Etan Kabun̄ in Jab Maron̄ Pepe Kake

Jān Elder Neil L. Andersen

Jān Doulul eo an Jon̄oulruo Rijilōk ro

N̄e jej lukkuun ļoor kapilōk eo an Irooj āinwōt an waļo̧k n̄an rikanaan eo An emour, eļaptata n̄e ej itok ilo ļōmņak eo ad, emenin aikuj ettā im wūjlepļo̧k, Irooj ej kōjeraam̧m̧an kōj kōn eļapļo̧k kajoor ilo jetōb.

Ilo juon kweilo̧k an ribbōk nuuj im meļeļe ilo Okwōj 16, 2018, Būreejtōn Nelson ekar ba: “Irooj ekar im̧we kōļmenļo̧kjeņ eo aō kōn aorōk in jim̧we in āt eo etan Kabun̄ eo An, aaet Kabun̄ eo an Jisōs Kraist im Armej ro Rekwojarjar ilo Raan Ko Āliktata.¹ Ewōr jerbal ko n̄an kōj n̄an bōktok kōj make ilo jokne ippān Ankilaan.”²

Ruo raan tokālik, ilo Okwōj 18, ikar pād ippān Būreejtōn Nelson ilo Montreal, Canada. Ālkin kweilo̧k eo an membōr ro am ilo Palais de Congrés, Būreejtōn Nelson ekar uwaake kajjitōk ko jān ririboot ro. Ekar kile bwe enaaj “kar juon menin idajon̄jon̄ n̄an [bar kōm̧m̧ane etan Kabun̄ in im] bar ukōt [juon] iminene ium̧win elōn̄ļo̧k jān bukwi iiō ko.” Ak, ekar kakobaba, “jejjab maron̄ pepe n̄an ukōt etan Kabun̄ in.”³

Jiljilimjuon wiik ko tokālik, Būreejtōn Nelson ekar kōnono ilo juon kweilo̧k eļap: “Irooj ekar im̧we kōļmenļo̧kjeņ eo aō kōn aorōk in jim̧we in āt eo etan Kabun̄ eo An, aaet Kabun̄ eo an Jisōs Kraist im Armej ro Rekwojarjar ilo Raan Ko Āliktata. … Rilo̧mo̧o̧r make ekar ba, ‘Bwe āindein naaj etan Kabun̄ eo Aō.’” Innem Būreejtōn Nelson ekar bar āliji, “Jejjab maron̄ pepe n̄an ukōt etan Kabun̄ in.”⁴f

Juon Kajjitōk Em̧m̧an

Juon kajjitōk em̧m̧an kar wōnlōn̄tak kake: Etke kiiō, ke ilo elōn̄ iiō ko rellōn̄ eto ad kar kōjerbal riab in etad “Mormon”? “Mormon Tabernacle Kuwaer eo,” bitio ko rekadu n̄an kadeleel kōn kabun̄ in etan “I’m a Mormon,” al eo an Būraimere etan “I Am a Mormon Boy”?

Katak ko an Kraist reban okoktak im rej n̄an indeeo. Aeet bun̄tōn ko ralikkar im raorōk kōn jerbal ko an Rilo̧mo̧o̧r rej waļo̧k ilo iien ko aer rekkar im jejjet. Kiin ej jibbon̄ Būreejtōn Nelson ekar ba, “Jepļaaktok eo ej juon jerbal jej kōm̧m̧ane, ejjab juon m̧akūtkūt.”⁵ Im Irooj ekar ba, “Ak men otemjeļo̧k reaikuj kūrm̧ool ilo iien eo aer.”⁶ Kiiō ej ad iien, im jej bar kōjepļaak tok im kwaļo̧k etan Kabun̄ in.

Kadkad in mejān kajjik eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata emenin aikuj bwe ren an̄inn̄in kōj kōn et eo Etan. Raan ko ļo̧k ikar pād ilo Kirtland Ohio, ijo Rikanaan Josep Smith, ippān jejjo membōr in Kabun̄ in, ekar kanaan, “Kabun̄ in enaaj kobrak Tueōn im Turōk in Amedka—enaaj kobrak laļ in.”⁷ Irooj ekar kōmeļeļeik epepen in āinwōt “juon jerbal men in bwilōn̄.”⁸ Ekar kōnono kōn juon “bujen [eo me enaaj] kajejjet kitien ilo raan ko āliktata,” kōtļo̧k bwe “ri aelōn̄ … otemjej ilaļ renaaj jeraam̧m̧an.”⁹

Naan ko ilo kweilo̧k in em̧ōj ukōti ilo 55 kajin ko. Āliktata, naan kein naaj ron̄ im riiti ilo 98 kajin ko ilo elōn̄ļo̧k jān 220 laļ ko im jikin ko.

Ke Rilo̧mo̧o̧r ej jepļaaktok ilo utiej im aibojooj, membōr ro retiljek ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata naaj pād ilubwiljin laļ ko, aolep armej, aolep kūl im aolep manit ko ilo laļ in.

Jim̧we in Etan Kabun̄ in

Im̧we eo an Kabun̄ eo an Jisōs Kraist eban n̄an ro wōt me rej membōr in Kabun̄ in. Kōn enjeļ ro jān lan̄ me rej waļo̧k ilo raan kein, kōn jeje ko rekwojarjar me em̧ōj aer jepļaaktok n̄an laļ in im menin letok eo ekajoor kōn Jetōb Kwojarjar, jenaaj erom̧ juon meram eo ej meram ioon juon toļ āinwōt an ļapļo̧k an armej jab tōmak ilo Jisōs Kraist im rej kōmarokļo̧k laļ in. Men̄e elōn̄ remaron̄ kōtļo̧k bwe laļ in en kōm̧ōjņoik tōmak ko aer ilo Ripinmuur, jejamin “em̧m̧akūt jān [ijoko] jikid.”¹⁰ Rikūrijtin ro ro rejjab membōr in Kabun̄ in renaaj m̧ōņōņō kōn eddo ko ad im ad kam̧ool em̧ool kōn Kraist. Barāinwōt ro rej Rikūrijtin me rej kalimjōk kōj kōn tōmak ko an Kabun̄ in renaaj atbokwōj kōj āinwōt ro m̧ōttaer juon raan. Ilo raan kein rej pedotok, naaj an̄inn̄in kōj kōn etan Jisōs Kraist.

Kom̧ em̧m̧ool kōn kijejeto ko ami rem̧m̧an n̄an kōļapļo̧k ad kōjerbal m̧ool in etan Kabun̄ in ilo jim̧we im jejjet. Ilo juon kweilo̧k, jilu iiō ko remootļo̧k, Būreejtōn Nelson ekar kallim̧uri kōj “bwe ilo ad tiljek ļōmņak n̄an kōjerbal et eo ejim̧we an Kabun̄ eo an Rilo̧mo̧o̧r … [enaaj tōlļo̧k kōj] n̄an tōmak eo ej eddōkļo̧k im maron̄ būki kajoor ko reļļapļo̧k ilo jetōb.”¹¹

Kallim̧ur in kar kam̧oole jān rikaļoor ro rej wūjlepļo̧k aer ipeļaakin laļ in.¹²

Brother Lauri Ahola jān tueōn in Amedka ekar kwaļo̧k m̧ool ke jet iien ej en̄jake an āliklik n̄an kwaļo̧k lukkuun etan Kabun̄ in. Ak kōnke kapilōk eo an rikanaan eo, ej kakkōt wōt kake. Ilo juon iien em̧m̧an, ekar loļo̧k juon m̧ōttan ilo juon bar kabun̄. Erkein naan ko an:

“Eo m̧ōtta ekar kajjitōk, “Kwe ke juon Mormon?”

“Ij juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata.” Ekar jino kajjitōkin eō jet kajjitōk ko, kajjojo kajjitōk rekar jino kōn: ‘Kabun̄ in Mormon ej ke tōmak … ?’ Im kajjojo iien, ij jino uwaak eo aō kōn naan eo: ‘Ilo Kabun̄ in an [Jisōs] Kraist me kar kōjepļaaktok, kōmij tōmak …’

“… Ke eaar jeļā bwe iaar jab bōk taitōļ eo ‘Mormon,’ eaar kajju kajjitōk ippa, ‘Kwojjab Mormon ke?’

“Kōn menin iaar kajjitōk ippān eļan̄n̄e ejeļā wōn eo kar Mormon—ekar jab jeļā, iaar ba n̄an e ke Mormon ekar juon rikanaan … [im ikar] utiej bwe ij m̧ōttan ļo̧k [E].

“Bōtaab,’… iaar wōnm̧aanļo̧k wōt, ‘Mormon eaar jab mej kōn jerawiwi ko aō. Mormon ekar jab … en̄taan ilo Getsemane ak mej ioon debwāāl [kōn eō]. … Jisōs Kraist ej aō Anij im aō Rilo̧mo̧o̧r. … Im ej kōn Etan me ikōņaan bun̄bun̄ kake. …’

“… Ālkin jejjo jekōn in ejjeļo̧k keroror, [eo m̧ōttan ekar ba], ‘Em̧ōj, kwoj juon Kūrjin ke!’”¹³

Kwoj ke kemeemej naan ko an Būreejtōn Nelson? “Ij kallim̧uri kom̧ bwe eļan̄n̄e jenaaj kōm̧m̧ane ijo em̧m̧antata n̄an kajim̧we et eo ejim̧we an Kabun̄ eo an Irooj, E eo me an Kabun̄ in naaj lelaļtak kajoor im kōjeraam̧m̧an ko n̄an ioon bōran Armej ro Rekwojarjar ilo Raan Ko Āliktata, men ko me jej jan̄in kar loi.¹⁴

Irooj ej Kōpeļļo̧k Iaļ eo Aolep Iien

Irooj enaaj kōjparok kallim̧ur ko An aolep iien. E ej kōpeļļo̧k iaļ eo n̄an kōj ilo ad kōm̧m̧ane jerbal eo An.

Ium̧win iiō ko, kōm kar kōjatdikdik n̄an wiaiki internet domain site ko ChurchofJesusChrist.org and ChurchofJesusChrist.com. Rekar jab wiakaki. Ak ilo iien eo Būreejtōn Nelson ej kōm̧m̧an kōjjeļā, site kein jim̧or rekar pojak. Ekar juon menin bwilōn̄.¹⁵

Irooj ekar kōļapļo̧k kijejeto ko ad ilo ad kar bar etale et ko me eto ad kōjerbali n̄an etan Kabun̄ in.

Wōnm̧anļo̧k wōt ilo tōmak, etan kuware eo me Mormon Tabernacle Kuwaer eo ekar oktak n̄an Tabernacle Kuwaer ilo Tampeļ Square. Website eo LDS.org, eo me elōn̄ļo̧k jān 21 million ro rej deļon̄e im alooje kajjojo allōn̄, ekar oktak n̄an ChurchofJesusChrist.org.¹⁶ Et eo etan LDS Business College ekar oktak etan n̄an Ensign College. Website eo etan Mormon.org ekar bar oktak n̄an ChurchofJesusChrist.org. Elōn̄ļo̧k jān juon taujin m̧weiuk ko me ekar wōr etan “Mormon” ak “LDS” me ekar eļļaak ak pād ilo kilier em̧ōj aer bar ukōti Bukwi Armej ro Rekwojarjar Retiljek ilo Raan Ko Āliktata me rettā rekar kajjieon̄ bwe ren iminene kōn akkaun ko aer ilo website ko, podcast ko, im Twitter.

Jekar jino kōjerbal kōkkaļļe in ekāāl me ej pād ioļapļap ilo Jisōs Kraist.

Ilo ioļapļap in kōkaļļe in ej jutak kōn statue in Kraist eo me kar kōm̧m̧an jān marble an Christus. Ej kwaļo̧k kōn Irooj ke ekar jerkakpeje, Irooj eo emour ej erļo̧ke pein n̄an wōnm̧aeik ro me renaaj itok n̄an E.

“Kōkaļļe in, Jisōs Kraist ej jutak ium̧win juon arch [ej kakeememej] kōj kōn Rilo̧mo̧o̧r ke em̧ōj an jerkakpeje im anjo̧ jān lūb eo.”¹⁷

Kōkaļļe im jeje ko an Kabun̄ eo an Jisōs Kraist im Armej ro Rekwojarjar ilo Raan ko Āliktata rekar oktak im rej kōjerbali ilo elōn̄ļo̧k jān 50 kajin ko. Āt kein rekāāl me kar ekkatak im ejaaki ilo peļaakin laļ in.

Kam̧m̧olool kōn Jipan̄ ko an Ro Jet

Jej kam̧m̧olool kōn elōn̄ armej ro rem̧m̧an im jouj ro me kar kautiej er n̄an kūr er kōn jim̧we in et eo. Ikar riiti juon bwebwenato raan ko ļo̧k me ej kouti juon ritōl an Katōlik ej ba kōn “Armej ro Rekwojarjar ilo Raan Ko Āliktata.”¹⁸ Ilo aō kar loļo̧k juon ritōl an juon m̧ōn jar an Rikūrijtin juon allōn̄ emootļo̧k ilo tueon̄ in Amedka, ekar ba kōn Kabun̄ in ilo naan ko an jinointata kōn likio in etan kabun̄ in, im ālkin elōn̄ kōttan an ba “Kabun̄ eo an Jisōs Kraist.”

Jej kile bwe kakobaik bar jiljino naan ko n̄an etad eban maron̄ ekkar n̄an media, ak āinwōt an Būreejtōn Nelson kar ba m̧okta, “media eo em̧m̧an enaaj meļeļe aikuj ko ad im eo̧ron̄ kajjitōk in ad n̄an likūt jim̧we in etan Kabun̄ in.”¹⁹ Kom̧ em̧m̧ool kōn ami letok n̄an kōm ejja ļōmņak in kar leļo̧k n̄an doulul ko an manit, ikkure ko, kien, ak jukjukin pād ko ilo aer kōjerbal āt eo kōm̧ij kōņaan im ejim̧we.

Enaaj lōn̄ ro, rej kajjieon̄ n̄an kōm̧ōjņoik im kakkure mijen in ad, renaaj wōnm̧anļo̧k wōt im kūr kōj “Mormon ro” ak “Kabun̄ eo an Mormon.” Ilo kautiej, jej bar juon alen kajjitōk ippān media ro n̄an kautiej kōņaan in am n̄an kūr kōm kōn jim̧we in etan kabun̄ in ilo kar 200 iiō ko remootļo̧k.

Peran eo an Armej ro Rekwojarjar ilo Raan Ko Āliktata

Elōn̄ taujin im taujin Armej ro Rekwojarjar ilo Raan Ko Āliktata ro rekar peran n̄an kwaļo̧k jim̧we in etan Kabun̄ in. Ilo ad kōm̧m̧ane ijo koņaad, ro jet renaaj ļoore. Em̧m̧an ippa bwebwenato in jān Tahiti.

Iriura Jean jon̄oul iiō dettan ekar kālet n̄an ļoor kapilōk eo an Būreejtōn Nelson.

“Ilo kūļaaj eo an ilo jikin jikuuļ rekar kōnono kōn wiiken eo aer … im Iriura ekar kōnnaan kōn … kabun̄.

“Rūkaki eo an, Vaite Pifao, ekar ba, ‘O, kwon ba kwoj juon Mormon ke?’

“Iriura ekar kajju ba, ‘Ejjab, … N̄a juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata!’

“Rūkaki eo an ekar uwaak, ‘Aeet, … kwoj juon Mormon.’

“Iriura ekar kwaļo̧k, ‘Ejjab rūkaki, N̄a juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata.

“Ms. Pifao ekar bwilōn̄ kōn tōmak eo an Iriura im ekar lokjeņ an etke ekar lukkuun kōņaan kōjerbal et eo eaitok etan Kabun̄ eo an. [Ekar kālet n̄an ekkatak eļapļo̧k kōn Kabun̄ in.]

“[Tokālik, ke Sister] Vaite Pifao ekar peptaij [ekar kwaļo̧k an kam̧m̧olool] bwe Iriura ekar eo̧ron̄ kapilōk eo an Būreejtōn Nelson.”²⁰

“Jejjab Maron̄ Pepe n̄an Ukōt Etan Kabun̄ in.” Bun̄ m̧aanļo̧k kōn tōmak. N̄e jej lukkuun ļoor kapilōk eo an Irooj āinwōt an waļo̧k n̄an rikanaan eo An emour, eļaptata n̄e ej itok ilo ļōmņak eo ad, emenin aikuj ettā im wūjlepļo̧k, Irooj ej kōjeraam̧m̧an kōj kōn eļapļo̧k kajoor ilo jetōb im jilkinļo̧k enjeļ ro an n̄an jipan̄ kōj im jutak likid.²¹ Jej bōk kean̄ im kōmālim eo An.

Ij juon rikam̧ool kōn kajoor an lan̄ me ej pād ioon rikanaan eo ad ejitōnbōro, Būreejtōn Russell M. Nelson. Kōņaan eo An eļap im em̧ool ej n̄an kabun̄ buruōn Irooj im kōjeraam̧m̧an ajri ro nejin Jemedwōj Ilan̄. Jān en̄jake eo aō make im ekwojarjar, ij kam̧ool kōn iakwe eo an Irooj n̄an e. E ej rikanaan an Anij.

Ij kam̧ool bwe Jisōs ej Kraist eo, Nejin Anij. Ilo etan Jisōs Kraist, amen.

Kakeememej ko

1. Lale 3 Nipai 27:7–9; Katak im Bujen Ko 115:4.

2. Russell M. Nelson, in “The Name of the Church,” Newsroom, Aug. 16, 2018, newsroom.ChurchofJesusChrist.org.

3. “President Nelson Discusses the Name of the Church,” Newsroom, Aug. 21, 2018, newsroom.ChurchofJesusChrist.org.

4. Russell M. Nelson, “Jim̧we in Etan Kabun̄ in,” Liaona, Nob. 2018, 87.

5. Russell M. Nelson, “The Temple and Your Spiritual Foundation,” Liahona, Nov. 2021, 94.

6. Katak im Bujen Ko 64:32.

7. Teachings of Presidents of the Church: Joseph Smith (2007), 137.

8. 2 Nipai 27:26.

9. 1 Nipai 15:18.

10. Katak im Bujen Ko 101:17.

11. Russell M. Nelson, “Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Liaona, Nob. 2018, 114.

12. Lale Henry B. Eyring, “Thus Shall My Church Be Called,” Liahona, Oct. 2021, 6–9.

13. Lauri Ahola, “Using the Full Name of the Church Was Awkward but Worth It” (digital-only article), Liahona, Apr. 2020, ChurchofJesusChrist.org.

14. Russell M. Nelson, “Jim̧we in Etan Kabun̄ in,” 89.

15. Church’s Intellectual Property Office eto aer lale im etale et eo ChurchofJesusChrist.org n̄an website eo jān 2006, im ejjanin kar tōprak. Ekar menin kabwilōn̄lōn̄ rekar wia kake ilo ejja iien eo wōt Būreejtōn Nelson ekar kōjjeļā kake, im Kabun̄ in ekar wiaiki et in ippān juon bar pade kōn wōn eo em̧m̧antata.

    Ilo ejja wāween in wōt, Kabun̄ in ekar bar jino lale im etale ia eo repād ie im n̄e etōprak et in ChurchofJesusChrist.com jān 2011. Men eo ekabwilōn̄lōn̄, ej kab tin tōprak ilo Okwōj 2018 im kar bar wiaiki.

16. Ilo Oktoba 2018 kweilo̧k eo eļap, Būreejtōn Nelson ekar ba:

    “Ro jeiū im jatū, elōn̄ iakwelel ko ņae kōjepļaakgtok et eo ejim̧we etan Kabun̄ in. Kōnke laļ in jej mour ie eobrak kōn meļeļe, im būrookraam̧ ko ilo kam̧pukōr ko rej etali meļeļe ko rej bōk bun̄tōn ko me rej jipan̄ loe meļeļe ko jej aikuj enan̄in ilo iien eo wōt —ekoba meļeļe ko kōn Kabun̄ eo an Irooj—ro rej kōrraat rej ba bwe juon kajim̧we ilo tōre in ejjab jim̧we.

    “… Ij kallim̧uri kom̧ bwe eļan̄n̄e jenaaj kōm̧m̧ane ijo em̧m̧antata n̄an kajim̧we et eo ejim̧we an Kabun̄ eo an Irooj, E eo me an Kabun̄ in naaj lelaļtak kajoor im kōjeraam̧m̧an ko n̄an ioon bōran Armej ro Rekwojarjar ilo Raan Ko Āliktata” (”Jim̧we in Etan Kabun̄ in,” 88, 89).

    Jān oktak in an LDS.org n̄an ChurchofJesusChrist.org, maron̄ eo (maron̄ im kajoor an juon sit n̄an kajejjet ilo search engines) eļapļo̧k an nej em̧m̧an im kajoor jān kar m̧okta. N̄an waanjon̄ak, ChurchofJesusChrist.org home peij epojak kiiō, im eto ļo̧k jān juon iiō, search result ko ilo United States ilo Google n̄e juon ej kappuko naan in “kabun̄,” ijo m̧oktta ejjab maron̄ waļo̧k ak loe oktak in.

17. Russell M. Nelson, “Kōpeļļo̧k Lan̄ ko n̄an Bōk Jipan̄,” Liaona, Māe 2020, 73.

18. Lale Tad Walch, “‘If We Can’t Get Along, It’s Downright Sinful’: The Partnership between Catholics and Latter-day Saints,” Deseret News, July 1, 2021, deseret.com.

19. Russell M. Nelson, “Jim̧we in Etan Kabun̄ in,” 89.

20. “The Correct Name of the Church: A Tahitian Story,” Pacific Newsroom, Sept. 15, 2019, news-nz.ChurchofJesusChrist.org.

21. Lale Katak im Bujen Ko 84:88.