ចក្ខុវិស័យ និង តុល្យភាព

ដោយ អែលឌើរ ហ្គែរី អ៊ី ស្ទីវ៉ែនសុន នៃកូរ៉ុមនៃពួកសាវកដប់ពីរនាក់ និង ស៊ីស្ទើរ លីសា ស្ទីវ៉ែនសុន ។

ការប្រជុំធម្មនិដ្ឋានសម្រាប់យុវមជ្ឈិមវ័យទូទាំងពិភពលោក• ថ្ងៃទី ២ ខែ ឧសភា ឆ្នាំ២០២១• មជ្ឈមណ្ឌល អ្នកត្រួសត្រាយផ្លូវ

អែលឌើរ ហ្គែរី អ៊ី ស្ទីវ៉ែនសុន ៖ប្អូនៗប្រុសស្រីវ័យក្មេងជាទីស្រឡាញ់របស់ខ្ញុំ លីសា និងខ្ញុំមានចិត្តសោមន្សដើម្បីស្វាគមន៍ប្អូន មកកាន់ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យនេះ ។ កាលយើងចាប់ផ្តើម យើងសូមនាំមកនូវការផ្ដាំផ្ញើដ៏កក់ក្តៅ និងស្មោះសររបស់ប្រធាន រ័សុល អិម ណិលសុន និងគណៈប្រធានទីមួយចំពោះប្អូនៗ ។ ពួកលោកស្រឡាញ់ប្អូនៗ ហើយយើងក៏ស្រឡាញ់ប្អូនៗដែរ ហើយយើងគោរព និងគាំទ្រដល់ពួកលោកជាមួយគ្នា ។

ស៊ីស្ទើរ លីសា ស្ទីវ៉ែនសុន ៖ឥឡូវនេះ ពួកយើងចូលរួមជាមួយប្អូនៗមកពីទីកន្លែងដ៏អស្ចារ្យ និងពិសេសខ្លាំងណាស់ក្នុងប្រវត្តិសាស្រ្តរបស់ពួកយើងក្នុងនាមជាពួកបរិសុទ្ធថ្ងៃ ចុងក្រោយ ។ ហើយខ្ញុំពិតជាមានន័យថា « ទីកន្លែង »ពិតមែន ។

អែលឌើរ ស្ទីវ៉ែនសុន យើងនៅទីនេះនៅមជ្ឈមណ្ឌលអ្នកត្រួសត្រាយផ្លូវដែលបានឧទ្ទិសឆ្លងថ្មីក្បែរវិមាននេះជាឧទ្យានបូជនីយដ្ឋាន ជាទីកន្លែងនៅតាមវាលទំនាបខាងលើ ទីក្រុង សលត៍លេក រដ្ឋ យូថាហ៍—ជាទីកន្លែងដែលអបអរសាទរសេចក្តីប្រកាសដ៏ឆ្ងាយដោយប្រធាន ព្រិកហាំ យ៉ង់ថា« នេះ គឺទីកន្លែង »^១បន្ទាប់ពីដំណើរដ៏លំបាកជាមួយក្រុម អ្នកត្រួសត្រាយផ្លវដំបូងគេជិត ១៧៥ ឆ្នាំទៅហើយ ។

ស៊ីស្ទើរ ស្ទីវ៉ែនសុន ៖ពួកបរិសុទ្ធថ្ងៃចុងក្រោយដ៏នឿយហត់ ខ្សោះកម្លាំងពីខ្លួនទាំងនេះ បានភៀសខ្លួនចេញពីការធ្វើទុក្ខបុកម្នេញយ៉ាងខ្លាំង ដើម្បីមករស់នៅទីនេះនៅជ្រលងភ្នំនេះ ។ សូមស្រមៃពីរូបភាពនៃជ្រលងភ្នំ សតល៍ លេក ដែលបានរង់ចាំពួកគេ ។ វាលខ្សាច់ដ៏ធំល្វឹងល្វើយដែលជាកន្លែងសម្បូរទៅដោយដើមសាហ្គីប្រុះស៍ ដែលជាភស្តុតាងថា ការតាំងទីលំនៅនៅទីនេះច្បាស់ជាមិនងាយស្រួលឡើយ ។

អែលឌើរ ស្ទីវ៉ែនសុន ៖ទោះជាយ៉ាងណាក្តី ពួកគេមានពរជ័យដោយចក្ខុវិស័យសួគ៌ាដែលមិនអាចយល់បាន ដែលគាំទ្រដល់ការព្យាករនៅក្នុងគម្ពីរសញ្ញាចាស់អេសាយថា ព្រះអម្ចាស់នឹង « លើកទង់ជ័យសម្រាប់ពួកសាសន៍ដែលនៅទីឆ្ងាយ » ។^២ ពួកបរិសុទ្ធដ៏ស្មោះត្រង់ទាំងនេះនឹងទទួលបានសេចក្តីសុខសាន្ត និងគោលបំណងជាថ្មីម្តងទៀត ដោយមានចក្ខុវិស័យខាងដំណឹងល្អកើនឡើងខ្ពស់ជាងកំពូលភ្នំ ដែលពួកគេបានឡើងដល់ជ្រលងភ្នំសលត៍ លេក ទៅទៀត ។

ស៊ីស្ទើរ ស្ទីវ៉ែនសុន ៖ពួកអ្នកត្រួសត្រាយផ្លូវទាំងនេះ និងអស់អ្នកដែលបានមកដល់បន្ទាប់ពីពួកគេ បានបង្កើតជាប្រវត្តិសាស្រ្តដោយចារទុកកន្លែងនេះនៅលើវាលខ្សាច់នេះ ។ ព្រះបានប្រទានពរដល់ពួកគេ កាលដែលការប្រមូលផ្ដុំអ៊ីស្រាអែលបានចាប់ផ្តើមឡើង ។

អែលឌើរ ស្ទីវ៉ែនសុន ៖សូម្បីតែថ្ងៃនេះ ស្មារតី និងចក្ខុវិស័យអ្នកត្រួសត្រាយផ្លូវដូចគ្នានោះ អាចមើលឃើញនៅក្នុងគ្រប់ពួកបរិសុទ្ធថ្ងៃចុងក្រោយនៅគ្រប់ទីកន្លែងក្នុងពិភពលោកនេះ ។

កាលពីប៉ុន្មានសប្តាហ៍មុន ប្រធាន អិម រ័សុល បាឡឺដ ដែលជាប្រធានស្តីទីនៃកូរ៉ុមនៃពួកសាវកដប់ពីរនាក់ បានឧទ្ទិសឆ្លងមជ្ឈមណ្ឌលអ្នកត្រួសត្រាយផ្លូវថ្មីនេះ ។

នៅទីនេះ សមាជិក និងក្រុមគ្រួសារអាចមក ហើយទទួលយកសមិទ្ធិផលដ៏មហិមារបស់ពួកបរិសុទ្ធថ្ងៃចុងក្រោយនៅពេលខិតខំពុះពារប្រទល់នឹងការលំបាកយ៉ាងខ្លាំង ។ លទ្ធភាពដើម្បីទទួលបានជោគជ័យគឺមានតិចតួចណាស់ ។ ពួកអ្នកត្រួសត្រាយផ្លូវបានអំពាវនាវរកព្រះអម្ចាស់ទាំងថ្ងៃទាំងយប់ កាលដែលពួកគេចម្រើនទៅមុខដើម្បីដាំដុះអាហារ យកទឹកពីអន្លង់ភ្នំ សង់ផ្ទះ និងជម្រក សាលារៀន និងសាលាប្រជុំនានា ហើយព្រមទាំងព្រះវិហារបរិសុទ្ធផងដែរ ។

ស៊ីស្ទើរ ស្ទីវ៉ែនសុន ៖អ្វីដែលពួកគេបានធ្វើ វាស្ទើរតែមិនអាចស្រមៃបានទេ ។ ចក្ខុវិស័យដ៏ទេវភាព—ដែលបានបំផុសគំនិតដោយព្រះអម្ចាស់ដល់ពួកព្យាការីដែលនៅរស់—ដោយការប្រទានពរជ័យដល់ជីវិតនៃបុត្រាបុត្រីដ៏ជម្រើសរបស់ទ្រង់ ដើម្បីនាំមកនូវព្រះរាជបំណងរបស់ទ្រង់ ។

អែលឌើរ ស្ទីវ៉ែនសុន ៖ដូចដែលប្អូនបានឃើញនៅប៉ុន្មានគីឡូម៉ែត្រពីកន្លែង ដែលខ្ញុំកំពុងឈរនៅមជ្ឈមណ្ឌលអ្នកត្រួសត្រាយផ្លូវនេះ គឺជាដំបូលកញ្ចក់ដែលអាចមើលឃើញបូជនីយដ្ឋាន នេះជាទីកន្លែងដ៏ត្រឹមត្រូវ ។ ហើយនៅក្រោមនោះ យើងមានទីក្រុងមួយដែលមានភ្លើងភ្លឺចែងចាំ ដែលពួកគេបានចាប់ផ្ដើមសង់យូរឆ្នាំមកហើយ ។ ហើយលើសពីនោះ ប្អូនៗមានទស្សនៈដ៏ទូលំទូលាយមួយ—ជា ចក្ខុវិស័យមួយ ប្រសិនបើប្អូនមាន—ដែលមើលទៅទិសខាងលិច និងជើងមេឃដែលមានថ្ងៃលិច ។ ទស្សនៈដ៏ល្អនេះ រួមនឹងការយល់ដឹងរបស់យើងអំពីអតីតកាល វាពង្រីក និងប្រាប់ពី ទស្សនវិស័យរបស់ពួកយើងអំពីចក្ខុវិស័យរបស់ពួកអ្នកត្រួសត្រាយផ្លូវ ។ វាក៏អាចដើរតួជាការប្រៀបធៀបមួយដើម្បីជួយធ្វើឲ្យចក្ខុវិស័យរបស់ពួកយើងផ្ទាល់ក្នុងដំណឹងល្អកាន់តែស៊ីជម្រៅ ហើយដឹកនាំយើង នៅពេលពួកយើងប្រឈមនឹងការសម្រេចចិត្ត និង ឧសគ្គនៅក្នុងជីវិតយើង ។ នៅប៉ុន្មានថ្ងៃនៃការប្រកាសរបស់ព្យាការីថា « នេះជាទីកន្លែងដ៏ត្រឹមត្រូវ »^៣នោះចក្ខុវិស័យសម្រាប់ព្រះវិហារបរិសុទ្ធ ទីស្នាក់ការកណ្តាលសាសនាចក្រ និងកន្លែងមួយដើម្បីក្លាយជាទង់ជ័យសម្រាប់ពួកសាសន៍នានា បានចាប់ផ្ដើមជំហានដំបូងរបស់ខ្លួនទៅរកការពិត ។

ដូច្នេះនៅល្ងាចនេះ យើងនឹងប្រើអតីតកាល ជាចក្ខុវិស័យនៃបុព្វបុរសត្រួសត្រាយផ្លូវរបស់ពួកយើង ដើម្បីជួយយើងឲ្យទទួលបានចក្ខុវិស័យដ៏ច្បាស់មួយសម្រាប់អនាគតរបស់យើង ។ ពាក្យពេចន៍ដ៏បំផុសគំនិតរបស់វីនស្ដុន ឆឺតឈីល ទំនងជាមានទំនាក់ទំនងជាពិសេសសម្រាប់ការសន្ទនារបស់យើងនាល្ងាចនេះ ៖ កាលណាយើងក្រឡេកមើលទៅក្រោយកាន់តែឆ្ងាយ នោះយើងក៏អាចមើលទៅមុខកាន់តែឆ្ងាយដែរ ។^៤

ស៊ីស្ទើរ ស្ទីវ៉ែនសុន ៖ពិតណាស់ យើងកំពុងប្រឈមនឹងភាពមិនប្រាកដប្រជានៅក្នុងពិភពលោកនេះ ។ បន្ទាប់ពីជួបជំងឺរាតត្បាតដែលមិនធ្លាប់មានពីមុនមក ជិតមួយឆ្នាំកន្លះមកនេះ តើមានអ្វីខ្លះទៀតនាពេលអនាគត ? ពួកយើងម្នាក់ៗតម្រូវឲ្យមាននូវចក្ខុវិស័យដ៏ទេវភាព និងការដឹកនាំពីសួគ៌ាដូចគ្នា ដែលពួកបរិសុទ្ធពីជំនាន់មុនបានដកពិសោធន៍ នៅពេលយើងមើលឆ្ពោះទៅរកអនាគតរបស់យើង ។

អែលឌើរ ស្ទីវ៉ែនសុន ៖ប្អូនអាចមានអារម្មណ៍មិនប្រាកដថា តើប្អូនគួរត្រូវទៅផ្លូវមួយណា ។ ប្អូនអាចឱបក្រសោបឲ្យជាប់ទៅនឹងក្ដីស្រមៃនៃការបម្រើបេសកកម្ម ការទទួលបានការអប់រំ និងការមានអាជីពមួយ ។ ឬ ប្អូនអាចគិតអំពីការស្រឡាញ់មនុស្សម្នាក់ ការរៀបការ និងមានគ្រួសារមួយ ព្រមទាំងការមើលឃើញពីពរជ័យនៃព្រះវិហារបរិសុទ្ធកើតមានចំពោះប្អូន និង មនុស្សដែលប្អូនស្រឡាញ់ ។ ឬ ប្រហែលជាប្អូនមានគ្រួសារដ៏អស់កល្បរបស់ប្អូន ហើយឥឡូវនេះកំពុងដកពិសោធន៍នូវឧបសគ្គនៃការចិញ្ចឹមបីបាច់កូនតូចៗ ។

គោលដៅចុងក្រោយបង្អស់របស់យើងគឺដូចគ្នា ៖ គឺដើម្បីរីកចម្រើននៅលើផ្លូវនៃសេចក្ដីសញ្ញា ដោយរៀបចំខ្លួនយ៉ាងស្មោះត្រង់សម្រាប់ភាពតម្កើងឡើង ។ ទស្សនវិស័យមួយក្នុងដំណឹងល្អផ្ដល់ជាចក្ខុវិស័យនានាដល់ប្អូន និងខ្ញុំឲ្យមើលឃើញផ្លូវនោះយ៉ាងច្បាស់ ។

ស៊ីស្ទើរ ស្ទីវ៉ែនសុន ៖នៅពេលនិយាយអំពីការបន្តនៅលើផ្លូវនៃសេចក្តីសញ្ញា ប្រធាន រ័សុល អិម ណិលសុន បានថ្លែងថា « គន្លឹះគឺការធ្វើ និងរក្សាសេចក្ដីសញ្ញាពិសិដ្ឋ ។ យើង ជ្រើសរើស រស់នៅតាម និងរកចម្រើននៅលើផ្លូវនៃសេចក្ដីសញ្ញារបស់ព្រះអម្ចាស់ ហើយបន្តនៅលើផ្លូវនោះ ។ វាពុំមែនជាផ្លូវលំបាកទេ ។ វាគឺជា ផ្លូវទៅរកអំណរពិតនៅក្នុងជីវិតនេះ និងជីវិតដ៏នៅអស់កល្បជានិច្ចបន្ទាប់ពីជីវិតនេះ » ។^៥

អែលឌើរ ស្ទីវ៉ែនសុន ៖ហេតុដូច្នេះហើយក្តីសង្ឃឹមរបស់យើងគឺ ដើម្បីចែកចាយបទពិសោធន៍ផ្ទាល់ខ្លួនមួយចំនួនរបស់ពួកយើង ដែលអាចផ្តល់ជាការណែនាំកាលប្អូនស្វែងរកតម្រូវការទាំងអស់នៅក្នុងជីវិតរបស់ប្អូន ដើម្បីជួយប្អូនឲ្យឆ្ពោះទៅមុខដោយមានចក្ខុវិស័យ និង តុល្យភាព ។

« មកមកពួកបរិសុទ្ធ »—ដែលសម្តែងដោយគ្រួសារ បឺនណឺ ៖

មក​មក​ពួក​បរិសុទ្ធ​កុំ​ខ្លាច​ឡើយ​ណា
តែ​ខិតខំ​ដោយ​សារទរ ។
ថ្វី​បើ​ដំណើរ​នេះ​លំបាក​របៀប​ណា
ព្រះគុណនឹង​ជួយ​លើក​ទ្រ ។

គ្រាន់​បើ​ជាង​បើ​យើង​ខំ​ឧស្សាហ៍
កម្ចាត់​ចោល​កង្វល់​យើង​នៅ​រុញ​រា
ធ្វើ​បែប​នេះ​ទើប​ចិត្ត​នឹង​រីករាយ—
ស្រួល​ទាំងអស់ ! ស្រួល​ទាំងអស់ !

ម្ដេច​ក៏​យើង​ទួញ​នឹង​ថា​ជីវិត​ពិបាក ?
មិន​មែន​ទេ ត្រូវ​ទាំង​អស់ 
ម្ដេច​ក៏​យើង​គិត​ចង់​បាន​រង្វាន់​ដ៏​ធំ 
បើ​យើង​នៅ​គេច​ចម្បាំង ?

ចូរ​ពាក់​គ្រឿង​សឹក​មាន​ចិត្ត​ក្លាហាន
ព្រះ​យើង​មិន​ដែលបោះបង់​ចោល​យើង​ឡើយ
បន្តិច​ទៀត​យើង​នឹង​មាន​រឿង​ប្រាប់ —
ស្រួល​ទាំងអស់ ! ស្រួល​ទាំងអស់ !

យើង​នឹង​រក​ឃើញ​កន្លែង​ដែល​ព្រះ​រៀប​ទុក
នៅ​ទិស​ខាង​លិច​ដ៏​ឆ្ងាយ
គឺ​ជា​កន្លែង​ដែល​គ្មាន​អ្នក​ណា​បញ្ឈឺ ឬ​កំហែង
ពួក​បរិសុទ្ធ​បាន​ពរ ។

ចូយើងរ​បន្លឺ​សំឡេង​សរសើរ
តម្កើងថ្វាយ​ដល់​ព្រះ​នឹង​រាជា​យើង
យើង​នឹង​បន្លឺពាក្យនេះ​ឲ្យ​ខ្លាំង —
ស្រួល​ទាំងអស់ ! ស្រួល​ទាំងអស់ !

ហើយបើយើងស្លាប់មុនពេលដំណើរយើងចប់

ថ្ងៃសប្បាយ ! ស្រួលទាំងអស់ !

អែលឌើរ ស្ទីវ៉ែនសុន ៖ថ្ងៃសប្បាយ ! ស្រួលទាំងអស់ ! »^៦តាមការពិតនោះ វាគឺជាសេចក្តីថ្លែងការណ៍ ពី ចក្ខុវិស័យដ៏អស្ចារ្យមកពីពួកអ្នកត្រួសត្រាយផ្លូវនៅសម័យមុន ។ ចក្ខុវិស័យរបស់ពួកគេដែលថា « ស្រួលទាំងអស់ » ខណៈដែលជួបឧបសគ្គ និងទុក្ខលំបាកគឺពិតជាអាចធ្វើទៅបាន ដោយសារតែទស្សនវិស័យរបស់ពួកគេនៅក្នុងដំណឹងល្អ ។

យើងអាចចំណាយពេលមួយម៉ោងដើម្បីនិយាយអំពី ទស្សនវិស័យដែលមនុស្សមួយចំនួនហៅថាជា « សិល្បៈនៃការមើលឃើញរឿងដែលមនុស្សដទៃមើលមិនឃើញ » ។^៧ វាដឹកនាំទៅរកសំណួរមួយ ដែលប្អូនគ្រប់រូបសួរខ្លួនឯងនៅពេលខ្លះថា « តើនៅបច្ចុប្បន្ននេះ ខ្ញុំមើលឃើញអ្វីខ្លះសម្រាប់ខ្លួនឯងនៅប៉ុន្មានឆ្នាំខាងមុខ ? តើខ្ញុំ បានទៅដល់ទីណាខ្លះ ? ហើយតើខ្ញុំ នឹងទៅទីណា ? »

ស៊ីស្ទើរ ស្ទីវ៉ែនសុន ៖ពេលខ្លះ យើងគ្រាន់តែដឹងថា ជាមួយនឹងទស្សនវិស័យនៃដំណឹងល្អ និង អំណោយទាន នៃព្រះវិញ្ញាណបរិសុទ្ធ នោះយើងមាននូវចក្ខុវិស័យ កាន់តែប្រសើរឡើងអំពីអ្វីដែលអាចកើតមាន ។ រឿងបែបនេះនឹងកើតឡើង នៅពេលប្អូនខិតខំនៅក្នុងកិច្ចការផ្នែកអប់រំ ឬ អាជីពបច្ចុប្បន្នរបស់ប្អូន ទោះបីជាប្អូនប្រហែលជាកំពុងតែគិតពីអ្វីដែលប្អូនចង់ធ្វើក៏ដោយ ។

អែលឌើរ ស្ទីវ៉ែនសុន ៖ឥឡូវនេះ ខ្ញុំបានឃើញថា ខ្ញុំធ្លាប់មានអារម្មណ៍បែបនេះ នៅពេលខ្ញុំចាប់ផ្ដើមអាជីពការងារ ។ ខ្ញុំបានចាប់ផ្ដើមជីវិតអាជីពការងារខ្ញុំជាមួយនឹងមិត្តភក្ដិម្នាក់កាលពីក្មេង ដោយចាប់ផ្ដើមមុខរបរមួយកាលនៅរៀននៅសាកលវិទ្យាល័យ ដោយនាំចូលគ្រឿងធ្វើអំណោយមកពីអាស៊ី ។ លុះ ៣០ ឆ្នាំក្រោយមក ក្រុមហ៊ុនរបស់យើងបានផ្លាស់ប្តូរទាំងស្រុង និង ពង្រីកខ្លួនយ៉ាងធំ ។ ជារឿយៗ មានគេតែងតែសួរយើងនូវសំណួរមួយថា « នៅពេលលោកចាប់ផ្ដើមអាជីវកម្មរបស់លោក តើនេះគឺជាចក្ខុវិស័យរបស់លោកមែនទេ ? » ពិតណាស់ចម្លើយដ៏ខ្លីគឺថា វាមិនមែនទាំងស្រុងនោះទេ ។

ចក្ខុវិស័យត្រូវការ ការកែតម្រូវជាទៀងទាត់ម្ដងហើយម្ដងទៀត ។ ការចាប់ផ្ដើមអាជីវកម្មជាក្រុមហ៊ុនតូចមួយ ដែលនាំចូលគ្រឿងអំណោយស្ពាន់ ហើយបន្ទាប់មកបានពង្រីកខ្លួនទៅជាក្រុមហ៊ុនផ្គត់ផ្គង់សម្ភារហាត់ប្រាណដ៏ធំមួយ តម្រូវឲ្យមានសំណាងខ្លាំង និងការកែតម្រូវយ៉ាងច្រើនចំពោះចក្ខុវិស័យរបស់យើងនៅចន្លោះពេលនោះ ។ ហើយដូច្នេះ ការបោះបង់ចោល និងការដាក់ផែនការថ្មី ការបង្កើតថ្មី និងការកែតម្រូវគឺជាភាពរឹងមាំមួយ ពុំមែនជាភាពទន់ខ្សោយនោះទេ ។

ស៊ីស្ទើរ ស្ទីវ៉ែនសុន ៖ទោះជាយ៉ាងក្ដី នេះគឺជាចំណុចដែលយើងចង់ចង្អុលបង្ហាញពីអត្ថប្រយោជន៍ដ៏សំខាន់ ដែលយើងចែកចាយនៅក្នុងការស្វែងរកចក្ខុវិស័យរបស់យើង ។ ដោយសារប្អូនមានចំណេះដឹងអំពីដំណឹងល្អ ដូចជាពួកអ្នកត្រួសត្រាយផ្លូវដែរ នោះប្អូនមានពរដោយមានទស្សនវិស័យនៃដំណឹងល្អ ។ អត្ថប្រយោជន៍របស់ប្អូនគឺ ការមើលឃើញដំណើររបស់ប្អូននៅក្នុងជីវិតរមែងស្លាប់នេះមកពីទស្សនៈ សួគ៌ាផ្ទាល់ ។

អែលឌើរ ស្ទីវ៉ែនសុន ៖ទស្សនវិស័យដ៏អស់កល្ប ឬដំណឹងល្អផ្ដល់ភាពច្បាស់លាស់ដ៏មានប្រយោជន៍ ដែលមនុស្សដទៃមិនចូលចិត្ត—សូម្បីតែនៅក្នុងបញ្ហាខាងសាច់ឈាមអំពីការអប់រំ និងអាជីពក្ដី ។ យើងសូមបង្ហាញពីបញ្ហានេះដោយការប្រើរូបភាព ជាជាងការប្រើពាក្យសម្ដី ។

ដូច្នេះ យើងសូមស្មើប្អូនឲ្យមើលរូបភាពនេះ ។ ឥឡូវ តើប្អូនមើលឃើញអ្វី ? តើប្អូនអាចដឹងថា រូបភាពនេះពិពណ៌នាពីអ្វីដែរឬទេ ?

ឥឡូវនេះ តើទស្សនវិស័យថ្មីនេះជួយផ្ដល់ភាពច្បាស់លាស់ដល់ប្អូនដែរឬទេ ? តើមើលឃើញតែប៉ុណ្ណឹងទេ មែនទេ ? តើប្អូនគិតយ៉ាងណាដែរ ? សូមមើលទៅតាមលំដាប់លំដោយ នៅពេលរូបភាពនេះលាតត្រដាងឡើង ដូច្នេះ សូមមើលឲ្យជិត ។

អែលឌើរ ស្ទីវ៉ែនសុន ៖ឥឡូវតាមរយៈលំហាត់ដ៏សាមញ្ញនេះ ប្អូនអាចមើលឃើញ—យ៉ាងច្បាស់—លើសពីអ្វីដែលនៅពីមុខប្អូននៅពេលនេះ ។ ចក្ខុវិស័យរបស់ប្អូនត្រូវបានពង្រីកកាន់តែធំ នៅពេលប្អូនទៅកាន់តែឆ្ងាយ ។

ពាក្យចាស់ដ៏ប្រពៃស្រដៀងគ្នានេះនៅក្នុងគម្ពីរសុភាសិតចែងថា « គ្រាណាដែលឥតមានការបើកសម្តែង នោះបណ្តាជនរមែងលែងទប់ចិត្ត » ។^៨

គោលការណ៍ពិតនេះត្រូវបានពិពណ៌នាបន្ថែមទៀតនៅក្នុងជំនាន់របស់យើងដោយប្រធាន អិម រ័សុល បាឡឺដ នៅពេលលោកបានថ្លែងថា « អស់អ្នកដែលសម្រេចបានកិច្ចការច្រើនបំផុតក្នុងពិភពលោកនេះ គឺជាអ្នកដែលមានចក្ខុវិស័យសម្រាប់ជីវិតខ្លួន » ។^៩ ឱ វាជាការពិតម៉្លេះ !

ចក្ខុនវិស័យខាងវិញ្ញាណដែលបានមកពីទស្សនវិស័យរបស់យើងនៃដំណឹងល្អ ផ្តល់ឲ្យនូវការយល់ដឹងអំពីអាទិភាពទាំងអស់នៃជីវិត ។ ចក្ខុវិស័យនេះវាជួយយើងឲ្យសម្របតាមអាទិភាពទាំងនោះ ហើយរក្សាវាឲ្យមានមានតុល្យភាពត្រឹមត្រូវ ។ នេះហើយជាហេតុផលដែលយើងមើលឃើញទំនាក់ទំនងដ៏ស្អិតរមួតមួយរវាងចក្ខុវិស័យ និង តុល្យភាព ។

ខ្ញុំចង់ចែកចាយជាមួយប្អូននូវគោលការណ៍នៃតុល្យភាពនេះ ដោយភ្ជាប់ទៅនឹងបទពិសោធន៍ផ្ទាល់ខ្លួនដែលខ្ញុំមាន ។

មិត្តខ្ញុំម្នាក់ដែល មាននូវជំនាញ់ និងបទពិសោធន៍ល្បីល្បាញនៅក្នុងអាជីពរបស់គាត់ ក៏ធ្លាប់ជាអ្នកបើកឧទ្ធម្ភាគចក្រដែរ ។ នៅថ្ងៃដ៏ក្ដៅមួយនារដូវស្លឹកឈើជ្រុះ គាត់បានទូរសព្ទមក ហើយប្រាប់យើងថាគាត់នឹងធ្វើដំណើរតាមឧទ្ធម្ភាគចក្រទៅ កាន់ទីក្រុង សលត៍ លេក ហើយបានសួរថាតើដៃគូអាជីវកម្មខ្ញុំ និងខ្ញុំចង់ឲ្យគាត់ដឹកយើងទៅចង់ចុះចតនៅដីរបស់យើងលើភ្នំដែរឬទេ ។

ដើម្បីទៅដល់ទីនោះ បើជិះឡានត្រូវចំណាយពេលជាងពីរម៉ោង ។ ប៉ុន្ដែ បើគាត់ដឹកយើងតាមឧទ្ធម្ភាគចក្រទៅទីនោះ វាចំណាយពេលតែ ១៥ នាទីប៉ុណ្ណោះ ។ ដូច្នេះ យើងបានសម្រេចចិត្តថាទៅ ។

វាគឺជាថ្ងៃដ៏ស្រស់ស្អាតដើម្បីធ្វើដំណើរតាមឧទ្ធម្ភាគចក្រ ។ យើងអាចមើលឃើញពណ៌ចម្រុះនៃស្លឹកឈើដែលជ្រុះ កាលយើងចាប់ផ្ដើមចុះចត ។ មិនដល់មួយនាទីទៀតទេ យើងនឹងចុះដល់ដី ស្រាប់តែស្លាបចក្រនៅកន្ទុយឧទ្ធម្ភាគចក្របានដំណើរការខុសប្រក្រតី ។ វាធ្វើឲ្យឧទ្ធម្ភាគចក្រវិល ដែលលែងគ្រប់គ្រងបាន ។ នេះគឺជាស្ថានភាពដ៏ធ្ងន់ធ្ងរ ។

ជាសំណាងល្អសម្រាប់ពួកយើង ការបណ្តុះបណ្តាលរបស់អ្នកបើកឧទ្ធម្ភាគចក្រក្នុងការចុះចតបន្ទាន់គឺស្ទើរតែជារឿងធម្មតាចំពោះគាត់ ។ គាត់បានដឹងថា បើយើងចុះចតដោយប្រើផ្នែកខាងមុខ ឬដោយប្រើផ្នែកខាងក្រោមនៃឧទ្ធម្ភាគចក្រទៅមុន នោះយើងអាចស្លាប់បាន ។

ក្នុងស្ថានភាពដែលឧទ្ធម្ភាគចក្រវិលខ្ញាល់ដោយមិនអាចគ្រប់គ្រងបាន នោះភ្លាមៗនោះ គាត់បានបង្វែរឧទ្ធម្ភាគចក្រយ៉ាងប៉ិនប្រសប់ទៅចំហៀង ហើយវាបានធ្លាក់ចុះទៅដល់ដី ។

ប្រេងក៏ហៀរ ហើយភ្លើងក៏ឆេះចេញពីម៉ាស៊ីនមក ។ គាត់អាចបិទម៉ាស៊ីន ហើយយើងចេញពីឧទ្ធម្ភាគចក្រមុនពេលវាផ្ទុះ ។ តាមរយៈសកម្មភាពរបស់អ្នកបើកឧទ្ធម្ភាគចក្រ និងព្រះហស្តរបស់ព្រះអម្ចាស់នោះយើងត្រូវបានប្រទានពរឲ្យរួចផុតគ្រោះថ្នាក់ពីការធ្លាក់ឧទ្ធម្ភាគចក្រនោះ ។

ខ្ញុំបានរៀនច្រើនអំពីឧទ្ធម្ភាគចក្រចាប់តាំងពីថ្ងៃនោះមក ។ បទពិសោធន៍ របស់ យើង នៅ ក្នុង ការធ្លាក់ឧទ្ធម្ភាគ ចក្រ នោះ គឺ ជា លទ្ធផល នៃ អតុល្យភាព មួយ រវាង ធាតុ ដ៏ សំខាន់ ដែល ធ្វើ ឲ្យ ឧទ្ធម្ភាគចក្រ នោះ ហោះហើរ នៅ លើ អាកាស បាន ។ នៅពេលសម្រេចបានតុល្យភាពចំណោមល្បឿននៃស្លាបចក្រធំ ស្លាបចក្រកន្ទុយ និងទំហំមុំ នោះការធ្វើដំណើរតាមឧទ្ធម្ភាគចក្រជារឿងដ៏គួរឲ្យរីករាយ ។ បើមិនដូច្នោះទេ វាគឺជារឿងគួរឲ្យរន្ធត់ណាស់ ! ខ្ញុំអាចថ្លែងទីបន្ទាល់ផ្ទាល់ខ្លួនអំពីការណ៍នោះបាន ។

សូមយើងចំណាយពេលមួយភ្លែត ដើម្បីបំបែកធាតុសំខាន់ៗទាំងទាំនេះឲ្យកាន់តែលម្អិត ។

ធាតុទីមួយគឺជាស្លាបចក្រធំ ។ ការវិល និងប្រវែងស្លាបចក្របង្កើតជាកម្លាំងលើកឡើង និងកម្លាំងបង្វិល ។ ទោះយ៉ាងណា កម្លាំងបង្វិលដែលបង្កើតដោយស្លាបចក្រធំត្រូវតែ ត្រូវគ្នាមានតុល្យភាព ឬ បើមិនដូច្នោះទេ ឧទ្ធម្ភាគចក្រនឹងវិលដោយមិនអាចគ្រប់គ្រងបានឡើយ ។

ស៊ីស្ទើរ ស្ទីវ៉ែនសុន ៖នេះជាមូលហេតុដែលឧទ្ធម្ភាគចក្រមានស្លាបចក្រកន្ទុយ ។ វា បង្កើត ជា ការផ្ទុយ នឹង កម្លាំង បង្វិល ស្លាប ចក្រ ធំ ។ ល្បឿន ស្លាបចក្រ ធំ ត្រូវ បាន គ្រប់គ្រង ដោយ អ្នក បើក ឧទ្ធម្ភាគចក្រ តាម រយៈ ការគ្រប់គ្រង ល្បឿន ដោយ ប្រើ ជើង ម្ខាង ។ ល្បឿន ស្លាប ចក្រ កន្ទុយ ត្រូវ បាន គ្រប់គ្រង ដោយ ជើង ម្ខាង ទៀត ។ ការកែតម្រូវជាទៀតទាត់ចំពោះល្បឿនស្លាបចក្រទាំងពីរគឺជារឿងចាំបាច់បំផុត ។

ជាថ្មីម្ដងទៀត បើមិនធ្វើដូច្នេះទេ នោះវានឹងគ្មានលទ្ធផលល្អទេ ។

អែលឌើរ ស្ទីវ៉ែនសុន ៖៖ ពិតហើយ ឥឡូវ បន្ទាប់ទៀត គឹ ចង្កឹះលេខ ។ ចង្កឹះលេខ គ្រប់គ្រង មុំ របស់ ឧទ្ធម្ភាគចក្រ ដែល ជា ថ្នូរ មក វិញ វា គ្រប់គ្រង ទិសដៅ លទ្ធភាព បត់បែន និង លំនឹង របស់ ឧទ្ធម្ភាគចក្រ វា ដំណើរការ យ៉ាង ស៊ីសង្វាក់ ជា មួយ នឹង ស្លាបចក្រ ធំ និង ស្លាបចក្រ កន្ទុយ ។ អ្នកបើកឧទ្ធម្ភាគចក្រប្រើចង្កឹះលេខនោះដោយដៃស្ដាំរបស់គាត់ ។

ជាចុងបញ្ចប់ ទម្ងន់ផ្ទុក និងទំហំមុំរបស់ឧទ្ធម្ភាគចក្រកំណត់នូវល្បឿន និងថាមពលដែលតម្រូវឲ្យមានសម្រាប់ស្លាបចក្រធំ និងស្លាបចក្រកន្ទុយ ។

ស៊ីស្ទើរ ស្ទីវ៉ែនសុន ៖នៅ ពេលធាតុទាំងអស់នេះមានភាពស៊ីសង្វាក់គ្នា នោះតុល្យភាពមានភាពត្រឹមត្រូវ ។ ស្លាបចក្រធំ ស្លាបចក្រកន្ទុយ ចង្កឹះលេខ ទម្ងន់ និងទំហំមុំ—វាទប់ទល់នឹងកម្លាំងទំនាញផែនដី ។

តើប្អូនអាចភ្ជាប់ការធ្វើដំណើរតាមឧទ្ធម្ភាគចក្រដ៏ស្រស់ ស្អាត តែស្មុគស្មាញ នេះ ទៅ នឹង ជំពូក ថ្មី នៃ ជីវិត ផ្ទាល់ ខ្លួន និងអាជីពរបស់ប្អូនដោយរបៀប ណា ?

អែលឌើរ ស្ទីវ៉ែនសុន ៖ខ្ញុំសូម ណែនាំ នូវ គំនិត មួយ ចំនួន ដែល បាន បំផុស ដោយ សារលិខិត ដែល ប្រធាន ហ្គរដុន ប៊ី ហ៊ិងគ្លី បាន ថ្លែង នៅ ក្នុង សន្នសីទ សម្រាប់ ថ្នាក់ដឹកនាំ ដែល ខ្ញុំ បាន ចូលរួម កាល ពី ច្រើនឆ្នាំ កន្លង ទៀត ។ វានឹងបង្កើត ទំនាក់ទំនងនេះសម្រាប់ប្អូន ។

លោកបានរៀបរាប់ថា « យើងម្នាក់ៗមានការទទួលខុសត្រូវបួនយ៉ាង ។ ទីមួយ យើងមានការទទួលខុសត្រូវចំពោះគ្រួសារយើង ។ ទីពីរ យើងមានការទទួលខុសត្រូវចំពោះនិយោជកយើង ។ ទីបី យើងមានការទទួលខុសត្រូវចំពោះកិច្ចការរបស់ព្រះអម្ចាស់ ។ ទីបួន យើងមានការទទួលខុសត្រូវលើខ្លួនយើង » ។^១០

ដោយការប្រើការប្រៀបធៀបដូចគ្នាអំពីតុល្យភាព តាមរយៈអន្ដរកម្មនៃកត្តាសំខាន់ៗនៃឧទ្ធម្ភាគចក្រ ចូរយើងក្រឡេកមើលទៅការទទួលខុសត្រូវទាំងបួនយ៉ាងតាមរបៀបដូចគ្នានេះ ។

ស៊ីស្ទើរ ស្ទីវ៉ែនសុន ៖យើងចាប់ផ្ដើមជាមួយនឹងគេហដ្ឋាន និងគ្រួសារ ដែលជាកត្តាដ៏សំខាន់នៅក្នុងជីវិតរបស់យើង ។ វាគឺជារឿងដ៏សំខាន់ដែលប្អូនមិនត្រូវព្រងើយកន្តើយនឹងគ្រួសាររបស់ប្អូនឡើយ ។ « គ្មានអ្វីដែលមានតម្លៃជាងគ្រួសាររបស់ប្អូនទេ ។… វាគឺជាទំនាក់ទំនងគ្រួសារ ដែលប្អូននឹងនាំយកទៅក្នុងជីវិតក្រោយទៀត » ។^១១ នៅប៉ុន្មានឆ្នាំមកនេះ ថ្នាក់ដឹកនាំទាំងឡាយរបស់សាសនាចក្របានសង្កត់ធ្ងន់យ៉ាងខ្លាំងលើសារៈសំខាន់នៃគេហដ្ឋាន និងក្រុមគ្រួសារ ។

ការណែនាំនាពេលថ្មីៗនេះទាក់ទងនឹងតុល្យភាពថ្មីរវាងការបង្រៀនដំណឹងល្អនៅក្នុងគេហដ្ឋាន និងសាសនាចក្រ ព្រមទាំងកាលវិភាគការប្រជុំដែលបានកែតម្រូវ គឺជាការបង្ហាញដ៏ធំមួយថា គេហដ្ឋាន និង គ្រួសារគួរតែត្រូវបានចាត់ទុកថាជាស្លាបចក្រធំនៅក្នុងជីវិតរបស់យើង ។

ប្រធាន ណិលសុនបានសំណូមពរយើងឲ្យ « ធ្វើការដោយឧស្សាហ៍ព្យាយាម ដើម្បីរៀបចំគេហដ្ឋានរបស់ [ យើង ] ឲ្យក្លាយទៅជាមជ្ឈមណ្ឌលនៃការរៀនសូត្រដំណឹងល្អ » ។ នៅពេលយើងធ្វើដូច្នេះ លោកបានសន្យាថា « យូរៗទៅថ្ងៃឈប់សម្រាក របស់បងប្អូននឹងបានជាទីរីករាយចិត្តយ៉ាងពិតប្រាកដ ។ កូនចៅរបស់បងប្អូននឹងមានចិត្តរំភើបក្នុងការរៀន និងរស់នៅតាមការបង្រៀនរបស់ព្រះអង្គសង្គ្រោះ ហើយឥទ្ធិពលរបស់មារសត្រូវនៅក្នុងជីវិត របស់បងប្អូននិងគេហដ្ឋាន របស់បងប្អូនននឹងត្រូវសាបរលាប ។ ការផ្លាស់ប្ដូរនៅក្នុងគ្រួសាររបស់បងប្អូននឹងមានយ៉ាងខ្លាំង និងរឹងមាំ » ។^១២

អែលឌើរ ស្ទីវ៉ែនសុន ៖បន្ទាប់ទៀត ចូរយើងពិចារណាពីការងារ ឬ ជីវិតអាជីពរបស់ប្អូន—ជាមុខរបររបស់ប្អូន ឬ បើជាសិស្ស គឺជាការអប់រំដែលប្អូនកំពុងស្វែងរកដែលវានឹងដឹកនាំទៅរកអាជីព ឬ ការងារពេញម៉ោងរបស់ប្អូន ។ ពិតណាស់ ការអប់រំពង្រីកលទ្ធភាពមានការងារធ្វើរបស់ប្អូន ។ ការងារអនុញ្ញាតឲ្យប្អូនមើលថែខ្លួនឯង គ្រួសាររបស់ប្អូន និងមនុស្សដទៃ ។ ការងារដឹកនាំទៅរកភាពខ្លួនទីពឹងខ្លួន ទាំងខាងសាច់ឈាម និងខាងវិញ្ញាណ ។ នៅក្នុងបរិយាកាសការងាររបស់ប្អូន ប្អូនមានកាតព្វកិច្ចមួយចំពោះនិយោជករបស់ប្អូន ប្អូនត្រូវស្មោះត្រង់ និង មានភក្តីភាពដើម្បីផ្តល់នូវលទ្ធផលដែលរំពឹងទុកដែលប្អូនទទួលបាននូវភាពតបស្នងវិញ ។ ប្អូនត្រូវខិតខំឲ្យអស់ពីលទ្ធភាពនៅក្នុងការងារ ឬអាជីពរបស់ប្អូន ។

ចំពោះការបង្ហាញរបស់យើង សូមចាត់ទុកថា ការងារដូចជាស្លាបចក្រកន្ទុយនៃឧទ្ធម្ភាគចក្រ ។

ស៊ីស្ទើរ ស្ទីវ៉ែនសុន ៖ដើម្បីធ្វើឲ្យអស់ពីសមត្ថភាពសម្រាប់ខ្លួនឯង និងគ្រួសាររបស់ប្អូន នោះប្អូនត្រូវតែធ្វើឲ្យអស់ពីលទ្ធភាពសម្រាប់ការងាររបស់ប្អូនដែរ ។ រឿងទាំងពីរនេះចងភ្ជាប់គ្នាយ៉ាងខ្លាំង ហើយតុល្យភាពរវាងរឿងទាំងពីរគឺជារឿងដ៏ចាំបាច់ ។ មាននិយោជក សង្គមវិទូ និងអ្នកប្រឹក្សា អាជីវកម្ម កាន់តែច្រើនឡើងៗ កំពុងប្រកាន់យកអត្ថប្រយោជន៍នៃតុល្យភាពរវាង ការងារ និង ជីវិត ។

អែលឌើរ ស្ទីវ៉ែនសុន ៖ធាតុទីបីនៃតុល្យភាពដ៏ចាំបាច់ក្នុងជីវិតគឺចំពោះព្រះអម្ចាស់ និងកិច្ចការរបស់ទ្រង់ ។ នេះគឺជាគោលបំណងដ៏សំខាន់មួយនៃហេតុផល ដែលយើងម្នាក់ៗមកកាន់ផែនដីនេះ ។ យើងរស់នៅលើផែនដីនេះដើម្បីស្រឡាញ់ គោរព ប្រតិបត្តិ និងបម្រើទ្រង់ និងបុត្រាបុត្រីរបស់ព្រះវរបិតាសួគ៌យើង ដែលជាបងប្អូនប្រុសស្រីរបស់យើងនៅជុំវិញពិភពលោក ។ ព្រះអម្ចាស់ត្រូវការ ការខិតខំ និងទេពកោសល្យរបស់យើងដើម្បីស្ថាបនានគរទ្រង់ ។

« សូមបែងចែកពេលវេលារបស់បងប្អូនដើម្បីបំពេញការទទួលខុសត្រូវរបស់បងប្អូនក្នុងសាសនាចក្រ » ។^១៣ ខ្ញុំយល់ដឹងថា ពាក្យ បែងចែកគឺជាពាក្យណែនាំសំខាន់ ។ វាតម្រូវឲ្យយើងធ្វើការជ្រើសរើសដែលមានសតិសម្បជញ្ញៈដើម្បី « មានពេលវេលា » សម្រាប់ការបម្រើព្រះអម្ចាស់ និងសាសនាចក្ររបស់ទ្រង់នៅក្នុងជីវិតប្រចាំថ្ងៃរបស់យើង ។

ស៊ីស្ទើរ ស្ទីវ៉ែនសុន ៖ភាពជាអ្នកដឹកនាំ និងការបម្រើគឺជាធាតុសម្គាល់ពីរ ក្នុងសាសនាចក្រនៃព្រះយេស៊ូវគ្រីស្ទដែលបានស្ដារឡើងវិញ ។ ប្អូនម្នាក់ៗនឹងត្រូវបានសុំឲ្យរួមចំណែកចំពោះនគរព្រះតាមរបៀបខុសៗគ្នា ។ ការហៅដែលកើតមានចំពោះប្អូន និងមនុស្សដទៃទៀតនៅក្នុងគ្រួសាររបស់ប្អូន អាចកើតឡើងនៅគ្រាដែលមើលទៅមានការលំបាក ។ ទោះជាយ៉ាងនេះក្ដី « បើសិនជាអ្នករាល់គ្នាមានបំណងចង់បម្រើដល់ព្រះ នោះអ្នករាល់គ្នាបានហៅឲ្យធ្វើកិច្ចការនោះហើយ » ។^១៤

លើសពីនេះ ព្យាការីជាទីស្រឡាញ់របស់យើង ប្រធាន ណិលសុន បានបង្រៀនយើងថា ពិភពលោករបស់យើងផ្លាស់ប្ដូរឥតឈប់ឈរ គឺដូចជាការបម្រើរបស់យើងនៅក្នុងសាសនាចក្ររបស់ព្រះអម្ចាស់ដែរ ។ លោកបានលើកទឹកចិត្តយើងឲ្យឱបក្រសោប « ស្ថានភាពធម្មតាជាថ្មី » ។ លោកបានសំណូមពរយើងឲ្យ « ផ្ដល់ការងារបម្រើដល់អ្នកដទៃ ។ រក្សាទស្សនវិស័យអស់កល្បជានិច្ច ។ [ ហើយ ] តម្កើងការហៅ [ របស់យើង ] » ។^១៥

អែលឌើរ ស្ទីវ៉ែនសុន ៖ការលើកទឹកចិត្តនេះផ្ដល់ចក្ខុវិស័យដល់យើងម្នាក់ៗឲ្យធ្វើអ្វីដែលយើងត្រូវបានហៅឲ្យធ្វើ ប៉ុន្តែក៏ណែនាំយើងឲ្យរក្សាទស្សនវិស័យអស់កល្បជានិច្ចរបស់យើងផងដែរ ឬនិយាយម្យ៉ាងទៀតគឺ ធ្វើឲ្យវាមានតុល្យភាពជាមួយនឹងការទទួលខុសត្រូវសំខាន់ៗផ្សេងទៀតរបស់យើង ។ ខ្ញុំគិតអំពីការបម្រើក្នុងសាសនាចក្រដូចជាចង្កឹះលេខនៃឧទ្ធម្ភាគចក្រ ដែលវាធ្វើឲ្យយើងមានលំនឹង ហើយតម្រង់ទិសយើង ។

ស៊ីស្ទើរ ស្ទីវ៉ែនសុន ៖ធាតុចុងក្រោយដើម្បីធ្វើឲ្យមានតុល្យភាពគឺជាកាតព្វកិច្ចមួយចំពោះខ្លួនយើង ។

ជីវិតអាចមានភាពមមាញឹក ខ្លាំង ។ វាសំខាន់ដែលយើងត្រូវបន្ថយល្បឿននៅពេលខ្លះ ដើម្បីទទួលបានកម្លាំងជាថ្មី ហើយមើលឲ្យបានដិតដល់ចំពោះសេចក្ដីត្រូវការរបស់ខ្លួនយើងផ្ទាល់ ដូចជាការសម្រាក លំហាត់ប្រាណ សកម្មភាពកម្សាន្ត និងការអភិវឌ្ឍផ្ទាល់ខ្លួនខាងវិញ្ញាណ ។ ថ្មីៗនេះ ថ្នាក់ដឹកនាំរបស់សាសនាចក្របានផ្ដល់យោបល់ជាក់ស្ដែងដ៏មានតម្លៃ ដើម្បីជួយយើងឲ្យធ្វើកិច្ចការនេះ ។

អែលឌើរ ស្ទីវ៉ែនសុន ៖ពិតណាស់ លីសា ពួកលោកបានធ្វើបែបនោះមែន ។ ថ្មីៗនេះ ប្រធានបាឡឺដបានណែនាំពីសារៈសំខាន់នៃការស្វែងរកពេលវេលាដ៏ស្ងប់ស្ងាត់ ។ លោកមានប្រសាសន៍ថា ៖

« ខណៈដែលបច្ចេកវិទ្យាតែងតែជាពរជ័យមួយនៅក្នុងជីវិតខ្ញុំ វាក៏អាចជាការរំខានមួយដែលដាក់ជារបាំងរវាងយើង និងសមត្ថភាពរបស់យើង ដើម្បីស្ដាប់ឮព្រះសូរសៀងរបស់ព្រះអម្ចាស់ដែរ ។ ខ្ញុំប្រាប់ចៅៗរបស់ខ្ញុំថា ពួកគេគួរតែញែកពេលដ៏ស្ងប់ស្ងាត់រៀងរាល់ថ្ងៃដើម្បីគិតពីជីវិតរបស់ពួកគេ ហើយសញ្ជឹងគិតពីអ្វីដែលព្រះអម្ចាស់សព្វព្រះទ័យឲ្យពួកគេធ្វើ ។ …

« …ខ្ញុំមិនអាចភ្ជាប់នឹងស្ថានសួគ៌នៅក្នុងភាពរញ៉េរញ៉ៃបានទេ ។… នៅពេលខ្ញុំនៅក្នុងភាព[ស្ងៀមស្ងាត់] នោះជាពេលដែលខ្ញុំទទួលបានការបំផុសគំនិត » ។^១៦

អែលឌើរ ជែហ្វ្រី អ័រ ហូឡិន មានប្រសាសន៍អំពីការអធិស្ឋានដ៏ម៉ឺងម៉ាត់ ។ លោកមានប្រសាសន៍ថា ៖« មានមេរៀនដ៏អស្ចារ្យមួយនៅក្នុង… ការអធិស្ឋានដ៏ម៉ឺងម៉ាត់ និងបន្ទាន់ ដើម្បីយកឈ្នះ … ភាពផ្ទុយរបស់មារសត្រូវ ការមើលថែក្នុងថ្ងៃនោះ ឬការរំខានក្នុងគំនិតរបស់យើង » ។^១៧

ស៊ីស្ទើរ ស្ទីវ៉ែនសុន ៖ស៊ីស្ទើរ ជីន ប៊ី ប៊ីងហាំ ប្រធានសមាគមសង្គ្រោះទូទៅ បានរៀបរាប់ពីកត្តាបីយ៉ាងដើម្បីជួយខ្លួនយើង ហើយកត្តានីមួយៗមានតម្លៃយ៉ាងខ្លាំង ។

ទីមួយ គាត់អញ្ជើញព្រះវិញ្ញាណតាមរយៈបទគម្ពីរទាំងឡាយ ។ គាត់មានប្រសាសន៍ថា« រឿងដំបូងមួយដែលខ្ញុំធ្វើនៅពេលព្រឹកដើម្បីមានព្រះវិញ្ញាណ គឺការអានព្រះគម្ពីរ ។ វាជួយខ្ញុំឲ្យមានគំនិតត្រឹមត្រូវ ដើម្បីខ្ញុំអាចទទួលបានវិវរណៈ » ។

ធាតុទីពីរ របស់គាត់គឺថ្វាយបង្គំក្នុងព្រះវិហារបរិសុទ្ធ ។ « វិធីដ៏អស្ចារ្យមួយទៀត ដើម្បីអាចស្ដាប់ឮព្រះសូរសៀងរបស់ព្រះអង្គសង្គ្រោះកាន់តែច្បាស់គឺជាការចូលរួមក្នុងព្រះវិហារបរិសុទ្ធ ។ ពេលខ្លះ កាលខ្ញុំកំពុងអង្គុយក្នុងព្រះវិហារបរិសុទ្ធ ខ្ញុំនឹងទទួលបានចម្លើយមួយចំពោះការអធិស្ឋាន ឬ ខ្ញុំមានគំនិតមួយខណៈដែលខ្ញុំនៅស្ងៀមស្ដាប់ព្រះវិញ្ញាណ » ។

ទីបី គាត់មានប្រសាសន៍ថា« តន្ត្រី … ជួយខ្ញុំឲ្យស្ដាប់ឮព្រះសូរសៀងរបស់ព្រះអង្គសង្គ្រោះ ។ ខ្ញុំចូលចិត្តស្ដាប់ទំនុកតម្កើង ទោះជាស្ដាប់តែទំនុកភ្លេងសុទ្ធក្ដី ។ ខ្ញុំចេះទំនុកបទទាំងនោះ ដោយសារខ្ញុំធ្លាប់ច្រៀងវាយូរមកហើយ ដូច្នេះវាដក់ជាប់នៅក្នុងគំនិតខ្ញុំ » ។^១៨

អែលឌើរ ស្ទីវ៉ែនសុន ៖វាហាក់ដូចថា ជារឿយៗ ការចំណាយពេលសម្រាប់ខ្លួនយើងគឺជារឿងដ៏លំបាកបំផុត ប៉ុន្តែវាក៏ជារឿងដ៏សំខាន់បំផុតដែរ ។ ខ្ញុំធ្លាប់ឮគេរៀបរាប់វាដូចជា ការផ្អាកឲ្យមានពេលគ្រប់គ្រាន់ពីការងារដ៏មមាញឹកនៃការអារឈើ ដើម្បីសំលៀងផ្លែរណារ ។

ស៊ីស្ទើរ ស្ទីវ៉ែនសុន ៖ការចងចាំថាយើងមានការទទួលខុសត្រូវចំពោះខ្លួនយើង និងការដាក់បញ្ចូលការណ៍នោះមួយជំហានម្ដងៗទៅក្នុងជីវិតរបស់យើង នោះវានឹងក្លាយជាពរជ័យមួយ ។ ខ្ញុំបានឃើញថា នៅពេលខ្ញុំអភិវឌ្ឍខ្លួនខាងសាច់ឈាម ខាងផ្លូវចិត្ត និងខាងវិញ្ញាណ វាមិនគ្រាន់តែនាំមកនូវអត្ថប្រយោជន៍ដ៏ធំមួយចំពោះខ្ញុំផ្ទាល់នោះទេ ប៉ុន្តែវាអនុញ្ញាតឲ្យខ្ញុំបីបាច់គ្រួសារ និងមិត្តភក្ដិខ្ញុំផងដែរ ។

សូមក្រឡេកមើលថាតើផ្នែកទាំងបួននៃជីវិតរបស់យើងមានភាពរលូនយ៉ាងណា បើបានប្រតិបត្តិដោយចក្ខុវិស័យនិង តុល្យភាពនោះ ! ពួកវាដំណើរការរួមគ្នាបានល្អណាស់មែនទេ ?

អែលឌើរ ស្ទីវ៉ែនសុន ៖ពិតជាបែបនោះមែន ។ ឥឡូវទោះជានៅពេលយើងនិយាយពីតុល្យភាពនៅក្នុងទិដ្ឋភាពខុសៗគ្នាក្នុងជីវិតរបស់យើងក្ដី ក៏យើងត្រូវដាក់រឿងនេះនៅក្នុងទស្សនវិស័យត្រឹមត្រូវដែរ ។

អែលឌើរ បែដណា បានសង្ខេបរឿងនេះនៅក្នុងការចុះផ្សាយលើប្រព័ន្ធផ្សព្វផ្សាយសង្គមថ្មីៗនេះ ។ លោកបានមានប្រសាសន៍ថា« ពេលខ្លះ យើងសញ្ជឹងគិតរាល់ការទទួលខុសត្រូវរបស់យើងនៅផ្ទះ សាលារៀន ការងារ និងព្រះវិហារ ហើយងឿងឆ្ងល់ថាតើយើងអាចសម្រេចបាននូវតុល្យភាពមួយនៅក្នុងការទាមទារដ៏ច្រើនពីពេលវេលារបស់យើងយ៉ាងដូចម្ដេច ។ ជំនួសឲ្យការធ្វើខ្លួនយើងមានការថប់បារម្ភ ដោយព្យាយាមធ្វើអ្វីៗគ្រប់យ៉ាងក្នុងពេលតែមួយ នោះយើងគួរតែកំណត់ពីរឿងសំខាន់ៗមួយចំនួនដែលជាអាទិភាពខ្ពស់បំផុតរបស់យើង ។ បន្ទាប់មក យើងអាចខិតខំផ្ដល់ពេលវេលាដល់កិច្ចការនីមួយៗតាមសេចក្ដីត្រូវការរបស់វា—ម្ដងមួយៗ » ។^១៩

លីសា រឿងនេះរំឭកបងអំពីបទពិសោធន៍ដ៏គួរឲ្យចងចាំមួយជាមួយនឹងឪពុកបង ។ ខ្ញុំគឺជាឪពុកវ័យក្មេងម្នាក់ ហើយខ្ញុំមានអាជីវកម្មមួយដ៏មមាញឹក ។ យប់មួយ ខ្ញុំបានដើរចូលទៅក្នុងពិធីជប់លៀងថ្ងៃខួបកំណើតគ្រួសារយឺត ។ កូនៗយើង និងបងប្អូនជីដូនមួយរបស់ពួកគេមកពេញផ្ទះ ។ ប៉ុន្តែខ្ញុំបានដើរចូលទៅក្នុងផ្ទះដោយមិនខ្វល់ ហើយអង្គុយនៅកាច់ជ្រុងបន្ទប់ ដោយបារម្ភពីអាជីវកម្ម និងវួដរបស់ខ្ញុំ ។

ឪពុកខ្ញុំបានដើរមករកខ្ញុំ ហើយពោលពាក្យខ្លាំងៗថា « ហ្គារី តើកូនកំពុងធ្វើអីហ្នឹង ? » នៅពេលខ្ញុំប្រាប់គាត់ពីការបារម្ភអំពីការទទួលខុសត្រូវនៅព្រះវិហារ និងការងារ ខ្ញុំស្មានថាគាត់អាណិតខ្ញុំខ្លាំងណាស់ ។ ប៉ុន្តែផ្ទុយ ទៅវិញ គាត់បានអង្គុយក្បែរខ្ញុំ ហើយប្រាប់ខ្ញុំថាគាត់ព្រួយពីខ្ញុំ ហើយថាខ្ញុំត្រូវធ្វើការកែតម្រូវមួយចំនួន ដើម្បីកុំឲ្យខ្ញុំដាច់ឆ្ងាយពីគ្រួសារខ្ញុំ នៅពេលខ្ញុំនៅជាមួយពួកគេ ។ តើអូននៅចាំរឿងនេះទេ លីសា ?

ស៊ីស្ទើរ ស្ទីវ៉ែនសុន ៖ អូនចាំបានល្អណាស់ !

អែលឌើរ ស្ទីវ៉ែនសុន ៖គាត់បានពោលថា « នៅពេលកូននៅផ្ទះ សូមចាត់ទុកផ្ទះជាអាទិភាព មិនមែនព្រះវិហារ និងការងារទេ ។ នៅពេលកូនទៅធ្វើការ សូមជ្រើសរើសយកវាជាអាទិភាព មិនមែនផ្ទះ និងព្រះវិហារនោះទេ ។ នៅពេលកូននៅព្រះវិហារ សូមជ្រើសយកវាជាអាទិភាព មិនមែនការងារ និងផ្ទះទេ » ។

ឥឡូវទោះបីជាឱវាទនេះមានការលំបាកក្នុងការធ្វើសមាហរណកម្មក្តី ហើយសូម្បីពេលនេះខ្ញុំនៅឆ្ងាយពីភាពឥតខ្ចោះក៏ដោយក៏វាបានជួយខ្ញុំ ។ វាសម្រាលបន្ទុកខ្ញុំ ហើយបានមានពេលដ៏ល្អយ៉ាងច្រើនក្នុងជីវិតខ្ញុំ ។ ដូចនេះ ខ្ញុំចង់សូមអញ្ជើញប្អូនឲ្យគិតអំពីរឿងនេះហើយ សាកល្បង អនុវត្តដោយខ្លួនឯង ។

គួរឲ្យចាប់អារម្មណ៍ នេះស្ទើរតែដូចគ្នានឹងអ្វីដែលអែលឌើរ បែដណាបានប្រឹក្សានៅក្នុងការចុះផ្សាយលើប្រព័ន្ធផ្សព្វផ្សាយរបស់លោកថ្មីៗនេះ ។ លោកបានចែកចាយថា « វាអាចស្ដាប់ទៅសាមញ្ញ ប៉ុន្តែយើងមិនគួរធុញថប់ ហើយខ្ជះខ្ជាយការខិតខំ និងពេលវេលា ដើម្បីព្យាយាមសម្រេចឲ្យបាននូវលំនឹងដ៏ល្អឥតខ្ចោះក្នុងចំណោមរាល់កិច្ចការសំខាន់ៗដែលត្រូវធ្វើនោះទេ ។ នៅពេលយើងអធិស្ឋានដោយស្មោះ សូមជំនួយពីព្រះដើម្បីកំណត់ពីអ្វីដែលសំខាន់បំផុត នោះទ្រង់នឹងដឹកនាំ ហើយជួយយើងឲ្យផ្ដោតលើការខិតខំរបស់យើងពីមួយថ្ងៃទីមួយថ្ងៃ » ។^២០

ស៊ីស្ទើរ ស្ទីវ៉ែនសុន ៖ឥឡូវនេះ ខ្ញុំមានដំណឹងអាក្រក់តូចមួយចង់ចែកចាយ ។ បើប្អូនធ្វើតាមការប្រឹក្សានេះ ហើយដើរឆ្ពោះទៅមុខដោយមាន តុល្យភាព និង ចក្ខុវិស័យ នោះប្អូននឹងនៅតែមានភាពបរាជ័យមួយចំនួនដដែល ។ ប្អូននឹងមានរបួស ហើយ ជាំមួយចំនួន ។

មានពេលខ្លះ ទស្សនវិស័យរបស់ប្អូនទំនងជាមានភាពស្រអាប់ដោយ ផ្លូវមានអ័ព្ទ ឬ ប្អូនអាច បាត់បង់តុល្យភាពរបស់ប្អូន ។ ប៉ុន្ដែ នេះជាដំណឹងល្អមួយ ៖ ប្អូនគឺជាបុត្រា និងបុត្រីរបស់ព្រះវរបិតាសួគ៌ដែលពេញដោយក្ដីស្រឡាញ់ ។

បទគម្ពីរបង្រៀនយើងថា « ដ្បិតព្រះទ្រង់មិនបានប្រទានឲ្យយើងមានវិញ្ញាណ ដែលតែងតែខ្លាចឡើយ គឺឲ្យមានវិញ្ញាណដ៏មានអំណាច … និងប្រាជ្ញានឹងធឹងវិញ » ។^២១ ហើយសូមកុំភ្លេចពីការប្រឹក្សាដ៏សំខាន់នេះមកពីព្រះអម្ចាស់ផ្ទាល់ថា « ហេតុដូច្នោះហើយ ចូរសង្ឃឹមឡើង ហើយចូរកុំខ្លាចឡើយ ដ្បិតយើងជាព្រះអម្ចាស់ គង់នៅជាមួយនឹងអ្នក ហើយនឹងឈរនៅក្បែរអ្នក » ។^២២ ដូច្នេះហើយ ប្អូនមានប្រភពកម្លាំងដ៏ស្ថិតស្ថេដែលមិនចេះអស់ នៅក្នុងព្រះអង្គសង្គ្រោះជាទីស្រឡាញ់របស់យើង—គឺព្រះយេស៊ូវគ្រីស្ទ ។

អែលឌើរ ស្ទីវ៉ែនសុន ៖ឥឡូវនេះ សូមស្ដាប់ការលើកទឹកចិត្តដ៏បំផុសគំនិតសម្រាប់ប្អូនម្នាក់ៗ នៅទីនេះនាថ្ងៃនេះមកពីប្រធានណិលសុន លោកបានមានប្រសាសន៍ថា « ព្រះទ្រង់បានជ្រាបថា … ផ្លូវនៃសេចក្ដីសញ្ញាមិនងាយនឹងរកឃើញ ឬបន្តដើរនោះឡើយ ។ ដូច្នេះ ទ្រង់បានបញ្ជូនព្រះរាជបុត្រាបង្កើតតែមួយរបស់ទ្រង់មកធ្វើដង្វាយធួនសម្រាប់យើង ហើយបង្ហាញផ្លូវដល់យើង ។ អំណាចរបស់ព្រះដែលមានចំពោះមនុស្សគ្រប់រូបដែលស្រឡាញ់ ហើយធ្វើតាមព្រះយេស៊ូវគ្រីស្ទ គឺជាអំណាចដើម្បីព្យាបាលយើង ពង្រឹងយើង លាងសម្អាតយើងពីអំពើបាប ហើយតម្កើងយើងឲ្យធ្វើកិច្ចការដែលយើងមិនអាចធ្វើដោយខ្លួនឯងបាន » ។^២៣

ស៊ីស្ទើរ ស្ទីវ៉ែនសុន ៖ចូរឲ្យចំណេះដឹងអំពីអត្តសញ្ញាពិតរបស់ប្អូន និងបុគ្គលដែលនៅខាងប្អូន ជួយប្អូនឲ្យរស់នៅក្នុងជីវិតដែលមានទស្សនវិស័យច្បាស់លាស់ និងតុល្យភាពនឹងនរ ។ ព្រះអម្ចាស់ « នឹងពង្រីកឱកាសរបស់អ្នក បន្ថែមចក្ខុវិស័យរបស់ប្អូន និងចម្រើនកម្លាំងដល់ប្អូន » ។^២៤

អែលឌើរស្ទីវ៉ែនសុន ៖អស្ចារ្យណាស់ ដែលបាននៅជាមួយប្អូនៗនារាត្រីនេះ ។ ហើយយើងសូមបញ្ចប់ឥឡូវនេះដោយការបង្ហាញពីការដឹងគុណរបស់យើងនិងការអញ្ជើញដល់ប្អូន រាល់គ្នានិងធ្វើនូវទីបន្ទាល់របស់យើង ។ សូមអញ្ជើញប្អូនម្នាក់ៗឲ្យពិចារណា ទីមួយ សូមពិចារណា អំពី ចក្ខុវិស័យដំណឹងល្អរបស់ប្អូនដើម្បីធានានិងបញ្ជាក់ពីអត្តសញ្ញាណរបស់ប្អូនដែលជាបុត្រីនិងបុត្រានៃព្រះ ។

ទីពីរ សូមពិចារណាពីរបៀបដែលប្អូនដោះស្រាយទំនួលខុសត្រូវ បួនយ៉ាងរបស់ប្អូនចំពោះ គេហដ្ឋាន និង គ្រួសារ ការអប់រំ និង ការងារ ចំពោះសាសនាចក្រ និង ខ្លួនប្អូន ។

ឥឡូវ ទីបី ខ្ញុំសូមអញ្ជើញឲ្យប្អូនរកកន្លែងស្ងប់ស្ងាត់ហើយសរសេរចំណាប់អារម្មណ៍មួយចំនួនដែលប្អូនបានទទួលក្នុងអំឡុងពេលនៃការប្រជុំធម្មនិដ្ឋាននេះ ។ សូមចាំថាក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ប្អូនម្នាក់ៗមាននូវអំណោយទានជាមួយភាពជាដៃគូនៃព្រះវិញ្ញាណបរិសុទ្ធ ។

ស៊ីស្ទើរស្ទីវ៉ែនសុននៅពេលប្អូនធ្វើតាមការអញ្ជើញរបស់អែលឌើរ ស្ទីវ៉ែនសុន សូមកុំភ្លេចអំពីអ្នកត្រួសត្រាយផ្លូវដែលបានមកមុនយើង ដែលយើងបាននិយាយអំពីអ្នកដែល បាន តាំង ទីលំ នៅជ្រលងភ្នំនេះ ក៏ ដូច ជាអស់អ្នកដែលរស់នៅក្នុងគ្រួសារនីមួយៗនិងប្រទេសកំណើតរបស់ប្អូន ។ ស្មារតី ជា អ្នកត្រួសត្រាយផ្លូវ និង គំរូ នៃ ការ ធ្វើ អ្វី ដែល ពិបាក ក៏ អាច ផ្តល់ ឲ្យ ប្អូន នូវ ទំនុកចិត្ត ក្នុង ការធ្វើ អ្វី ដែល លំបាក ផងដែរ ។

អែលឌើរស្ទីវ៉ែនសុន ៖ដូច្នេះដូច ជាពួកបរិសុទ្ធ ពីមុនដែរ យើងត្រូវសម្លឹងទៅមុខ ។ យើងសម្លឹងមើលទៅលើ ។ និង យើងសម្លឹងមើលក្នុង ចក្ខុវិស័យ និង តុល្យភាព ដំណឹងល្អ ។

ស៊ីស្ទើរ ស្ទីវ៉ែនសុន ៖សូមថ្លែងទីបន្ទាល់របស់ខ្ញុំថា ប្អូនអាចទទួលបាន« ការភ្លឺថ្លានៃសេចក្ដីសង្ឃឹមដ៏ឥតខ្ចោះ »^២៥ គឺថាព្រះវរបិតាសួគ៌ស្គាល់ប្អូនម្នាក់ៗ តាមឈ្មោះហើយថាទ្រង់ស្រឡាញ់ប្អូន ។ សូមថ្លែងជាសាក្សីរបស់ខ្ញុំអំពីព្រះយេស៊ូវគ្រីស្ទ ថា ជាព្រះរាជបុត្រា តែមួយគត់នៃព្រះដ៏មានព្រះជន្មរស់ ។ ហើយខ្ញុំធ្វើកិច្ចការនេះក្នុងព្រះនាមនៃព្រះយេស៊ូវគ្រីស្ទ អាម៉ែន៕

អែលឌើរស្ទីវ៉ែនសុន ៖អាម៉ែន៕ អរគុណ លីសា ។ ខ្ញុំសូមថ្លែងទីបន្ទាល់និងសាក្សីរបស់ខ្ញុំដល់ប្អូនប្រុសស្រីដ៏ស្រស់ស្អាតរបស់យើង ។ ខ្ញុំសូមថ្លែងទីបន្ទាល់របស់ខ្ញុំថា យើងជាកូនរបស់ឪពុកម្ដាយសួគ៌ាជាទីស្រឡាញ់ ព្រះវរបិតាសួគ៌ ស្រឡាញ់ប្អូន ហើយ គោលលទ្ធិ របស់ព្រះវរបិតា គឺ ថាទ្រង់សព្វព្រះទ័យ ឲ្យកូនចៅទាំងអស់របស់ទ្រង់ត្រឡប់ទៅរកទ្រង់វិញ ។

ឥឡូវនេះ គោលលទ្ធិនេះត្រូវបានបើកដំណើរការដោយព្រះរាជបុត្រារបស់ទ្រង់ គឺព្រះអង្គសង្គ្រោះជាទីស្រឡាញ់របស់យើង ព្រះយេស៊ូវគ្រីស្ទ ។ តាមរយៈដង្វាយធួនរបស់ទ្រង់ នោះយើងអាចត្រឡប់ទៅកាន់ទីវត្តមានរបស់ព្រះវរបិតាសួគ៌ជាទីស្រឡាញ់របស់យើងវិញបាន ។ ខ្ញុំសូមថ្លែងជាសាក្សីរបស់ខ្ញុំចំពោះប្អូន ។ ខ្ញុំ សូម ថ្លែងទីបន្ទាល់ របស់ ខ្ញុំ អំពី ព្រះយេស៊ូវគ្រីស្ទ និង តួនាទី ដ៏ ពិសិដ្ឋ របស់ ទ្រង់ ជា ព្រះអង្គសង្គ្រោះ និង ព្រះប្រោសលោះ របស់ យើង ។ ហើយ ខ្ញុំ សូម ធ្វើ កិច្ចការ នេះ ក្នុង ព្រះនាម ទ្រង់ គឺ ព្រះយេស៊ូវគ្រីស្ទ អាម៉ែន ៕