Tei ibukin te Koaua

Taromauri n te Aonaaba ae Taabangaki ibukiia Kairake n Ikawai

Beretitenti Dallin H. Oaks ao Titita Kristen M. Oaks

Man te Moan Beretitentii

Tabati, Meei 21, 2023

Beretitenti Dallin H. Oaks: Kam rabwa ibukin te katangitang ae tamaroa. Ao ko rabwa, Kamitina Gilbert, ibukin te kabwarabwara ae tamaroa.

Nakoia kairake ni ikawai, ao ataein te reirei ake iaon kawaia ni bane aia tai man kauarinan reirei, E kukurei nanou ao Titita Oaks ni kaota ara tangira nakoimi ao ni marooro nakoimi n te bootaki n taromauri ae kakawaki aio. A kakorakai taai aikai nakoira ni kabane, ma ana euangkerio Iesu Kristo e anganira arora ae kakawaki bwa ti na kukurei. Irouia Ana burabeti, e a anganira kakaewenako te Atua bwa ti na keiaki rinanon kangaanga, ao ana reirei Iesu Kristo e kaoti kawai n tokanikai nakon tokin kawaira mai karawa n te maiu ae akea tokina.

I.

Marooro nakoia taan ongora n ai aromi, e anga te kauring ae kakawaki aio Beretitenti Russell M. Nelson: “Ngkai te aonaaba e a rikirake riki iai waaki aika aki raraoi ao n uarereke te maiu n tamnei, aromi n rikirake a riai n kaonaki riki n bwain te tamnei ao n kauarerekei mwakuri aika bubuaka Keiaki mwaaka n tei ibukin reirein tuua nakon te kan tanoata.”

Imwiina e anga te kakaewenako, are ti anaia bwa atuun ara taromauri: “Ataa te koaua ao tei ibukina, e ngae ngke te koaua anne e aki rangi n tanoata taekana n waaki n tautaeka.”¹

Ara kouru ni maiura n te aonaaba ao te kawai ae ti riai n toua ibukin kakorakorakira a karekeaki n te babaire ni kamaiu ao, taai aikai, inanon “Te Utu: Te Katanoata nakon te Aonaaba.” Iangoa te noonori n te marooro ae kakawaki aei mairoun Beretitenti Nelson:

“Te maiu bon tiaki te bwai n takakaro mwakuriana. Bon iai te maiu imwain te maiu aei. Ao bon iai te maiu imwiin te mate. Te tai inanon te aonaaba n taamnei ao te maiu aei bon taai ni kakatauraoi nakon maiura n te maiu imwiin te mate. Te ataibwai n rinanin te mimitong ake teniua, are e kaotaki nakoia burabeti, a anganira te nonoori ae tau ibukin ara konabwai ni maiura imwiin te mate. E mimitong te maiu ae akea tokina ao n aki matebuaka korakorara nako iai.”²

Ngkai ngaira Aika a Itiaki ni Boong aika Kaitira, ti kakabwaiaaki ma kaotioti ni boong aikai are a anganira te oota ae korakora ibukin tibwangara n te maiu aei. N aron are e taekinna Beretitenti Nelson, ti aki taraia bwa te bwai ae riki n ti tetaina. Ibukira, iai teniua mwakoro ibukin ara borau nakon te maiu are akea tokina. Mwakoro 1 Rikira n te aonaaba n tamnei. Maiura ngkai n te maiu aei e roko imwiina, kanga mwakoro 2. Maiura imwiin te mate bon mwakoro 3. Te kabanea ni mwakoro e airi iai manga Utiia aomata ni kabane ake a tia ni maiu n te maiu aei ao te Kabanea ni Motikitaeka are e na anganiira te abanuea ni mimitong ake a kaineti ma ara mwakuri, babaire, ao nanora ake a karekea nakoira.

Ana euangkerio Iesu Kristo ae kaokaki e bon kaoti koaua aika onoti ni kaineti ma ana babaire ni kamaiu Tamara are Ikarawa ibukia natina.

Te kantaninga ibukin maiura iaon te aba, mwakoro 2 bwa ti na rikirake nakon tokin kawaira n te maiu ae akea tokina. Ti karaoa aio man tokanikaira nakon kakaitara ni kabane are taekinaki n Ana Boki Moomon, ni ikotaki ma kariiri nakon uruan ana tua te Atua. Kaitaraan ao n tokanikai iaon te kariiri, ao kaniakira nakon te Atua rinanon rinerine aika a eti ao te rairannano man mwakuri aika kaairua, e buokira ni kateimatoa te rikirake ae akea tokina are bon bukin te maiu ibukia natin te Atua.

Ngaira ake iai iroura ana bwai n tiruaraoi te Tamnei ae Raoiroi ao n oota ni kaotioti ni boong aikai ti kakabwaiaaki ma te atatai ae bati iroura. Te katooto, ana Boki Moomon e berita nakoia ake a botumwaaka ni ukoukoria “ane a na kunea; ao bwaai aika a rabaae ana bwai te Atua ana kaotaki nakoia, ni mwaakan te Tamnei ae Raoiroi.”³ I tataro bwa ni kabaneia ake I tangiriia—ni ikotaki ma ni kabane natin te Atua ake a ongo bwanaau—ana mwakuria te kakao anne bwa kam aonga ni kunea ao n ataa te koaua.

II.

Te moan koaua e irekereke ma te mare. Te mare bon ngaia boton te kaantaninga n te maiu aei ao imwiina. Ngaira natin Tamara are i Karawa ae tatangira are e karikiira bwa ti na kawakina Ana tua ni karikaia natina ao kaonan te aonaaba. Te mwaaka ni kariki aomata bon teuana te bwai n tituaraoi ae rangi ni kakawaki ae reke iroura n te maiu aei. Ma ae kakawaki nakon te bwai n tiruaraoi anne bon tuan te itiaki, te tua bwa mwakara ni kariki aomata e na karaoaki ti inanon te mare imarenan te mwaane ao te aine. Te tua anne e kakawaki inanon ana euangkerio Iesu Kristo. Anne raoi ae kabwarabwara bukina bwa e aera iai iroura aroaro aika a kakaokoro ao ni totokoira man anua tabeua ake a maiuakinaki irouia ake katobibira.

Arora nakon kabwaranakon te mare ao nakon te mare bon katooto nakon anne. Taan kairiiri n ana Ekaretia Iesu Kristo a moamoa aia raraoma ibukin bitaki aika a riki ngkai ni waakin ao wakin te mare iaon te United States. Ibuakon aikai ao e rikirake mwaitiaa kaain US, ni ikotaki ma tabeman ataeinimmwane ao ataeinaine aika a tau aika Itiaki ni Boong aikai, a taona aia bong ni mare. Ni kabwabwara te waaki anne, ti na tarai uoua tiaata iaon te mare. E ngae ngke waare aikai ibukin te United States, ma a tei ibukin kangaanga n te aonaaba ae bwanin.

Te moan tiaata e kaota korakoran keerikaakin te ware n te katebubua irouia kaan te United States aika a tuai man mare. Inanon 30 te ririki n nako, e a tia ni bwaka te ware anne waniua nakon ruaia te katebubua ibukia mwaane ao aine. E oti bwa iai te kerikaakin te mare n te United States.

Te kauoua n tiaata e kaota irekereken te kekerikaaki n te mare irouia kairake aika Itiaki ni Boong aika kaitira. Aio e katamneia roro irouia Aika Itiaki ni Boong Aika Kaitira mwaane ao aine n te tai are a moan mare iai. E kaota te rikirake inanon nimaua te ririki ibukia mwaane ao aine.⁴

Iangoia bwa tera ae bua irouia kairake ni ikawai ni Boong aikai ngkai a rimwi aia mare n te tai ae kakawaki: a kabuai tibwangaia ae rang kakawaki ao n tataoni kakabwaia. Nanon aei bwa taonakin rikiraken temanna ae kakawaki are e riki n te reitaki imarenan te buu te mwaane ao te buu te aine, rikirake n aroaro aika a rianako n aron te anganano ao te nanorinano. Are nanona bwa e kerikaaki te tai ae kakawaki ibukin katean abanuean te Atua. E rang kakawaki riki, are nanona bwa a karako ataei ake a bungiaki ao n ikawairake ma kakabwaia man te euangkerio. Kam atai aikai ni kabane, ao kam riai n ataia bwa ami taani kairiiri ataia bwa a mwaiti mai buakomi aika a tuai reke toaia ni mare ni bukina ae riaon aia konaa. N na marooro riki iaon anne rimwi.

Taiaoka Kristen, ma tibwaa am iango iaon aei.

Titita Kristen M. Oaks: Oo Ngaia. Ni koauana, te mare bon te bwaintangira. Te mare e aki ti karekea nakoira te tibwanga ibukin ataei, e anganira naba te tai ae kakawaki ao te kaunganano ni moana kawaira n rikirake imarenara. Ti reiakina te mwakuri n anganano ao ni beku n aron ara kona n aanga riki tabeua.

Ngke tuai reke toau, I aki toki ni kakaenako bwa nna beku. Ngkai, ni katoa ara tai ni katairiki, tabeu bon iroun temanna ae aki toki n tekateka ni kakaitaraai. I reiakinna arou n tangira buu ao ni buokia; E reke raraou ae I kona ni ngare ma ngaia ao n tang naba ma ngaia. Iai te tia tei ibukiu ao au tia reirei, ao te tia kaungaunga ao e bubuokai. Te mare bon te beku ae karekea reiakinan te reitaki ao karekean te kaantaninga bwa e na nakoraoi. I tangiria bwa kam na ataia ae e nakoraoi riki te maiu ngkana ara mare e toma nakon te bwai ae korakora riki nakoira ao ni kaanira ma ara tia Kamaiu. Ao ti tangira anne ibukimi ni kabane.

N te kaotioti ae Les Misérables iai te taeka, “Tangiran temanna te aomata bon nooran matan te Atua.”⁵ Akea ae tamaroa ae kona n riki anne irarikin te mare.

Beretitenti Oaks: N taekana n te koaua n aomata, kawaeremwan babairean rikiia ataei—n aki moanibwaiaki kakawakina—e kakoauaki man te bwaka ae oti n te ribooti man aaba n aia ware are e kaotia bwa kakawakin karikaia ataei irouia ikawai e a bwak man 66 te katebubua nakon 33 te katebubua inanon 25 te ririki.⁶

Ngai ma Kristen ti iangoa kakawakin kaokan te Ekaretia ngkai e aki moanibwai kakaawakia ataei ngke tarin Kristen e karekerekea ana taeka natina te mwaane ae uarereke. Ngke a wareka te Rao ao n taraa tamnein Iesu, e miimii ngke Iesu e weteiia ataei bwa a na Nakoina. Anders, ae aua ana ririki, e kaeka ma ana kabwarabwara ae nanonna: “Ko aki ota iai? E tangiria ataei Iesu.”

Uringnga, iai ana babaire Tamare are i Karawa ae tatangira ibukimi Kairake ni ikawai, ao mwakoron te babaire anne bon te mare ao karikaia ataei.

Ao ngkai, ti kan kaunga te waaki, ti tangiria n tibwaa te bwai ae ti a tia n reirei iaona ae te reitaki n te iraorao ao te mwamwairiiri. Aio te witeo n te bwai are I taekinna n 2005 ngke te kabanea ni ikawai n kairake ni ikawai ae raora ngkai ai tibwa 12 ana ririki, ao ngkami are nikirana bon ataei aika a uarereke ke kam bon tuai bungiaki.

N ririki aika a mwaiti, e a tia te Ekaretia n reirei nakoia kairake bwa a naaki irekereke imwain koron 16 aia ririki. Tao tabeman kairake ni ikawai, riki mwane, a tia ni kawakina te reirei ae tamaroa aei ni karakaa ao ni baireia n aki irekereke imwain 26 ke tao 36 te ririki. I a kaoko ngkai n okirikaaki ma ngai n matakuakina te witeo aei man 2005.

Beretitenti Oaks [witeo]: “Mwaane, ngkana kam a oki man ami mition ao n teimatoa ni kakaraoa naba are tataraia mwaane-aine are kam reireiaki bwa kam iriiria ngke 15 ami ririki, am tai aio ni kaamwaneko ke ni kaaineko. Ninikoria ao kakaea temanna ao n reitaki ma ngaia. Moanna man te marooro n reitaki ma aine tabeman, ao ngkana e nakoraoi te motintaeka anne, waakinako nakon te tangira ibukin te mareaki. Te tai ni iein. Anne nanon te Uea ibukia An kairake ni ikawai aika naati mwaane ao aine. Iai irouia mwaane te kona ni waaki, ao ngkami mwaane kam riai ni waaki iai ngkai. Ngkana kam aki ataia bwa tera te iraorao, tao e na ibuobuoki nanona aio. I ongo mairouia tibuu aine aika 18 aia ririki. Te iraorao e riai ni bwaati teniua ukeuke ps: (1) babaire moantaai, (2) kanakoraoaki, and (3) kabaeaki n te tangira.

Raraou aika kairake ni ikawai aika kam tuai iein, ti reirei nakoimi bwa kam na kaineta rekerekemi ma te aine ke te mwane inanon te iraorao ae na uoti ngkami nakon te mare, tiaki ti te irekereke are e na uoti ngkami bwa kaain te tiim n takakaro n aron te butibooro. Te mare tiaki te waaki ni irekereke n te kurubu—tiaki ni karokoa a mwaiti ataei n riki.”⁷

[Tokin te witeo]

Mwaneu, taraan ae kam rangi ni kukurei ni kawaia ataeinimwaane aika akea toaia. Ao ngkai, iai ana taeka tabeua Kristen nakoia ataeinaine aika akea raomi.

Titita Oaks: Beretitenti Oaks, te witeo anne ibukin te iraorao e a rangi ni bwakanako taina, ma te reirei e tiku n akea bitakina—te iraorao e teimatoa ni karika te mare.

Ibukina bwa I mareaki n au ririki ae 53, I ataia bwa aekakira te namakin ibukin tataningaan toam, ao te ingainga ao te marakin n nano ao rannimata iaon uningau are e riki naba. Ma I kona ni kakoaua n ana tangira te Uea ibukia tarira ake a teimatoa ngkai n tataninga, ibukina bwa I a tia ni mena n te namakin anne. Nanou e nakoia naba mwaaneu ake a kakaonimaki ake titebo nanoia ma aio. Rinanon te korakai e bon rereke. Te iraorao ao te aki iraorao e kona naba ni karawawata.

Ngkana e kataaki au onimaki ao arou rimwi—I mimi bwa e aera nna anganaki te rawawata ni maiu ao I teimatoa ni karaoa au kabanea ni konaa ni maiuakina te euangkerio— n tabetai e roko irou ae iai te kaairua ae I karaoia. Bon akea te kaairua ae i a tia ni karaoia

N aron ae taku Titita Michelle D. Craig, “te Kataaki bon tiaki nanona bwa e aki nakoraoi te babaire.” Te babaire kanoana te rikirake are e kantaningaaki bwa e na buokira n ukoukora te Atua. E reitia n taku Titita Craig, “E tabe riki Tamam are Ikarawa ma [arom] ni kekeiaki n riki bwa te tia iriira Iesu Kristo nakon [ae ko] titiku n arom.”⁸

Ngkana ko ataiko bwa ko taua am tai ni kariaa bwa e na bon roko n taina te mare, tai tataninga ma moana am katauraoi. Katauraoiko ibukin te maiu—man karaoan am reirei, rinanon waaki, ao katauraoa am babaire. Tai taninga te kukurei bwa e na karokoaki iroum. Ukori waaki ibukin te mwakuri ni ibuobuoki ao karekean te rabakau. Ae kakawaki riki, onimakina te Uea, “wetea aran te Uea ni katoabong, ao teimatoa n nene n te onimaki bwa ana bon koro nanon bwaai.”⁹ I berita ngkana ko karaoa aio, e na roko te kukurei iroum.

Beretitenti Oaks: E a tia n angani ngkami mwaneu tabeua reirei aika a kakawaki Kristen. Ana reirei e aki bwakanako taina. Ma, au reirei nakoia mwaane aika akea buuia e bon aki naba bwakanako taina. A raraoma taan kairiiri n ana Ekaretia Iesu Kristo ibukin te mare n arora naba 20 te ririki n nako. Raraomara bon ibukin naba rikin kangaanga, n aron karakon te mweenga are a kona ni karekea taanga ake a tibwa mareaki ao rikiraken mwaitin aia tarau ake a reirei.

N aron ae kam bon ataia raoi ngkami kairake ni ikawai, tiaki ngkami ae kam karika te kangaanga ni baikanne, ma ngkami aika kam rootaki iai. Tera ae ko na karaoia? Waaki nako ma te onimaki, ao karaoa am kabanea ni kona n waakina karekean auti aika a maketenaki aika a kai reke riki nakon are ngai ma tibumi ti kaaitara ma ngaia n ara tai n rikirake Ao, riki, mwakuri ni kauarerekea ami tarau n te reirei.

N ana babaire te Atua ti kona ni karekei bwaai ni kabane, ma tiaki n aron are kaantaningaakina n waakin te aonaaba. Ti tangiria ni ibuobuoki man te kauring nakoimi n ana babaire te Atua ao katooto ni konabwai aika a tamaroa irouia naake a tia n taui waaki imwaira. A kitana mwengaia bwaeoniia ao aia bwai nako n uotia aia utu nakon te karekean te rau n taamnei n te Maunga i Maeao. N te bong aei, ti kaumakiko bwa ko na aki kitana te maiu n tamnei ao am utu ibukin karekean te kaubwai.

III.

Ao ngkai i taetae nakoimi ibukin kangaanga tabeua are e na kona naba ni kaineti nakoia ataein te reirei aika tangiraki ake a raoniira n te tai aei.

Ni kabuta te aonaaba, ao iai rao aika rotaki aia iango n te maaku ma te aki rau, bane nanoia n tangiran kamanging aika a taburoroko, bane aia tai iaon bwaai n reitaki n te intanete, ao n ukori reirei aika a tauaki mwaitiia Kam rootaki ni waaki aikai, ma te rongorongo ae raoiroi e kona n kauarerekea te rawawata anne ibukim.

Kam ataia bwa ngkami natin te Atua, aika a okoro n rikimi n uea mairoun te Atua. E tangiri ngkami te Atua. Bon te tia ibuobuoki ae mwakaroiroi, ao E a tia ni berita bwa e na buoki ngkami ngkana kam Ukoria n te kawai are E a tia n reirei iai. Kanakoraoa ami iango ao bwaai aika a kakawaki iroumi n te koaua ae korakora bwa ngke bon natin te Atua ae tangiraki. Ana tangira e anganiko te kona ni karinerine, te korakora, ao te unga n nano ni kaitarai kangaanga ake ko kaitara ma ngaia ni maium. Ao tai mwaninga bwa a tangiri ngkami Ana tabonibai. Ti tangiri ngkami.

I a tibwa karekea te reta ae kakawaki mairoun te ataeinaine ae 16 ana ririki ae maeka n te State ike a karako iai tabeman ara membwa. N na aranna bwa Amy. E rangi ni kakawaki ana reta ibukina bwa e kabwarabwaraki ana namakin aika a rereke irouia kairake n te Ekaretia ni kabuta. Ana reta Amy ae abwabwaki iai kanoana aikai. I a tia ni butia temanna raomi bwa e na wareka ana taeka.

Amy: “I namakinna bwa n tabetai I karekea te rongorongo ae bibitaki ma ni kaminonano man te Ekaretia. Ni maiu ni katoa bong, I nonoria kaain ana Ekaretia Iesu Kristo ibukiia Aika Itiaki ni Boong aika Kaitira iaon bwaai n reitaki ao ni karaoi mwakuri aika tiaki kanoan te euangkerio. … Kanga I namakinna bwa ti ngai te ataeinaine n au uoote ae I noori bwaai aika I noori bwa a bure ma te aonaaba. … I bon aki raoi koaua ao n oota bwa bukin tera a mwaiti kairake n ara Ekaretia ae aki noori kangaanga irouia aomata aika a bita aroia n riki ni mwaane ke aine, iraorao n tangira imarenaia aine ma aine ao mwaane ma mwaane ke ni kabuaa kinaakia n aine ao n mwaane. …

“N taai ni kakukurei irouia kairake n uoote ke titeiki, I tuangaki bwa antai au onea n ara irarikin arau, ke n te reirei I tuangaki bwa N na mwaie ma te aine are e taku bwa te mwaane ngaia. I ataia bwa ti riai n tangiria aomata ni kabaneia ao ni kaota ara karinerine, ao I kakaroa anne. I [bon] namakinna bwa e a tia n aki karaoaki ae riai. … Tera ngke ti ongo riki marooro mairouia taan kairiiri n te Ekaretia ibukin te kangaanga aei.”¹⁰

Beretitenti Oaks: Aio bon te reta ni kaumaki mairoun te ataeinaine ae bon kan roromi ae ataein te reirei n rinan are ieta riki ibuakomi ngkai. Bukin tera ana reta e rootai? E tangiria ni karaoa ae eti, ma e namakinna bwa e katobibiaki ni waaki ma anua aika e namakinna bwa a bure, ao n aki ataia bwa tera ae na karaoia iai. E tangiria ni kan tei ibukin te Koaua ma e aki ata arona ni karaoia ma te tangira. N te bootaki n taromauri nakoia kairake ni ikawai n Ensign college, Ngai ma Unimwaane Clark G. Gilbert ti kabwarabwara te kakaewenako n teimatoa ma te tangira ni katanoata te koaua. Ti kona n teimatoa n tangiria aomata ao n teimatoa n ara waaki n aki kabuaa te koaua are ti ataia.¹¹

N ana reta Amy e korea taekaia raoraona n te Ekaretia are aki oota ibukin riikia, te aro are e aranaki bwa kaokoron te namakin n rikim n aine ke ni mwaane. Te aki ota aio e kona ni karioi kakaokoron waaki n taai aika a kakaokoro ni maiun te aomata. Aomata ake a rootaki ke kaain te utu a riai n taraa raoi aio ao ni ukori reirei mai karawa ake a na katan iai ao ni mwakuriia. I a tia ni iangoa aron te waaki aei n te tai ae maan. Ngkai, n te tangira ae I namakinna ibukia ake a rootaki ma kangaanga aikai, I namakina kaungaan nanou iroun te Tamnei ni kabongana te tai aei ni katuruturui tabeua koaua aika a kakawaki ake a kaotaki man ana euangkerio Iesu Kristo ake a na buokira ma te aki ota aio.

Ataeinimwaane ao ataeinimwaane, ami taan kairiiri n te Ekaretia ao tieminari ao Intitute ao taan reirei ao ami karo iai tibwangaia ao te kairi nakoia n reireia koaua n ana euangkerio Iesu Kristo ae tia ni kaokaki. Iai iroumi te bokinreirei ae kakawaki Ibukin Kakorakoraia Kairake, are e koreaki iaon moan tua man ana babaire Tamara are i Karawa ibukin te kamauiaki, ana Mwakuri ni kamaiu Iesu Kristo, ao berita ae tabu are ti karaoia ngke ti bwabetitoaki ao ni kaboui ni katoa tabati man kanakin te toa. Moani baana e kaota te berita aio: “Ma koaua aikai bwa kairam, ko kona ni karaoi rinerine aika kaungaaki are e na kakabwaiako ibukin ngkai ao n aki tokina.”¹²

Ngke e titirakinaki Iesu bwa tera te tua ae korakora, E anga uoua. Te Moan bwa ko na tangira te Atua, are ti kaotia man kawakinan Ana tua nako. Te Kauoua tangiria raora.¹³ Ti riai ni karaoi ni kauoua, ao e aki beebete anne. ngaira aikai iai te anua iroura n anga te tangira ae aki tau nakoia raora ao ni katuruturua riki kawakinan te tua (tuua). Anne ni koaua nanou ibukin au kataneiein tuua. Ma ngaia are, tangiran te Atua ao kaotan ara tangira ibukin te Atua man kawakinan Ana tua nako bon te moan korakora n tua. Ao e koaua, e bebete iroura n motiki taekara ao aomata bwa ti bon ongotaeka nakon te tua. Irarikina, e rangi ni kakawaki naba nakoira kawakinan te kauoua n tua, are “n aron naba anne,”¹⁴ tangira raom n aron ana tangira Iesu nakoira.¹⁵

Ae babane nanou iai mai karawa te katooto ni bootakian ao kawakinan tua aika a korakora aikai are e karaoia te tia Kamaiu ngke e kaitaraaki ma te kangaanga aei. Mwakoro waniua n ana boki Ioane ao e taekina aroia tarukaio ao Bwaritaio are a uota te aine bwae na motikaki taekana iroun Iesu. Aia kaantaninga bwa a na kamwanea te tia Kamaiu bwa e aonga n rineia ni kaitaraa ana tua Mote ke te tua n Rome, are e aki kariaia te katuua ae te tiriaomata are e kairaki man ana tua Mote ni karaoan te bure aei. Ma kakawakin te katooto ibukira n boong aikai bon aron Iesu ni totokoa te kamwane ao n reireia te reirei ae korakora aei ni maiuakinan tuua aika uoua aika korakora aikai.

Te Moan, E aki karekekai nakoia ake a ukora ni waekoa kammwakuran te tua. E karaoa aei man totokoaia ni ukeria nako ibukia. “Ane tuai karaoa te bure mairoumi,” E taku, “ao kee moan karea moa neiei n te atiibu.”¹⁶ Ngke a nako ma te mamaa aomata akekei, e kaota mwakan te tangira te tia Kamaiu. Ana nanoanga e iremwe ni kabuakaka te aine, ao te mwakuri n tangira anne e uotirake nakon te maiu ae boou. Kammwakuran te tua e na roko rimwi, ngke e na motikaki taekana ni kabanea maiuna ni ikotaki ma te rairannano. Ma ni moan rikin anne e karababa ana tangira ao ana nanoanga te tia Kamaiu man katokan te kabuakakaaki ao imwiina kamatoaan te tua ngke e taku, “Ko na nako, ao tai manga bure.”¹⁷

Kainanoan botakin ao kamwakuran te tua ao te tangira, ma taun te tai ae kairaki mai ieta, e kaotaki ikai. E a tia ni kauringira Unimwaane Christofferson bwa “karaoan moa te moan tua e aki kamemerea arora ni kawakina te kauoua n tua. Ni kaitaraana, te moan tua e kakorakora ao ni kamatoa are te kauoua. … Ara tangira ibukin te Atua e karikirakea ara konaa n tangiria aomata n ae kororaoi bukina bwa ti iraorao ma te Atua ibukin tararuakiia Natina.”¹⁸

Iangoi kabwarabwara aika uoua aikai, teuana mairoun te tia taetae i BYU ao are teuana n te marooro rimoa mairoun te Mataniwii ni Kabuta.

“Te mwakuri ae bwanin n te babaire ni kamaiu, e roko n tokina mai ieta n ana mwakuri ni kamaiu ae korakora Iesu Kristo, e anganira te kona n riki bwa aomata n tangira ae te kabanea ni nano n reitakira ma aomata. …

“E reireinira aio bwa ni kabane tuua ao [ kairiri ni kabane mairouia burabeti]—ma koaua aika a kakawaki n te katanoata nakon te utu—a na kairiira ni kawain te Atua bwa ti aonga n riki bwa aomata aika bwaina te tangira.”¹⁹

Ao ngkai, te marooro are teuana:

“Kataan kakukureiaia aomata imwain kakukurein te Atua bon kaibibitan te moan ao te kauoua n korakora n tua. E kamwaninganako bwa e mena ia ara taratara. Ao eng, ti bane ni karaoa te kairua anne ibukin maakakiia aomata. …

Te Tia Kamaiu, ara katooto ae kakannato, e ongo n taainako iroun Tamana. E tangiriia ao n toro ibukiia Ana aomata ma e taku, “I aki kaeka te kamoamoaki mairouia aomata’ (Ioane 5:41). E tangiriia aomata ake e reireiniia bwa a na Iriiria, ma E aki ukora aia kariaia.”²⁰

Kabwarabwaran te tangira ao te tua aikai a kaairaki ni koaua ma te bwai ae tua te Atua bwa ti na karaoia. I a tia n taekina n nanona “reitinakon ara [kekeiaki] ni kabaeranta te tua aika uoua n te tangira ao te tua,”²¹ ma I kakoaua ngkai bwa te kouru anne ni kaota tamaroan kabwarabwaraan ni kataia n maiuakina ni kauoua tuua aikai n anga ae nakoraoi riki. Ane e aki kaota karineaia aomata ake a kaaitara ma kakaewenako n te riki ni mwane kee n aine a bon aki ira nanon te reirei n te moan ao te kauoua ni korakora n tua. Ngaia are, n ana tua te Atua, ti riai n uringnga bwa e a tia ni kaotia te Atua ae bon ngaia ae E karika te mwaane ao te aine.²² Ao irarikin kabaeara n tabera n tangiriia kain rarikira, ti riai n uringa bwa e a tia n tua nakoira te Atua bwa tina tangiriia n ikotaki ma ake a tuai kona ni kawakina te tua.

Ngkana ngkoe, ke temanna te membwa n te utu, ke te rao ae e rootaki n te kangaanga iaon kinaakin rikina, I kaumakiko bwa kona karina inanon maium tua n te euangkerio aikai ao ana tangira ao n nanoanga ara tia kamaiu ao te tia Kabooi Maiura, are ngaia e na buokiko ao ni kairiko ngkana ko mwananga n toua mwiin kawaina. Iesu Kristo, are E taku bwa ngaia “otan te aonaaba,”²³ e reireinira te kawai ae ti riai n iria ni karekei kakabwaia n rinerine mairoun Tamara are i Karawa. E reirei nakoira rinanon booki aika a tabu, irouia Ana burabeti, ao n ana kaotioti temanna. E tangirira ao e na kairiira ngkana ti ukoria ao n iriira are E kairiira iai.

IV.

Te kangaanga ae ataaki bon namakinan te tangira nakon te aomata ae titebo arom n riki ma ngaia n aron te mwaane nakon te mwaane. Eng, ngkana e aki karaoaki mwakuriana, te namakin anne bon tiaki te bure. Ma ti na kanga ni kaitaraa te namakin anne, are iroura ke irouia tabeman?

Au moan ibuobuoki bwa ko na uringnnga bwa kakaokorora n ana karikibwai ae bati Tamara are i Karawa, E tangirira ni kabane , ao Ana babaire ni kukurei ae kororaoi ibukira ni kabane. Ti kaota ara tangira Nakoina man kawakinan Ana tua ao tangiraia natina.

Ngkai aomata ma kaain te utu a buoka te namakin aei, a riai ake a reke iroua aei n taratara raoi ma kabwarabwara aika aki eti. E taetae iaon aei Beretitenti Russell M. Nelson n te bootaki n taromauri n te ririki ae nako. E reireia bwa kabwarabwaran temanna ae totokoaki ni kabane bukina bwa e urua ke ni katoka aroia aomata ni iango ibukia ao ake tabeman. Imwiin anne, e reirei, “Akea temanna ae na katuka, onea mwiin, ke tau taeka iaon kinaaki aika teniua aikai: ‘natin te Atua,’ ‘nati n te berita ae tabu,’ ao ‘ana reirei Iesu Kristo.’” E anga te kauring:

“Naake aki kona tau reirei aika teniua aikai bon ngaia ake ana uotiko rikaaki Tabeua kanikina a na bon aki kona n anganiko te kukurei ibukina bwa akea korakoraia ni kairiko nakon te maiu ae akea tokina n abanuean te Atua e tiretio.”²⁴

Tera ae iai mwaakana ni kairiira nakon te maiu ae akea tokina ao te abanuea ae tiretio bon berita aika a tabu ake ti karaoi. E a manga, bon tibwa reirei nakoira Beretitenti Nelson n te ririki ae nako:

“N te tai are ngkoe ao ngai ti karaoa te berita ae tabu ma te Atua, ara reitaki ma Ngaia e rikirake ni kaan nakon riki ara berita ae tabu. Ngkai ti a uaia ni kabaeaki. Ibukin ara berita ma te Atua, E na bon aki kua n Ana mwakuri ni buokiira, ao ti na bon aki kabuaa Ana nanomatoa n nanoanga nakoira. Ngaira n tatabemaniira nako iai nera ae onoti iroun te Atua.”²⁵

Ngkanne, tabeua te namwakaina n nako, E kauringiira Beretitenti Nelson bwa “kawakinan berita aika a tabu e na bon kabebetea te maiu! Aomata nako ake a karaoi berita aika tabu … a karikirakea karekean mwaakan Iesu Kristo.”²⁶

Ikotakina nakon korakoran temanna are e reke man kawakinan berita aika a tabu bon ana reirei ae tamaroa ara tia Kamaiu bwa ibuakon kangaanga n te maiu aei, ti riai “ni kukurei.”²⁷

N te marooro ni kabuta te aonaaba tabeua te namwakaina n nako, Unimwaane Jeffery R. Holland e kauringiira bwa e anga te reirei Iesu n te tairiki imwain Taurakina. E kanga Iesu n taetae iaon karekean te kukurei inanon ana tai ni kaitarai karawawata are e kaaitarai? E kabwarabwara Unimwaane Holland:

“Inanon te tai ni karuanikai are e riai ni karaoaki n te Kabanea n Katairiki, E [tia] n teimatoa Kristo ni kauringiia Ana reirei aroia ibukin, ao tabeia, ni ‘kabebetei nanoia’ [Ioane 16:33]. …

“… Ni koauana, te bwai ni kakoaua aei n Ana onimaki, n Ana kaantaninga ao ana tangira ae kororaoi, a roko ibukina bwa E ataa tokin te karaki. E ataia bwa e reke te raoiroi ngkana a roko n tokiia karaki. E ataia bwa te oota n tainako e tokanikai iaon te roo n aki toki ao n akea tokina.”²⁸

Kristen, iai am taeka ni kainiin ae ko tangiria n taekinna nakoia te kurubu aika a tangiraki aikai?

Titita Oaks: Bwaai ni bane ake ti taekin ikai a kona n uota te kakabwaia nakon maiura. Ti bane n ataa karakinaia tibun Iteraera are a boitin irouia naeta n te rereua. Ma n te tairiki aei aio bon ami karaki naba. N ana kaetieti te Atua, Mote e karaoa te kanikina n tei ibukin te tia Kamaiu, Iesu Kristo. Imwiina, Mote e weteia aomata ni kabane bwa na tararake ao a na kamaiuaki man ikoakia.

N te tairiki aei, kanga ai aroia Iteraera, ti buakanaki ibukin ara koaua aika tabu ake ti taui inanora. I tuangko, naba, bwa ko na tararake nakon te Atua ao ko na maiu. Tarai taeka ake a taekinaki n te tairiki aei, aia taeka ara burabeti, booki aika a tabu, te babaire ni kamaiu, ao am kakabwaia n tamanuea. Tataro ao e na mena iroun te Uea. Tiaki nanon anne bwa akea mai iroura ae na aki boo ma te kangaanga, ma e nanonaki bwa ti naaki maroaa, ao ti na waaki nako ni kairaki ao ni kamanoaki man te buakaka aika a katobibira. Nanona ti na ataa te koaua ao kukurei n te Tamnei. I kaoko bwa ko na taraa te Atua ao ni maiu.

V.

Beretitenti Oaks: Ti a tia ni marooroakina taekan te babaire ni kamaiu—ni kabane mwakuri ake teniua ake a tia ni kaotaki, moarara riki oin tabera n te maiu aei.

Ti a tia ni marooroakina taekan te tabe ao te tai ni mare ao ataei.

Ti a tia n reiakinna bwa ti riai ni ukora ataakin Iesu Kristo, n namakina Ana tangira, ao ni karekea te onimaki Irouna ao Ana kairiiri ae tatangira iaon kawain te berita nakon tiara are akea tokina.

Ti a tia ni marooroakini uoua tuua aika korakora—tangira te Atua ao tangiria raom—ao n tia n reireiakinaki bwa a riai n kawakinaki raoi.

N raraomara ni kabane, ngkai ti mwakuri korakora ni kaitarai kakaewenako, ti kaumakiko bwa e na rau nanom, bwa E a tia n tokanikai iaon te aonaaba. Ti konaa naba. Uringa, bwa a na babaire Tamara are i Karawa bon te babaire ni kakukurei.

I kakoauaa bwa ara Tia Kamaiu Iesu Kristo, bon Ngaia te kawai, te koaua, ao te maeu. N arana ae tabu, ae Iesu Kristo, amen.