24:38

E Dua na Parofita ena Vanua: Veika e Vakabibitaka na Parofita vei ira na iTabagone Qase cake

Kakaburaki Vakayabaki ni S&I 2023

Elder Clark G. Gilbert

Ena Vitusagavulu

Vakaraubuka, Janueri 27, 2023

Ai Vakamacala Taumada

Vei kemuni na ivakavuvuli ena lotu, me’u vakaraitaka na noqu vakavinavinaka ena veika ko ni vakayacora tiko me ra laveti kina na itabagone kei na tabagone qase cake ena Lotu. Vakaidina sara, era sa tiko ena nomuni kalasi o ira na isausau vou ni Lotu, ka‘u sa vakauqeti ena sala ko ni veiqaravi ka kauwaitaki ira tiko kina na nomuni gonevuli.

Au tekivu ena noqu kauti kemuni vata kei au ena dua na ka sotavi ka noqu ena vulaimago ena Malad Summit, na delana cere duadua ni ko draiva mai Salt Lake City ki Rexburg, Idaho. Ena noqu lako tiko ena dua na ilesilesi ni Lotu, au a ciqoma e dua na uqe matata me’u rogoca tale na vosa nei Peresitedi Russell M. Nelson ena lotu ni tabagone qasecake ka vakatokai na “Digidigi me baleta na Tawamudu.” Ni’u cabeta na uluna, au a vakila e rua na vakila matata. A imatai, au a luvuci ena vakila na loloma baleti ira na itabagone qasecake ena Lotu. A ikarua, au vakila na vakila ni kurabui ena cakamana ni dua na parofita bula ka kacivi me vakavulici ira na itabagone qasecake oqo ena veigauna dredre. Au a vakelea na motoka me’u toboka na veivakauqeti ka na veimuataki sara ki na vosa kau na wasea kei kemuni nikua.

Eda bula ena gauna yavavala, ia sa tukuna na Turaga, , “Au na solia na vakarau ni ka kecega mo dou kakua kina ni vakacalai; io sa lako voli yani ko Setani ena loma ni vanua, ka sa lako yani me temaki ira na veimatanitu.”¹ Ia me vaka a vakatavulica o Sisita Wendy Nelson, ni sa lako yani ko Setani e loma ni vanua, e tu talega vei keda e dua na parofita ena vanua, eda rawa ni rai vua baleta na dina kei na matata ena veisiga emuri oqo.²

Yakavi nikua, au via vakaraitaka e lima na itoko vakaparofita ka ra vakabibitaka tiko na parofita kei na iapositolo, vakatabakidua vei ira na itabagone qasecake ena Lotu. Kevaka au a liutaka tiko e dua na vuli ni Vakatavuvuli nodra na Parofita Bula ena tabanivuli ka tarava, na itoko eso oqo era na lewe ni vuli. Se vaka cava na ituvaki ni vuli o vakavulica tiko, au nuitaka ni ko ni na vakatara na itukutuku eso oqo me na vakauqeta na nomuni ka ni vuli kei na ivalavala ni nomuni veivakavulici kei na veiqaravi vei ira na vuli,

Na lima na veika vakaliuci vaka parofita mo vakasamataka vakatitobu e oka kina na:

Mo kila na nomu ivakatakilakila vakalou.
Dreta na kaukauwa i Jisu Karisito kei na nomu veiyalayalati.
Laiva me qaqa na Kalou, ka muria na Nona parofita.
Vakavulica na dina ena loloma.
Mo taukena na nomu ivakadinadina.

1. Mo Kila na Nomu iTutu Vakalou.

Kevaka au tovolea me’u kilamatata veivakamatatataki vakaparofita mai vua na parofita me baleta na itabagone qasecake, au na tekivu ena nona soqoni ni vuravura raraba vou vei ira na itabagone qasecake kei na nona itukutuku vakatokai “Digidigi me baleta na Tawamudu.” E levu vei ira na itabagone qasecake era kunedredre tiko baleta ni ra sega ni kilamatata na nodra itutu dina. A taroga o Peresitedi Nelson:

“Ocei O Iko?

“Me imatai ka liu duadua, oya ni ko luve ni Kalou.

“iKarua, oya ni ko lewe ni Lotu ko sa dua na gone ni veiyalayalati. iKatolu, ko sa dua na tisaipeli i Jisu Karisito.”³

Raica e veivakatavulici o Peresitedi Nelson ena vakilavata kei na loloma, ia e vakavulica ga na uto ni dina baleta na itutu vakalou. Rogoca na vakaibalebale emuri mai na nona vosa.

[Tekivutaka na vidio]

Peresitedi Russell M. Nelson: “E vica na ivolakabi e rawa ni bibi vei iko, e dina ga. Yalovinaka kua ni tauri au cala. Au sega ni tukuna tiko ni vei vakacacavu kei na ivakatakilakila eso e sega ni yaga. Au tukuna wale ga ni sega ni dua na ivakatakilakila ena biuta tani, sosomitaka, se vakabibitaki cake mai na tolu na vakacacavu oqo: ‘luve ni Kalou,’ ‘luve ni veiyalayalati, ka ‘tisaipeli i Jisu Karisito.’

“Ke dua na ivakatakilakila ka sega ni veiwekani kei na tolu na vakacacavu oqo ena vuni lomabibi vei iko. Eso na ivolakabi ena vakatuburarawa vagauna vei iko baleta ni sega vei ira na kaukauwa me muataki iko ki na bula tawamudu ena vuravura vakasiletieli ni Kalou.”⁴

[Mua ni vidio]

Na imatai ni ivakabibi vakaparofita baleti ira na itabagone qasecake keimami vakadreta tiko me na vukea nodra kila nodra itutu vakalou. Au cauraka vakaukauwa na vosa kece nei Peresitedi Nelson ena “Digidigi me baleta na Tawamudu” me uto ni ivurevure vei iko ni ko dauveivakatavulici ni lotu cakacaka tiko kei ira na itabagone qasecake kei na itabagone ena Lotu.

2. Dreta mai na Kaukauwa i Jisu Karisito kei na Nomu Veiyalayalati.

iKarua, me taqomaka na itutu vakalou meda vakavulici ira noda itabagone qasecake mera dreta na kaukauwa i Jisu Karisito ena maroroi ni veiyalayalati. E vakavulica o Peresitedi Nelson: “Na veika kece e vakavulici e valetabu, mai na ivakasala kei na Yalo, e vakalevutaka na noda kilai Jisu Karisito vinaka. Na Nona cakacaka vakalotu bibi sa vauci keda Vua ena veiyalayalati tabu ni matabete. Ia, ni da maroroya na noda veiyalayalati, sa solia vei keda na Nona kaukauwa veivakabulai, veivaqaqacotaki. Io, eda sa gadreva sara na Nona kaukauwa ena veisiga ni mataka.”⁵

Ena yabaki sa oti au a vosa ena lotu ni BYU ka vakatokai na “Kunea na Vakacegu i Karisito ena Gauna ni Veivakararawataki,” ka’u cavuti Peresitedi Nelson vakavuqa kina.⁶ Ni oti na lotu, e dua na iliuliu ni vuli a tukuna ni talei vua noqu cavuta na vosa mai vei Peresitedi Nelson. Au vakamacalataka ni va na vakacacavu duidui au a taurivaka, ka vu mai na vatavata vata ga.

A vakayagataka o Peresitedi Nelson na matavosa drua, ka mai na imawi ni vosa yadua a vosa kina baleta na dredre, rerevaki, lomabibi, kei na veicoqacoqa ena veisiga emuri oqo. Ena yasa imatau ni drua, a cavuta ena yalodei kei na nuinui ni ena vuku i Jisu Karisito kei na noda maroroya na noda veiyalayalati vei Koya eda rawa ni ulabaleta na dredre oqori. Au wilika e sega ni lailai mai na vitu na drua oqori mai na nona itkutuku eso ni koniferedi raraba o Peresitedi Nelson mai na gauna e yaco kina me parofita. Me da raica mada e rua ga oqori mai na nona vosa “Na Valetabu kei na Nomu Yavu Vakayalo.”

Vakacacavu dua: “Kemuni na taciqu kei na ganequ lomani, oqo na iotioti ni gauna. Kevaka me daru na vorata na vei ka rarawa ena veisiga ni mataka kei na oca, sa ka bibi me tiko na noda dui yavu vakayalo tudei e taracake tu ena vatu ni noda Dauveivueti, o Jisu Karisito.”⁷

Vakacacavu rua: “Sa kaya na Turaga se cava ga na veibolebole vou nikua, o ira sa tara nodra yavu vei Jisu Karisito, ka sa vulica me rawata na Nona kaukauwa, ena sega ni rawai ena veika rarawa duatani nikua.”⁸

Yaco tale, ena vosa e rua sa tekivuna na parofita ena nona raica na dredre eda sotava ena veisiga emuri. E qai muria o koya ena dua na iyalayala ni na rawa ni da ulabaleta na dredre oqori kei na kena lomabibi veiwekani ni da vuki vua na iVakabula ka vulica me dreta na Nona kaukauwa.

Ena imatai ni gauna au raica kina na iwalewale oqo, au nanuma ni vakaibalebale oya vei Jisu Karisito e kena ibalebale ni kevaka au kelea na noqu ivakadinadina vua na iVakabula, au na rawa ni vorata na veivakatovolei ka na lako tiko mai ena iotioti ni veisiga. Ia, e vakalevu, au vakabauta talega ni kacivi keda tiko o Peresitedi Nelson meda vakataka na iVakabula.

E rairai a ka a vosataka tiko o Elder Jeffrey R. Holland ni a tukuna meda veisau meda “yaco me ‘dua na Yalododonu mai na Veisorovaki i Karisito na Turaga’” ena nona vosa vei ira na itabagone qasecake e BYU eliu ena yabaki oqo.

[Tekivutaka na vidio]

Elder Jeffrey R. Holland: “A vakatavulica na Tui o Penijamini ni dua na inaki bibi ni bula vakayago—de rairai na inaki bibi ni bula vakayago, o ya meda yaco meda ‘dua na Yalododonu mai na Veisorovaki i Karisito na Turaga,’ ka na gadreva meda—a qai tomana o koya ni kaya—“vaka na gonelailai, talairawarawa, yalomalua, yalomalumalumu, dauvosota, dauloloma, ka talairawarawa ki na veika kece e raica na Turaga ni yaga me yaco vua, me vaka na gone sa talairawarawa vua na tamana” [Mosaia 3:19; vakaikuritaki].”⁹

[Mua ni vidio]

3. Laiva me Qaqa na Kalou, ka Muria na Nona Parofita

Me vukei ira na itabagone qasecake mera kila na nodra itutu vakalou ka dreta na kaukauwa i Jisu Karisito, e dodonu meda vakavulici ira talega mera biuta me liu na Kalou ka muria na Nona parofita. E sega ni dua na vanua e vakatavuvulitaki vakaukauwa cake kina na itukutuku oqo mai na ivakaro nei Peresitedi Nelson me “qaqa duadua ga na Kalou.” Me vaka a caka veivakatarogi tiko ki na Lotu raraba, a tarogi keda na parofita ena ono na taro oqo:

“O sa tuvakarau beka mo laiva me qaqa tikoga na Kalou ena nomu bula?
O sa tu vakarau beka mo laiva na Kalou me dau veivakayarayarataki bibi duadua ena nomu bula?
Ko na vakatara beka na Nona vosa, na Nona ivakaro, kei na Nona veiyalayalati me veivakayarayarataki ena veika o vakayacora e veisiga?
Ko na vakatara beka na Domona me liu duadua mai vei ira kece na kena vo?
O sa tu vakarau beka mo laiva na veika cava ga e gadreva o Koya mo cakava, me bibi duadua mai vei ira na nomu veisasaga kecega?
O sa tu vakarau beka mo laiva me sa duavata na lomamu kei na Lomana?”¹⁰

Ena vuqa na yabaki sa oti, au vakila na cava me’u laiva na Kalou me qaqa ena noqu bula. Ni oti na ilakolako vakavuli eliu ki na baravi ena tokalau, e yaco me sa matata mai ni na Turaga e sa vakarautaka na sala duatani ki na noqu matavuvale ka na muataki keitou ki Rexburg, Idaho. Ena ivakatakevi au lelevaka vei watiqu, “Au vaka na tamata vutuniyau, ia, au kila na icavacava ni talanoa vakatautauvata oqo, kau na vakamuria tikoga na salatu eda sa liutaki tiko kina.”

Oqo e sega sara ni ituvaki ni yalo vinaka duadua au rawa ni digitaka. Ena mataka ka tarava ena dua na bose ni iliuliu ni iteki, e dua ka vosa kina a veitalanoataka na vosa vakatautauvata vata kau a tukuna vei watiqu ena bogi sa sivi. E kaya ni luvuci vakalevu me baleta na cauravou iliuliu vutuniyau ena droini ni vakatautauvata nei Heinrich Hoffman. A vakamacalataka o koya na kena irairai na cauravou iliuliu vutuniyau ni rai tani yani me vaka ni vakasamataka tiko ga na ka ena vakasuka. Na ivalavala sara ga ni nona rai tani e vakuwai koya me raica na sala vinaka cake ka dusia tiko vua na iVakabula, Na veigauna eda laiva me qaqa duadua na Kalou ena noda bula eda sa solia tani na noda bula vakayago me vakaisosomitaki ena dua na ka vinaka sara vei Jisu Karisito.

Na ivakarau ni noda laiva me qaqa na Kalou e gadreva talega meda vakasaqara ka ciqoma na ivakatakila. E vakatavulica o Peresitedi Nelson ena nona itukutuku “iVakatakila ki na Lotu, iVakatakila ki na Noda Bula.”¹¹ Na idusidusi nei lomalagi e sega walega ni lako mai ena nona veiqaravi ni Lotu ia ena nona digidigi ni bula ena vanua me tiko kina, nona vuli, o cei me vakawatitaka, nona cakacaka, ni nona bula vakaitubutubu. Na vulici ni ivakarau ni ciqomi ni ivakatakila yadua vakaoqo e sa imatai ni kalawa ni laiva me qaqa na Kalou ena noda bula. Ena vukei ira talega na noda itabagone qasecake mera kunea ka ciqoma na ivakatakila era gadreva ka na vakalougatataki ira ena gauna bibi ni vakatulewa.

4. Vakavulica na Dina ena Loloma

Kevaka ko dau sarava na sala era veivakatavulici kina na noda parofita kei na iapositolo, o na raica e dua na ivakarau ni vakatavulica na dina, ena mata mada ga ni vakalelewa. Era cakava oqo ena loloma, vakilavata, kei na kauwai va Karisito vei ira na tani, ia era vakatavulica tikoga na dina ka ra a vakaroti me ra vakatavulica. E vakaraitaka o Peresitedi Nelson na ivakarau oqo ni vakatavulica na dina ena loloma ni a vakatavulica na bibi ni itutu vakalou ena nona itukutuku e vuravura raraba vei ira na itabagone qasecake.¹² E kitaka oqo ni a vakavakatavulica baleta na veiwekani vei rau na loloma kei na lawa ni Kalou.¹³ A vosa ena vuku ni itavi oqo o Peresitedi Dallin H. Oaks ena nona vosa vei ira na itabagone qasecake ena Ensign College ena yabaki sa oti.

[Tekivutaka na vidio]

President Dallin H. Oaks: “Na vakaraitaka na vakarokoroko e sega ni kena ibalebale mo lako tani mai na nomu vakabauta kei yavu ivakavuvuli ki na matavuvale kei na bibi ni ‘ituvatuva ni Kalou ki na iyacoyaco tawamudu nodra na Luvena’ me vaka e vakatakilai ena iVakaro ni Matavuvale.

“Yalovinaka ni nanuma na itavi e neimami na lewe ni Mataveiliutaki Taumada kei na Kuoramu ni Le Tinikarua ni keimami iApositolo ni Turaga ko Jisu Karisito. Sa dodonu meda talaucaka na dina me vaka sa vakaraitaka na Kalou. Keimami sega ni galala me tomika ka digia na dina keimami vunautaka ka taqomaka.”¹⁴

[Mua ni vidio]

Ena vosa vata oya, a vakamacalataka o Peresitedi Oaks e lima na sala e rawa ni da vakavulica kina ena loloma.

Levea na ituvaki eso ni veisaqasaqa.
Lomani ira na tani, kunea na vanua veiwekani, ena gauna mada ga eda duidui kina.
Taura dei na dina, ni o dolele tiko mada ga vei ira na tani.
Mo dua na rarama ki vuravura.
Ka me nomu itakele o Jisu Karisito.

Eso era na veibataka ni loloma vei ira na tani e gadreva meda vunia na dina ni Kalou. Ia raica na ivakasala nei Peresitedi Oaks meda taura na dina ena noda dolele mada ga. Ena dua tale na kena itukutukuni, era sega ni digidigi veisaqasaqa oqo. Vakarogoca na ivakasala nei Elder Holland ena ka oqo ena nona vosa vei ira na qase kei ira na vakailesilesi ni BYU ena bibi ni kena yacovi na ivakarau donu.

[Tekivutaka na vidio]

Elder Holland: “Me ivakaraitaki, me da qarauna na loloma kei na vakilavata me kakua ni vakadewataki me veivakadonui kei na veitaqomaki. Se na vakabauta levu kei na lomadina ki na ivakavuvuli me kua ni vakadewataki me yaloca se tawadina vei ira na tamata. Me vaka au sa kila rawa, a sega vakadua ni tarova na Karisito mai vua e dua na tamata na Nona loloma, Ia a sega talega ni bau kaya o Koya vua e dua, ‘Baleta niu lomani iko, o sa vakuwai kina mai na nomu talairawarawa ki na Noqu vunau.’ Eda sa vakacolati ena noda tovolea me da tura na vakatautauvata kacivi veinanumi ena noda bula.”¹⁵

[Mua ni vidio]

Ni da sega ni kauwaitaka na dina ni Kalou, eda yalana tiko na noda rawata me da vakaraitaka na loloma cecere duadua vei ira na Luvena. E vakamacalataka o Elder D. Todd Christofferson na vuna vei ira na itabagone qasecake e BYU:

“Noda vakaliuca tiko na imatai ni vunau e sega ni kena ibalebale ni yalana se vakalailaitaka na noda rawa ni muria na ikarua ni ivunau. Ena kena veibasai, ena vakalevutaka ka vaqaqacotaka. E kena ibalebale ni da vakatorocaketaka na noda loloma ena noda vakaiyaqataka ena inaki kei na kaukauwa vakalou. … Na noda lomana na Kalou ena laveta cake na noda rawata me da lomani ira vakalevu cake na tani ka vakataucokotaki baleta ni da sa veitokani vakaidina kei na Kalou ena nodra qaravi na Luvena.”¹⁶

5. Ka Taukena na Nomu iVakadinadina.

Na iotioti ni vakabibitaki vakaparofita vei ira na itabagone qasecake au vakabibitaka e semati ki na nomuni taukena na nomuni ivakadinadina. Kevaka o via muria na parofita, vakaraica na ka e tokaruataka, ka vakarorogo vakavinaka ni vakayagataka na vosa me vaka “Au vakamasuti kemuni.” Ena nona vosa ena koniferedi raraba ka kena ulutaga “Vakamalumalumutaki Vuravura ka Kunea na Vakacegu,” a kaya o Peresitedi Nelson: “Au solia vei ira na lewe ni Lotu raraba na itavi vata ga au a solia vei ira na noda itabagone qasecake ena Me sa oti. Au a uqeti ira ena gauna oya—kau masuti kemuni oqo—moni karona na nomuni ivakadinadina kei Jisu Karisito kei na Nona kosipeli.”¹⁷

Me da vakarorogo ki na ilesilesi vata ga a soli vei ira na itabagone qase cake ena nona vosa “Digidigi me tawamudu.”

[Tekivutaka na vidio]

Peresitedi Nelson: “Au vakamasuti kemuni mo ni cavuta na nomuni ivakadinadina. Cakacakataka. Taukena. Kauwaitaka. Bucina me na rawa ni tubu. Vakania ena dina. Kakua ni vakadukadukalitaka ena nodra ivakavuvuli lasu na tagane kei na yalewa tawavakabauta ka qai vakataroga se cava sa malumalumu kina na nomu ivakadinadina.”¹⁸

[Mua ni vidio]

Na nomu taukena na nomu ivakadinadina sa kena ibalebale meda vakayaloqaqataki ira na itabagone qasecake mera sotava ena yalodina na nodra taro. E dua na iwalewale ni kena saumi na taro e tuvai koto ena tabana ni ivurevure ni S&I iVakavuvuli Vakaivunau kei na tabana ni vurevure kena ulutaga na “Ciqomi ni Kilaka Vakayalo.” E vakamacalataka o Elder Lawrence E. Corbridge na ulutaga oqo, ka raica talega mai na duidui e tiko ena taro bibi kei na veitaro tale eso.¹⁹ Na taro bibi eso era tiko ena lomadonu ni dua na ivakadinadina. E oka kece kina na kilai ni Kalou ko Tamada, sa Karisito ko Jisu, ka dina na iVola i Momani. Na ikarua ni taro e oka kina na taro me baleta na matailalai ni itukutuku makawa ni Lotu, vakamau vakalevu, kei na dodonu ni matabete. Na ikarua ni taro e rawa ka dodonu me saumi, ia era sega ni vakaikuritaki, ka dau yaco me muataki ki na dua na ivakadinadina ka sega ni veivakadeitaki kei na taro taumada.

A wasea o Elder Robert S. Wood na nona sala me vakaiyaqataki kina isau ni taro taumada ena nona cakacaka mai na ikarua ni taro.²⁰ Ena dua na lotu a soli vei ira na gonevuli mai BYU–Idaho, a vakamacalataka o Elder Wood ni yadra tiko ena bogi taucoko ni wilika na iVola i Momani ka rawata na imatai ni nona ivakadinadina matata ni sa dina. Ena macawa ka tarava a tukuna vua e dua na itokani mai koronivuli ni tiko vua na ivakadinadina ni sega ni dina na iVola i Momani, ka kaya e dua na ituvatuva ni cala ena ivola. E tukuna o Elder Wood vei rau nona itokani ni sa rui bera o koya ka sa tiko rawa e dua nona ivakadinadina. Ena dua tale na kena itukutukuni, sa tiko rawa vua na isau ni dua na taro taumada. Ia a tukuna me taura na ituvatuva ka cakacakataka na veitaro o ya. Eso vei ira era sa wali vakatotolo sara, ka so era taura e dua na gauna.

Ena gauna oqo, a veiqaravi tiko ena Lotu o Elder Wood, a vakamau ena valetabu, rawata nona vuli, ka susuga nona matavuvale ena kosipeli. E vica na yabaki na nona kacivi me Vakaitutu Raraba ni Vitusagavulu, sa walia na iotioti ni vosavakacacataki ena nona lisi oya e dua na parofesa, ena Cornell University. E rawa beka ni o raitayaloyalotaka kevaka a waraka tu o Elder Wood me sauma na ikarua ni taro ni bera ni toso yani ki liu ena vakabauta?

E vakamacalataka o Peresitedi Nelson kivei ira na noda itabagone qasecake na sala me ra sotava kina na nodra vakatataro.

[Tekivutaka na vidio]

Peresitedi Nelson: “Kevaka e tiko na nomu taro—ka’u nuitaka ni tiko—vakasaqara na kena isau ena gagadre dina mo vakadinata. Vulica na veika kece o rawata me baleta na kosipeli, ka vakadeitaka mo gole ki na ivurevure vakasinaiti ni dina me veidusimaki. Eda bula tiko ena itabagauna me na ‘sega ni bureitaki e dua na ka’ [Vunau kei na Veiyalayalati 121: 28]. O koya gona, ena yaco mai na gauna, ena sauma mai na Turaga na noda taro kece sara.”²¹

[Mua ni vidio]

iTinitini

Kemuni na taciqu kei na ganequ, eda bula tiko ena gauna vakadomobula.²² Ia sa vakarautaka na sala ena veika ka kecega na Turaga me kua ni rawa nida vakacalai kina. E tiki ni ivakarau oqori na nona tiko e dua na parofita ena vanua me vakavulica vei keda na dina. E vakarorogo tiko beka, e tara tiko beka na ivakarau ni noda veivakavulici ka veiqaravi vei ira na noda gonevuli?

Ena bogi nikua au sa tuvalaka kina e lima na veika bibi vakaparofita keitou vinakata mo ni vakananuma ena nomu ilesilesi vaka dauveituberi vakalotu. Na ikau oqo kei na nodra itikotiko vakayavu era sa umani vata ena teveli e tarava:

Na Veika Vakabibitaki vaka Parofita me Baleti Ira na iTabagone Qasecake	iUlutaga Yavutaki
1. Mo kila na nomu itutu vakalou.	Russell M. Nelson, “Choices for Eternity” (lotu e vuravura raraba ni itabagone qase cake, 15 ni Me, 2022), ChurchofJesusChrist.org
2. Vakayagataka na kaukauwa i Jisu Karisito kei na nomu veiyalayalati.	Raica na Russell M. Nelson, “Na Valetabu kei na Nomu Yavu Vakayalo,” Liaona, Nove. 2021, 93–96. Jeffrey R. Holland, “Na Yalododonu Mai na Veisorovaki i Karisito na Turaga” (Brigham Young University devotional, Janu. 18, 2022), speeches.byu.edu
3. Me qaqa na Kalou ka muria na Nona Parofita.	Russell M. Nelson, “Me Qaqa Duadua Ga na Kalou,” Ensign se Liaona, Nove. 2020, 92–95. Russell M. Nelson, “iVakatakila ki na Lotu, iVakatakila ki na Noda Bula,” Ensign se Liaona, Me 2018, 93–96
4. Vakavulica na dina ena loloma.	Dallin H. Oaks and Clark G. Gilbert, “Stand Fast with Love in Proclaiming Truth” (Ensign College devotional, Me 17, 2022), ensign.edu D. Todd Christofferson, “The First Commandment First” (Brigham Young University devotional, Maj. 22, 2022), speeches.byu.edu
5. Taukena na nomu ivakadinadina.	Russell M. Nelson, “Choices for Eternity” (lotu e vuravura raraba ni itabagone qase cake, 15 ni Me, 2022), ChurchofJesusChrist.org Raica na Lawrence E. Corbridge, “Stand Forever” (Brigham Young University devotional, 22 ni Janu. 2019), speeches.byu.edu Raica na Robert S. Wood, “Be Ye Transformed by the Renewal of Your Mind” (Brigham Young University–Idaho devotional, Me 13, 2003), byui.edu/devotionals “Rawati na Kila Vakayalo,” S&I Bulataki ni Vunau

Ni da raica rawa na iulutaga oqo, eda sa vakanamata kina nona itukutuku iyaqa na parofita, “Digidigi me baleta na Tawamudu.” E vuqa vei ira na itukutuku a soli ena vanua era vosa vakadodonu kina na parofita kei na iapositolo vei ira na itabagone qasecake ena iVakarau ni Vuli ni Lotu. Na ulutaga yadua oqo era sa vakatakilakilataki mai na nodra railesuva vakavinaka kei ira na peresitedi ni univesiti ni VVL, oka kina na iliuliu ni S&I, o Baraca Chad Webb, ka vakakina na veiliutaki ni komiti e cake ni Matabose ni Vuli ni Lotu. Keitou vakauqeti iko mo vulica na iulutaga yavutaki eso oqo Kilai ira. Curumaki ira ki na nomu veivakavulici kei na lewenivuli. Ka bibi cake, cokoti ira vata ki na ivakarau o sauma kina na taro ka qarava na nodra gagadre na nomu gonevuli.

Au kila ni dua na parofita ni Kalou e liutaki keda ena gauna dredre oqo. Me da muria na ivakasala eso oqo kei na veivakasala talega vaka parofita tale eso eda na ciqoma tikoga sa noqu masu ena yaca i Jisu Karisito, emeni.