Tōmak n̄an Kōm̧m̧ane im Erom
Kōn jar, ekkatak jeje ko rekwojarjar, im m̧akūtkūt, jemaron̄ kōppeļļo̧ki kōjeraam̧m̧an ko an lan̄ im erom̧ em̧m̧anļo̧k ad ļoore Rilo̧mo̧o̧r eo Jisōs Kraist.
Ejjab etto ālkin aer kar kūr eō n̄an jerbal āinwōt juon uwaan Doulul eo an Jiljilimjuonn̄oul Rijilōk ro, ear wōr juon tōre n̄an aō loļo̧k Būreejtōn Russell M. Nelson ilowaan jejjo minit ko. Ekar juon karōk eo kar jab ketmene ilo im̧ōn m̧ōn̄ā eo, im ear lukkuun in jouj ilo an karuwaineneik Elder S. Mark Palmer im n̄a n̄an jijet im ippān doon ilo am kar m̧ōn̄a in rālep.
“Ta eo kim maron̄ kōnono kake ilo kar iien kōrelep eo ippān rikanaan eo?” en̄in ej kōļmenļo̧kjeņ eo ear itok ilo ļōmņak e aō. Kōn menin iaar kālet in kajitōn ippān Būreejtōn Nelson elan̄e ewōr naan in kapilōk ak tōl n̄an n̄a āinwōt ke ij kap bōk ko̧liin̄ e aō. Uwaak eo an eaar lukkuun bidodo im jejjet: ear kalimjōk eō im ba, “Elder Schmeil, kwar kūr n̄an ta eo komaron̄ erom.” Iaar ilo̧k ilo aō lōm̧ņak ta eo Irooj ekōņaan bwe in erom. Ke iaar ļōmņak kōn kajjitōk in, iaar kile bwe ear kōņaan bwe in erom ļeo pelele eo ej em̧m̧anļo̧k, jemān baam̧le eo em̧m̧anļo̧k juon nejin im juon rijerbal eo em̧m̧anļo̧k. Iar kile bwe aolepān men kein remaron̄ in tōbrak ilo aō kate eō n̄an erom juon rikaļoor eo em̧m̧anļo̧k an Jisōs Kraist.
Kweilo̧k eo eļap āliktata, Būreejtōn Nelson ear ba: “Bwe en maron̄ wājepdik men ko jej kōm̧m̧ani, ej aikuj wōr kijejeto. Erom̧ juon rikaļoor em̧ool an Jisōs Kraist ej bar āinwōt in.”1 Būreejtōn Nelson ej karuwainene kōj wōj bwe jen niknik n̄an jerbal bwe jen erom rikaļoor ro em̧m̧anļo̧k an Jisōs Kraist. Ear jiron̄ kōj bwe n̄an ad erom āinwōt Rilo̧mo̧o̧r eo, jej aikuj in kōkajoorļo̧k tōmak ko ad ilo ad kajjitōk, jerbal, im katak, ilubwilijin ko jet.
1. Kajjitōk
Ear ba, “kajjitōk ippān Jemedwōj Ilan̄, ilo etan Jisōs Kraist, kōn jipan̄.”2 Kajjitōk ilo am̧ jar ej juon iaan ki ko n̄an jeļā ekōjkan am̧ erom rikaļoor eo em̧m̧anļo̧k an Jisōs Kraist.
Ilo an kar epaak jemļo̧k in jerbal in lo̧mo̧o̧r eo An ilubwilijin riNipai ro ilo Amedka, Jisōs Kraist ear weaaklōn̄ļo̧k n̄an lan̄. Tokālik, rikaļoor ro An raar itok ippān doon, “ilo aer juon wōt ilo jar im jitlo̧k ekajoor. Im Jisōs eaar bar waļo̧ktok n̄an er, bwe raar jar n̄an Jemān ilo Etan.”3 Etke Jisōs Kraist ekar waļo̧ktok n̄an er bar juon allen? Kōnke rekar jar; er rekar kajjitōk.
Innām Ekar wōnm̧aanļo̧k wōt:
“Kiiō Ij ilo̧k n̄an Jema. Im em̧ool Ij ba n̄an kom̧, jabdewōt men ko kom̧ naaj kajjitōk ippān Jema ilo Eta naaj lewōj n̄an kom̧.
“Kōn menin, kajjitōk, im kom̧ naaj bōk; kaļļaļļaļ, im enaaj peļļo̧k n̄an kom̧; bwe eo ej kajjitōk, ej bōk; im n̄an eo ej kaļļaļļaļ, enaaj peļļo̧k.”4
Jej aikuj kajjitōk ilo tōmak n̄an jeļā kōn jerbal eo an Irooj im jeļā ke Anij ejeļā ta eo ej em̧m̧anļo̧k n̄an kōj.
2. Jerbale
Jerbal ej kiiō juon bar ki eo eaorōk n̄an erom rikaļoor eo em̧m̧anļo̧k an Jisōs Kraist. Ilo ad jerbal im kōm̧m̧an ko ad, E enaaj tōļ im kōjbwebweik kōj. Eļap aō jeļā bwe Nipai eaar pukot jipan̄ n̄an tōļ jen Jemedwoj Ilan̄ n̄an jeļā wāween an bōk būrāāj pileij ko jen Leban, ak e im ļōm̧aro jein im jatin m̧aan raar kajjieon̄ ruo kattōn ilo an ejelok tōbrak. Bōtaab raar bōk koņaer im kōm̧m̧ane jerbal eo, im E Anij eaar tōļ im kōjbwebweik er im̧aan aer iaļ. Āliktata, Nipai eaar anjo kein kajilu an kajjieon̄. E ekar keememej, “Im Jetōb eaar tōl eō, ilo aō jab jeļā kōn men ko renaaj bo̧k jikin im̧aan in kar kōm̧m̧ani.”5
Wāween de in an Irooj jerbal ilo ad likūt e im̧aan jerbal im m̧akūtkūt ko ad mekarta n̄e ejjab alikkar ad meļeļe kōn ta eo ej aikuj in tōbrak. Irooj ekar ba n̄an Nipai ta n̄an kōm̧m̧ane: etal im bōk pileij gold ko. Bōtaab ekar jab ba n̄an Nipai wāween an kōm̧m̧ane. Ekar likūti ioon Nipai bwe en pukōt kilen im bōk jipan̄ jen Anij—im en̄in ej wāween an Anij jerbal ilo mour ko ad. Ilo ad wōnm̧aanļo̧k ilo tōmak, Jemedwoj Ilan̄ ej tōļ im kōjbwebweik kōj.
3. Katōk
Ilo 3 Nipai, rijilōk ro rekar ba n̄an Rilo̧mo̧o̧r eo bwe ekar wōr boktak ko ikōtaan armej ro kōn wōt āt eo etan Kabun̄ in. Ilo an uwaak, Rilo̧mo̧o̧r eo ekar katakin juon jon̄ak eo eaorōk ilo an kar kajjitōk, “Raar jab lin̄ūr jeje ko rekwōjarjar ke?”6 Ekkatak ej kiiō juon bar ki eo eaorōk n̄an erom rikaļoor eo em̧m̧anļo̧k an Jisōs Kraist. Jar im ekkatak jeje ko rekwojarjar rej ippān doon. Rej jerbal ippān doon n̄an em̧m̧an eo ad. Jōkjōk in jerbal eo in Irooj ekar ejaake. “Kwōjkwōj ioon naan ko an Kraist; bwe lo, naan ko an Kraist renaaj jiron̄ kom̧ aolep men ko kom̧ij aikuj kōm̧m̧an.”7
Rilo̧mo̧o̧r eo ekar barāinwōt katakin ke jejjab aikuj in wōt katak jen jeje ko rekwōjarjar ak barāinwōt n̄an katakin jeni, ilo an kōm̧m̧ane n̄an riNipai ro: “Im kiiō ālkin men kein ke ar m̧ōj an Jisōs tipdiki aolep jeje ko rekwōjarjar ilo juon, ko rekar jeiki, Eaar jiron̄ er bwe ren katakin men ko Eaar tipdiki n̄an er.”8
En̄in ej juon iaan un ko eļap an aorōk bwe Nipai en bar ro̧o̧l im bōk pileij gold ko: baam̧ļe eo an rej aikuji jeje ko ejjab n̄an wōt jipan̄ er ilo iial eo aer n̄an āneen kallim̧ur ak ej barāinwōt n̄an jipan̄ er katakin ajri ro nejier. Kōj barāinwōt jej aikuj bōk jipan̄ jen jeje ko rekojarjar n̄an iial in ad, im jej aikuj katakin jeni ilo imoko imōd im eddo ko ad ilo Kabun̄ in.
4. Jerbale n̄an Erom
Elōn̄ iien uwaak in jar ko reban itok ilo iien eo em̧ōkaj. Ak jej aikuj wōr tōmak n̄an wōnm̧aanļo̧k, m̧akūtkūt ilo erreo, im jab ebbweer āinwōt Nipai ilo tōre eo ear kajjieon̄ n̄an bōk pileij gold ko. Irooj enaaj kalikkar tok jidik ilo jet iien; ilo ad lin̄ūr jeje ko rekwojarjar, Irooj enaaj letok uwaak ko rekkar n̄an kōkajoorļo̧k kōj n̄an eļļā ioon bar juon raan; juon wiik, im n̄an kajjieon̄ bar juon alen. Elder Richard G. Scott ekar ba: “Kwon kam̧oolol bwe jet iien Irooj ej kōtļo̧k bwe kwon en̄taan ilo juon iien aetok mokta jen an itok uwaak ko. Ej jelet tōmak eo am bwe en kajoorļo̧k im m̧wilūm bwe en eddōkļo̧k.”9
Ilo aō jar im katak jeje ko rekwojarjar, aolep iien Irooj ej letok n̄an eō kajoor n̄an wōnm̧aanļo̧k wōt im mour iumin bar juon raan, juon wiik, im n̄an kajjieon̄ bar juon alen. Elōn̄ allen uwaak ko rejjab itok ilo iien eo em̧ōkaj. Ewōr jet aō kajjitōk ko im ejan̄in itok uwaak ko aer , ak ij kajjitōk wōt im ekatak, im ij mōņōņō bwe Irooj ejjab bōjrak an letok n̄an eō kajoor n̄an jerbal ilo aō kōttar uwaak ko.
Elder Scott ekar barāinwōt ba, “Ilo am wōnm̧aanļo̧k kōn jon̄an meļeļe eo am ilo aiļelur in am jab jeļā, ilo am̧ tōmak, kwonaaj etal ilo ialan tōļ n̄an tōbar uwaak ko koban maron̄ kar bōki.”10
Bwe jen erom juon rikaloor eo em̧m̧anļo̧k an Rilo̧mo̧o̧r Jisōs Kraist ej juon ial in mour eo aetok kitien, im jej aolep ped ilo kajjojo mōņakjen ko, wōnm̧aanļo̧k ilo kajjojo jon̄ak ko. Jej aikuj depij ilo kōlmeļo̧kjen bwe ejjab menin jiāe menin, im bwe jej pād ijin n̄an ad iakwe im jipan̄ doon. Jej aikuj bwe jen kōm̧m̧ane ijo koņaad bwe pein Rilo̧mo̧o̧r en jerbal ippād ilo mour ko ad.
Kōnono n̄an Sidney Rigdon, Irooj ekar ba men kein, Iaar kalimjek eok im jerbal ko am. Iaar ron̄ jar ko am, im kar kōpooj eok n̄an juon jerbal eļapļo̧k.”11 Ij kwaļo̧k kam̧ool ke Irooj ej ron̄ im uwaak jar ko kajjojo ad; E ejeļā kōn kōj, im E ewōr juon jerbal eļap eo ej kōpooj n̄an kajjojo iaad. Kōn jar, ekkatak jeje ko rekwojarjar, im m̧akūtkūt, jemaron̄ kōppeļļo̧ki kōjeraam̧m̧an ko an lan̄ im erom̧ em̧m̧anļo̧k ad ļoore Rilo̧mo̧o̧r eo Jisōs Kraist.
Būreejtōn Dallin H. Oaks eaar katakin bwe: “Ekajet eo Āliktata ejjab n̄an wōt etale aolepān jerbal ko rem̧m̧an im nana—ta eo jaar kōm̧m̧ane. Ej juon tōprak in jerbal ko im ļōmņak ko jelet mour ko ad āliktata—ta eo jaar erom.”12
Ij kam̧ool kōn rikanaan ro, ro rej loe ilju im jekļaj, im ro rej loe men otemjej, rej jet riiaron̄ron̄ ro jen ioon tawōr eo eutiej. Rej loe men ko kōj jejjab maron̄ loi. Ij kam̧ool ke jen naan ko aer, jej maron̄ erom rikaloor ro rem̧m̧anļo̧k an Rilo̧mo̧o̧r Jisōs Kraist im bōk kōjeram̧m̧an ko ad. Ij kam̧ool bwe Kraist ej mour im Ejeļā kōj kajjojo. En̄in ej Kabun̄ eo An. Ilo āt eo ekwojarjar etan Jisōs Kraist, amen.