Erom̧ Eļapļo̧k ilo Kraist: Waanjon̄ak eo kōn Jepāpe in Ijo Jej Pād Ie

Jān Elder Clark G. Gilbert

Jān Jiljilimjuonn̄oul eo

Ilo iien ippān Irooj, ejjab kōn ia eo jej ijjinoe ak ej ia eo jej jibadōk e aorōkļo̧k.

Āinwōt juon ļaddik jidikdik, ekar wōr ippa kōttōpar ko reļļap. Juon raan ālikin m̧ōj in jikuuļ, ikar kajjitōk, “Mam̧a, ta eo ij aikuj erom̧ n̄e inaaj rūttoļo̧k: juon rikkure basketball eo etijem̧ļo̧k ak juon rock star?” Būrom̧ōj, Clark eo “ejabde im tijjan̄” ekar jab kwaļo̧k kōkaļļe ko in juon rikkure ak bun̄bun̄ ilo al ilju im jakļaj. Im mekarta elōn̄ kattōn kijejeto ko, kar jab kadeļo̧n̄ n̄a elōn̄ kattōn n̄an būrokuraam̧ in ekkatak eo eutiejļo̧k an jikuuļ eo. Āliktata rikaki ro aō rekar letok juon ļōmņak bwe in ped wōt ilo kūlaaj ko rekkar n̄an jon̄an eo iped ie. Ium̧win juon tōre, ikar ejaake m̧wil in ekkatak ko rem̧m̧an. Ak ekar jab āindein m̧ae iien mijen eo aō ilo Japan ke ikar en̄jake an maron̄ ko aō ilo jeļālo̧kijeņ im ilo jetōb kar jinoe waļo̧k. Ikar wōnm̧aanļo̧k wōt im kate eō jerbal. Bōtaab kein kajinuontata ilo mour e aō, ikar kōm̧m̧an karōk n̄an kobaik Irooj ilo eddōkļo̧k eo aō, im menin ekar kōm̧m̧an oktak eļap.

Ro jeiū im jatū, ilo Kabun̄ in, jej tōmak ilo jon̄ak eo ekwojarjar an aolep ajri ro nejin Anij im ilo maron̄ eo ad n̄an erom̧ juon men eļapļo̧k ilo Kraist. Ilo iien ippān Irooj, ejjab kōn ia eo jej ijjinoe ak ej ia eo jej jibadōk e aurōkļo̧k.¹

N̄an kōmeļeļeik pedped in katak in, inaaj kōmeļeļe jān jet math ko repidodo. Kiiō, jab kūran̄ kōn am̧ ron̄ naan in math ilo kweilo̧k eo eļap. Kumi in math eo am ilo BYU-Idaho raar kallim̧ūri n̄a bwe jekdoon ro rej kab jinoe ekkatak renaaj meļeļe jekjek in. Ej ijjino kōn juon formula n̄an juon ļain. Mejān kajjik eo, n̄an kōttōbar ko ad, ej ijjino kōn ļain eo ad. Mejān kajjik eo emaron̄ jim̧ōr ijjinoe ilo utieej ak ettā. Jepāpe ijo jej pād ie ilo ļain eo, eo emaron̄ le n̄an nana ak em̧m̧an.

Kōj aolep ewōr ad intercept ko reoktak ilo mour in—jej ijjinoe ilo jikin ko reoktak kōn jon̄ak ko an mour in reoktak. Jet rej ļōtak tok kōn intercept ko reutiej, obrak kōn iien ko rem̧m̧an. Ro jet rej jelm̧ae jekjek ko me reppen im ilo lali rejjab jim̧we.² Innem jej wōnm̧aanļo̧k ilo eddōk ilo juon slope in eddōkļo̧k an juon armej make. Ilju im jakļaj eo ad enaaj alikkar ejjab eļap jān ia eo jekar ijjinoe ie ak eļapļo̧k jān slope eo ad. Jisōs Kraist ej loe jon̄ak eo ad ekwojarjar jekdoon ia eo jej ijjinoe ie. Ekar loe ippen rikowadon̄ eo, rijerawiwi eo, im rinan̄inmej eo. Ekar loe ippān rien̄wōd ro, ritōl owōj, im juon rijojomar, im aet ippān rizelōt eo. Jekdoon ia eo jej ijjino ie, Kraist ej kile ta eo jej kōm̧m̧ane kōn ta eo em̧ōj letok n̄an kōj.³ Ilo an laļ in kalimjek intercept eo ad, Anij ej kalimjōk slope eo ad. Ilo bōnbōn an Irooj, Enaaj kōm̧m̧ane aolep men E emaron̄ e n̄an jipan̄ kōj ukōt slope ko ad n̄an aelōn̄ in lan̄.

Pedped in katak in aikuj leļo̧k kainōm̧m̧an n̄an ro rej pād ilo apan̄, im bōjrak n̄an ro eļap aer jeram̧m̧ān. Kōtļo̧k bwe in ijinoe ilo aō kōnono kōn kajjojo armej ro me rej ijjino ko kōn apan̄ ko reppen, ekoba jarm̧ōļ, ejabwe maron̄ n̄an drelo̧n̄e jikin jikuuļ, im apan̄ ko an baam̧le. Ro jet rej jelm̧ae apan̄ ko ilo ānbwin, jorrāān in kōmālij, ak nin̄inmej ko reļļap.⁴ N̄an jabdewōt ro rej apan̄ kōn ijjino ko reppen, jouj im kile bwe Rilo̧mo̧o̧r ejeļā apan̄ ko ad. Ekar “bōk ioon m̧ōjņo̧ ko am̧, bwe būruōn en [maron̄] obrak kōn tūriam̧o̧… bwe En [maron̄] jeļā … ekōjkan jipan̄ [kōj] ekkar n̄an m̧ōjņo̧ ko [ad].”⁵

Kōtļo̧k bwe in kwaļo̧k ruo eria ko in kōketak ro rej jelm̧ae ijjino ko reppen in jekjek ko in mour in. M̧okta, likkuun lale ia eo kwoj jibadōk e im ejjab ia eo kwoj ijjinoe ie. Enaaj bōd n̄an kaarmejete jekjek ko kwoj iooni—rej m̧oolin im rej menin aikuj n̄an ekōnono kaki. Bōtaab likkuun ļā jān jon̄an ļōmņak kake juon ijjino eo epen emaron̄ lewaj ļōmņak ko reriab kōn wōn kwe im aaet kapan̄ maron̄ eo am̧ n̄an kālet.⁶

Iiō ko ļo̧k ikar jerbal ippān juon kurup in jo̧dikdik ro jān jikin ko rejarm̧ōl ilo Boston, Massachusetts, ro rekar kāāl n̄an gospel in im n̄an kōtmene ko an Kabun̄ in. Ekar menin kapo n̄an kapok būrom̧ōj eo aō ippen kea eo aō kōn jekjek eo rej pād ie ippān juon ikdeelel n̄an kōttāikļo̧k jon̄ak ko an Anij.⁷ Āliktata ikar kile bwe iaļ eo ekajoortata n̄an kwaļo̧k iakwe eo aō ekar bwe in jab kōttāikļo̧k kōjatdikdik ko aō. Kōn men ko otemjej ijeļā n̄an kōm̧m̧ani, jekar ļōmņak wōt kōn jon̄an aurōkier, im kajjojo iaer ekar jino lelōn̄ļo̧k slope ko aer. Eddōkļo̧k eo aer ilo gospel in ekar jab m̧ōkaj ak ekar dim. Rainin em̧ōj aer jerbale mijen ko aer, kadiwōjļo̧k jān college, m̧are ilo tampeļ, im rej tōl mour ko aer make im rekabwilōn̄lōn̄ im jerbal ko reutiej.

Kein karuo, kobaik Irooj ilo am̧ kajjieon̄ ļōn̄aj jepāpe in jikin eo kwoj pād ie. Ke ikar jerbal āinwōt juon būreejtōn in BYU-Pathway, ij keememej aō jijet ilo juon kweilo̧k eļap ilo Lima, Peru, ijo Elder Carlos A. Godoy ekar rikenono eo. Ke ej reiļo̧k n̄an jarlepju eo, ekar ļo̧kjenan ilo an kalimjōke elōn̄ bwij eo m̧okta in rijikuuļ in university ro retiljek. Bōlen ej ļōmņak likļo̧k kōn iaļ eo an make ilo kain jekjek ko reppen, Elder Godoy ekar ba ilo eļap en̄jake: Irooj enaaj “jipan̄ eok eļapļo̧k jān am̧ maron̄ jipan̄ eok make. [Kōn menin] kobaik Irooj ilo wāween in.”⁸ Rikanaan Nipai ekar katakin “bwe ej jān jouj jej mour, ālikin aolep ijo jemaron̄ kōm̧m̧an make.”⁹ Jej aikuj kōm̧m̧ane ijo koņaad em̧m̧antata,¹⁰ eo ekoba ukweļo̧k, ak ej wōt ilo jouj eo An Irooj bwe jen maron̄ kile jon̄ak eo ad ekwojarjar.¹¹

Āliktata, kōtļo̧k bwe in kwaļo̧k ruo eria in kapilōk ko n̄an ro rej ijjinoe ilo utiej. M̧oktata, jemaron̄ kwaļo̧k ad ettā n̄an jekjek ko me jemaron̄ kar jab ejaaki kōn kōj make? Āinwōt an būreejtōn eo an kar BYU Rex E Lee. kar kwaļo̧k n̄an rijikuuļ ro an, “Em̧ōj ad aolep idaak jān aibōj laļ ko jekar jab kūbwiji im kōmāņāāni kōj kōn kijeek ko jekar jab ejaaki.”¹² Innem ekar kūr rijikuuļ ro an n̄an bar lelo̧k jipan̄ im kōļapļo̧k aibōjlaļ in jeļāļo̧kijeņ ko me armej ro m̧oktata rekar kalōki. Likjab n̄an bar kaddōk ine ilo jikin kallūb eo kar katōke jān ro jet emaron̄ ejjeļo̧k oktak jān ad kōro̧o̧le juon taļōn ilo ejjeļo̧k tōprak.

Kein karuo, ļōmņakļo̧k wōt ilo juon ijjino eo eutiej emaron̄ ekkā an kōm̧m̧an bwe jen en̄jake bwe jej wōnm̧aanļo̧k ak ilo m̧ool jepāpe eo ad itulowa emaron̄ m̧ōjņo̧. Rūkaki eo ilo Harvard, Clayton M. Christensen ekar katakin bwe enan̄in aolep armej ro eļap aer tōprak rej ro eļaptata aer ettā kōnke eļap aer peran n̄an bōk kajjim̧we im ekkatak jān jabdewōt armej.¹³ Elder D. Todd Christofferson ekar kapilōk kōj n̄an “m̧ōņōņō ilo [kappukot wāween ko] n̄an bōk im em̧ool kappukōt kajjim̧we ilo kōj make.¹⁴ Em̧ool men̄e men ko rej waļo̧k ke rem̧m̧an, jej aikuj kappukot iien ko rem̧m̧an n̄an kōkm̧anm̧anļo̧k kōn akweļap in jar.

Mekarta n̄e jekar ijjinoe ilo jeraam̧m̧an ak jekjek ko reppen, jenaaj kile lukkuun jon̄ak eo ad enaaj wōt waļo̧k n̄e jej kōm̧m̧an bwe Irooj en iaad. Raan ko ļo̧k ikar bwebwenato ippān juon eo eutiej ilo jikin jeļāļo̧kjeņ ipeļaakin laļ in eo ekar kōņaan jeļā kōn tōprak ko an BYU-Pathway. Ekar māletlet im kajjitōk eo an ekar m̧ool, ak ekar alikkar bwe ekar kōņaan juon uwaak eo ejjab ekkeijel ippān men ko an Kabun̄. Ikar kwaļo̧k n̄an e būrokuraam̧ ko in kōjparok im kijejeto ko an rūkaki ro. Ak ikar kajjem̧ļo̧ke ilo aō ba, “Aolepān men kein rej jerbal ko rem̧m̧an, bōtaab un eo em̧ool unin an rijikuuļ rein amim wōnm̧aanļo̧k ej kōnke kōmij katakin er kōn jon̄ak eo aer ekwojarjar. Pijaik m̧ōk eļan̄n̄e aolepān mour eo am̧, kar jiron̄ eok bwe koban tōprak. Kiiō ļōmņak jekjek in am̧ kar ekkatak bwe kwoj lukkuun juon ļaddik ak leddik nejin Anij kōn maron̄ eo ekwojarjar?” Ekar bōjrak, innām baj uwaak “Eļap an kajoor men eo.”

Ro jeiū im jatū, juon iaan kabwilōn̄lōn̄ ko ilo menin, Kabun̄ eo an Irooj, ej katakin bwe kajjojo iaad emaron̄ erom̧ juon men eļapļo̧k ilo Kraist. Ijeļā kōn ejjeļo̧k bar juon kabun̄ eo me ej leļo̧k n̄an membōr ro aer iien ko rem̧m̧an n̄an jerbal in jipan̄, bar ukōtļo̧k jipan̄, ukweļo̧k, im erom̧ armej ro rem̧m̧anļo̧k. Jekdoon n̄e jej ijjinoe ilo jeraam̧m̧an ak jekjek ko reppen, jen kōm̧m̧an bwe jen dāpij erreiļo̧k ko ad im jepāpe in ijo jej pād ie n̄an aelōn̄ in lan̄. Ilo ad kōm̧m̧ane, Kraist enaaj ļōn̄aj kōj lōn̄ļo̧k n̄an juon jikin eutiejļo̧k. Ilo etan Jisōs Kraist, amen.

Kakeememej ko

1. Lale Clark G. Gilbert, “The Mismeasure of Man” (BYU–Pathway Worldwide devotional, Jan. 12, 2021), byupathway.org/speeches. Ilo enaan in ikar laleļo̧k wāween an emakijkij an laļ in bōd aer jon̄e aurōkin armej. Em̧ool barāinwōt kajjojo armej ro rem̧m̧an ro rej ļoor jerbal ko an ro retijiem̧ļo̧k ro rej lale armej ro ilo nan̄inmej ilo kōlmenļo̧kijeņ im rej katakin kōn katak eo kōn kijejeto (Angela Duckworth) im ļōmņak ko rekajoor (Carol S. Dweck) rejjab kaurōk likkuun maron̄ eo em̧ool an armej n̄e rej pedpedļo̧k ioon jon̄ak ko katakin er kaki im rej karmejete jon̄an aurōkid ekwojarjar ilo Kraist.

2. Lale Dale G. Renlund, “Illu kōn Kalijōkļo̧k,” Liaona, Māe 2021, 41–45.

3. Lale Matu 25:14–30. Ilo bwebwenato eo kōn taļōņ ko, kajjojo rijerbal ro rekar bōk jon̄an taļōņ ko reoktak jān irooj eo aer. Ak rekar jab ekajet er kōn ta eo rekar bōk bōtaab kōn wāween aer kar kōjerbali. Ekar korļo̧k eo me ekar tōl Irooj bwe en ba, “Eṃṃan aṃ kōṃṃan kwō karijera eṃṃan im tiljek. Kwaar tiljek kōn men ka re iiet, Inaaj kairooj eok ioon men ko re lōñ” (Matu 25:21).

4. Lale Mosaia 3:19. Juon un emaron̄ bwe ilo an armej ilo likkuun piktokin jelōt kōj emaron̄ oktak ilo oktak in bōdan̄. Āinļo̧k wōt ad bōk menin letok kwojarjar kōn menin letok ko reoktak, ej barāinwōt wōr ippād apan̄ ko reoktak ilo ānbwin, kōļmenļo̧kijeņ, im en̄jake ko me jej aikuj ekkatak wāween jerbali im anjo̧ jāni.

5. Alma 7:11–12. Kraist ejjab wōt jipan̄ kōj anjo̧ jān jerawiwi ko ad kōn ukweļo̧k, ak E ejeļā wāween kainem̧m̧an kōj ilo men ko reppen ilo mour ko ad, kōn Pinmuur eo, E ekar en̄jake im anjo̧ jān aolep en̄taan an armej.

6. Elder David A. Bednar ej kakkeememej kōj bwe jej rikajebwebweik im aikuj m̧akūtkūt n̄an kōj make. N̄e jej jon̄e kōj make kōn wāween jon̄ak ko an laļ in, jej kadik jon̄an ekwojarjar in aurōk eo ad, ilo ad kōm̧m̧ane menin, jej kadik maron̄ eo ad n̄an kālet. (Lale David A. Bednar, “And Nothing Shall Offend Them,” Liahona, Nov. 2006, 89–92.)

7. Lale Russell M. Nelson, “The Love and Laws of God” (Brigham Young University devotional, Sept. 17, 2019), speeches.byu.edu. Ilo kweilo̧k in an BYU, Būreejtōn Nelson ej katakin bwe kōnke Anij im Eo Nejin rej iakwe kōj, Em̧ōj Aer letok n̄an kōj kakien ko im kōtmene ko me renaaj jipan̄ kōj. “Kien ko an Anij rej kwaļo̧k iakwe eo An edipeo n̄an kajjojo iaad. Kien ko an rej kejparok kōj ilo jetōb im jipan̄ kōj eddōkļo̧k indeeo” (peij 2).

8. Carlos A. Godoy, BYU–Pathway Connections Conference, Lima, Peru, May 3, 2018.

9. 2 Nephi 25:23.

10. Ro jinō im jema rekar ejake juon jabon kenaan n̄an Gilbert baam̧le n̄an “Kōm̧m̧ane Ijo Koņaam̧ Em̧m̧antata.” Bar juon wāween n̄an laleļo̧k bwebwenato in slope in ej n̄an kile bwe eļan̄n̄e jej kōm̧m̧ane ijo koņaad em̧m̧antata, jemaron̄ lōke Anij n̄an wōnm̧aantak im kadedeikļo̧k.

11. Lale Clark G. Gilbert, “From Grit to Grace” (BYU–Pathway Worldwide devotional, Sept. 25, 2018), byupathway.org/speeches. Ilo enaan in ikar ekkatak kōn ļōmņak eo me men̄e jej aikuj ekkatak n̄an buuļ jerbal im ejaake m̧wil ko rewājabdik, n̄an kile piktokid em̧ool ilo Jisōs Kraist, jej aikuj ekkatak n̄an kōjerbal tiriam̧o eo An.

12. Rex E. Lee, “Some Thoughts about Butterflies, Replenishment, Environmentalism, and Ownership” (Brigham Young University devotional, Sept. 15, 1992), 2, speeches.byu.edu; barāinwōt lale Deuteronomy 6:11.

13. Lale Clayton M. Christensen, “How Will You Measure Your Life?,” Harvard Business Review, July–Aug. 2010, hbr.org. Enaan in kar leļo̧k āinwōt juon katak m̧ōttanļo̧k Class Day eo ekar ekkeijelļo̧k kadiwōjļo̧k eo an Harvard Business School eo. Ilo enaan eo an, Professor Christensen ekar kakkōl rijikuuļ ro an bwe ren jab kajenolo̧k peran jān ettā bōro, kakkeememej er bwe n̄an wōnm̧aanļo̧k n̄an eddōkļo̧k ilo mour in, renaaj aikuj kōttāik er ebwe n̄an aer bōk naan in kajjim̧we im ekkatak jān ro jet.

14. D. Todd Christofferson, “As Many as I Love, I Rebuke and Chasten,” Liahona, May 2011, 97.