Lukkuun Aiboojoj—Eļem Waan An Aiboojoj
Kōm̧m̧an bwe jen dāpij wōt ļam waan eo an gospel eo ilo ad bōk iood eddo ko ad kar kappeik rekwojarjar.
Kadkad In
Ij lewaj juon karuwainene emeņeņ n̄an kom̧ ro rej bōk koņaer ilo kweilo̧k in.
Rainin ij kōjatdikdik n̄an kōmeļeļeik ruo men ko kōn gospel eo an Jisōs Kraist kar kōjepļaaktok, ālkin kōn emen bwebwenato ko reim̧we jān Armej ro Rekwojarjar ilo Raan-ko Āliktata ibeļaakin laļ in rej kwaļo̧k jerbal eo an pedped in katak kein. Men eo m̧oktata an gospel eo kar kōjepļaaktok—jerbal in lo̧mo̧o̧r eo an Anij im mour ijo eutiejtata—ej pedped ioon eddo ko kar kappeik rekwojarjar. Men eo kein karuo ej kakeememej kōj bwe gospel eo alikkar, aorōk, im ļam waan.
Eddo ko kar Kappeik Rekwojarjar
N̄an bōk mour indeeo, jej aikuj “itok n̄an Kraist, im weeppān ilo e.”1 Ilo ad itok n̄an Kraist im jipan̄ ro jet kōm̧m̧ane ejja āinwōt, jej bōk koņaad ilo jerbal in lo̧mo̧o̧r eo im mour āinwōt Anij, eo ej pedped wōt ioon eddo ko kar kappeik rekwojarjar.2 Eddo kein rekwojarjar rej kōjjepan kōj ippān priesthood ki ko kar kōjepļaaktok jān Moses, Elias, im Elijah, āinwōt kar je ilo 110th jekjōn in Katak im Bujen Ko,3 im kein eo eļap kein karuo kar letok n̄an kōj jān Jisōs Kraist n̄an iakwe ro rūturūd āinwōt kōj make.4 Rej loi ilo peij ko ruo im̧aan in Bok in Bōk Meļeļe eo kar update i, rej pād n̄an aolep membōr ro.
Eļan̄n̄e ron̄jake naan ko “Bok in Bōk Meļeļe” ak “eddo ko kar kappeik rekwojarjar” ekōm̧m̧an bwe kwon wudiddid im mijak kōn kapokpok eo an, jouj im jab. Eddo kein reļem waan, kaim̧we, kōm̧weiur, im pidodo kōm̧m̧ani. Erkein rej:
-
Mour kōn gospel eo an Jisōs Kraist
-
Jipan̄ ro rej pād ilo aikuj
-
Kūr aolep n̄an bōk gospel eo
-
Kobaik baam̧le ko n̄an indeeo
Kwomaron̄ lali āinwōt aō kar: āinwōt juon mab in iaļ n̄an bar ro̧o̧l n̄an ippān Jemedwōj Ilan̄ eo ej iakwe.
Gospel eo Ej Pidodo, Aorōk, im Ļam Waan
Em̧ōj kar ba bwe gospel eo an Jisōs Kraist ej “lukkuun aiboojoj im eļem waan an aiboojoj.”5 Laļ in ejjab. Ekapokpok, epok jaļjaļ, im eobrak kōn aen̄wān̄wā im kajjim̧we. Jej jeraam̧m̧an ilo ad kōjerbal mejmej karuo eo n̄an jab kōtļo̧k kapokpok, ekanooj bun̄bun̄ ilo laļ in, n̄an an deļo̧n̄e wāween eo jej bōke im kōjerbal gospel eo.
Būreejtōn Dallin H. Oaks ekar katakin: “Jaar ekkatak elōn̄ men ko reddik im reļam waan ilo gospel eo an Jisōs Kraist. Jej aikuj keememej bwe ilo jon̄an im ilo juon tōre eaorōk, men ko me āinwōt reddik im reļam waan men ko reļļap rej waļo̧k.”6 Jisōs Kraist Make ej kōmeļeļeik bwe ine eo an em̧m̧an, im men eo Ej ineke e mera.7 Jej aolep aikuj in kajjieon̄ n̄an dāpij ļam waan eo an gospel eo—ilo mour ko ad, ilo baam̧le ko ad, ilo kūlaaj im doulul ko ad, im ilo ward ko im stake ko ad.
Ilo ami ron̄jake bwebwenato kein inaaj kwaļo̧ki ippāmi, kile bwe raar kanooj kāāleti n̄an im̧we ilo juon wāween im n̄an kōnnanik ilo bar juon wāween. Jerbal ko an kajjojo Armej ro Rekwojarjar ilo Raan Ko Āliktata rej erom juon m̧ōņōkjān n̄an kajjojo iaad ilo kōjerbal gospel eo ilo wāween ko ralikkar, raorōk, reļem waan ilo kakūrm̧ool juon iaan eddo ko kar kappeik rekwojarjar ej kab m̧ōj kwaļo̧ki.
Mour kōn Gospel eo an Jisōs Kraist
M̧oktata, mour kōn gospel eo an Jisōs Kraist. Jens jān Denmark ej jar raan otemjej n̄an mour kōn gospel eo im kile im̧we ko jān Jetōb Kwojarjar. E ekar ekkatak n̄an jerbal m̧ōkaj n̄e ej en̄jake an tōl jān Jetōb.
Jens ekar kwaļo̧k menin:
“Kōmij jokwe ilo juon em̧ aļaļ bōro̧o̧j eo an ejimettan ak ekam̧ōņōņō, edik, bōro̧o̧j eo an ej aj, ilo ioļapļap in juon bukwōn eineem̧m̧an, epaakeļo̧k dān eo ilo bukwōn eo.
“Ilo bon̄ōn jab in kōn mejatoto in jōm̧ar eo ekanooj aiboojoj an Denmark, kōjām ko im wintō ko raar peļļo̧k, im aolep men raar pād ilo aer aenōm̧m̧an. Kōn wōt an aiboojoj im aitok an bon̄ ilo jōm̧ar, ikar jab ekairir in jāniji tōm̧a eo ekar bwil ilo ruum̧ in jikin jarom im men ko am.
“Ejidimkij, ikar bōk juon en̄jake ekajoor bwe ij aikuj jāniji tōm̧a eo ilo iien eo em̧ōkaj! Ilo ejja iien eo wōt, ikar ron̄ an lio pāleō, Mariann, kūr eō im ajri ro n̄an kwaļ peiūm̧ kōnke kōjota eo ekar pojak!
“Ebwe an to aō m̧are n̄an jeļā bwe menin ekar jab juon iien n̄an jino kōm̧m̧an jabdewōt men ijello̧kin kwaļ peiū, bōtaab ikar ron̄ aō make ikkūrļo̧k n̄an Mariann bwe inaaj kar ekairirļo̧k n̄an im̧ōn wia eo n̄an wiaiki juon tōm̧a kāāl. Ekar kajoor aō en̄jake n̄an ilo̧k ilo iien eo em̧ōkaj tata.
“Im̧ōn wia eo ekar pād iturejet in dān eo. Ekkā am kijon̄ etal laļļo̧k, ak rainin ikar bōk bajkōļ eo waaō. Ke ikar eļļāļo̧k jān dān eo, ilo kona in meja ikar kile juon ļaddik edik, emaron̄ ruo an iiō, etetal make epakeļo̧k tōrerein dān eo, lukkuun epaake dān eo—ejidimkij ekar wōtļo̧k ilowan! Juon minit ekar pād ijo—im ļak ilbōk ejako!
“Ejjeļo̧k juon ekar lo an menin waļo̧k ak n̄a. Ikar door laļļo̧k bajkōļ eo waaō ioon bwidej, ettōrļo̧k, im kelo̧k n̄an lowaan dān eo m̧wilaļ in wōt ipū. Ioon dān eo em̧ōkaj an jakoļo̧k kōn ujooj, ekōm̧m̧an bwe en pen n̄an lo ium̧win dān eo. Innām ikar en̄jake juon em̧ōjānjān ilo iturejete Ikar likūt peiū ilo dān eo, jibwe juon jiln̄iij, im kanōk lōn̄tak ļaddik jidikdik eo. Ekar jino bōk kūtuwōn, pokpok, im jan̄. Ejjab to jān iien eo ļaddik eo ekar bar koba ippān ro jinen in jemen.”
Ilo an Brother Jens jar kajjojo jibbon̄ kōn jipan̄ n̄an kile im̧we ko jān Jetōb Kwojarjar, jekdo̧o̧n juon men eo ejjeļo̧k ļōmān āinwōt kair in jāniji juon tōm̧a, ej barāinwōt jar bwe maron̄ kōjerbale āinwōt juon kein jerbal n̄an kōjeraam̧m̧an ajri ro nejin Anij. Jens ej mour kōn gospel eo kōn kappukōt tōl eo ekwojarjar kajjojo raan, kajjieon̄ n̄an erom erreo, innām kōm̧m̧ane ijo em̧m̧an tata ippān n̄an ļoor tōl jab eo n̄e ej itok.
Jipan̄ Ro rej Pād ilo Aikuj
En̄in ej juon waanjon̄ak kōn jipan̄ ro rej pād ilo aikuj. Juon raan juon stake būreejtōn ilo Cúcuta stake eo ilo Colombia ekar etal ippān būreejtōn eo an Doulul eo an Jiron̄ ro an stake n̄an loļo̧k ruo jiron̄ ro—im ļaddik eo jeierro ejodikdik—eo raar dibuk jet apan̄ ko renana. Ejjab to eo jemeer ekar mej, im jinier ekar mej juon iiō im̧aanļo̧k. Jilu jemjān jemjati ro raar kiiō makeļo̧k ilo m̧weo edik, im̧weer ebwe. Dipin m̧weo ekar kōm̧m̧an jān aļaļ ko rekkur balōklōk ippān pāāk būļajtik ko, im bōro̧o̧j tin eo ekar kalibubuik wōt ijo raar kiki ie.
Ālkin loļo̧k eo aerro, ritōl rein raar jeļā bwe raar aikuj jipan̄. Kōn ward ko̧o̧njeļ eo, juon karōk n̄an jipan̄ erjel ekar jino in waļo̧ktok. Ritōl ro an ward im stake eo—Doulul eo an Kōrā ro, doulul eo an em̧m̧aan ro, Doulul eo an Likao ro, Doulul eo an Jiron̄ ro—im elōn̄ baam̧le ko aolep rej kōpooj er n̄an jerbal eo ak kōjeraam̧m̧an baam̧le in.
Dolulu ko an ward eo raar kūrļo̧k jejjo ro uwaan ward eo me rej jerbal ilo jikin ekkal ko. Jet raar jipan̄ kōn design, ro jet raar leļo̧k iien ko aer im jerbal, ro jet raar kōm̧m̧ani m̧ōn̄ā ko, im ro jet raar leļo̧k ujkinen ekkal ko kar aikuji.
Ke m̧weo edik ekar dedeļo̧k, ekar juon raan elem̧ōņōņō n̄an ro me raar jipan̄ im n̄an membōr ro jilu an ward eo. Ajri atajinemjen rein raar en̄jake okmāņāņ im iakwe eo em̧ool an ward baam̧le eo aer n̄an jeļā bwe erjel ejjab make iaer im bwe Anij ej aolep iien pād n̄an erjel. Ro raar pukōtļo̧k raar en̄jake iakwe eo an Rilo̧mo̧o̧r eo n̄an baam̧le in im kar jerbal āinwōt pā ko Pein ilo jerbal n̄an er.
Karuwaineneik Aolep n̄an Bōk Gospel eo
Ij ļōmņak kom̧ naaj lem̧ōņōņō kōn waanjon̄ak in kōn kūr aolep n̄an bōk gospel eo. Eo jon̄ouljiljilimjuon iiō-dettan Cleiton jān Cape Verde ekar ejjeļo̧k an jeļā enaaj kar waļo̧k āinwōt juon tōprak in an etetalļo̧k n̄an kūlaaj in jemeneri eo an ward eo an juon raan. Bōtaab mour eo an im mour ko an ro jet renaaj kar indeeo oktak kōnke ekar.
Cleiton, ippānļo̧k jinen im ļaddik eo jein, kar peptaij n̄an Kabun̄ in jet iien m̧oktaļo̧k, im aaet baam̧le eo ekar bōjrak an pād ilo jar. An etal n̄an jemeneri enaaj kar juon iien kareel n̄an baam̧le eo an.
Jodikdik ro jet ilo kūlaaj in jemenere eo raar em̧m̧an im karuwainene. Raar kōm̧m̧an bwe Cleiton en en̄jake an ruwainene im kar kōketak e n̄an etal n̄an m̧akūtkūt ko jet. Ekar etal n̄ani im ejjab to ekar jino etal n̄an kweilo̧k ko jet an Kabun̄ in. Juon bisop eo elo̧ļe ekar lo kōjatdikdik ilo jetōb eo ilo Cleiton im kar kajjitōk ippān n̄an an juon rijjipan̄. “Jān iien eo m̧aanļo̧k,” Bisop Cruz ej ba, “Cleiton ekar erom juon waanjon̄ak im juon kareel n̄an jodikdik ro jet.”
Armej ro m̧oktata Cleiton ekar karuwaineneitok n̄an bar ro̧o̧ltok n̄an jar ekar jinen, innām ļaddik eo jein. Innām ekar kōdepakpakļo̧k doulul eo an ro m̧ōttan. Juon iaan ro m̧ōttan ekar juon likao ded jab eo an, Wilson. Ilo iien eo im̧aan tata in an ioon mijenede ro, Wilson ekar kwaļo̧k an ikdeelel n̄an peptaij. Mijenede ro raar bwilōn̄ im ļo̧kjeņ aer kōn ewi jon̄an eo kadede Cleiton ekar kwaļo̧k ippān Wilson.
Kijejeto ko an Cleiton raar jab bōjrak ijo. Ekar jipan̄ membōr ro rejeniknik bar ro̧o̧ltok, ilo kakobaba n̄an waļo̧k gospel eo ippān ro m̧ōttan jān kabun̄ ko jet. Rainin ward eo ewōr 35 jodikdik ro reniknik, kōn juon būrookraam̧ in jemenere ejeraam̧m̧an, kam̧m̧oolol eļap tata kōn kijejeto ko an Cleiton n̄an iakwe, kwaļo̧k, im karuwainene. Cleiton im ļeo jein, Cléber, rej jim̧or kōppopo n̄an jerbali mijen ko relikio.
Kobaik Baam̧le ko n̄an Indeeo
Āliktata, in kwaļo̧k juon waanjon̄ak aiboojoj kōn kobaik baam̧le ko n̄an indeeo. Lydia jān Kharkiv, Ukraine, ekar m̧oktata ekkatak kōn tampeļ jān mijenede ro. Ejjab tok, Lydia ekar en̄jake juon ikdeelel ekajoor n̄an etal n̄an tampeļ, im ālkin an peptaij, liin ekar jino kōppopo n̄an bōk juon peba in mālim deļo̧n̄e tampeļ.
Lydia ekar etale n̄an Freiberg Germany Tampeļ eo n̄an bōk menin letok kwojarjar eo an innām joļo̧k jejjo raan ko kōm̧m̧ani jerbal in bōk jikin (proxy) eo ijo. Ālkin aje eo an Kyiv Ukraine Tampeļ eo, Lydia ekar emakijkijļo̧k an etal n̄an tampeļ eo. Liin im ļeo pāleen, Anatoly, raar liāp indeeo ijo im tokālik kar kūr n̄an jerbal āinwōt mijenede ro an tampeļ. Ippān doon raar lo elōn̄ļo̧k jān 15,000 etan rūtto ro aer im kar jerbal n̄an kōm̧m̧ani kain̄i ko an tampeļ n̄an er.
Ke kar kajjitōk kōn en̄jake ko an ikkijine jerbal in tampeļ, Lydia ej ba, “Ta eo ikar bōk ilo tampeļ? Ikar kōm̧m̧ani bujen kāāl ko ippān Anij. Naan in kam̧ool eo aō em̧ōj an kajoorļo̧k. Ikar ekkatak n̄an bōk revelesōn an juon make. Ij maron̄ in kōm̧m̧ani kain̄i in lo̧mo̧o̧r ko n̄an rūtto ro aō raar mej. Im imaron̄ iakwe im jerbal n̄an ro jet.” Liin ekar kōjem̧ļo̧ke kōn ennaan in elukkuun in m̧ool: “Irooj ej kōņaan lo an emakijkij ad pād lowaan tampeļ.”
Jem̧ļo̧k in
Ij im̧we jān em̧m̧an eo an Armej rein Rekwojarjar ilo Raan Ko Āliktata, kajjojo kōn oktak in jekjek in mour ko aer, pedped ilo bwebwenato kein emān. Eļap ijo jemaron̄ ekkatak jān tōprak eo ekabwilōn̄lōn̄ kar bōktok jān jjerbal eo eļem waan an pedped in katak ko an gospel eo reļem waan. Men eo raar kōm̧m̧ane ejja men ko wōt ilo bwebwenato kein raar kōm̧m̧ane.
Jen dāpij wōt ļam waan eo an gospel eo ilo ad bōk iood eddo ko kar kappeik rekwojarjar ad: N̄an mour kōn gospel eo an Jisōs Kraist barāinwōt n̄an im̧we ko raorōk, āinwōt kar Jens ilo Denmark. N̄an jipan̄ ro rej pād ilo aikuj, āinwōt kar kwaļo̧ke jān membōr ro an Cúcuta stake eo ilo Colombia ilo kōm̧m̧an jikin jokwe n̄an ward membōr riatajinemjen ro. N̄an kūr aolep n̄an bōk gospel eo, ilo wāween eo me Cleiton jān African island country eo an Cape Verde ekar kōm̧m̧an ippān ro m̧ōttan im baam̧le eo. Āliktata, n̄an kobaik baam̧le ko n̄an mour indeeo, āinwōt kar kwaļo̧k jān Sister Lydia jān Ukraine kōn kain̄i ko an tampeļ an make, kijejeto ko an jerbal in menmenbwij an baam̧le, im jerbal in jipan̄ ilo tampeļ.
Kōm̧m̧ane āindein enaaj ilo mo̧ol bōktok lan̄lōn̄ im aenōm̧m̧an. Jān menin ij kallim̧ur im kam̧ool—im kōn Jisōs Kraist āinwōt ad Rilo̧mo̧o̧r im Ripinmuur—ilo etan Jisōs Kraist, amen.