lo’u toalua, “Ou te lagona e pei a’u o le taulealea mauoa, ua na ona ou iloa le mutaaga o le faataoto, o lea o le a ou mulimuli ai i le ala o loo taitaiina ai i tatou.”
Atonu o le uiga faaalia aupito sili lea atonu sa ou filifilia. O le taeao lava na sosoo ai i se fonotaga faaleauta’ita’i a le siteki, sa talanoaina ai e se tasi o le au failauga le faataoto lava lea sa ou ta’ua i lo’u toalua i le po ua tuanai. Fai mai a ia sa ia lagona lava le salamo mo le taulealea mauoa faitulafono, e pei ona faaalia i le ata a Heinrich Hoffman o le faataoto. Ma sa ia faamatala ai le ala sa foliga ai e pei o loo tilotilo ese le taulealea mauoa faitulafono, e pei ua na o le pau le mea sa ia mafaufau i ai o mea na te lafoa’ia. O le taga tonu lava o le tilotilo ese, sa le mafai ai e ia ona vaai atu i se ala e sili atu lea sa faasino atu e le Faaola ia te ia. Uso e ma tuafafine, otaimi uma tatou te faamuamua ai le Atua i o tatou olaga, tatou te lafoa’ia ai lo tatou lava tagata natura mo se mea e sili mamao atu ona lelei ia Iesu Keriso.
O le mamanu o le faamuamua o le Atua i o tatou olaga e manaomia ai lo tatou sailia ma le mauaina o faaaliga faaletagata lava ia. Na aoao mai e Peresitene Nelson lenei mea i lana savali “Faaaliga mo le Ekalesia, Faaaliga mo o Tatou Olaga.”11 E oo mai le taitaiga a le lagi e le gata i lana tautua i le Ekalesia, ae i filifiliga i lona olaga i le mea e nofo ai, ana a’oga, o ai e faaipoipo i ai, o laga galuega faapolofesa, ma i lona avea ai ma matua. O le aoaoina o lenei mamanu o le mauaina o faaaliga, o le laasaga muamua lea o le faamuamua o le Atua i o tatou olaga. O le a fesoasoani ai foi i o tatou talavou matutua ia maua ma talia faaaliga latou te moomia ma o le a faamanuiaina ai i latou i lenei vaitau ogaoga.
4. Aoao Atu le Upumoni ma le Alofa
Afai na outou matauina le ala e aoao atu ai o tatou perofeta ma aposetolo, o le a outou matauina ai se mamanu o le aoao atu o upumoni, e oo lava i le feagai ai ma faitioga. Latou te faia lenei mea ma le alofa, agaalofa, ma le popole faaKeriso mo isi, ae o loo latou aoao atu pea upumoni ua poloaiina i latou e aoao atu. Na faaali mai e Peresitene Nelson lenei mamanu o le aoao atu o upumoni ma le alofa ina ua ia aoao mai le taua o le faasinomaga e faavavau i lana savali i talavou matutua i le lalolagi atoa.12 Na ia faia lenei mea ina ua ia aoao mai e uiga i le sootaga o le alofa ma tulafono a le Atua.13 Sa saunoa Peresitene Oaks e uiga i lenei tiutetauave i lana lauga i talavou matutua i le Kolisi o Ensign i le tausaga ua tuanai.
[Start video]
Peresitene Dallin H. Oaks: “O le faaalia o le faaaloalo e le faapea tatou te savavali ese mai ai mai o tatou talitonuga ma aoaoga faavae autu i le aiga ma lona taua i le ‘fuafuaga [a le Atua] mo le taunuuga e faavavau o Ana fanau, e pei ona faaalia i le Folafolaga i le Aiga.
“Faamolemole ia manatua le tiutetauave ua i ai ia i tatou, o uso o le Au Peresitene Sili ma le Korama a le Toasefululua, o ni Aposetolo a le Alii o Iesu Keriso. E tatau ona tatou folafola atu le upumoni e pei ona faaalia mai e le Atua. Matou te le o saoloto e piki ma filifili pe o a upumoni o le a matou talai atu ma puipuia.”14
[End video]
I lena lava lauga e tasi, sa faamatala ai e Peresitene Oaks auala e lima e mafai ona tatou aoao atu ai le upumoni ma le alofa:
-
Aloese mai faatulagaga soona fefinauai.
-
Alofa i isi, su’e tulaga e tutusa ai, tusa lava pe tatou te le ioeina.
-
Taofimau le upumoni, e oo lava i lo tatou aapa atu i isi.
-
Ia avea o se malamalama i le lalolagi.
-
Ma ia tumau ona taula ia Iesu Keriso.
O nisi o le a faaauau pea ona finau faapea o le alofa i isi e moomia ai lo tatou faamamasagia o le upumoni a le Atua. Peitai, matau le fautuaga a Peresitene Oaks e taofimau i le upumoni e oo lava i lo tatou aapa atu. I se isi faaupuga, e le o ni filifiliga faatautava. Faalogologo i le fautuaga a Elder Holland i lenei mataupu a o ia saunoa atu i faiaoga a le BYU e uiga i le taua o le faasa’oina o le paleni lenei.
[Start video]
Elder Holland: “E tatau ona tatou faaeteete o le alofa ma le lotomalamalama e le faaliliuina faapea o le le amana’iaina ma le faalauiloa. Po o le faapea o talitonuga ua talia ma le lotonuu i le mataupu faavae o le agaleaga po o le le faamaoni i tagata. E pei ona ou iloa, e lei i ai se taimi na taofia ai e Keriso Lona alofa mai soo se tasi, ae Na te lei fai atu lava i se tasi, ‘Ona ou te alofa ia te oe, ua tuusaunoaina oe mai le tausiga o a’u poloaiga.’ Ua nafa i tatou ma le taumafai e taia lena lava paleni maaleale moomia i o tatou olaga.”15
[End video]
A tatou faatuatuana’i i upumoni a le Atua, ua tatou faatua’oia moni lava lo tatou tomai e mafai ai ona faaali atu le alofa silisili i Ana fanau. Sa faamatala e Elder D. Todd Christofferson le mafuaaga i le autalavou matutua i le BYU:
“O le faamuamua o le poloaiga muamua e lē faaitiitia ai pe faatapulaaina ai lo tatou gafatia e tausia le poloaiga lona lua. I se isi itu, e faateleina ai ma faamalosia ai. O lona uiga tatou te faalauteleina lo tatou alofa e ala i le taula i le faamoemoega paia ma le mana. … O lo tatou alofa i le Atua e siitia ai lo tatou tomai e alolofa atoatoa ai i isi ma le atoatoa ona ua tatou faipaaga i le ute ma le Atua i le tausiga o Ana fanau.”16
5. Ia Pulea Lau Molimau
O le faamamafa faaperofeta mulimuli i talavou matutua o le a ou faamamafaina e fesootai ma le pulea o lau molimau. A e manao e mulimuli i le perofeta, matau mea na te ta’u faafia, ua’i atu ma le faaeteete pe a ia faaaogaina faaupuga e pei o le “Ou te aioi atu ia te outou.” I lana saunoaga i le konafesi aoao na faaigoa o le “Faatoilaloina o le Lalolagi ma Maua le Malologa,” na ta’ua ai e Peresitene Nelson: “Ou te tuuina atu i tagata o le Ekalesia atoa le poloaiga lava e tasi na ou tuu atu i o tatou talavou matutua ia Me talu ai. Sa ou augani atu ia i latou i lena taimi—ma aioi atu ia te outou i le taimi nei—ia pulea e oe lava ia lau lava molimau ia Iesu Keriso ma Lana talalelei.”17
Tatou faalogologo uma atu i lena lava poloaiga e pei ona sa tuuina atu i talavou matutua i lana saunoaga o le “Filifiliga mo le Faavavau.”
[Start video]
Peresitene Nelson: “Ou te augani atu ia te outou ia pulea lau molimau. Galue i ai. Umia. Tausi i ai. Faafailele ina ia tuputupu ae. Fafaga i upumoni. ’Aua ne’i faaleagaina i filosofia sese o alii ma tamaitai le talitonu ona e tuufesili lea pe aisea ua vaivai ai lau molimau.”18
[End video]
O le puleaina o lau molimau o lona uiga tatou te fautuaina talavou matutua ia taulima ma le faamaoni a latou fesili. O loo otooto atu se mamanu mo le taliina o fesili i le itulau o punaoa o le Atamai i Aoaoga Faavae a le S&I ua faaigoaina o le “Mauaina o le Malamalama Faaleagaga.” Sa talanoaina e Elder Lawrence E. Corbridge lenei autu, ma taua ai le eseesega i le va o fesili a tamaiti ma fesili a tagata matutua.19 O fesili a tamaiti o loo i le totonugalemu o se molimau. E aofia ai le iloaina o le Atua o lo tatou Tama, o Iesu o le Keriso, ma e moni le Tusi a Mamona. O fesili a tagata matutua e aofia ai fesili e uiga i auiliiliga o le talafaasolopito o le Ekalesia, autaunonofo, ma le pule o le perisitua. O fesili a tagata matutua e mafai ma e tatau ona tali, ae e le uma, ma e seāseā tau atu i se molimau e aunoa ma le talitonuga maumaututu ma fesili faavae muamua.
Sa faasoa mai e Elder Robert S. Wood lona lava ala o le taula i tali i fesili a tamaiti a o ia galue i fesili a tagata matutua.20 I se faigalotu na tuuina atu i tamaiti a’oga o le BYU-Idaho, sa faamatala ai e Elder Wood lona ala i le po atoa e faitau le Tusi a Mamona ma maua ai lana uluai molimau manino a o i ai pea o ia i le aoga maualuga. O le vaiaso na sosoo ai, sa ta’u atu ai ia te ia e se uo mai le aoga, sa ia maua se faamaoniga e le moni le Tusi a Mamona, ma ta’u mai ai se lisi umi o mea na tutupu e le tatau ona i ai i le tusi. Sa ta’u atu e Elder Wood i lana uo ua tuai tele o ia ma ua i ai sana molimau. I se isi faaupuga, ua uma ona maua lana tali i se uluai fesili. Ae na ia ofo atu e ave le lisi ma galue ai i fesili. Na vave ona foia nisi o na fesili, a o isi na manaomia ai se taimi umi.
I le taimi lea, sa auauna Elder Wood i le Ekalesia, sa faaipoipo i le malumalu, uma ona a’otauina, tausia lona aiga i le talalelei. I ni nai tausaga ina ua mavae lona valaauga mulimuli ane o se Fitugafulu o le Pulega Aoao, sa foia ai le talafaatusa mulimuli i lana lisi e se polofesa i le Iunivesite o Cornell. Pe mafai ona outou mafaufau pe ana faatalitali Elder Wood e tali fesili uma faatagata matutua a o lei agai atu i luma ma le faatuatua i ana uluai fesili?
Sa faamatala e Peresitene Nelson i o tatou talavou matutua le ala e taulima ai a latou fesili.
[Start video]
Peresitene Nelson: “Afai e i ai ni au fesili—ma ou te faamoemoe e i ai—saili ni tali faatasi ma manaoga faatauanau ia talitonu. Aoao mea uma e te mafaia e uiga i le talalelei ma ia mautinoa e te liliu atu i puna e faatumulia i upumoni mo le taitaiga. Ua tatou ola i le tisipenisione pe a ‘leai se mea e taofia’ [Mataupu Faavae ma Feagaiga 121:28]. O lea, o le a i ai le taimi o le a tali mai ai e le Alii a tatou fesili uma.”21
[End video]
Faaiuga
Uso e ma tuafafine, ua tatou ola i aso faigata.22 Ae ua saunia e le Alii se mamanu i mea uma ina ia le manaomia ai ona faaseseina i tatou. O se vaega o lena mamanu o le i ai o se perofeta i le laueleele e aoao i tatou i upumoni. Pe o tatou faalogo ea, ma pe o aafia ai le auala tatou te aoao atu ai ma auauna atu ai i a tatou tamaiti aoga?
O le po nei ua ou otootoina atu faamamafa faaperofeta e lima e tatau ona tatou mafaufau loloto i ai i la outou matafaioi o ni faiaoga faalelotu. O nei autu ma lauga faavae e faatatau i ai, o loo aotele atu i le laulau o i lalo:
Faamamafaga Faaperofeta o I Ai Nei mo Talavou Matutua |
Saunoaga Faavae |
---|---|
1. Ia iloa lou faasinomaga paia. |
Russell M. Nelson, “Filifiliga mo le Faavavau” (faigalotu i le lalolagi atoa mo le autalavou matutua, 15 Me, 2022), ChurchofJesusChrist.org |
2. Utuvai mai le mana o Iesu Keriso ma au feagaiga. |
Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93, 96 Jeffrey R. Holland, “A Saint Through the Atonement of Christ the Lord” faigalotu a le Iunivesite a Polika Iaga, 18 Ian., 2022), speeches.byu.edu |
3. Ia faamuamua le Atua, ma mulimuli i Lana perofeta. |
Russell M. Nelson, “Ia Faamuamua le Atua,” Ensign po o le Liahona, Nov. 2020, 92–95 Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 93–96 |
4. Aoao atu upumoni ma le alofa. |
Dallin H. Oaks ma Clark G. Gilbert, “Tutu Mausali ma le Alofa i le Folafolaina Atu o le Upumoni” (Faigalotu a le Kolisi o le Ensign, 17 Me , 2022), ensign.edu D. Todd Christofferson, “The First Commandment First Commandment” (faigalotu a le Iunivesite a Polika Iaga, 22 Mat., 2022), speeches.byu.edu |
5. Ia pulea lau molimau. |
Russell M. Nelson, “Filifiliga mo le Faavavau” (faigalotu i le lalolagi atoa mo le autalavou matutua, 15 Me, 2022), ChurchofJesusChrist.org Tagai Lawrence E. Corbridge, “Stand Forever” (faigalotu a le Iunivesite a Polika Iaga, 22 Ian., 2019), speeches.byu.edu Tagai Robert S. Wood, “Be Ye Transformed by the Renewal of Your Mind” faigalotu a le Iunivesite a Polika Iaga-Idaho, 13 Me, 2003), byui.edu/devotionals “Mauaina o le Malamalama Faaleagaga,” Atamai i Aoaoga Faavae a le S&I |
I le faailoaina o nei autu, sa matou taulai atu i le savali autu a le perofeta e taula ai, “Filifiliga mo le Faavavau.” O le tele o isi savali na tuuina atu i faatulagaga na saunoa tuusao atu ai perofeta ma aposetolo i talavou matutua i le Polokalama Faaleaoaoga a le Ekalesia aoao. O nei autu taitasi na faailoa mai e ala i se iloiloga faautauta ma peresitene o iunivesite o le CES, e aofia ai le taitai o le S&I, o Brother Chad Webb, faapea foi le taitaiga a le komiti faapitoa o le Aufaatonu o Aoga a le Ekalesia. Matou te uunaia outou e suesue i nei saunoaga faavae ua faasino i ai. Ia iloa i latou. Tuu i totonu o au aoaoga ma au mataupu aoaoina. E sili ona taua, ia faaaoga i le ala tou te tali atu ai i fesili ma auauna atu i manaoga o a outou tamaiti a’oga.
Ua ou iloa o loo ta’ita’ia i tatou e se perofeta a le Atua i nei taimi faigata. Tau ina ia tatou mulimuli i lenei fautuaga ma isi fautuaga faaperofeta o le a tatou saga maua pea lava o la’u tatalo lea i le suafa o Iesu Keriso, amene.