Gat Fet long Fiuja
Divosen blong Ol Yang Adalt Raon long Wol
Sandei 5 Mei, 2024
Tangkyu tumas, Elda mo Sista Gilbert, long ol komen mo testemoni blong yutufala. Mi tingbaot tu eksperiens ia long Peru mo tu ol tijing blong yutufala mo hamas mifala i bin kasem blesing mo olgeta tu from ol tijing blong yutufala long ol dei ia.
Mi wantem endem ol komen blong mi wetem wan toktok: hop.
Mi biliv se hem i moa isi blong yumi ol olfala pipol blong luksave han blong Lod insaed long laef blong yumi, bitim long yufala, ol yangfala pipol. From se yumi bin laef plante moa yia mo yumi bin gat plante moa eksperiens long pas blong yumi, mo yumi save lukluk biaen mo luk han blong Papa long Heven we i lavem yumi, i stap lidim yumi mo protektem yumi truaot long laef blong yumi.
Naoia mi stap lukluk bak, mo mi luksave se long ol plante taem we mi bin ting se mi stap miwan, mi no bin stap miwan. Mi save luk naoia se taem sam doa i klos, mi bin stap tingting se ?from wanem?, mo mi stap komplen from, mo mi stap ting se ol prea blong mi oli no ansarem, be rili, wan nara doa long wan nara taem, o long wan nara ples, i stap open i go long wan rod we i moa gud. Be mi no bin save luksave long ol dei ia. Be mi save luk naoia, taem mi stap lukluk i gobak.
Long plante narafala taem, mi ting se mi nao mi stap mekem ol waes desisen miwan o wetem Mônica, stap bilivim se mi nao smat wan we mi stap bildimap wan gudfala fiuja blong mi. Mi save luk naoia we wan han we ae i no save luk, i stap biaen long ol samting ia mo i stap lidim mo protektem mi long ol mistek we i save hapen. Mi save luk se oltaem Hem i bin stap blong mi.
Hemia i from wanem mi save testifae se yumi gat wan Papa long heven we i save mo kea long yumi. Mi save testifae se yumi gat wan Sevya we i lavem yumi mo i rere blong helpem yumi long eni situesen blong laef blong yumi.
Samtaem, sam long yufala i stap tingting se nogat man i save wanem yu stap go tru long hem long laef blong yu, mo maet yu tru; yumi yumi no save. Be Sevya i save. Elda Bednar i tijim yumi se:
“I no gat soa long bodi, i no gat wari blong wol, i no gat safa blong spirit, i no gat wan samting we yumi no strong long hem we yumi bin gat eksperiens long hem, we Sevya i no bin eksperiensem fastaem. Long wan taem we yu mo mi i no strong, yumi save singaot mo talem: ‘I nogat man i save andastanem. I nogat wan i save.’ Maet i no gat wan man i save. Be, Pikinini blong God i save gud mo i andastanem, from se Hem i bin filim mo tekem ol trabol blong yumi fastaem long yumi. Mo from Hem i bin pem bigfala praes ia mo i tekem hevi harem nogud ia, Hem i save andastanem stret evriwan, mo i givim long yumi ol han blong sore blong hem long plante pat [blong laef blong yumi].”
Long Alma 7 yumi lanem olsem wanem mo from wanem Sevya i bin save givim kaen help ia.
“Mo bae hem i go aot, i harem nogud long ol soa blong bodi mo fulap hadtaem mo temtesen blong evri kaen; mo samting ia bae i mekem profesi i hapen we i talem se, boe ia bae i tekem long hem ol soa blong bodi mo ol sik blong ol pipol blong hem.”
From hemia, Sevya i no bin safa nomo from ol sin blong yumi, be tu, Hem i bin safa from ol samting we i no fea, soa, harem nogud, mo evri harem nogud long saed blong filing we bae yumi save go tru long hem long laef blong yumi.
Afta Alma i talem long en:
“Mo bae hem i tekem long hem ded, blong hem i save tekemaot ol rop blong ded we i fasem ol pipol blong hem; mo bae hem i tekem long hem ol samting blong olgeta we oli no strong, blong mekem se insaed blong hem i save kam fulap long sore, long saed blong bodi blong mit mo bun, mekem se hem i save, long saed blong bodi blong mit mo bun, olsem wanem blong helpem ol man blong hem long saed blong ol samting blong olgeta we oli no strong long olgeta.”
Mi gat wan testemoni blong miwan abaot help ia blong heven. Mi bin eksperiensem long yangfala taem blong mi, long mared blong mi, olsem wan papa, mo long laef blong mi olsem wan lida. Mi save se Ridima blong mi i laef mo tru long gladhat blong Hem mo ol blesing blong Atonmen blong Hem, yumi save gat hop mo glad long laef ia mo wan famli we i no save finis long nekis laef.
Mo mi testifae abaot hemia, wetem evri lav blong mi, long nem blong Jisas Kraes, amen.