Tōmak eo n̄an Kajjitōk Innām n̄an Kōm̧m̧ane
Tōmak ilo Jisōs Kraist ej kii eo n̄an bōk revelesōn ko an m̧ool.
Ro jeiū im jatū rejitōn bōro, ij kam̧m̧oolol kōn iien in aō em̧m̧an n̄an kōnono ippemi ilo m̧wen̄an in an joteen in Jādede an kweilo̧k in eļap. Ilo an kar kwaļo̧k kadkad in kweilo̧k in jibbon̄ in, Būreejtōn Russell M. Nelson ekar ba bwe “revelesōn erreo n̄an kajjitōk ko ilo būruwōm̧ renaaj kōm̧m̧an bwe kweilo̧k in en ļap im ban meļo̧kļo̧ke. Eļan̄n̄e kwoj jan̄in kar kappukot jerbal in karejar eo an Jetōb Kwojarjar n̄an jipan̄ eok ron̄jake ta eo Irooj enaaj kōņaan bwe kwon ron̄jake ilo raan kein ruo. Ij karuwaineneik kom̧ bwe kom̧in kōm̧m̧ane āindein kiiō.”1 Ikar kappukot kōjeraam̧m̧an in ilo aō kar m̧aanjabpopo n̄an bōk revelesōn n̄an lotok in ippemi. Jar eo aō em̧ool ej bwe kom̧ maron̄ bōk revelesōn jān Anij.
Wāween eo n̄an bōk revelesōn jān Anij ejjan̄in oktak jān raan ko an Adam im Iv. Ekar ejja wāween eo wōt n̄an aolep ro ņaetaer rikarejar ro an Irooj jān jinoin n̄an rainin. Ejja wāween eo wōt n̄an kwe im n̄a. Aolep iien ej kōm̧m̧an kōn kōjerbal tōmak.2
Rūm̧m̧an ded eo Josep Smith ekar bwe tōmak eo an n̄an kajjitōk juon kajjitōk ippān Anij, tōmak bwe Anij enaaj uwaake aikuj eo an būruwōn. Uwaak eo ekar itok ekar ukōt laļ in. Ekar kōņaan jeļā kabun̄ ta eo bwe en kobaļo̧k ie n̄an erreo jān jerawiwi ko. Uwaak eo ekar bōke ekar rōjan̄ e bwe en wōnm̧aanļo̧k wōt an kajjitōk aolep kajjitōk ko rem̧m̧an im ļoor ibweebtok in revelesōn eo ej kab ijjinoe.3
En̄jake eo am̧ emaron̄ ejja āinwōt in ilo kweilo̧k in. Ewōr am̧ kajjitōk ko kōn men ko kwoj pukot uwaakier. Ebwe tōmak eo am̧ n̄an kōjatdikdik bwe kwonaaj bōk uwaak ko jān Irooj jān rikarejar ro An.4 Koban maron̄ wōr am̧ iien ko rem̧m̧an n̄an kajjitōkļo̧k n̄an bōk uaak ko jān rikōnono ro, ak komaron̄ kajjitōk ippān Jemōm̧ Ilan̄ ilo jar.
Ijeļā jān en̄jake bwe uwaak ko renaaj itok im jejjet n̄an aikuj ko am̧ im m̧aanjabpopo eo am̧ ilo jetōb. N̄e kwoj aikuji juon uwaak eo ej aorōk n̄an kōjeraam̧m̧an eo am̧ indeeo ak n̄an ro jet, uwaak eo enaaj itok. Kiiō im tokālik, komaron̄ bōke—āinwōt Josep Smith ekar bōke—uwaak eo n̄an kijenmej.5
Eļan̄n̄e tōmak eo am̧ ilo Jisōs Kraist ekar tōlļo̧k eok n̄an juon bōro erub itok jān jekjek ko rejelet pinmuur eo An, enaaj ļapļo̧k am̧ maron̄ en̄jake unoojdikdik ko an Jetōb eo n̄an uwaak in jar ko am̧. En̄jake eo aō ej bwe ainikien in emeļak im edik—eo ej alikkar im maron̄ kile ilo aō ļōmņak n̄e ij en̄jake aenōm̧m̧an ilowa im leļo̧k aō n̄an ankilaan Irooj. En̄jake in ettā in emaron̄ lukkuun kōmeļeļeiki āinwōt “A en jab ankil Aō a Am̧ wōt.”6
Jerbal in kōn revelesōn ej kwaļo̧k etke kwonaaj ron̄ an rikōnono ro katakin ilo kweilo̧k in ta eo jej ņaetan katak ko an Kraist.7 Revelesōn ej itok n̄an kōj ilo juon m̧ōttan n̄an jon̄ak eo me jekar kappukote n̄an bōk katak ko an Kraist n̄an būruwōd im kōjerbale ilo mour ko ad.
Kwoj keememej ke jān Bok in Mormon ke Nipai ekar katakin kōj bwe tōmak ilo Jisōs Kraist ej kii eo n̄an bōk revelesōn ko rem̧ool im kii eo n̄an lōke bwe jej ļoore tōl eo an Rilo̧mo̧o̧r eo. Nipai ekar je naan kein bukwi iiō ko m̧oktaļo̧k jān ļotak eo an Jisōs Kraist n̄an mour in.
“Enjeļ raņ rej kōnono kōn kajoor in Jetōb Kwōjarjar; kōn menin, rej kōnono naan ko an Kraist. Kōn menin, ij ba n̄an kom̧, kwōjkwōj ioon naan ko an Kraist; bwe lo, naan ko an Kraist renaaj jiron̄ kom̧ aolep men ko kom̧ij aikuj kōm̧m̧an.
“Kōn menin, kiiō ālikin Aō kar kōnono naan kein, eļan̄n̄e kom̧ij jab meļeļe kaki enaaj kōnke kom̧ij abin kajjitōk, im kom̧ij jab kaļļaļļaļ; kōn menin, kom̧ij jab itok n̄an meram eo, ak aikuj jako ilo marok.
“Bwe lo, bar juon alen ij ba n̄an kom̧ bwe n̄e kom̧ naaj deļo̧n̄ ilo iaļ eo, im bōk Jetōb Kwōjarjar, enaaj kwaļo̧k n̄an kom̧ aolep men ko kom̧ij aikuj kōm̧m̧an.
“Lo, en̄in ej katak an Kraist, im enaaj bar ejjeļo̧k katak letok m̧ae iien Enaaj kwaļo̧ke make n̄an kom̧ ilo kanniōk. Im n̄e Enaaj kwaļo̧ke make n̄an kom̧ ilo kanniōk, men ko Enaaj jiron̄ kom̧ kom̧ naaj niknik im kōm̧m̧ani.”8
Irooj enaaj ba men ko kōn rikarejar ro An n̄an kwe im n̄an n̄a rainin im ilo raan ko rej itok wōt. Enaaj ba n̄an kōj men ko jej aikuj kōm̧m̧ani.9 Rilo̧mo̧o̧r eo ej jāmin naaj būron̄e eok ak n̄a. Āinwōt an Ilaija katakin:
“Im Ear ba, kwōn diwōjļo̧k im jutak ioon toļ im̧aan Irooj. Im, lo, Jeova ear eļļā jān e, im juon kōto eļap im e kajoor ear ko̧kkure toļ eo, im rupe dekā ko im̧aan Jeova; a Jeova ear jab pād ilo kōt eo: im ālkin kōto eo, e m̧akūtkūt laļ; a Jeova ear jab pād ilo an laļ m̧akūtkūt:
“Im ālikin an m̧akūtkūt laļ juon kijeek; a Jeova ear jab pād ilo kijeek eo: im ālikin kijeek eo juon ainikien e dik im e mera.”10
Ron̄jake ainikien enaaj itok jān tōmak ilo E. Kōn juon tōmak ebwe, jenaaj kajjitōk tōl kōn kōņaan n̄an etal im kōm̧m̧ane jabdewōt men Ej kajjitōk.11 Jenaaj ejaake tōmak eo n̄an jeļā bwe jabdewōt men Ej kajjitōk naaj kōjeraam̧m̧an ro jet im bwe jemaron̄ in erreo ilo wāween in kōn iakwe eo An n̄an kōj.
Ilo an tōmak eo ad ilo Jisōs Kraist naaj tōlļo̧k kōj n̄an kajjitōk ippān Jemān n̄an uwaak ko, tōmak in enaaj barāinwōt bōktok im̧we eo an Rilo̧mo̧o̧r eo im ebwe n̄an ad ron̄jake tōl eo An im ad maron̄ kōņaan im m̧ōņōņō in pokake. Innām jenaaj al naan ko an al in kōn lan̄lōn̄, aaet men̄e jerbal in epen: “Jerbal in epen, aō Anij, aō Kiin̄.”12
An ļapļo̧k an lōn̄ katak ko an Kraist ippād ilo mour ko ad im ilo būruwōd, enej ļapļo̧k ad en̄jake iakwe im kautiej n̄an ro rejjan̄in kar bōk kōjeraam̧m̧an ko kōn tōmak ilo Jisōs Kraist ak rej apan̄ ilo aer dābiji. Epen n̄an kōjparok kien ko an Irooj eļan̄n̄e ejjeļo̧k tōmak im lōke ilo E. Ilo an jet luuji tōmak eo aer ilo Rilo̧mo̧o̧r eo, er remaron̄ in jum̧ae kapilōk eo An, ņa etan em̧m̧an nana im nana em̧m̧an.13 N̄an eļļo̧k jān bōd enana, elukkuun aorōk bwe jabdewōt revelesōn eo ad make jej būki rej jokun wōt juon ippān katak ko an Irooj im rikanaan ro An.
Ro jeiū im jatū, ebōk tōmak n̄an maron̄ pokake kien ko an Irooj. Ebōk tōmak ilo Jisōs Kraist n̄an jerbal n̄an ro jet n̄an E. Ebōk tōmak n̄an diwōjļo̧k im katakin gospel eo An im leļo̧k n̄an armej ro me remaron̄ jab en̄jake ainikien Jetōb eo ak remaron̄ in aaet kaarmejete m̧ool eo an ennaan eo. Ak ilo ad kōjerbal ad tōmak ilo Kraist—im ļoore rikanaan eo An emour—tōmak enaaj ļapļo̧k ipeļaakin laļ in. Kōnke technology, bōlen elōn̄ļo̧k ajri ro nejin Anij renaaj ron̄jake im kile naan ko an Anij jem̧ļo̧kin wiik in jān jabdewōt raan ko jet ruo ilo bwebwenato.
Kōn ļapļo̧k in tōmak in bwe en̄in ej Kabun̄ eo an Irooj im aelōn̄ in kiin̄ eo an in ioon laļ in, elōn̄ļo̧k membōr ro rej kōļļā juon m̧ōttan jon̄oul im leļo̧k n̄an jipan̄ ro rej pād ilo aikuj, aaet āinwōt membōr ro rej jelm̧ae mālijjon̄ ko aer make. Kōn tōmak in rekar kūr er jān Jisōs Kraist, mijenede ro ipeļaakin laļ in rekar loe wāween aer jo̧o̧r jān apan̄ ko waļo̧k jān ajedeed in juon nan̄inmej, kōm̧m̧ane menin kōn peran im laudin̄din̄. Im ilo kijejeto ko aer relļapļo̧k, tōmak eo aer ekar kajoorļo̧k.
Jum̧ae im mālijjon̄ ko rekar baj wōt jān etto kar juon men ej jelet eddōkļo̧k kōn tōmak. Menin ekar aolep iien m̧ool, eļaptata jān jinoin Jepļaaktok eo im jutak eo an Kabun̄ in an Irooj.14
Ta eo Būreejtōn George Q. Cannon ekar ba etto ej m̧ool rainin im enaaj m̧ae an naaj Rilo̧mo̧o̧r eo itok n̄an tōl Kabun̄ in An im armej ro An: “Pokake n̄an gospel eo ej bōktok [armej] n̄an lukkuun epaake im jem̧jerā epaake Irooj. Ej ejaake juon kōtaan eo em̧m̧an ikōtaan armej ioon laļ in im ad Rikōm̧anm̧an Eļap ilo lan̄ ko. Ej bōktok n̄an kōļmenļo̧kjeņ an armej juon en̄jake ewāppen ilo Eo Ekajoor Bōtata im ilo An m̧ōņōņō in ron̄jake im uwaake kajjitōk ko an ro rej lōke ilo E. Ilo iien mālijjon̄ ko im iien ko reppen lōke in ej ļapļo̧k jān jabdewōt wōņāān. Inepata emaron̄ itok ioon kajjojo armej ak ioon armej ro, jorrāān emaron̄ kaam̧ijak im kōjatdikdik an aolep armej me remaron̄ in jako, aaet, ijo im [armej] rej kōjerbal n̄an kōņaan kōjeraam̧m̧an eo me pokake n̄an gospel eo ej bōktok, er ewōr ippāer juon jikin jutak epen, ne ko neer rej jutak ioon juon dōkā ej jāmin em̧m̧akūt.”15
Ej naan in kam̧ool eo bwe dōkā eo im jej jutak ioon ej ad kam̧ool bwe Jisōs ej RiKraist eo; en̄in ej Kabun̄ eo An, eo im E ej tōl e; im bwe Būreejtōn Russell M. Nelson ej rikanaan eo An emour rainin.
Būreejtōn Nelson ej kappukot im bōk tōl jān Irooj. N̄an n̄a e ej juon waanjon̄ak kōn kappukot tōl in kōn ikdeleel n̄an ļoore. Ejja ikdeleel in wōt n̄an pokake tōl eo an Irooj ilo būruwōn aolep ro rekar kōnono ak renaaj kōnono, jar, ak al ilo kweilo̧k in eļap an Kabun̄ in An.
Ij jar bwe ro otemjej ipeļaakin laļ in ro rej alooje ak ron̄jake kweilo̧k in renaaj en̄jake iakwe eo an Irooj n̄an er. Jemedwōj Ilan̄ ekar uwaak jar eo aō me ikar en̄jake jidik in m̧ōttan iakwe eo an Rilo̧mo̧o̧r eo n̄an kwe im An iakwe n̄an Jemān Ilan̄, eo ej Jemedwōj Ilan̄.
Ij kam̧ool bwe Jisōs Kraist emour. Ej ad Rilo̧mo̧o̧r im ad Ripinmuur. En̄in ej Kabun̄ eo An. E ej pād ilo bōran Kabun̄ in. E, koba Jemān Ilan̄, rekar waļo̧k ilo nememein armej n̄an Josep Smith ilo juon bukwin wōjke ilo New York. Gospel eo an Jisōs Kraist im priesthood eo An rekar jepļaaktok kōn rikwōj meļan ro jān lan̄.16 Jān kajoor eo an Jetōb Kwojarjar, ijeļā bwe ej m̧ool.
Ij jar bwe kom̧in maron̄ bōk ejja kain kam̧ool in wōt. Ij jar bwe kom̧ naaj kajjitōk ippān Jemedwōj Ilan̄ kōn tōmak ilo Jisōs Kraist kom̧ij aikuj in kōm̧m̧an im kōjparok bujen ko me renaaj kōtļo̧k an Jetōb Kwojarjar eo erom̧ ami kōm̧pānien. Ij likūt ippemi aō iakwe im kam̧ool em̧ool ilo āt eo ekwojarjar etan Jisōs Kraist amen.