Kabwilōn̄lōn̄ ko an Gospel eo an Jisōs Kraist
Ijeļā ke gospel in An enaaj bōktok kōjatdikdik, aenōm̧m̧an, im lan̄lōn̄, ejjab kiiō wōt, ak enaaj barāinwōt kōjeraam̧m̧an ro jet ilo epepen kane rej itok.
Mabuhay! Ij bōktok n̄an kom̧ iakwe im okmānāānin in ettōn̄ dikdik ko jān Armej ro Rekwojarjar ilo Phillipine. Iiiō in ej m̧aake 60 iiō jān ke mijenede ro moktata raar bōktok ilo aelōn̄ in Phillipine. Rainin ewōr 23 mijen ie im elōn̄ļo̧k jān 800,000 membōr ro an Kabun̄ in ilo 123 stake ko. Ewōr kiiō 7 tampeļ ko emōj kōm̧m̧ani, rej pād ilo aer kōkāāli wōt, ak iien kōjjeļļā kaki. Menin ej lukkuun juon kabwilōn̄lōn̄. Jej kam̧ool i kanaan kein me emōj aer waļo̧k ilo 2 Nipai 10:21: “Reļļap kallim̧ur ko an Irooj n̄an er ro rej pād ioon aelōn̄ ko ioon lo̧jet.”
Menin bwilōn̄ in ej barāinwōt juōn kannaan eo me emōj an bar waļo̧k ilo kar jar eo an-Elder Gordon B. Hinckley ilo Manila ilo iiō ne 1961. Ilo jar eo, Elder Hinckley ekar ba: “Kōmij uwar e kōjeraam̧m̧an ko Am n̄an ioon armej rein ilo aelōn̄ in, bwe ren em̧m̧an im jeļā karuwainene im jouj im em̧ool n̄an ro me ranej itok, im bwe rein relōn̄, aet, Irooj, kōmij jar bwe en [lōn̄], im elōn̄ taujin ro renaj bōk ennaan kein im jeraam̧m̧an kaki. Komaron̄ ke kōjeraam̧m̧an ir kōn ļōmņak ko repojak im būruwō ko remeļeļe, im kōn tōmak bwe ren maron̄ bōk ioor, im kōn peran n̄an aer maron̄ mour ekkar ñan pedped in gospel eo” (jar in kōjeraam̧m̧an lōp ilo American War Memorial Cemetery, Philippines, Apr. 28, 1961).
Emootļo̧k jān bwijjin, bwijin taujin in ritōmak ro ilo Armej ro Rekwojarjar ilo Raan Ko Āliktata, me emōj an menin bwilōn̄ kein ilo gospel in kar kōm̧m̧an oktak ko rem̧m̧an n̄an lal eo im armej ro ie. N̄aij juōn rikam̧ool eo emour rainin kōn menin. Ekar jiljino aō iiō ke jinō im jema rekar itok n̄an Kabun̄ in ilo turōk in ānneo ilo Mindanao. Ilo kar tōre eo, ekar wōr juōn mijen ilo aolepān lal en im ekar ejjeļo̧k stake. Eban jem̧ļo̧k aō kam̧m̧oolole jinō im jema kōn aer kar peran im wūjlepļo̧k er make n̄an ļoor Rilo̧mo̧o̧r eo. Ij kautiej er im aolepen pioneer ro an Kabun̄ in ilo Philippine in. Raar kōmetale ial eo n̄an epepen ko rej bōk jikier n̄an aer jeraam̧m̧an.
Kiin̄ Benjamin ilo Bok in Mormon eaar ba: “Im eļapļo̧k, ikōņaan bwe kom̧in ļōmņak kōn jekjek eo ejeraam̧m̧an im ekōm̧ōņōņō an ro raar kōjparok kien ko an Anij. Bwe lo, rej jeraam̧m̧an ilo aolep men ko otemjeļo̧k, jimor ilo kanniōk im jetōb” (Mosaia 2:41).
Ilo ad mour im pokake pedped ko im kain̄i ko an gospel in, jej jeraam̧m̧an, oktak, im oktak n̄an erom āinwōt Jisōs Kraist. Āindene an kar gospel eo ukōt im kōjeraam̧m̧an Armej ro Rekwojarjar ilo Philippine, kobaļo̧k ippān baam̧le eo aō. Gospel eo ej lukkuun ial eo n̄an m̧ōnōnō, mour obrak kōn jeraam̧m̧an.
Pedped eo mokta ilo gospel in ej tōmak ilo Irooj Jisōs Kraist. Elōn̄ Riphilippine rej ritōmak kadede im kaju mōkaj aer tōmak ilo Anij. Elukkuun pidodo n̄an kōj n̄an lōke Jisōs Kraist im jeļā ke jemaron̄ bōk uwaak ko an jar ko ad.
Baam̧le eo an Obedoza rej juon waanjon̄ak em̧m̧an kōn menin. Brother Obedoza ekar branch būreejtōn eo aō ke iaar juōn ļaddik wōt. Kar kōņaan eo an Brother im Sister Obedoza eļaptata ej bwe ren maron̄ liape baam̧le eo aer ilo Manila Tampeļ. Raar jokwe ilo General Santos City, 1,000 miles (1,600 km) ettoļo̧k jān Manila. Āinwōt juōn baam̧le eo ewōr ruatimjuōn uwaan, ekōm̧m̧an bwe ial eo ļo̧k n̄an tampeļ en pen. Ak āinwōt em̧m̧aan ruwia kake eo eaar ilo̧k im wia kake aolep men ko ewōr ippān n̄an wiaik juon bōōr eo eļap wōņāān (lale Matu 13:45–46), ripālele in raar kālet bwe ren wia kake m̧weo im̧eer n̄an kōļļāk tūreep eo aer. Sister Obedoza eaar inepata kōnke emaron̄ in ejjeļo̧k aer jāān in bar ro̧o̧l. Bōtaab Brother Obedoza eaar ba n̄an e ke Irooj enaaj kake.
Raar liāp āinwōt juon baam̧le n̄an iien im n̄an indeeo ilo tam̧peļ eo ilo 1985. Ilo tam̧peļ eo raar lo lan̄lōn̄ eo ilōn̄in aolep lan̄lōn̄—bōōr eo aer ejjeļo̧k wōņāān. Im n̄an kam̧ool naan ko an Brother Obedoza, bwe Irooj eaar kake. Ilo jepļaak ļo̧k eo aer jān Manila, juon m̧ōttāer me ejouj eaar leļo̧k jikin aer jokwe, im tokālik ekar bar wōr juōn mweier make. Irooj ej kōjparoke ro rej kwaļo̧k aer tōmak ilo E.
Pedped eo kein karuo an gospel in ej ukweļo̧k. Ukweļo̧k ej oktakļo̧k jān jerawiwi im oktakļo̧k n̄an Anij n̄an jeorļo̧k bōd. Ej juon oktak ilo kōļmenļo̧kjeņ im bōro. Āinwōt an Būreejtōn Russell M. Nelson katakin, en̄in “kōm̧m̧an im em̧m̧anļo̧k jidik kajojo raan” (“Jemaroñ Kōmman bwe en Emmanlok im Maroñ Emmanlok ,” Liahona, May 2019, 67).
Ukweļo̧k elukkuun ļap an āinwōt jop. Āinwōt juōn Injinia in Chemical, iar jerbal ilo jikin kōm̧m̧an jop ilo Philippine. Iaar katak kilen kōm̧m̧an jop im wāween eo me ej kwaļo̧k kilen an jerbal. N̄e kwoj iōōke oil ko ippān juon alkali base im kobaik ūno eo ej joļo̧k kij, ej ejaake juon men eo ekajoor me emaron̄ joļo̧k kij im virus ko. Āinwōt jop, ukweļo̧k ej āinwōt agent in karreo in. Ej letok ien n̄an joļo̧k men ko rejjab erreo ippād im kinej ko ippād, bwe jān erreo n̄an ad maron̄ pād ippān Anij, āinwōt ke ejjeļo̧k menen ettoon emaron̄ jolōte aelōn̄ in [Anij]” (Alma 11:37).
Kōn ukweļo̧k jemaron̄ epaakļo̧k n̄an karreo, kokwojarjare kajoor eo an Jisōs Kraist. Ej juōn kii m̧ōttan wōt jerbal in oktak tok eo. Menin ar waļo̧k n̄an Anti-Nipai-Liai ilo Bok in Mormon. Rekar Rileman ro me raar lukkuun m̧ool in oktak jon̄an raar “jab bar wōtlo̧k” (lale Alma 23:6–8). Rekar kalbwin kein tariņae ko aer im rekar jab bar kwaļo̧ki. Renej mej mokta jen aer kakkure bujen eo. Im raar kam̧ool e. Jejeļā ke kōn aer kar kaarmijete er make rekar bōktok menin bwilōn̄ ko; taujin ro raar tarinae ņae er raar bar joļo̧k kein tarinae ko aer im raar bar oktak ippāer. Elōn̄ iiō tokālik likao ro nejjier, ro me jejeļā kake er ruo taujin likao em̧m̧an ded rein an ritarinae, raar kōjparok er jān menin kabwilōn̄lōn̄ ko ejjeļo̧k uwaer!
Baam̧le eo aō im elōn̄ armej ro rekwojarjar ilo Philippine me rekar pād ilo ejja kilen oktak in wōt. Ke kōm̧ ar bōke gospel eo an Jisōs Kraist im kobaļo̧k ilo Kabun̄ in, kōm kar ukōt m̧wiļ ko ammim im m̧anit ko ammim n̄an kepaakeļo̧k gospel in. Kōm̧ ar aikuij in joļo̧k imenene ko rejjab jimwe. Iar lo menin ippān jema ke ar katak kōn gospel in im ukweļo̧k. Ekar juōn eo elukkuun kar ļap an kōbatat, ak ar joļo̧k jikka ko kijen im jab bar jibwi. Kōn an kar ļōmņak in oktak, emān epepen laltak jān e raar lukkuun jeraam̧m̧an.
Ukweļo̧k ej tōl kōj n̄an ad kōm̧m̧an im kōjparok bujen ko ilo kain̄i ko rekwojarjar. Kain̄i eo kein kajuōn an Lo̧mo̧o̧r im mour eo eutiej ej n̄an peptaij im tuļo̧k n̄an jeorļo̧k in jerawiwi ko. Peptaij ej kōmman bwe jen maron̄ bōk menin letok eo an Jetōb Kwojarjar im delo̧n̄e juon bujen ippān Irooj. Jemaron̄ kōkāāl e bujen in peptaij ko ad ilo ad bōk kwojkwoj eo aolep wiik. Menin ej bar juōn menin kabwilōn̄lōn̄!
Ro jeiū im jatū, ij karuwaenene kom n̄an bōk menin kabwilōn̄lōn̄ kein ilo mour ko ami. Itok n̄an Jisōs Kraist im kālet n̄an kōjerbal tōmak eo am ilo E; ukweļo̧k im kōm̧m̧an im kōjparok bujen ko me raar waļo̧k ilo kain̄i in lo̧mo̧o̧ren ko im mour āinwōt Anij. Menin enaaj kōtļo̧k am kobaļo̧k ippān Kraist im bōk kajoor eo im kōjeraam̧m̧an in āinwōt Dikanij (lale Katak im Bujen Ko 84:20).
Ij kam̧ool kōn Jisōs Kraist ke ej m̧ool im Ej mour im iakwe kōj kajojo. Ijeļā ke gospel in An enaaj bōktok kōjatdikdik, aenōm̧m̧an, im lan̄lōn̄, ejjab kiiō wōt, ak enaaj barāinwōt kōjeraam̧m̧an ro jet ilo epepen kane rej itok. Ej unin an aiboojoj im mānnāān ettōn̄ dikdik ko an armej ro rekwojarjar ilo Philippine. Ej menin bwilōn̄ eo an gospel in im katak eo an Kraist. Ij kam̧ool men kein ilo et eo ekwojarjar etan Jisōs Kraist, amen.