Kile Kraist Bwe En Rijeje kōn Bwebwenato in Mour eo Am̧
Kōm̧m̧an bwe bwebwenato in mour eo am̧ en kōn tōmak, ļoor Riwanjon̄ak eo am̧, Rilo̧mo̧o̧r Jisōs Kraist.
Ij jino ilo aō litok jejjo kajjitōk ko, n̄an an kajjojo armej kejokļo̧kjeņ kaki:
-
Kain bwebwenato rot eo am̧ make me kwoj je kōn mour eo am̧?
-
Iaļ in me kwoj kōmeļeļeiki ilo bwebwenato eo am̧, ekajim̧we ke?
-
Bwebwenato eo am̧ ej ke jem̧ļo̧k ijo ekar jino ie, ilo kapijuknen eo am̧ ilan̄?
-
Ewōr ke juon riwaanjon̄ak ilo bwebwenato eo am̧—im ej ke Rilo̧mo̧o̧r Jisōs Kraist?
Ij kam̧ool bwe Rilo̧mo̧o̧r ej “rijeje im rikadedeļo̧k an tōmak eo ad.”1 Naaj karuwaineneik E bwe en erom̧ juon rijeje im rikadedeļo̧k bwebwenato in mour eo am̧?
E ejeļā jinoin im jem̧ļo̧kin. E ekar juon Rikōm̧anm̧an lan̄ im laļ. Ekōņaan bwe jen jepļaak n̄an E im ippān Jemedwōj Ilan̄. E ewōr ippān aolep men ekar letok n̄an kōj im ekōņaan bwe jen tōprak im jeraam̧m̧an.
Ta eo kwoj ļōmņake ej dāpij kōj jān ad kwaļo̧k bwebwenato ko in mour ko ad n̄an E?
Bolen kōmeļeļe in enaaj jipan̄ etale eok make.
Juon lawyer eo ewejepdik eo ej kōm̧m̧an keij ko ejeļā bwe ilo iien bar etale kajjitōk ak ekajet rikam̧ool ro, kwojjab aikuj kajjitōkin juon rikam̧ool kōn juon kajjitōk eo me ejjab jeļā uwaak eo an. Kajjitōk juon kajjitōk ej kōm̧m̧an bwe rikam̧ool eo en ba n̄an kwe—im riekajet eo im jury eo—juon men kwojjab jeļā kadede kake. Kwomaron̄ bōk juon uwaak eo me ej kabwilōn̄ eok im ej iookļo̧k bwebwenato eo me kwaar ejaake kōn keij eo am̧.
Men̄e kajjitōk ippān juon rikam̧ool juon kajjitōk eo me ejjab jeļā uwaak eo ejjab jerbal kapeel n̄an juon lawyer eo an keij eo, ak oktan menin em̧ool n̄an kōj. Jemaron̄ kajjitōk kajjitōk ko n̄an Jemedwōj Ilan̄ eo ej iakwe kōj, ilo etan Rilo̧mo̧o̧r eo eļap an tūriam̧o, im rikam̧ool eo ej uwaak kajjitōk ko ad ej Jetōb Kwojarjar, eo ej kam̧ool aolep iien kōn m̧ool eo.2 Kōn Jetōb Kwojarjar eo me ej jerbal ilo bōro kuk ewāppen ippān Jemedwōj Ilan̄ im Jisōs Kraist, jejeļā bwe waļo̧ktok ko an Jetōb rej jet menin kōjatdikdik. Etke, innām, jet iien jej makoko in kajjitōk kōn kain jipan̄ in jān lan̄, m̧ool eo kwaļo̧k tok n̄an kōj jān Jetōb Kwojarjar? Etke jej kōtļo̧k bwe jen kajjitōk juon kajjitōk me jejjab jeļā uwaak eo an n̄e rikam̧ool eo ejjab jouj wōt ak ej kwaļo̧k m̧ool eo aolep iien?
Bolen kōnke ejjeļo̧k ad tōmak n̄an bōk uwaak eo me jemaron̄ bōke. Bolen ej kōnke kōrā im em̧m̧aan ro ilo lukkuun piktokier rejjab kōtļo̧k bwe ren pedped ioon Irooj ilo aolep men im lukkuun lōke E. Bolen unin ad kālet n̄an dāpdep wōt ilo bwebwenato ko me jekar je kōn kōj make, juon kape em̧m̧an in bwebwenato in mour ko ad me ejjab maron̄ kōm̧m̧an kajim̧we jān Maajta Rijeje eo. Jejjab kōņaan kajjitōk juon kajjitōk im bōk juon uwaak eo me ejjab jejjet n̄an bwebwenato eo jekar je kōn kōj make.
Ilo m̧ool, jejjo iaad jenaaj bōlen je ilo bwebwenato in mour ko ad mellijon̄ ko me rej kōkm̧anm̧anļo̧k kōj. Ak jej ke m̧ōņōņō kōn jem̧ļo̧kin juon bwebwenato eaibojooj eo me jej riiti kōn armej eo ilo bwebwenato eo me ej anjo̧ ioon apan̄ ko? Mellijon̄ ko rej m̧ōttan karōk ko me kar kōm̧m̧an bwe bwebwenato in mour ko ad rem̧m̧an tata ippād ren em̧m̧an, jab kakkure iien, kōļapļo̧k tōmak, im wōr tokjeņ bwebwenato kake. Apan̄ ko raibojooj kar je ilo bwebwenato in mour ko ad rej ta eo ej kepaak kōj n̄an Rilo̧mo̧o̧r im kōkm̧anm̧anļo̧k kōj, kōm̧m̧an bwe jen āinwōt E.
Bwe Devid en maron̄ kar anjo̧ ioon Goliat, ļaddik in ej aikuj kar jelm̧ae rijum̧ae eo, rineia eo. Jekjek eo epidodo n̄an Devid ej bwe en kar jepļaak im lale sip ko. Ak ijjeļo̧kin ekar kejokļo̧jeņ kōn en̄jake ko an n̄an lo̧mo̧o̧ren ļam ko jān juon ļaiōn im juon bear. Im kalōk ioon kajoor kein, ekar kobaik tōmak im peran n̄an kōtļo̧k bwe Anij en je bwebwenato in mour eo an, ej ba, “Irooj eo ear lo̧mo̧o̧r eō jān pein ļaiōn, im jān pein bear, Enaaj lo̧mo̧o̧ren eō jān pein ri Pilistia en.”3 Kōn juon ikdeleel n̄an kōtļo̧k bwe Anij en anjo̧, n̄an ron̄jake Jetōb Kwojarjar im juon kōņaan n̄an kōtļo̧k bwe Rilo̧mo̧o̧r en rijeje im rikadedeļo̧k bwebwenato in mour eo an, ļaddik eo Devid ekar wiin jān Goliat im ekar lo̧mo̧o̧ren armej ro an.
Pedped in katak eo eim̧we kōn anemkwoj in kālet, em̧ool, ej kōtļo̧k kōj n̄an je bwebwenato in mour ko ad make—Devid ekar jepļaak n̄an kapijuknen, im bar lale sip ko. Ak Jisōs Kraist ej pojak im jutak n̄an kōjerbal kōj āinwōt jet kein jerbal ko rekwojarjar, kakkan̄e penjeļ ko ilo Pein, n̄an jin̄n̄aik juon jin̄n̄a/pija! E ej kōņaan ilo tūriam̧o bwe en kōjerbale eō, juon penjeļ eo emera, āinwōt juon kein jerbal eo ilo Pein, eļan̄n̄e ewōr aō tōmak n̄an kōtļo̧k bwe E en, eļan̄n̄e inaaj kōtļo̧k bwe En rijeje kōn bwebwenato in mour eo aō.
Ester ej bar juon waanjon̄ak em̧m̧an kōn kōtļo̧k bwe Anij en anjo̧. Ijjeļo̧kin an kar dāpdep ilo juon bwebwenato kōn kilen kōjparok kōj make, ekar kōjerbal tōmak, lukkuun leļo̧k aolepen an n̄an Irooj. Haman ekar kōm̧m̧an karōk n̄an kakkure aolep riJu ro ilo Persia. Mordecai, nukin Ester, ekar jeļā kōn jekjek eo im ekar jeje n̄an e, ekairiiri e n̄an kōnono ippān kiin̄ eo ilo etan armej ro an. Ekar kakeememej e bwe juon eo ej kajjieon̄ tōpar kiin̄ eo ilo an jab kam̧m̧ool enej aikuj mej. Ak ilo juon jerbal in tōmak eļap, ekar kajjitōk ippān Mordecai n̄an aiin tok riJu ro im jitlo̧k kōn e. “N̄a barāinwōt im lim̧aro ri karijera kōmnaaj barāinwōt jitlo̧k,” liin ekar ba, “āindein inaaj deļo̧n̄ n̄an ippān kiin̄ eo, men̄e e jab ekkar n̄an kien: im eļan̄n̄e I jako, ekwe, I jako.”4
Ester ekar kōņaan kōtļo̧k bwe Rilo̧mo̧o̧r en je bwebwenato in mour eo an men̄e, kōn kōļmenļo̧kjeņ ko an laļ, jem̧ļo̧k eo emaron̄ kar lukkuun kaburom̧ōjm̧ōj. Ejeram̧m̧an, kiin̄ eo me kar wōnm̧aeik Ester, im riJu ro ilo Persia rekar bōk lo̧mo̧o̧r.
Aaet em̧ool, jon̄an peran eo an Ester ejeja an kajjitōkin kōj bwe jen kōm̧m̧ane. Ak kōtļo̧k bwe Anij en anjo̧, kōtļo̧k bwe en rijeje im rikadedeļo̧k bwebwenato in mour ko ad, emenin aikuj bwe jen kōjparok kien ko An im bujen ko jekar kōm̧m̧ani. Ej ad kien im ad kōjparok bujen ko me renaaj kōpeļļo̧k iaļan kōnono im bōk meļeļe kōn kōj n̄an bōk revelesōn jān Jetōb Kwojarjar. Im ej kōn waļo̧ktok eo an Jetōb me enaaj kōm̧m̧an bwe en en̄jake eļtan pein Maajta eo ilo an je bwebwenato in mour ko ad.
Ilo Eprōļ 2021, rikanaan eo ad, Būreejtōn Russell M. Nelson, ekar kajjitōk ippād n̄an ļōmņak kōn ta eo jemaron̄ kōm̧m̧ane eļan̄n̄e en kar ļapļo̧k tōmak ilo Jisōs Kraist. Ilo an ļapļo̧k ad tōmak ilo Jisōs Kraist, jemaron̄ kajjitōk juon kajjitōk eo me jejjab jeļā uwaak eo—kajjitōk ippān Jemedwōj Ilan̄, ilo etan Jisōs Kraist, n̄an jilkinļo̧k juon uwaak me ej itok jān Jetōb Kwojarjar, eo ej kam̧ool kōn m̧ool eo. Eļan̄n̄e eļapļo̧k tōmak eo ad, jenaaj kajjitōk kajjitōk eo innām m̧ōņōņō kōn uwaak eo jej bōke, men̄e ejjab lukkuun jejjet n̄an bwebwenato eo ad me em̧m̧an ippād. Im kōjeraam̧m̧an eo kar kallim̧ur kake me enaaj itok jān kōm̧m̧an kōn tōmak ilo Jisōs Kraist ej juon ļapļo̧kin tōmak eo ilo Kraist āinwōt juon rijeje im rikadedeļo̧k. Būreejtōn Nelson ekar ba bwe jej “bōk eļapļo̧k tōmak itok jān ad kōm̧m̧ane juon men enaaj aikuji eļapļo̧k tōmak.”5
Kōn menin, ruo ripālele ro ejjeļo̧k nejierro rekar būrom̧ōj kōn aerro jab neji, remaron̄ kajjitōk ilo tōmak eļan̄n̄e rej aikuj kōkaajriri ajri ro im m̧ōņōņō in bōk uwaak eo, men̄e bwebwenato eo rekar je kōn er make ekoba juon menin bwilōn̄ n̄an neji.
Ripālele ro rerūtto remaron̄ kajjitōk eļan̄n̄e eiien n̄an er bwe ren etal im mijen im kōņaan etal, men̄e bwebwenato eo rekar je kōn er make ekoba eļapļo̧k iien ilo jikin jerbal. Ak bōlen uwaak eo enaaj “jab kiiō,” im renaaj ekkatak ilo jepta ko tokālik etke rekar aikuj bwe ren bar pād jidik ilo kapijuknen.
Juon likao em̧m̧an dettan ak jiron̄ remaron̄ kajjitōk kōn tōmak eļan̄n̄e kōttōpar ikkure ko ak jikuuļ ak al eļap an aorōk im rekōņaan ļoor unoojdikdik eo an rikam̧ool eo ewāppen, ej Jetōb Kwojarjar.
Etke jekōņaan bwe Rilo̧mo̧o̧r en erom̧ rijeje im rikadedeļo̧k bwebwenato in mour ko ad? Kōnke ewāppen An jeļā lukkuun wōn kōj, Enaaj bōk kōj n̄an jikin ko jejan̄in kar antooneļo̧k. E emaron̄ kōm̧m̧an bwe jen āinwōt Devid ak Ester. Enaaj kōkajoorļo̧k kōj im kōkm̧anm̧anļo̧k kōj bwe jen erom̧ āinwōt E. Men ko jenaaj bōki ilo ad kōm̧m̧an kōn eļap tōmak enaaj kōļapļo̧k tōmak ko ad ilo Jisōs Kraist.
Ro jeiū im jatu, juon iiō emootļo̧k rikanaan eo ad ekar kajjitōk: “Kwoj ke kōņaan bwe Anij en anjo̧ ilo mour eo am̧? … Kwoj ke kōņaan bwe jabdewōt men eo Ej kōņaan bwe kwon kōm̧m̧an en aorōk ļo̧k jen ko jet?”6 Ij kakobaik kajjitōkin in kanaan ko ilo ettā: “Kwonaaj ke kōtļo̧k bwe Anij en erom̧ juon rijeje im rikadedeļo̧k bwebwenato in mour eo am̧?”
Ilo Revelesōn jej ekkatak bwe jenaaj jutak im̧aan mejān Anij im naaj ekajet kōj jān bok in mour, ekkar n̄an jerba ko ad.7
Naaj ekajet e kōj kōn bok in mour ko ad. Jemaron̄ kālet n̄an je juon bwebwenato eo em̧m̧an kōn kōj make. Ak jemaron̄ ļoor Maajta Rijeje im Rikadedeļo̧k n̄an je bwebwenato in mour ko ad ippād, kōtļo̧k eddo in Ej kōņaan bwe jen kōm̧m̧an bwen aorōk ļo̧k jen ko jet?
Kōtļo̧k bwe Rilo̧mo̧o̧r en erom̧ rijeje im rikadedeļo̧k bwebwenato in mour ko ad!
Jen kōtļo̧k bwe Jetōb Kwojarjar en am̧ rikam̧ool!
Je juon bwebwenato eo me iaļ eo am̧ me kwoj pād ie ekajim̧we, ilo juon iaļ eo ej tōl eok n̄an jepļaak n̄an m̧weo im̧ōn ilan̄ n̄an mour ippān Anij.
Kōtļo̧k bwe apan̄ im kaen̄tanaan ko ren m̧ōttan ļo̧k aolep bwebwenato ko rem̧m̧an bwe ren erom̧ juon kōttōpar eo me ej kepaake eok n̄an, im erom̧ āinwōt, Jisōs Kraist.
Kwaļo̧k juon bwebwenato eo me kwoj kile bwe lan̄ ko rej peļļo̧k. Kajjitōk kajjitōk ko me kwojjab jeļā uwaak eo, jeļā bwe Anij ekōņaan bwe kwon jeļā Ankilaan n̄an eok kōn Jetōb Kwojarjar.
Kōm̧m̧an bwe bwebwenato in mour eo am̧ en kōn tōmak, ļoor Riwanjon̄ak eo am̧, Rilo̧mo̧o̧r Jisōs Kraist. Ilo etan Jisōs Kraist, amen.