Mool eo Erreo, Katak eo Erreo, im Revelesōn eo Erreo
Jouj im kōm̧m̧an bwe kweilo̧k in eļap en juon iien m̧ōn̄ā in kijone ioon ennaan ko jān Irooj kōn rikarejar ro An.
Ro jeiū im jatū, kom̧ij ruwainene n̄an kweilo̧k in eļap! Ej juon menin aō lan̄lōn̄ bwe in maron̄ pād ippemi! Ikar ļōmņak kōn kom̧ enan̄in ilo jiljilino allōn̄ ko rem̧ootļo̧k. Ikar jar kōn kom̧ im n̄an kom̧. Ilo wiik ko kiiō ikar jar bwe kweilo̧k in en erom̧ juon iien revelesōn im juon iien kejōkļo̧kjeņ n̄an aolep ro rej kappukot kōjeraam̧m̧an ko.
Jej lukkuun laudin̄din̄ in kōnono n̄an kom̧ jān Conference Center in bar juon alen. Enan̄in aolep jia kein rej pād wōt ilo aer ejjeļo̧k kobaer, bōtaab ilo an jejjo membōr ro uwaan Tabernacle Choir eo rej pād ej juon bun̄tōn nee m̧aanļo̧k eo em̧m̧an. Kōm̧ij karuwaineneik kom̧ aolep n̄an kweilo̧k in eļap imejatoto, jabdewōt jikin kom̧ij pād ie.
Jej pād wōt im jelm̧ae wāween ko rejjab em̧m̧an an COVID-19 im oktak ko an. Jej kam̧m̧oolol kom̧ kōn ami ļoori kapilōk ko ad im naan in rōjan̄ ko an taktō ro retijem̧ļo̧k im ritōl ro an kien eo ilo jukjukin pād ko ad.
Jej koba ippān doon kajjojo kweilo̧k eļap āinwōt an Irooj tōl.1 Kweilo̧k eo ekkā ad kōm̧m̧ane em̧jōj an oktak ium̧win elōn̄ iiō ko. Ke ikar jodikdik, kweilo̧k eo eļap ej jem̧ļo̧k ilo jilu raan ak emān raan ko. Tokālik, kweilo̧k in eļap ekar kaduļo̧k n̄an ruo raan. Aolep ennaan ko—tōre ko im kiiō—ej waļo̧k itok wōt jān jar eo etiljek im m̧aanjabpopo eo eļap ilo jetōb.
Ritōl ro Routiej im Opiija ro Routiej an Kabun̄ in ro renaaj kōnono renej pedped e ennaan ko aer kōn Rilo̧mo̧o̧r eo, Jisōs Kraist, tūriam̧o eo An, im kajoor in pinmuur eo An eļap. Ejjan̄in kar wōr juon iien ilo bwebwenato an laļ in ke jeļāļokjeņ eo ad kōn Rilo̧mo̧o̧r eo ej lukkkun aorōk n̄an kōj make im jejjet n̄an aolep jetōb an armej. Ļōmņak mōk ewi jon̄an an m̧ōkaj poktak kein renana ipeļaakin laļ in—im ro otemjej ilo mour ko ad kajjojo—enaaj maron̄ ņa mejļaer eļan̄n̄e kōj aolep ro rej ļoore Jisōs Kraist im eo̧ron̄ katak ko An.
Ilo jetōb in, ij karuwaineneik kom̧ n̄an ron̄jake jilu men ko ilo kweilo̧k in eļap: m̧ool eo erreo, katak eo erreo an Kraist, im revelesōn eo erreo. Mool eo n̄an pere ko an jet, em̧ool ewōr baj juon men āinwōt jim̧we im bōd. Em̧ool ewōr m̧ool—m̧ool eo ejjeļo̧k jem̧ļo̧kin. Juon iaan men ko elōn̄ ilo kōj raan kein ad ej bwe jejjo armej ro rejeļā ia eo n̄an pukot m̧ool eo ie.2 Imaron̄ kam̧oole n̄an kom̧ bwe ta eo kom̧ naaj ron̄jake rainin im ilju rej iookļo̧k m̧ool eo erreo.
Katak eo erreo an Kraist ekajoor. Ej ukōt mour an aolep ro rej meļeļe im kappukot n̄an kōjerbale ilo mour eo an. Katak eo an Kraist ej jipan̄ kōj loe im pād wōt ilo iaļ in bujen eo. Pād wōt ilo iaļ in erarin ak iaļ in em̧ōj kōmeļeļeiki enaaj lukkuun kōkarbab e kōj n̄an ad bōk aolep men ko an Anij.3 Ejjeļo̧k juon men emaron̄ aorōkļo̧k jān aolep men ko ewōr ippān Anij.
Āliktata, revelesōn eo erreo n̄an kajjitōk ko ad ilo būruwōd renaaj kōm̧m̧an bwe kweilo̧k in eļap en ļaptokjen im ban meļo̧kļo̧ke. Eļan̄n̄e kwoj jan̄in kar kappukot jerbal in karejar eo an Jetōb Kwojarjar n̄an jipan̄ eok ron̄jake ta eo Irooj enaaj kōņaan bwe kwon ron̄jake ilo raan kein ruo. Ij karuwaineneik kom̧ bwe kom̧in kōm̧m̧ane āindein kiiō. Jouj im kōm̧m̧an kweilo̧k in eļap en juon iien m̧ōn̄ā in kijone ioon ennaan ko jān Irooj kōn rikarejar ro An. Ekkatak ekōjkan am̧ maron̄ kōjerbali ilo mour eo am̧?”
En̄in ej Kabun̄ eo an Jisōs Kraist im Armej Ro Rekwojarjar ilo Raan Ko Āliktata. Jej ajri in bujen ro Nejin. Irooj ekar kwaļo̧k bwe Enaaj kōm̧ōkajļo̧k jerbal eo An ilo iien eo an4 im E ej kōm̧m̧ane āindein ilo juon iien eidin̄. Jej jeraam̧m̧an bwe jemaron̄ bōk koņaad ilo jerbal in Ekwojarjar.
Ij lewaj ioomi juon kōjeraam̧m̧an aolep ro rej kappukot meram eo emeramļo̧k, jeļāļo̧kjeņ eo, im m̧ool eo. Ij kwaļo̧k aō iakwe n̄an kom̧, ilo et eo ekwojarjar etan Jisōs Kraist, amen.