Ol Komen blong Elda mo Sista Gilbert
Divosen blong Ol Yang Adalt Raon long Wol
Sandei 5 Mei, 2024
Elda Clark G. Gilbert: Tangkyu Elda mo Sista Godoy. Eli long wik ia, mi talem long waef blong mi se tufala Godoy bae i ringim mitufala blong toktok blong smol ia. Mo hem i talem, “OK. ?Bae i gat hamas pipol long taem ia?” Mo mi talem, “O, bae i gat taosen pipol long Tabenakol, afta bae i gat ol handred blong ol taosen raon long wol. I no tumas ia.”
Hamas ol instraksen ia oli gat bigfala paoa long yufala tunaet. Elda mo Sista Godoy, tangkyu blong tijim gud ol yang adalt. Mitufala i tangkyu from plante janis we Christine mo mi i gat blong lanem tekpat wetem ol yang adalt raon long Jos. Blong lisin long tufala Godoy long naet ia i naes tumas. Taem yumi groap, yumi wantem blong kam olsem tufala Godoy. Hem i klia se tufala i filim ol nid mo ol wari blong ol yang adalt mo we tufala i lavem yufala tumas.
Wanem we mi laekem tumas hem i we Kraes i stamba long ol mesej blong tufala mo i folem ol tijing blong ol profet. Taem mi stap lisin long yutufala long naet ia, mi filim olsem mi stap harem ol semmak mesej we Presiden Nelson, Presiden Oaks, mo ol nara Aposol lida, oli bin givim long wan nara divosen blong ol yang adalt raon long wol. Bae yumi stop smoltaem mo luklukbak long stamba toktok we tufala Godoy i introdiusum long yufala long naet ia:
-
Stap Pat long Kraes mo Ol Kavenan blong yumi
-
Deiting
-
Stap Kasem Revelesen blong Yuwan
-
Ol Fasin blong givim Seves
-
Tempol
-
Ol Misin
-
-
Filing we i Stat blong Lavem Wan mo Mared
-
Hamas I Impoten blong Go long Institiut
Tufala Godoy i no bin serem wokbaot blong tufala nomo, be tufala i bin mekem long wan wei we i blong tufala nomo. Mi hop se bae yufala i luk hemia olsem wei we tufala i lavem mo wari from yufala. Tufala i bin serem mesej blong tufala tu long ol wei we i mekem ol kaonsel blong ol profet i kam moa strong long yumi mo i rimaenem yumi evriwan se yumi mekem hemia evri samting ia tru mo long Sevya blong yumi Jisas Kraes.
Sista Christine Gilbert: Wan long ol fevret pikja blong mi long naet ia hem i pikja blong yutufala olsem wan yang kapol. Mônica i luk olsem i fulap long hop, be Carlos !i luk olsem hem i fraet smol!
Naoia komperem wetem pikja blong ful famli blong tufala Godoy we i kam bigwan.
Mi askem miwan sapos yangfala Carlos mo Mônica i eva save pikjarem ol fiuja pikinini ia, ol niufala tambu, mo ol apu pikinini ia, long plante yia bifo. ?Tufala i bin save pikjarem graduesen long skul, wan wok, statem mo lukaotem wan famli, seves long Jos, stap laef raon long wol, mo naoia koling blong tufala olsem ol bigfala lida long Jos? Mifala i lavem Elda mo Sista Godoy. Mifala i luk tufala olsem ol fren mo eksampol blong wanem yu save mekem taem yu kipim ol kavenan, laef folem gospel, mo mekem Lod i pat evri taem long wokbaot blong yu. Mi stanap olsem wan witnes se taem yumi mekem Lod i pat blong laef blong yumi, bae Hem i givim instraksen long ol tingting blong hat blong yumi mo blesem ol hadwok blong yumi.
Elda Gilbert: Taem mi stap luklukbak long wokbaot blong tufala Godoy mo fasin blong tufala blong stap mekem Lod i pat blong laef blong tufala, i rimaenem mi long wan eksperiens blong miwan we mi bin gat wetem Elda Godoy sikis yia i pas.
Long taem ia, mi bin stap givim seves olsem Presiden blong BYU–Pathway Worldwide, mo Elda Godoy i bin Eria Presiden blong Saot Amerika Notwes Eria, we hedkwota blong hem i stap long Lima, Peru.
Peru i wan naesfala eria blong Jos wetem ova long 40 stek mo naoia i gat tu tempol. Yumi gat taosen blong ol BYU–Pathway studen long Peru. Long naet ia, we i olsem naet ia, mifala i askem Elda Godoy blong toktok long ol yang adalt abaot wokbaot blong olgeta long saed blong edukesen.
Elda Godoy i bin rere long wan toktok, be taem mitufala i sidaon long ples ia antap mo stap lukluk long evri studen ia, hem i filim se wanem we mifala i stap askem long olgeta blong mekem, i tumas. Hem i filim krae taem hem i tingbaot ol yang adalt ia we oli stap lanem Inglis, stap tekem ol lesen blong kolej, evriwan oli stap wok fultaem mo stap stadi long long wan nara lanwis. Wetem fulap filing, Elda Godoy i putum toktok blong hem we hem i rere long hem i stap, hem i stanap mo hem i talemaot: “Wanem we mifala i stap askem yufala blong mekem i had—speseli sapos yu stap traem blong mekem yuwan. Wei ia nomo blong yufala mekem hemia, i blong mekem Lod i pat blong wokbaot blong yu ia blong stap lan. Mekem Lod i kam patna blong yu mo evri gud samting bae i kam long yu long stret taem blong hem.”
Elda Godoy i bin save long taem ia, wanem we hem i no bin andastanem fulwan long evri yia ia we pas taem hem i wan yang adalt yet we i stap long Brasil we i stap werem ol longfala open leg traoses : wei ia nomo blong yufala blong kam wanem we yufala i nidim blong kam olsem, mo blong faenem glad long wokbaot ia, i blong mekem Lod i pat long laef blong yu. Tedei long naet, yumi i bin luk wan witnes blong prinsipol ia. Carlos mo Mônica Godoy oli eksampol we oli laef, abaot wanem we yumi save mekem taem yumi putum tras blong yumi long Lod mo mekem Lod i kam patna blong yumi.
Mifala i lavem kapol ia mo talem tangkyu from mesej blong tufala long yufala. Mi mo Christine i serem witnes blong mitufala se taem yu mekem Lod i pat long ol hadwok blong yu, bae Hem i mekem ol merikel oli hapen long laef blong yu. Mitufala i testifae olsem, long nem blong Jisas Kraes, amen.