Kōkajoorļo̧k Naan in Kam̧ool eo Ad
Nokon in Jota n̄an Rūm̧m̧an Ded ro Ipeļaakin Laļ In
Jabōt, Pāpode 18, 2024
Elder Ulisses Soares: Jen jinoe kōn unin kōnono in jinointata, “kōkajoorļo̧k naan in kam̧ool eo ad.”
PERU CONCEPCION— KAJJITŌK 2
Elder Soares, kajjitōk eo aō ej Elmen ad maron̄ kile n̄e jej m̧ōjņo̧ ilo jetōb, im elmen ad maron̄ etal jāne?
BOLIVIA LA PAZ— KAJJITŌK 6
Elder Soares, ta kapilōk eo am̧ kwon kar leļo̧k n̄an armej ro rej mour kake gospel in, jeļā bwe em̧ool ilo kōļmenļo̧kjeņ ko aer, ak rejjab en̄jake ilo buruweer?
CHILE CONCEPCION— KAJJITŌK 11
Iakwe, Elder Soares. Kajjitōk eo aō ej wāween Ta eo em̧m̧antata n̄an jipan̄ ro rejitenbōro bar ro̧o̧ļtok n̄an gospel in ālkin aer kar janiknik elōn̄ iiō?
Elder Soares: ro jera rejitenbōro, juon naan in kam̧ool eo em̧ool kōn gospel in ej kam̧ool n̄an jetōb eo ad jān Jetōb Kwojarjar kōn jet m̧ool ko rem̧ool indeeo. Kam̧ool in ej kōm̧m̧ane juon ikdeelel ilo kōj n̄an ukōt buruwōd n̄an Rilo̧mo̧o̧r ilo tōmak n̄an ukweļo̧k, en̄jake oktak in bōro, bōk kain̄i ko an lo̧mo̧o̧r, im bujen ko n̄an wōnm̧aanļo̧k wōt n̄an ļoor E ilo aolepān mour in ad. Ej bōktok meram in gospel eo em̧ōj an jepļaaktok an Jisōs Kraist n̄an mour ko ad n̄an adwōj mije m̧aanļo̧k ejja kōttōpar eo wōt n̄an jepļaakļo̧k n̄an ippān Jemedwōj Ilan̄. Juon naan in kam̧ool ekajoor rej lōn̄aj kōj n̄an kōm̧m̧an em̧m̧anļo̧k ilo mour in n̄an kōjparok kōj jān aujiid ko an Setan.
Rilo̧mo̧o̧r eaar letok juon wāween n̄an ad kōkajoorļo̧k naan in kam̧ool eo ad im n̄an bōbraik m̧ōjņo̧ im kapo ilo jetōbin aujiid ko. Eaar ba, “Ekkatak jān Eō, im ron̄jaki naan ko Aō; etetal ilo ettā in Jetōb eo Aō, im enaaj wōr am aenōm̧m̧an ilo N̄a.” Irooj make eaar kallim̧ur bwe E enaaj tōl iaļ ko ad n̄e jenaaj bōk kūr in.
Jet iiō remootļo̧k, rikanaan eo ad ejitenbōro, Būreejtōn Russell M. Nelson, ekar kwaļo̧k kōn jetōb eo ej im̧we jerbal eo. Eaar ba, “Jejjan̄in kar lukkuun aikuji em̧m̧an eo an kajoor eo ej im̧we jerbal eo eļapļo̧k jān ad aikuji kiiō, n̄an bōbrae m̧ōkaj in men eo enana im kōkkaļļe ko remarokļo̧k an iien ko eddōkļo̧k ilo kajoor.” Eaar kwaļo̧k ļalem men ko raorōk jej aikuj kōm̧m̧ani me enaaj jipan̄ kōj dāpij em̧m̧an in kajoor eo ej im̧we jerbal eo me emaron̄ jelet naan in kam̧ool eo ad kōn gospel in an Jisōs Kraist. Errein rej: (1) pād ilo iaļan bujen im pād wōt ie, (2) pukot lan̄lōn̄ eo an ukweļo̧k aolep iien, (3) ekkatak kōn Anij im ewi wāween An jerbal, (4) kappukot im kōtmāne kabwilōn̄lōn̄ ko, im (5) kabōjrake poktak ilo mour eo am̧ make. Ro m̧ōtta rejitōnbōro, ilo an rikanaan ro aolep iien kōm̧m̧ane, katak ko aer ej itok kallim̧ur ko: “Ilo am̧ jerbali kōttōbar kein, ij kallim̧uri eok kōn maron̄ eo n̄an em̧m̧akūt m̧aanļo̧k ilo iaļan bujen in enaaj kōļapļo̧k kajoor in im̧we jerbal eo, mekarta kapan̄pan̄ ko kwoj jelm̧ai. Im ij kallim̧uri kom̧ kōn eļapļo̧k kajoor n̄an jum̧ae kapo, eļapļo̧k aenōm̧m̧an ilo kōļmenļo̧kjeņ, anemkwoj jān mijak, im eļapļo̧k ippān doon ilo baam̧le ko ami.” En̄in ej ta eo rikanaan eo ej ba.
Ro m̧ōtta, tōmak ej waļo̧k jen jerbal, im jerbal ej kalōk im kōkajoorļo̧k naan in kam̧ool eo ad. Ilo ad jerbal kōn tōmak kōn men ko rikanaan eo ad ejitenbōro ekar kwaļo̧ki, naan in kam̧ool ko ad kōn Rilo̧mo̧o̧r im gospel eo An enaaj kajoorļo̧k, jenaaj kōmour wōt Kraist ilo mour ko ad, im jenaaj mour ilo mour ko ad “bwe em̧ōj likūt okram̧ ilo E im kalōk kom̧ ilo E, im kom̧win pen ilo tōmak, … im en ļap ami kam̧m̧oolol.” Ilo m̧ool, enaaj ļapļo̧k am̧ m̧ōņōņō kōn gospel in, naaj en̄jake eļapļo̧k im̧we eo an Jetōb Kwojarjar ilo mour ko am̧, im naaj jino kajoorļo̧k ilo jetōb n̄an kōjparok ņae jetōb ko renana n̄an kam̧ōjņo̧ik naan in kam̧ool eo.
Jitōnbōro, ewōr ke am̧ naan kōn jipan̄ ro jet ro̧o̧ltok n̄an iaļan bujen in ro me ekar jako naan in kam̧ool eo aer?
Sister Rosana Soares: Aaet. Ij tōmak aolep iien bwe wāween eo em̧m̧antata n̄an jipan̄ eo ejitenbōro bwe en ro̧o̧l n̄an iaļan bujen in ilo gospel in ej n̄an lukkuun iakwe Anij im armej eo im erom̧ waanjon̄ak eo em̧m̧antata kwomaron̄e. Kwomaron̄ rōjan̄ er n̄an jeļā kajjien Anij im m̧ōņōņōik iakwe eo eweppān an Rilo̧mo̧o̧r ilo jab ekajet er ak kajjirere kake er. Toon wōt ad iakwe Anij im pokake kien ko An, enaaj toon wōt ad en̄jake iakwe n̄an armej ro im ikdeelel eo me e emaron̄ m̧ōņōņōik kōjeraam̧m̧an ko an gospel in jekdo̧o̧n ijo rej lo er make ie ilo iaļan bujen in an rikaļoor. Ij ļōmņak armej rej aikuj lukkuun en̄jake iakwe men̄e kāālet ko aer ebōk er jān iaļan bujen in.