Mour Eo Ad En Pedped ioon Jisōs Kraist
Nokon an Rūm̧m̧an Ded ro Ipeļaakin Laļ In
Jabōt, Pāpode 18, 2024
Elder Ulisses Soares: Aolep kajjitōk ko rem̧m̧an jaar etali jotenin ej limtok jemļo̧k eo kōn unin kōnono eo aorōk tata me kom̧ kar bōktok n̄an kōj n̄an nokon in ad: “pedpede mour eo ad ioon Jisōs Kraist.”
Pija in alooj ko, jouj.
BOLIVIA LA PAZ— KAJJITŌK 3
Elder Soares, ewōr juon aō kajjitōk. Ekōjan ad maron̄, ilo juon laļ epoktak, ejaake juon lōke eļapļo̧k ilo Rilo̧mo̧o̧r im em̧m̧anļo̧k ad kajeeded meram eo an Jisōs Kraist ilo laļ in?
MEXICO CITY #1 – KAJJITŌK 4
Elder Soares, ekōjkan aō maron̄ epaakeļo̧k kajoor eo an Anij im, jān kōm̧m̧ane menin, kōkōm̧anm̧anļo̧k mour eo aō im maron̄ in jipan̄ ro jet?
PHILIPPINES CEBU— KAJJITŌK 9
Elder Soares, Ikōņaan kajjitōk, Ekōjkan ad kōjenolo̧k kōweeppān jān kūr eo an Kraist n̄an weppān āinwōt E?
Elder Soares: Kom̧ kanooj lukkuun em̧ool kōn ikdeelel jim̧we eo ami n̄an ļoor Rilo̧mo̧o̧r ilo ami kar kwaļo̧k kōn kajjitōk kein. Komij aikuj jeļā bwe ad Rilo̧mo̧o̧r Jisōs Kraist ej būlik jinoin raan ko ad, kōn pein tūriam̧o ko An rej eļļok kadede, m̧ōņōņō in, im maron̄ jepooļ kōj kōn An iakwe. Ikdeelel ko An rej bwe jen erom̧ āinwōt E, bwe jen ļōmņak im jerbal āinwōt n̄e en kar E, kōnke E ejeļā bwe en̄in ej iaļ eo n̄an bōk aenōm̧m̧an eo ejjeļo̧k jem̧ļo̧kin im m̧ōņōņō. Kōn menin, Rilo̧mo̧o̧r ej karuwaineneik kōj aolep iien n̄an epaakeļo̧k E im n̄an ļoor E kōn m̧ool in bōro. Ļōmņak kōn kūr in āinwōt kar je ilo jeje ko rekwojarjar:
“Reitok n̄an Eō ilo ļōmņak otemjeļo̧k; jab pere, jab mijak.” Ilo ad kautiej kūr in, Rilo̧mo̧o̧r ej kakūrm̧ool kallim̧ur ko An rekabwilōn̄lōn̄, ekoba etetal ilo meram eo An im an kajjojo armej bōk tōl ilo mour eo ad.
Pedpede mour ko ad ilo Rilo̧mo̧o̧r eaikuji kōj n̄an kōm̧m̧an bwe kōlmenļo̧kjen ko ad im ikideelel ko ad ren juon wōt Ippān. N̄an kōtōprak ijbadbad in, jej aikuj in kajjieon̄ katak eļapļo̧k kōn E, kōjeikiik mour ko ad bwe en ekkeijel wōt ippān gospel eo An ilo jokne, im kōm̧m̧ane juon kijejeto raan otemjeļo̧k, niknik n̄an kalimjōk wōt men ko me rem̧m̧an.
Ilo kijejeto ko ad n̄an kalaajrak mour eo ad ippān Rilo̧mo̧o̧r, jemaron̄ tarpok kōn ta meļeļe in n̄an erom̧ weeppān ilo Kraist im kōweeppān. Jitōnbōro, kwoj m̧ōņōņō ke in kwaļo̧k juon ļōmņak kōn menin?
Sister Rosana Soares: Aet. Ikōņaan bar āliji ta eo Elder Vern Stanfill jān Jiljilimjuōnn̄oul ekar katakin kōn wāween in. Ekar ba bwe jej aikuj keememej bwe weeppān ejjab āinwōt weeppān ilo Kraist. Kōweeppān ej aikuji jon̄ak eo an juon make, epen me ej keidi kōj n̄an ro jet. Menin ej kōm̧m̧an bōd im inepata im maron̄ kōm̧m̧an ad kōņaan kōmake ak kōttoļo̧k kōj.
Erom̧ weeppān ilo Kraist ej juon men elukkuun in oktak. Ej juon bun̄tōn—tōl jān Jetōb Kwojarjar ilo iakwe—n̄an erom̧ āinwōt Rilo̧mo̧o̧r. Jon̄ak ko rej kōm̧m̧an jān Jemed Ilan̄ eo ejouj im ejeļā aolep men im alikkar an kōmeļeļein ilo bujen ko kajjitōk ippād n̄an kautieji. Ilo ad bōk kūr eo an Rilo̧m̧oor n̄an itok n̄an E, em̧ōkaj ad kile bwe em̧m̧an tata eo ad ebwe im bwe kōn jouj eo an Rilo̧mo̧o̧r eo ej iakwe kōj enaaj kōm̧m̧ane oktak eo ilo wāween ko jejjab maron̄ ļōmņaki.
Elder Soares: Ro m̧ōtta, kobaļo̧k ilo jon̄ak in ej, ilo ejjeļo̧k kajjitōk, juon men jidik kōn jidik, to̧o̧n wōt ad mour im ej aikuj eļapļo̧k jān juon baj tōmak. Bōtaab ilo ad kaorōk e, jenaaj en̄jake lan̄lōn̄, aenōm̧m̧an, im eddōkļo̧k ilo jetōb, im m̧wil ko an Kraist remaron̄ erom̧ m̧ōttan kadkad ko ad, im nememen Anij emaron̄ waļo̧k ilo paotokimi.
Em̧ōj aō kar lo ekōjkan an pedpede mour eo ad ioon Rilo̧mo̧o̧r bōktok kajoor n̄an anjo̧ ioon men ko reppen, m̧ōjņo̧ ko, im metak ko an mour in, ko relukkuun in pen n̄an ineeki ilo an jako jipan̄ eo An im kajoor in kemour, Ewōr juon m̧ōtta eo me ej kiiō ioon juon nan̄inmej eļap, im nan̄inmej eo ejjab em̧m̧an. In m̧ōtta ejjab inepata kōn ta eo enaaj waļo̧k. Ikdeelel eo wōt an ej n̄an jeļā eļan̄n̄e liin ekar kijon̄ im kajoor ilo naan in kam̧ool eo an kōn Rilo̧mo̧o̧r Jisōs Kraist ilo mour eo an. Ej alikkar n̄an eō bwe in m̧ōtta ekar pedpede mour eo an ioon Rilo̧mo̧o̧r im ekar en̄jake An pein eļļo̧k n̄an atbo̧kwōje e, eļap tata ilo juon iien ekainepata.
Būreejtōn Nelson ekar katakin: “Emenin [aikuj juon] kijejeto eo eruj [im emakijkij] n̄an kobrak mour ko ad aolep raan kōn naan [ko an Rilo̧mo̧o̧r], katak ko An [im] m̧ool ko An.” Ejjeļo̧k men ej karuwaineneiktok Jetōb eo eļapļo̧k jān ad pedpede ļōmņak eo ad ioon Jisōs Kraist.
Ro m̧ōtta jitōnbōro, ij ļōmņak jej jino epaakeļo̧k jem̧ļo̧k in iien in ad aiboojoj ippān doon. M̧okta jān aō kwaļo̧k ennaan in ikkilōk ko aō, ikōņaan karuwaineneik jitōnbōro ro ad Brother im Sister Webb innām kōrā eo ippa ejitōnbōro n̄an kwaļo̧k jidik aer naan in kam̧ool. Komaron̄ ke kōm̧m̧ane menin? Kom̧ro m̧ool.
Sister Kristi Webb: Ro jeiū im jatū, ij iakwe ad Rilo̧mo̧o̧r, Jisōs Kraist. Itok n̄an meļeļe iakwe eo An eweeppān n̄an eō ekar ukōt mour e aō. E ekar ukōt eō. Ij kam̧ool bwe E ej mour. Ij kam̧ool bwe E ej iakwe kōj kajjojo. Ij kam̧ool bwe E ekar letok An mour n̄an lo̧mo̧o̧ren kōj. Waanjon̄ak in ettā bōro, pokake, im iakwe eo An ej im̧we eō raan otemjeļo̧k. E ej katakin eō ekōjkan lōke im jerbal n̄an Jema Ilan̄. E ej aō meram, kajoor, im kōjatdikdik. Ilo etan Jisōs Kraist, amen.
Brother Chad H Webb: Ej juon jeraam̧m̧an n̄an kōm n̄an pād ippāmi joteen in im n̄an pād ippān Elder im Sister Soares. Ij kōņaan kobaik naan in kam̧ool eo aō kōn kūr eo an Elder Soares āinwōt juon Rijilōk an Irooj Jisōs Kraist. Ij barāinwōt jeļā bwe Būreejtōn Russell M. Nelson ej rikanaan eo an Irooj ioon laļ in rainin. Ij barāinwōt kobaik naan in kam̧ool eo aō bwe Jemedwōj Ilan̄ ej iakwe kom̧. Ewōr juon an karōk in m̧ōņōņō eļap eweeppān n̄an lo̧mo̧o̧ren im kotak lōn̄ļo̧k ajri ro Nejin. Jisōs Kraist ej m̧ōņakjen eo ioļapļap in karōk jab in eweeppān im ej Rilo̧mo̧o̧r im Ripinmuur an laļ in. E ej ad waanjon̄ak eweeppān. E ej Kraist eo emour. E ej juon Anij in lo̧mo̧o̧r. Jej maron̄ lōke E kōn aolepān buruōd. Ij lukkuun kam̧m̧oolol bwe ij juon membōr in Kabun̄ eo An im kōn aolep kōjeraam̧m̧an ko ewōr ippān kōn gospel eo An me em̧ōj an jepļaaktok. Ilo etan Jisōs Kraist, Amen.
Sister Soares: Ro m̧ōtta rejitōnbōro, eļap aō kam̧m̧oolol kōn juon Anij eo ej epojak in jipan̄ ilo men redikdik ko ilo mour ko ad. Ejeļā ta eo jej aikuji, im E ewōr an uwaak n̄an kajjitōk ko ad. Ta eo jej aikuj kōm̧m̧ane ej kajjitōk! Ilo ad kwaļo̧k ad kijenmej, kam̧m̧oolol, im ad tōmak ilo E kōn jar em̧ool, E ej pād ijeņ aolep iien, n̄an pojak in jipan̄ kōj. E eban etal jān kōj. Men̄e jej jab en̄jake E, E ej aolep iien pād ijeņ.
Im ta eo eļap an letok kōjatdikdik n̄an n̄a ej ilo aō jeļā bwe ewōr juon Rilo̧mo̧o̧r eo ej tōl Kabun̄ in An ilo laļin kōn Būreejtōn Nelson im Rikanaan ro An, rilolo, im rikwaļo̧k revelesōn. Ilo etan ad Rilo̧mo̧o̧r, Jisōs Kraist, amen.