Kōm̧m̧an Iien n̄an Irooj
Ij akweļap ippemi rainin n̄an jum̧ae kareel ko an laļ in ilo ami kōm̧m̧an iien n̄an Irooj ilo mour eo ami—kajjojo im aolep raan.
Ro jeiū im jatū rejitōn bōro, ium̧win ruo raan ko jekar ekkatak jān rikarejar ro an Irooj ro rekar tiljek ilo pukot bwe ren jeļā ta eo Enaaj ba n̄an er.
Kar letok n̄an kōm eddo eo n̄an allōn̄ kein jiljino tok. Kiiō kajjitōk eo ej, enaaj ewi wāween ad oktak kōnke kōn ta eo jaar ron̄ im en̄jake?
Ajedeed in nan̄inmej in ekar kōmeļeļeiki wāween an mour in m̧ōkaj an maron̄ oktak, ilo elōn̄ iien ko jān jekjek ko retar jān jon̄an ad maron̄ kōjparoki. Ijoke, elōn̄ men ko jemaron̄ kōjparoki. Jej make kōm̧m̧ani kālet ko ad raorōktata im ņa mejļan wāween ad kōjerbal kajoor eo ad, iien, im kōjeraam̧m̧an ko. Jej pepe kōn wāween ad naaj kōm̧anm̧an n̄an kōj kajjojo. Jej kālet ro im jenaaj oktakļo̧k n̄an er kōn m̧ool im tōl.
Ainikien ko im kajoor in kareel eo jān laļ in rej bōk jikier im reļļap. Ak elukkuun lōn̄ ainikien ko rej m̧oņ, rekarelel, im remaron̄ bōk kōj jān iaļ in bujen in. N̄an kajekdo̧o̧n rub in bōro eo ejej uwaan emaron̄ waļo̧k, ij akweļap ippemi rainin n̄an jum̧ae kareel ko an laļ in ilo ami kōm̧m̧an iien n̄an Irooj ilo mour ko ami—kajjojo im aolep raan.
N̄e enan̄in aolep meļeļe ko kwoj būki rej itok jān social ak media ko jet, am maron̄ ron̄jake unoojdikdik ko an Jetōb eo enaaj dikļo̧k. Eļan̄n̄e kwojjab barāinwōt kappukot Irooj ilo jar aolep raan im ekkatak gospel eo, kwoj likūt eok make ilo katak ko remaron̄ kareel me remaron̄ kaitoktoklimo ak rejjab m̧ool. Aaet Rikwojarjar ro ro rej tiljek remaron̄ jodik er jān rijum̧ae eo rekajoor an Babiļon.
Ro jeiū im jatū, ij akweļap ippemi n̄an kōm̧m̧an iien n̄an Irooj! Kōm̧m̧ane pedped eo am epen ilo jetōb im emaron̄ jutak ilo iien mālijjon̄ an iien ilo am̧ kōm̧m̧ane men ko rej kōtļo̧k an Jetōb Kwojarjar eo aolep iien pād ippem.
Kwōn jab pere m̧ool eo eļap me “Jetōb eo ej kōnono … men ko āinwōt aer lukkuun im, kōn men ko āinwōt aer naaj waļo̧k.”1 “Enaaj kwaļo̧k n̄an kom̧ aolep men ko kom̧ij aikuj kōm̧m̧ani.”2
Ejjeļo̧k juon men eļapļo̧k an karuwaineneik Jetōb eo jān am̧ kajim̧weik jibadbad eo am̧ n̄an Jisōs Kraist. Kōnono kōn Kraist, lan̄lōn̄ ilo Kraist, kwojkwoj ioon naan an Kraist, im bun̄ m̧aanļo̧k kōn dim ilo Kraist.3 Kōm̧m̧an bwe raan in Jabōt eo am̧ en lan̄lōn̄ ilo am̧ kabun̄jar n̄an E, bōk m̧ōttan kwojkwoj eo, im kokwojarjar e raan eo An ekwojarjar.4
Āinwōt ikar kwaļo̧k jibbon̄ in, jouj im kōm̧m̧an am̧ iien n̄an Irooj ilo m̧weo Im̧ōn ekwojarjar. Ejjeļo̧k juon men enaaj kōkajoorļo̧k pedped eo am̧ ilo jetōb āinwōt iien jar ko ilo tampeļ im kabun̄jar ilo tampeļ.
Kōm̧ij kam̧m̧oolol aolep ro rej jerbal ilo tampeļ ko ad rekāāl. Rej ekkal ilo aolepān laļ in. Rainin ij m̧ōņōņō in kōjjeļļā kōn karōk ko ad n̄an kalōk elōn̄ļo̧k tampeļ ko ak iturin jikin kein rej ellaajrak: Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; im bar ekkal in kōkāāle Provo Utah Temple ālkin an Orem Utah Temple nej aje.
Ij iakwe kom̧, ro jeiū im jatū rejitōn bōro. Irooj ejeļā im ej iakwe eok. E ej am̧ Rilo̧mo̧o̧r im am̧ Ripinmuur. Ej tōl im jineete Kabun̄ in An. Enaaj tōl im jineete eok ilo mour eo am̧ make eļan̄n̄e kwonaaj kōm̧m̧an am̧ iien Ippān ilo mour eo am̧—kajjojo im aolep raan.
Anij en pād ippem m̧ae iien jenaaj bar ioon doon, ij jar ilo āt eo ekwojarjar etan Jisōs Kraist, amen.