Ol lesen we i kamaot long Laef blong wan Yang Adalt
Divosen blong Ol Yang Adalt Raon long Wol
Sandei 5 Mei, 2024
Fas Toktok
Elda Carlos A. Godoy: Tangkyu blong stap long ples ia wetem mifala tedei long naesfala histri ples ia. Hem i wan ona blong stap wetem yufala tedei. Tangkyu blong joenem mifala long ol fo kona blong wol. Mifala i laekem tumas blong stap wetem ol yang adalt. Yufala i gat wan spesel wok insaed long Jos, mo yufala i stap laef long wan impoten taem blong laef blong yufala. Ol desisen blong yufala tedei bae i jenisim bigwan fiuja blong yufala. So long naet, ia mifala i hop blong ademap wan samting we bae i help bigwan, i go wetem plante gudfala mesej we yufala i bin kasem finis long ol narafala devosen.
Mi glad blong gat wetem mi, Brata Chad Webb mo waef blong hem, Kristi, mo Elda Clark Gilbert mo waef blong hem, Christine. Tangkyu blong joenem mifala tedei.
Mi mi glad tumas tu blong gat Mônica i stap wetem mi long devosen ia. Bae mitufala i tij olsem wan tim, mo hop se bae yufala i laekem.
Olsem pat blong mesej blong mitufala, bae mitufala i soem wan sot vidio we Jos i mekem abaot ol taem we mitufala i bin yang. Mônica mo mi i gat kolosap semmak yia olsem yufala.
Truaot long vidio ia, mifala i hop blong tijim yufala sam long ol prinsipol we yufala i save yusum long laef blong yufala naoia. Hem i wan faef minit vidio we bae yufala i wajem ol defdefren taem blong laef blong mitufala. Plis lisin gud mo traem blong poenemaot ol prinsipol ia we yu biliv se i blong yu. Bae mitufala i kambak afta blong tokbaot sam long olgeta. ?OK?
[vidio]
Mi no bin stap lukaotem gospel o jos nating. Mi gat 16 yia, mo wan fren blong bigfala brata blong mi i bin kam long hom blong mi blong invaetem ol smol sista blong mifala blong go long wan aktiviti blong jos from se, hem i ting se mi mo brata blong mi mitufala i no kaenkaen ia blong go long jos. Mo taem mifala i kasem jos, oli stap plei wan simpol aktiviti nomo, mo oli bisi long pleplei ia mo stap laflaf. Mo mi tingting se, “?From wanem oli glad tumas?”
So, tu dei i pas, mi stap kasem ol lesen insaed long japel from se famli blong mi oli no intres tumas blong gat olgeta. Mi glad tumas from gospel. Mi bin save se i tru, inaf blong mekem mi wantem baptaes, iven sapos papa mo mama blong mi i no pat. Be i had tumas blong kam pat.
Mi no bin gat ol fren, mo i mekem se mi bin stap biaen long japel blong sam taem—stap wajem, lisin, mo afta go hom. Yu save mekem hemia blong wan sot taem, be sapos yu no gat ol fren, iven sapos yu save se i tru, i had, speseli taem yu gat ol fren aotsaed we oli stap singaotem bak yu bakegen.
Mi go long jos long wan Sandei, olsem, wan moa taem, mo oli stap fulumap ol aplikesen. Mo mi askem, “?Wanem ia?”
Oli talem, “hem i wan konfrens blong yut”. “Yu sud go.”
Mi se, “Okei, mi wantem traem.” Afta long konfrens blong ol yut, evriwan long ol yut ia oli stap pleiplei, singsing mo danis, kwiktaem wan voes long spika i talem, “Bae yumi mekem fas prea.”
Kwiktaem, evri pipol we oli stap mekem tumas noes, oli revren. Long mi, mi tingting, “?Wanem? ?Wanem i stap hapen long ples ia? ?Hao nao grup blong ol yut ia we oli save mekem tumas noes, mo afta kwiktaem oli save revren gud from wan prea? Waow, oli defren. Mi wantem kam olsem olgeta. Long mi, hem i Lod we i stap sendem wan mesej bakegen: “Carlos, yu no givap. Hemia nao ples blong yu.”
Nekis dei, mi stap wokbaot raon mo wan gel i stap long ples ia i stap plei flut hemwan. Taem mi luk gel ia, mi se, “!Waow!” Mo hat blong mi i stat blong pam hariap. Mo mi wantem blong toktok long hem. Hem i nomol nomo mo i toktok naes. Mo hem i stat blong toktok long mi olsem se mi wan nomol man. Mo, hem i kam fren blong mi, wan fren ia nomo. Mo tru long hem, mi bin save mitim ol narafala fren.
Afta long yut konfrens ia, mi jusum blong stap gohed blong go. Famli blong mi oli muv i go long narafala pat blong siti. Mi go long japel we i kolosap long hom blong mi, mo ges se huia i stap long ples ia—!Mônica! Hemia i wod blong hem. Long en blong miting, wan sista i kam long mi mo talem, “?Yu yu wan memba blong Jos?”
Mi harem kwestin ia plante taem finis. Mi se, “Yes, mi ting se, yes mi wan memba.”
Hem i talem, “O, yu sud kam long seminari.”
Mo mi tingting se, long ples blong mi, seminari i blong kam wan pris, wan pasta.
So, mi talem, “No, no, mi wantem mared mo gat ol pikinini ia.”
Mo hem i talem, “No, seminari i blong ol yut yu save, hem i blong lanem abaot gospel. Mifala i no gat plante yut long wod blong mifala. I gat tri nomo, olsem: Adriana Weber, Carlos Arthur Lencini, mo Mônica Brandão.
Mo mi tingting se, “Wao. Okei, mi no save gud se hem i wanem, be mi wantem stap long ples ia.”
Mo long evri moning mi stap kasem gudfala tok blong God. Mo hemia i givim mi andastaning ia abaot huia mi, paoa blong gohed blong stap faet mo holemtaet fasin blong mi blong stap gohed blong jenisim laef.
Afta, oli asaenem mi olsem wan hom tijing kompanion blong presiden blong Ol Yang Man . Mo nomata se mi no save plante samting abaot gospel, oltaem hem i givim ol asaenmen long mi blong tij. Hem i trastem mi, mi ting, moa bitim we mi trastem miwan long taem ia.
Mo wan samting tu we i gud tumas—hem i papa blong Mônica. Yufala mas save se, enjel gel ia, Mônica we i stap long ples ia blong helpem mi—hem i kam waef blong mi, afta. Afta we mitufala tugeta i go misin, mitufala i mared insaed long tempol, mo naoia hem i mama blong fo pikinini blong mitufala mo wan bubuwoman blong seven apupikinini. Hem stap wan enjel yet long laef blong mi.
Sapos yufala i lukluk raon, mi no gat tu tingting se bae yufala i save faenem olgeta we oli nidim help blong enjel. Lod i nidim yufala. So, taem yu luk yuwan long mira, no fogetem: insaed long yu, i gat wan naesfala spirit we i wan pikinini boe o gel blong Papa long Heven wetem evri fasin ia mo paoa insaed long yu.
[end video]
Elda Godoy: Mi misim hea ia. OK. Naoia bae mitufala i tokbaot sam long ol topik ia. Mo fasin blong stap yuwan, i faswan.
!Yu No Stap Yuwan!
Sista Mônica Godoy: Long ples ia, mi biliv se, hem i wan gud taem blong stop smoltaem mo toktok raon long wanem i hapen. Carlos, taem i yang, i stap filim se hem i stap hemwan mo tingting i foldaon.
Maet sam long yufala i bin filim se yufala i stap yufalawan mo oli fogetem yufala, olsem we i bin hapen long ples ia. Hem i no isi blong filim se yumi nating o se yumi nogat valiu. Blong olgeta we oli stap long kaen situesen olsem ia, plis no letem filing ia i fulumap yu. Yu no stap yuwan. Maet ol narawan oli no stap joen wetem yu o no stap lavem yu olsem we bae yu wantem. Hem i wan situesen we i no hapi. Be tingbaot se yu no stap yuwan, from se oltaem Sevya i bin stap blong yu. Hem i save yu, Hem i save wanem i stap hapen long laef blong yu, Hem i lavem yu, mo Hem i stap blong givhan long yu enitaem yu nidim. Plis, no givap blong stap traem blong kam pat. Hem bae i sendem ol enjel blong helpem yu.
Elda Godoy: Naoia, wan mesej i go long evriwan long yumi we i yumi stap kolosap long olgeta we oli stap filim se oli stap olgetawan o oli fogetem olgeta. Yumi nao i sud stap olsem ol enjel ia. Plis lukluk raon mo lukluk i go moa bitim ol evri dei fren blong yu. Olgeta ia oli stap long we, oli bin stap long we, mo ating yu no bin luksave olgeta. Yu bin bisi tumas wetem laef blong yu, wetem ol gudfala fren mo kompanion, mekem se yu no bin luk olgeta we oli stap hop blong filim lav mo blong oli akseptem olgeta. Be oli stap long we, oli stap lukaotem frensip, stap hop blong kam pat. Maet oli stap biaen long japel o long ol kona blong ol klasrum. Plante taem, bae oli no stap werem wan waet set mo wan nektae o wan naesfala dres blong Sandei. Be oli stap traem bes blong olgeta blong kam pat blong yumi. Plis givim wan janis long olgeta. Oli nidim smael blong yu, blong yu sekhan wetem olgeta mo frensip blong yu. Hemia wan kwot we i kam long Presiden Spencer W. Kimball abaot hemia:
“God i luksave yumi, mo Hem i stap lukaot long yumi. Be, plante taem, hem i tru long ol narafala man nao we Hem i stap ansarem ol nid blong yumi.”
OK. Deiting. Raonem wetem lav.
Raonem wetem Lav
Sista Godoy: OK, hemia i wan nara gudfala poen blong tokbaot: taem we yu stat blong laekem mi.
Elda Godoy: Mi save se bae yu jusum hemia ia.
Sista Godoy: !O yes! Hem i bin wan naesfala taem, mo i gat wan lesen long ples ia blong serem. Sam long yufala bae i stat blong gat filing blong lav long wan mo i isi blong faenem lav blong laef blong yu. Bae i olsem filing lavem wan long fastaem we yu luk hem.
Elda Godoy: Mi ting se hemia i situesen blong mi. Luk fes blong mi.
Sista Godoy: Be long mi, i bin defren.
Elda Godoy: Yes.
Sista Godoy: Yumi no mas ting se bae yumi faenem kompanion blong yumi blong taem we i no save finis, long semmak wei olsem ol narawan. Blong sam, bae i klia mo strong. Long ol narawan, i save tekem moa taem, hadwok mo fasin blong stap wet longtaem. Bae i kam moa klia taem yu gohed blong givim fulap long rilesensip ia. No givap kwiktaem from se long stat yu no bin gat wan strong filing. Eksperiens i tijim mitufala se, sam long ol gudfala mared i stat long wan simpol wei, smol afta smol, deit afta deit.
Elda Godoy: Mônica i talem tru. Blong mitufala, yes, i bin olsem ia nao. Taem mi bin luk hem, kwiktaem, i bin tajem hat blong mi. Long mi, i olsem se mi bin luk wan bigfala laet. Hem, long narasaed, i no bin filim eni samting i spesel long stat. I bin tekem mi sam manis blong wokhad kasem taem we hem i luksave se maet mi wan gudwan blong save jusum. Fastaem, mitufala i bin kam gudfren, mo afta long plante deit, long en, hem i luksave se hem i stat blong laekem “naesfala” yang man ia. Bigwan o smol
Eksperiens ia i bin tijim mitufala abaot wan nara prinsipol: wei we yumi kasem revelesen. Wei ia blong stap faenem wan i semmak long wei blong stap kasem revelesen.
Mi laekem tijing blong Elda Bednar abaot revelesen. Hem i yusum tu eksperiens we plante long yumi i bin gat wetem laet blong tij abaot hemia.
Hem i tokbaot eksperiens ia taem “yumi kam insaed long wan rum we tudak mo prestem paten blong laet. … Kwiktaem nomo wan laet we i saen i kavremap mo fulumap rum mo mekem se tudak i lus. … Wan laet we oli onem insaed long wan rum we i tudak i olsem blong stap kasem wan mesej we i kam long God kwiktaem mo … evriwan long wan taem.” Hemia i semmak long ol filing we i kam long mi abaot Mônica.
Narafala eksperiens i taem we “yumi wajem naet i tanem i kam moning. … Blong komperem wetem taem yumi stap onem wan laet long wan rum we i tudak, laet we i kam taem san i girap i no kamaot bigwan wantaem mo kwiktaem. [Be], sloslo mo long semmak wei, paoa blong laet i kam bigwan, mo … long en, fas laet blong san bae i kamaot long en blong solwota. …
“Fasin we laet i kam bigwan sloslo mo seraot long san we i stap girap, i olsem blong stap kasem wan mesej we i kam long God, ‘tijing folem tijing, rul folem rul,’ (2 Nifae 28:30).” Hemia i semmak long situesen blong Mônica taem hem i stap faenemaot se mi mi raet man blong hem. I bin tekem long taem smol.
Elda Bednar i endem se, “Oltaem, revelesen i kam smosmol mo oli ademap olgeta blong wan longfala taem, mo oli givim folem tingting blong hat blong yumi, fasin blong stap klin inaf mo blong stap rere.”
Sista Godoy: Yumi save talem semmak samting abaot wei ia blong kasem konfemesen long saed blong spirit abaot ol kompanion blong yu blong taem we i no save finis. Plante taem, bae oli kam smosmol mo ademap olgeta, taem yumi mitim ol pipol mo spenem taem tugeta.
Paoa long Saed blong Spirit
Elda Godoy: Letem mi tekem hemia. Olsem we yufala i bin luk long vidio, se hem i bin wan impoten desisen long mi blong stap atendem seminari. Nomata se fas risen blong atendem seminari i from wan naesfala gel mo i no ol lesen blong gospel, seminari i bin gat bigfala paoa long mi blong jenisim laef mo rod blong mi long saed blong spirit.
From ol tijing blong gospel we mi stap kasem smosmol evri dei, mi bin save mekem testemoni blong mi i kam strong mo stanap strong agensem ol temtesen truaot long dei blong mi. Seminari i helpem mi blong andastanem se mi wan pikinini blong God mo we Hem i gat wan plan blong mi long laef ia.
Sista Godoy: Semmak prinsipol ia i go tu long institiut. Hemia i bin pat blong ol taem blong deit blong mitufala tu. Mi hop se yufala i stap mekem gud yus long bigfala risos ia. Long ples ia, bae yufala i no faenem nomo trutok blong gospel be tu, ol tru fren. Luk wanem we Presiden Nelson i bin talem abaot institiut:
Vidio: “Ol dia brata mo sista blong mi, mi lavem yufala. Mi tingbaot yufala mo prea from yufala oltaem. Yufala i stap laef long wan taem we i defren long evri narawan. Yufala i stap long wan taem we yufala i stap mekem ol impoten desisen—ol desisen we bae oli gat paoa long ful laef blong yufala long wol ia mo laef we i no save finis. Blong mekem ol desisen ia, i luk olsem se i tumas o iven wanwan taem i mekem man i fraet. Be hem i wan naesfala samting blong stap mekem from se yumi stap laef long wan spesel taem.
“Mi invaetem yufala blong mekem wan samting we bae i helpem yufala long wan wei we sam nara samting i save mekem. !Go long institiut! Naoia mi bin luk ol pikinini, apu pikinini mo plante apu apu pikinini blong mi oli go long institiut. Blong stap go long institiut i bin jenisim laef blong olgeta.
“Institiut i bin helpem olgeta mo bae i helpem yu blong mekem yu jenisim laef blong yu moa i go long Jisas Kraes. Blong stap go long institiut bae i helpem yu blong filim bigfala lav blong Papa long Heven, moa long yu. Institiut bae i givim ol instrakta we oli givim insperesen, ol fetful fren, mo wan filing we i mekem yu filim pat blong gospel ia. Bae i helpem yu blong luk from wanem blong stap laef folem gospel i lidim yu go long hapines we i no save finis. Blong stap go long institiut bae i helpem yu blong laef folem gospel mo filim moa glad naoia.
-
Sapos yu wantem save trutok abaot huia yu, go long institiut.
-
Sapos yu wantem save stamba tingting blong laef, go long institiut.
-
Sapos yu wantem stap long kavenan rod, go long institiut.
-
Sapos yu wantem lanem hao blong letem God i win long laef blong yu, go long institiut.
-
Sapos yu wantem stap wan blong putum pis, go long institiut.
“Mi promesem yu ol blesing ia mo talemaot lav blong mi from yufala long tabu nem blong Jisas Kraes, amen.”
Elda Godoy: from se yumi stap yet long japta blong paoa long saed blong spirit, bae mi tokbaot eksperiens blong mi wetem hom tijing.
Olsem we yufala i bin luk long vidio, oli bin asaenem mi blong givim seves taem mi no gat tumas samting blong givim. Blong givim seves i mekem mi filim se mi gat valiu. Hemia i helpem mi blong helpem ol narawan mo, olsem wan risal, i bin mekem testemoni blong mi i kam strong. Wan long ol bes wei blong mekem testemoni blong wan i kam moa strong i blong stap serem. Mi hop se yufala i stap tekpat blong givim seves taem yufala i gat ol janis ia. Hem i save wok blong givhan, famli histri, tempol seves, o ol narafala Jos asaenmen we bae yu fogetem yuwan mo helpem ol narawan. Bae i blesem yu, givim paoa long yu mo protektem yu.
Mi laekem skripja insaed long Doktrin mo Ol Kavenan we i tokbaot bigwan prinsipol ia:
“I tru mi talem, ol man oli mas wok wetem strong tingting long wan gud wok, mo mekem plante samting long tingting blong olgetawan nomo, mo mekem plante stret mo gud wok oli kamtru.”
Mo blong ademap, olsem we mi bin taem long vidio, mi laekem tumas hom tijing kompanion ia we mi gat mekem se mi maredem gel blong hem. Hem i kam tambu blong mi. Hem i papa blong Mônica. Mi aktiv bigwan long ol asaenmen blong mi blong hom tijing. Evri manis mi stap long hom blong hem blong mekem sam tijing.
Sista Godoy: Wan blesing we ol jeneresen blong yufala i gat we mifala i no bin gat hem i, ol tempol we oli stap kolosap. Wan tempol ia nomo long Brasil taem mifala i yangfala i bin long São Paulo, we i stap longwe tumas long mifala. Long taem ia, ol yang adalt oli go long tempol taem oli stap aot blong go long misin o blong kasem mared. I gud tumas se, naoia Presiden Nelson i tokbaot plante hamas i impoten blong stap kasem ol endaomen blong yufalawan, nomata sapos yu no go long misin o mared. Hem i moa abaot fasin blong stap rere bitim eni narafala samting. Mi hop se bae yufala i tingting gud long hemia.
Blong go long haos blong Lod oltaem tu i karem ol blesing i kam. Insaed long tempol, yumi kasem ol lesen blong helpem yumi blong winim wol. Mi laekem tumas wanem we Presiden Nelson i talem abaot tempol long las konfrens:
Vidio: “I no gat wan samting bae i helpem yu moa we blong stap wosip long tempol oltaem long taem we yu save mekem. I no gat wan samting bae i protektem yu moa taem yu stap long medel blong tudak blong wol. I no gat wan samting bae i mekem testemoni blong yu long Lod Jisas Kraes mo Atonmen blong Hem i kam strong moao helpem yu andastanem moa naesfala plan ia blong God. I no gat wan samting bae i givim yu moa kamfot long spirit long taem blong harem nogud. I no gat wan samting bae i openem ol heven moa. !I nogat!”
Elda Godoy: Tangkyu, Presiden Nelson, long ol tijing blong yu. “Mifala i lavem yu tumas” OK, nekis topik: givim seves long wan misin.
Go long wan Misin
Sista Godoy: OK, taem blong tokbaot ol misin. Sikis manis afta we Carlos i aot blong go long misin, mi aot blong go long misin blong mi.
Elda Godoy: I hapen long stret taem.
Sista Godoy: I no hapen long wan stret taem. Mitufala tugeta i bin wantem blong givim seves long Lod, mo mitufala i wantem wan fiuja tugeta. So, mitufala i luk ol misin blong mitufala olsem wan gudfala wei blong mekem Sevya i glad mo long semmak taem, mekem mitufalawan i rere from mared laef blong mitufala. Mitufala i save se bae i tekem ol blesing tu i kam we mitufala i nidim blong wan fiuja blong yang mared kapol.
Elda Godoy: I sua se ol misin blong mitufala i bin karem blesing i kam long laef blong mitufala. From misin blong mitufala, testemoni blong mitufala abaot Sevya i kam strong, save blong mitufala abaot gospel i kam antap, mo komunikesen mo lidasip skil we mitufala i lanem long ples ia, i helpem ol wok blong mitufala. Be wanem we i moa bitim eni nara samting i we, mitufala i filim gud blong save mekem ol misin we Lod i wantem long mitufala.
Sista Godoy: Mi gat wan kwestin blong yu. ?Be olgeta we oli no save go o no finisim misin blong olgeta from ol defren risen? ?Oli save gat hop yet from wan fiuja we i gat sakses?
Elda Godoy: !Yes, oli save gat! Wan Papa long Heven we i gat lav, bae i oltaem i stap blong olgeta. Yumi no mas jajem olgeta we oli gat ol defren eksperiens blong misin, o no gat misin eksperiens nomo. Afta long evri samting, nomata se blong stap givim seves i wan impoten taem blong kasem ol eksperiens blong stap lanem samting long laef blong yumi, mo i wan prishud responsabiliti blong ol yang man, hem i no wan odinens blong gospel, so i no gat wan we bae i kasem panis long progres blong olgeta long laef ia o lusum ol blesing blong taem we i no save finis from hemia.
Sista Godoy: Mi mi glad blong gat janis blong givim seves, mo askem hemia long yufala evriwan. Be olsem we yumi save, ol yang woman oli welkam mo oli nidim olgeta, blong givim seves, be oli save jusum o no jusum.
Elda Godoy: Mi glad tu long misin eksperiens blong mi. Mi biliv se mi kambak afta long tu yia ia, mo mi rere moa blong laef. Mo wetem hea we oli katem i moa gud.
Sista Godoy: From yumi stap tokbaot blong kambak long ol misin, ?i oraet sapos yumi tokbaot mared naoia?
Elda Godoy: Okei. Letem yumi fesem topik ia.
Stap Lukaotem Gud wan Famli
Sista Godoy: Mitufala hemia, tu riten misinari we i finis wetem plante lav, plante plan, mo nogat mane.
Elda Godoy: !Yes! Mi tingbaot.
Sista Godoy: Naoia taem mi lukluk i gobak, mi luksave olsem wanem i naes tumas blong statem mared laef blong mitufala olsem we mitufala i bin mekem mo kasem ol gol blong edukesen, wok mo ol samting blong laef, tugeta. Mitufala i mekem tugeta, mo ol eksperiens mo ol jalenj ia oli mekem mitufala i kam mo kolosap long mitufala wanwan.
Elda Godoy: Mi tingbaot mo mi agri. Olgeta yia blong bildimap laef blong mitufala mo kasem ol gol blong mitufala, oli kam ol spesel memori blong mitufala. Hem i no minim se i rong blong statem mared laef taem yu gat inaf mane. Mitufala i wantem nomo blong serem wan mesej wetem olgeta we oli stap wet blong kam gud long rilesensip blong yufala kasem taem we yufala i kasem evri samting we yufala i nidim. Yu nidim ol stamba samting, wanwan long yutufala, mo Lod long saed blong yutufala—evri narafala samting, yutufala i save kasem tugeta, we bae i mekem mared blong yutufala i kam strong. Mo mi stap lukaotem sam long ples ia long olgeta we oli stap lisin naoia.
Sista Godoy: Mi jenisim pikja be mi no jenisim topik—wan nara komen abaot mared laef: taem yufala, ol yang adalt, i luk mifala, ol kapol mo ol famli we oli stap gud, maet yufala i tingting se oltaem i bin olsem ia nao, se oltaem evri samting i gud olsem we yufala i luk, mo laef i bin isi long mifala. Maet i olsem long sam, be i no evriwan.
Elda Godoy: I no blong mitufala tu.
Sista Godoy: Mared laef i wan eksperiens blong stap lanem samting we wetem hop bae ol samting i kam moa gud taem yumi stap progres. Lav ia i bin stap long stat, be blong gohed evri dei, yu mas bildim wan step afta narawan. Yumi nid blong jenisim yumi folem wanwan long yumi, laf mo krae long ples mo longwe; ol pikinini bae oli tekem glad mo hed i soa i kam, sik bae i kasem yumi wanwan taem, mo mane bae i save sot samtaem. ?Be yufala save wanem? Laef hem i sud olsem nao.
Elda Godoy: Be i gat wan samting we i sua. Sapos yumi tekem gospel blong Jisas Kraes i kam long plan ia, mared laef bae i kam moa isi mo gat moa glad.
Sista Godoy: OK. Nambatu kwestin. ?Wanem bae i hapen long olgeta we oli no janis blong mared long laef ia? ?Yu gat eni toktok blong givim long olgeta?
Elda Godoy: Yes mi gat. Mi laekem kaonsel blong Presiden Hinckley we i go long ol sista we mi biliv se i go long evriwan. Bae yumi luk wanem we hem i talem:
Vidio: “Sam long yufala, sore tumas, bae yufala i neva mared long laef ia. Samtaem hemia nao i situesen blong sam. Sapos i hapen, no spenem laef blong yu blong stap harem nogud from. Wol i nidim yet ol talen blong yu. I nidim kontribusen blong yu. Jos i nidim fet blong yu. I nidim strong han blong yu blong help. Laef i no wan lus kasem taem yumi singaotem se i olsem. I gat plante we oli nidim ol han blong help blong yu, smael blong yu we i gat lav, kaen tingting blong yu. Mi luk plante woman we oli save mekem mo oli naes we oli nomo filim blong wantem mared. Mi no andastanem, be mi save se long plan blong Hem we I gat Olgeta Paoa, plan ia we i no save finis we yumi singaotem plan blong God blong stap glad, bae i gat janis mo riwod blong olgeta we oli lukaotem.”
Elda Godoy: Wan skripja we i tokbaot ol semmak promes i stap long Mosaea 2:41.
“Mo antap long samting ia, mi wantem se yufala i tingbaot gudfala mo hapi ples blong olgeta we oli obei ol komanmen blong God. From luk, Lod i blesem olgeta long evri samting, ol samting blong laef ia tugeta wetem blong spirit; mo sapos oli fetful kasem en, bae oli go insaed long heven, blong mekem se oli save stap wetem God long wan ples blong hapi we i neva gat en. O tingbaot, tingbaot se ol samting ia oli tru; from Lod God i bin talemaot ol samting ia.”
Blong talem i sot, mesej ia we, yusum ol toktok blong Elda Bednar, yu nidim nomo blong stap wan gudfala gel o wan gudfala boe, obei ol komanmen, mo Lod bae i mekem evri samting. Long en, evri blesing bae oli givim long olgeta we oli stap fetful.
Môni, ?yu gat eni las komen?
Sista Godoy: Yes. Mi laekem blong endem wetem testemoni blong mi.
Mi save se yumi ol pikinini boe mo gel blong wan Papa long Heven we i gat lav. Mi save se Jisas i Kraes mo Hem i stap laef. Mi save se laef ia i taem blong rere blong mitim God. Mi save se Hem i lidim yumi mo mekem rere rod. Yumi no stap yumiwan. Mi save se tempol i haos i blong Lod long wol. I gat wan ples we yumi save kasem save mo insperesen long laef blong yumi. Mi save yumi gat wan profet long dei blong yumi, mo hem i tijim mo lidim yumi.
Long nem blong Jisas Kraes, amen.
Elda Godoy: Tangkyu tumas. Mi laekem tumas blong stap tij wetem yufala. Mo mi lavem yu.
?Tufala Gilbert? ?Eni komen o eni tijing blong givim long naesfala pipol ia?