O Lesona mai le Olaga o se Talavou Matua

Faigalotu i le Lalolagi Atoa mo Talavou Matutua

Elder Carlos A. Godoy ma Sister Mônica Godoy

Aso Sa, 5 Me, 2024

Faatomuaga

Elder Carlos A. Godoy: Faafetai mo lo outou i ai faatasi ma i matou i le asō i lenei nofoaga matagofie ma le talafaasolopito. E matagofie naua le faatasi ai ma outou i le asō. Faafetai mo le faatasi mai mai tulu’iga e fa o le lalolagi. Matou te fiafia lava e faatasi ma le autalavou matutua. E i ai sau matafaioi taua i le Ekalesia, ma ua e ola i se taimi taua i lou olaga. O au filifiliga i le asō o le a matuai aafia ai lou lumanai. Ia o le afiafi nei matou te faamoemoe e faaopoopo atu se mea aoga i savali maoae e tele ua uma ona maua i isi faigalotu.

Ua ou fiafia i a’u soa o Brother Chad Webb ma lona faletua o Kristi, ma Elder Clark Gilbert ma lona faletua o Christine. Faafetai mo le auai mai i le asō.

Ua ou fiafia foi i le faatasi ai ma a’u o Mônica i lenei faigalotu. O le a tatou faaaoga le aoao faalevaega, ma ou te faamoemoe o le a tou fiafia i ai.

O se vaega o le ma savali, o le a faasoa atu se vitio ata komi na faia e le Ekalesia o i ma’ua a’o talavou. Sa ma matutua ma Monica e pei o outou.

I lenei vitio, ma te faamoemoe e aoao atu nisi o mataupu faavae e mafai ona faatatau i lou olaga i le taimi nei. O le vitio e lima minute, o le a e vaai ai i ni taimi eseese o ma olaga. Faamolemole faalogo lelei ma taumafai e faailoa mai na mataupu faavae e te manatu e faatatau ia oe. Tatou te toe foi mai e talanoa i nisi o na mea. Ua lelei?

[vitio]

Ou te lei suea lava se talalelei po o se lotu. Sa 16 o’u tausaga, sa sau se uo a lo’u uso matua i lo’u fale e valaaulia o’u tuafafine laiti i se gaoioiga a le lotu ona sa manatu, o i maua ma lo’u uso sa le o ni tagata e fiafia i mea faalelotu. Ma ina ua matou taunuu i le lotu, sa latou faia se gaoioiga faigofie tele, ma sa latou matuā auai i lena tala ma le talie. Ma sa ou mafaufau, “Aisea ua latou fiafia ai?”

E lua aso mulimuli ane, na ou mauaina ai a’u lesona i le falesa ona sa le’i mananao tele lo’u aiga e fai a latou lesona. Sa ou fiafia i le talalelei. Sa ou iloa e moni, lea na ou manao ai e papatiso tusa pe lei i ai o’u matua. Sa faigata le taumafai ia faitaulia.

Sa leai ni au uo, ma mo sina taimi sa ou i ai iina i le pito i tua o le falesa—matamata, faalogologo, ma alu i le fale. E mafai na e faia lea mea mo sina taimi, ae a leai ni au uo, e tusa pe e te iloa e moni, e faigata lava, ae maise pe a o valaau mai au uo i fafo e te foi atu.

Sa ou alu i le lotu i se tasi Aso Sa, faapea toe tasi lava, ma sa latou faia ni talosaga. Sa ou fesili, “Le a lea mea?”

“O se konafesi a le autalavou,” sa latou fai mai ai. “E tatau ona e alu.”

Sa ou fai atu,“Ua lelei, Ou te fia faata’ita’ia.” Mulimuli ane i le konafesi, o nei talavou uma sa taaalo, pepese, ma sisiva, ma na faafuasei ona sau se leo i le sipika, “Tatou faia le tatalo amata.”

O na tagata pisapisao, sa faafuasei ona fifilemu. Ma mo a’u o le, “O le a? O le a le mea o loo tupu? E faapefea e nei talavou pisapisao ona vāvāo ae na vave foi ona fifilemu ona o se tatalo? Oka, e ese lava i latou. Ou te fia pei o i latou. Mo a’u, o le Alii lea ua toe aumai se feau, “Carlos, aua e te fiu. O lou nofoaga lenei.

I se tasi aso, sa ou savalivali solo, ae sa iliili e se teine lana foafoa nao ia iina. Ina ua ou vaai i lena teineitiiti, sa ou fai atu, “Oka!” Ma sa amata ona vave le tata o lo’u fatu. Ma sa ou fia talanoa ia te ia. Sa ese lona mo’i ma faauo. Sa amata ona talanoa mai ia a’u e pei o se tagata masani lava. Sa avea o ia ma a’u uo, la’u uo e toatasi. O ia, na mafai ai ona ou feiloai i isi uo.

Ina ua uma lea konafesi a le autalavou, sa ou filifili ai o le a ou faaauau pea. Sa me’i lo’u aiga i le isi itu o le nuu. Sa ou alu i le falesa sa latalata i lou aiga, mate mai la po o ai sa i ai iina—o Mônica! O lana uarota lena. Ina ua tuua le sauniga, sa sau se tuafafine ma fai mai ia a’u, E te auai i le Ekalesia?

Sa ou masani i lea fesili. Sa ou fai atu, “Ioe, pei lava; e mautinoa lava.”

Na fai mai o ia, “Oi, e tatau la ona e alu i le seminare.”

Sa ou mafaufau, e te iloa, o le mea ou te sau ai, o le seminare o le avea lea ma se faitaulaga, o se faifeau.

O lea na ou fai atu ai, “Oi e leai, e te iloa, ou te fia faaipoipo ma fai se fanau.”

Ae sa fai mai, “Leai, o le seminare e mo le autalavou, e te iloa; e aoao ai e uiga i le talalelei. E le toatele ni talavou i le matou uarota. E na o le toatolu, o le mea moni: o Adriana Weber, Carlos Arthur Lencini, ma Mônica Brandão.

Sa ou manatu, “Oi sole. Ou te le iloa po o le a lea mea, ae ou te fia i ai iina.”

Ma o taeao uma sa ou maua ai lena upu lelei a le Atua. O lena mea na aumaia ia te au le malamalama o ai au, le malosi e taumafai ai pea ma faaauau ai le faagasologa o lo’u liuaina.

Ona tofia lea o au o se soa o faiaoga o aiga i le peresitene o Alii Talavou. E ui e lei tele ni mea na ou iloa e uiga i le talalelei, ae sa ia tuu mai i taimi uma ni tofiga ou te aoao atu ai. Sa ia faatuatuaina a’u, e sili atu nai lo lo’u faatuatuaina o a’u lava i na aso.

Ma se mea manaia foi—o ia o le tamā o Mônica. Ma o lea la, o le tamaitai agelu o Mônica lea sa ou fai atu sa i ai iina e fesoasoani ia a’u—na avea mulimuli ane ma a’u avā. Ina ua uma ona ma auauna uma i misiona, sa ma faaipoipo i le malumalu, ma o lea ua avea nei o ia ma se tina o se fanau e toafa ma se tinamatua o fanau a fanau e toafitu. O loo avea pea o ia o se agelu i lo’u olaga.

A e vaavaai solo, ou te le masalomia o le a mafai foi ona e maua i latou e manaomia le fesoasoani a se agelu. O loo manaomia oe e le Alii. A e vaai ia te oe lava i se fā’ata, aua nei galo: o totonu o oe, o loo i ai se agaga aulelei o se atalii po o se afafine o le Tama Faalelagi, ma na uiga ma gafatia i totonu o oe.

[End video]

Elder Godoy: Ou te misia lena lauulu. Ua lelei. O le a tatou talanoaina nei nisi o na autu. Ma o le tuuatoatasi o le mea muamua lea.

E Le o Tuua Na o Oe!

Sister Mônica Godoy: O i, ou te talitonu o se taimi lelei tele e taofi ma talanoa ai i le mea na tupu. O Carlos, i lona talavou, sa lagona le tuuatoatasi ma loto vaivai.

Atonu sa lagona foi e nisi o outou le tuua toatasi ma le faagaloina, e pei ona tupu ii. E le faigofie le lagona e le o iloa mai i tatou, ma e tau leai so tatou taua. Mo i latou o i tulaga faapenei, faamolemole aua le lofituina outou i lea lagona. E le o tuua na o oe. Atonu e le o fesootai atu pe e le o talia oe e pei ona e manao i ai. O se mea faanoanoa lea. Ae manatua, e le o tuua na o oe aua o loo i ai lava le Faaola ma oe. Na te silafia oe, Na te silafia le mea o loo tupu i lou olaga, e alofa o Ia ia te oe, ma e aapa mai o Ia i soo se taimi e te manaomia ai. Faamolemole aua le fiu e taumafai ia e auai. O le a Ia auina mai agelu e fesoasoani ia te oe.

Elder Godoy: O se savali la ia i tatou uma o loo i talaane na lagona o le tuuatoatasi po o le faagaloina. E tatau ona avea i tatou ma na agelu. Faamolemole tilotilo solo ma vaai i tua atu o le li’o masan o au uo. O loo iina i latou, sa i ai iina, ae atonu e te le’i maitaua i latou. Ua e pisi tele i lou olaga, ma uo ma soa lelei, ua e le vaaia ai i latou o loo faamoemoe ia lagona le alofaina ma le taliaina. Ae o loo iina i latou e sue ni faauoga, ma faamoemoe ia auai. Atonu o loo pito i tua o le falesa po o tulimanu o ni potu. Atonu, latou te le ofua se ofutino paepae ma se fusiua po o se ofu lotu manaia. Ae o loo latou faia le mea sili ia talia lelei ai. Faamolemole tuu i ai se avanoa. Latou te manaomia lau ’ata’ata, lau lululima, ma lau faauo. O se upusii lea mai ia Peresitene Spencer W. Kimball e uiga i ai:

“E silafia i tatou e le Atua, ma na te leoleo ia te i tatou. Ae e masani lava, o se isi tagata na te taulima ai o tatou manaoga.”

Ua lelei. Tafaoga Faamasani. Tuputupu a’e i le alofa.

Tuputupu a’e i le Alofa

Sister Godoy: Ua lelei, o le isi manatu lelei lenei e talanoa i ai: o le taimi na e alofa ai ia te a’u.

Elder Godoy: Na ou iloa o le a e pikia le mea lea.

Sister Godoy: Oi ioe! Sa o se taimi matagofie, ma e i ai se lesona ii e faasoa atu. O nisi o outou o le a gaualofa atu ma faigofie ona iloa lau manamea o le olaga. O le, o se alofa i le uluai vaaiga.

Elder Godoy: Ou te iloa o le mea lena na tupu ia a’u. Vaai i o’u foliga.

Sister Godoy: Ae mo a’u sa ese.

Elder Godoy: Ou te iloa.

Sister Godoy: E le tatau na tatou manatu e maua a tatou soa e faavavau i le ala lea na faia e isi. Mo isi, o le a manino ma malosi. Mo isi, e mafai na alu ai le tele o le taimi, taumafaiga ma le onosai. O le a atili manino ao e finafinau pea i le mafutaga. Aua le vave fiu ona e te le’i maua muamua se lagona malosi. O aafiaga ua tatou aoao ai, o nisi o faaipoipoga maoae na amata i ni auala laiti, i ni nai tafaoga, ma evaga faamasani.

Elder Godoy: E sa’o Mônica. Mo ma’ua ia, sa faapena. Sa ootia le taele o lo’u loto i le taimi lava na ou vaai ai ia te ia. Mo a’u, sa pei sa ou vaai ai i se malamalama faaniutu. O ia, i le isi itu, na te le’i lagonaina se mea faapitoa i le taimi muamua. Sa alu ai ni nai masina o le galue malosi faatoa ona iloa ai o a’u o se filifiliga lelei. Sa avea muamua ma’ua o ni uo lelei, i le mavae ai o tele o tafaoga faamasani, sa iu loa ina ona iloa ua gaualofa o ia i lena alii talavou “aulelei”. Sili atu po le itiiti foi.

O lenei aafiaga ua aoao ai i tatou i se isi mataupu faavae: o le ala tatou te maua ai faaaliga. O le a se mea ua tatou aoao e uiga i la tatou matafaioi i le faagasologa o le mauaina o faaaliga.

Ou te fiafia i le aoaoga a Elder Bednar e uiga i le faaaliga. Sa ia faaaoga le faataitaiga o ni aafiaga se lua na tupu i le toatele o i tatou e uiga i le malamalama e aoao ai e uiga i ai.

Sa ia ta’ua le aafiaga pe a “tatou ulu atu i se potu pogisa ma ki le moli. … E vave faatumulia ai le potu e se malamalama susulu ma mou ese ai le pogisa lea. … O se malamalama e ki i se potu pogisa, e faapei o le mauaina vave, i le taimi lava lea o se feau atoa mai le Atua.” O le mea lena sa i ai ou lagona e uiga ia Monica.

O le isi aafiaga o le taimi na “ma vaaia ai le suia o le po i le taeao. … Pe a faatusatusa i le kiina o se moli i totonu o se potu pogisa, o le malamalama mai le la oso sa le’i oso faafuasei mai. [Ae], na faasolosolo malie lava ma le mautinoa le malosi ma le faateleina o le malamalama, ma … iu ai ina gaofa le la i luga ae o le tafailagi.

“O le faasolosolo o le faateleina o le malamalama e susulu mai le la oso ua pei o le mauaina o se savali mai le Atua o ‘lea fuaitau i luga o lea fuaitau, ma lea mataupu i luga o lea mataupu,’ (2 Nifae 28:30).” O le tulaga lena o Mônica i le iloaina o a’u le tagata sa’o mo ia. Sa umi teisi.

Na faaiu e Elder Bednar, “O le tele lava o taimi, e oo mai faaaliga i nai faaopoopoga laiti i le aluga o taimi, ma e tuuina mai e tusa ma o tatou manaoga, agavaa, ma tapenapenaga.”

Sister Godoy: E mafai na faapena foi le mauaina o le faamautinoaga faaleagaga e uiga i a tatou soa e faavavau. O le tele o taimi, o le a oo mai i faaopoopoga laiti a o tatou feiloai i tagata ma faaalu le taimi faatasi ma i latou.

Malosi Faaleagaga

Elder Godoy: Sei ou fai atu i le mea lea. Pei na e vaaia i le vitio, o le auai i le seminare sa o se filifiliga taua tele mo a’u. E ui o le mafuaaga muamua mo le auai sa o se teine lalelei ae le o lesona o le talalelei, ae sa aafia tele ai lo’u liua ma le malaga faaleagaga.

Ona o na inumaga o aoaoga o le talalelei i aso uma, sa mafai ai ona faamalosia la’u molimau ma tetee i faaosoosoga i o’u aso. Sa fesoasoani ou te malamalama ai, o a’u o se atalii o le Atua ma e i ai Sana fuafuaga mo a’u i lenei olaga.

Sister Godoy: E faatatau foi ia lava mataupu faavae i le inisitituti. Sa avea foi ma vaega o ma aso o tafaoga faamasani. Ou te faamoemoe o loo e faaaogaina lelei lenei punaoa maoae. O iina, e le gata ina e maua ai upumoni o le talalelei, ae faapea foi ma ni uo moni. Tagai i le saunoaga a Peresitene Nelson e uiga i le inisitituti.

Vitio: “O’u uso e ma tuafafine pele, ou te alofa ia te outou. Te mafaufau ma tatalo soo mo outou. Ua ese vaitausaga ua tou ola ai. O le taimi e te faia ai faaiuga taua— faaiuga e aafia ai lou olaga nei ma le ola faavavau. O le faia o nei faaiuga e ono lofituina pe taufaafefe i nisi taimi. E ese foi le manaia aua ua tatou ola i se vaitaimi taua.

“E mafai ona ou valaaulia oe e faia se mea e fesoasoani atili ai ia te oe? Auai i le inisitituti! Ua ou vaai nei i la’u fanau, a latou fanau, ma le toatele o fanau a latou fanau o o i le inisitituti. O le auai i le inisitituti ua suia ai le olaga mo i latou.

“Ua fesoasoani le inisitituti ia i latou, ma outou foi, e loloto ai lou liua ia Iesu Keriso. O le inisitituti e te lagona atili ai le alofa tele o le Tama Faalelagi mo oe. O le inisitituti e te maua ai faiaoga musuia, uo faamaoni, ma se lagona o oe o se tasi o i latou. O le a e iloa ai o le ola i le talalelei e tau i le fiafia e le gata. E fesoasoani le inisitituti e te ola ai i le talalelei ma maua atili le olioli—i le taimi nei.

A e fia iloa lou tagata moni, auai i le inisitituti.
A e fia iloa le faamoemoega o le olaga, auai i le inisitituti.
A e fia tumau i le ala o feagaiga, auai i le inisitituti.
A e fia faamuamua le Atua i lou olaga, auai i le inisitituti.
A fia avea oe ma se faatupu filemu, auai i le inisitituti.

“Ou te folafola atu nei faamanuiaga ma lo’u alofa mo outou, i le suafa paia o Iesu Keriso, amene.”

Elder Godoy: A o tatou i ai pea i lenei vaega o le malosi faaleagaga, sei ou talanoa atu i lou aafiaga o le faiaoga o aiga.

Pei na tou vaaia i le vitio, sa tofia a’u e auauna atu e ui e lei tele ni mea na ou iloa e ofo atu. O le auauna atu sa lagona ai lo’u faata’uaina. Sa saunia ai a’u e fesoasoani i isi ma, o se taunuuga, na faamalosia ai la’u lava molimau. O se tasi o auala sili e faaleleia ai le molimau a se tagata o le faasoa atu lea. Faamoemoe o loo e auai malosi i avanoa mo auaunaga. E pei o auaunaga, talafaasolopito o aiga, auaunaga i le malumalu, po o isi lava tofiga a le Ekalesia lea e te faagalo ai oe lava ae fesoasoani i isi. O le a faamanuiaina, faamalosia, ma puipuia ai oe.

Ou te fiafia i le mau i le Mataupu Faavae ma Feagaiga o loo faamamafa ai le mataupu faavae lenei.

“E moni Ou te fai atu, e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele.”

Oi, ma le isi, e pei ona ou fai atu i le vitio, sa ou fiafia tele i la’u soa o faiaoga o aiga, o lea na ou faaipoipo ai i lona afafine. Na fai o ia ma o’u tamā faaletulafono. O ia o le tamā o Monica. Ese lo’u toaga i o’u tofiga o faiaoga o aiga. O masina uma lava sa ou i ai iina i lona fale e faia le faiaoga o aiga.

Sister Godoy: O le tasi o faamanuiaga ua maua e lenei tupulaga lea ma te lei mauaina o le latalata o malumalu. O le malumalu e tasi i Pasila i aso o ma laiti sa i Sao Paulo, e mamao lava ma ma’ua. I le taimi lea, sa o ai talavou matutua i le malumalu pe a o i le misiona pe faaipoipo. O le mea e lelei ai, ua faamamafa mai e Peresitene Nelson le taua o le mauaina o ou faaeega paia e le faapea seiloga e alu i le misiona pe faaipoipo. E tele ina faatatau i sauniuniga ae le o se isi lava mea. Ou te faamoemoe o le a e mafaufau i ai.

O le auai soo i le maota o le Alii e aumai ai faamanuiaga. I le malumalu tatou te maua ai lesona e fesoasoani tatou te faatoilalo ai le lalolagi. Ou te fiafia i le saunoaga a Peresitene Nelson i le konafesi ua uma atu e uiga i le malumalu.

Vitio: “E leai se isi mea o le a sili atu ona fesoasoani ia te oe e pipiimau ai i le ai uamea nai lo le tapuai e le aunoa i le malumalu e pei ona faatagaina ai e ou tulaga. E leai se mea e sili atu ona puipuia oe a o e fetaia’i ma puao pogisa o le lalolagi. E leai se mea e faamausali ai lau molimau i le Alii o Iesu Keriso ma Lana Togiola pe fesoasoani e te malamalama atiliai i le fuafuaga ofoofogia a le Atua. E leai se mea o le a sili atu ona faamāfanafanaina ai lou agaga i taimi o tiga. E leai se isi mea o le a sili atuona tatalaina ai le lagi. Leai lava se mea!”

Elder Godoy: Faafetai lava, Peresitene Nelson, mo au aoaoga. Matou te alolofa tele ia te outou. Ua lelei, o le isi autu: auauna atu i se misiona.

Auauna Atu i se Misiona

Sister Godoy: Ia, ta talanoa e uiga i misiona. E ono masina talu na alu Carlos i lana misiona, ona ou alu foi lea.

Elder Godoy: O se mea faafuasei.

Sister Godoy: Sa le faafuasei. Sa ta mananao e auauna i le Alii, sa ta mamano foi i se lumanai faatasi. Sa ma vaaia a ma misiona o se auala lelei e faafiafia ai le Faaola, o le taimi lava foi lea e saunia ai i maua mo le olaga faaipoipoina. Sa ma iloa o le a aumaia ai faamanuiaga e manaomia tele i le lumanai o se ulugalii talavou.

Elder Godoy: E le masalomia lava o a ma misiona na aumaia ai faamanuiaga i o ma olaga. Ona o ma misiona, na faamalosia ai ma molimau o le Faaola, faateleina o ma malamalama o le talalelei, ma o tomai o le talanoa ma faaletaitai na aoaoina iina, sa fesoasoani i a ma’ua matātā. Ae sili atu i se isi lava mea, sa ma lagona le fiafia i le mafai ona faia ni misiona e pei ona faamoemoe ai le Alii ia i ma’ua.

Sister Godoy: E i ai la’u fesili mo oe. Ae faafefea i latou e le mafai ona o pe sa le’i uma misiona ona o pogai eseese? E mafai lava ona faamoemoe pea mo se lumanai manuia?

Elder Godoy: Ae a, e mafai! O le a i ai pea se Tama Faalelagi alofa iina mo i latou. E le tatau na tatou faamasino i latou e ese pe leai foi ni aafiaga o se misiona. Aua, e ui o le faia o se misiona e mafai ona avea o se aoaoga taua i o tatou olaga ma o se matafaioi faaleperisitua mo alii talavou, ae le o se sauniga o le talalelei, e le faasalaina se tasi i lo latou alualu i luma i lenei olaga pe le maua ai faamanuiaga i le faavavau ona o lea mea.

Sister Godoy: Ou te fiafia na ou maua le avanoa e auauna ai, ma ou te fautuaina atu mo tagata uma. Peitai pei ona tatou iloa, e talia fiafia tamaitai ma e matuai manaomia foi, ae o le auauna atu e tuu i le faitalia.

Elder Godoy: Ou te faafetai tele mo aafiaga o la’u misiona. Ou te talitonu na ou foi mai i lena lua tausaga ua saunia lelei mo le olaga. Ma se otiga o le ulu e sili atu ona lelei.

Sister Godoy: O le talanoa e uiga i le foi mai mai misiona, ae a pe a talanoa nei loa e uiga i le faaipoipoga?

Elder Godoy: Lelei. Ta talanoa loa i le autu.

Tausia o se Aiga

Sister Godoy: Ia o lea, e lua faifeautalai ua toe mai ma le alofa tele, fuafuaga e tele, ae leai ni tupe.

Elder Godoy: Ae a! Ou te manatua.

Sister Godoy: O le toe tepa i tua, ua ou iloa ai e ese le manaia o le amata o ta olaga faaipoipo e pei ona sa ta faia ma le ausia faatasi o ta sini faaleaoaoga, faalegaluega, ma faaletino. Sa ta faia faatasi, ma o na aafiaga ma luitau ua ta atili felata’i ai.

Elder Godoy: Ou te manatua ma ou te ioe i ai. O na tausaga o le atinaega o ta olaga ma le ausia o ta sini na avea ma manatuaga faapelepele mo i ta’ua. E le faapea e sese le amata o se olaga faaipoipoina ua mautu faaletupe. Ma te mananao e faasoa atu se savali ia outou o loo faatalitali seia tou maua mea uma tou te manaomia ona faaauau ai lea o tou mafutaga. E te manaomia mea faavae, o le tasi ma le isi, ma le Alii i lou itu—o isi mea uma e mafai ona lua ausia faatasi, lea o le a faamalosia ai le lua faaipoipoga. Ma o loo ou sailia ni nai mea iinei i le aofia.

Sister Godoy: O le suia o le ata ae le o le suia o le mataupu—o se isi manatu faaalia e uiga i le olaga faaipoipoina: a outou, le autalavou matutua, vaai mai ia i matou, o ulugalii ma aiga ua mautu, atonu tou te manatu sa faapena i taimi uma lava, e foliga lelei mea uma i taimi uma, ma sa faigofie le olaga mo i matou. Atonu sa faapena mo nisi, ae mo le toatele e le faapena.

Elder Godoy: Sa le faapena mo i ma’ua.

Sister Godoy: O le olaga faaipoipoina o se aafiaga e aoao ai, e faamoemoe e faaleleia a o tatou agai i luma. O le alofa na i ai mai le amataga, ma faifaiga lelei i aso uma, e fausia i lea laasaga ma lea laasaga. E manaomia ona fetuunai i le tasi ma le isi, ‘ata ma tagi ii ma o; o tamaiti o le a aumia le olioli ma le faatigaulu, o le a oo mai ma’i i lea taimi ma lea taimi, ma o nisi taimi e utiuti ai le seleni. Ae tou te iloa? O le ala lea sa tatau ona i ai le olaga.

Elder Godoy: Ae tasi le mea mautinoa. Afai tatou te tuu i ai le talalelei a Iesu Keriso i le mataupu, o le a sili atu ona faigofie ma olioli le olaga faaipoipoina.

Sister Godoy: Ia, o le fesili lona lua la. Ae a i latou o le a le maua le avanoa e faaipoipo ai i lenei olaga? E i ai sau upu mo i latou?

Elder Godoy: Ioe. Ou te fiafia i le fautuaga a Peresitene Hinckley i tuafafine ou te talitonu e mafai ona faatatauina mo tagata uma. Se’i o tatou vaai i lana saunoaga:

Vitio: “O le mea e faanoanoa ai, o nisi o outou o le a le faaipoipo lava i lenei olaga. O le tulaga lena e i ai i nisi o taimi. A tupu lena mea, aua le faaalua lou olaga e faavauvau ai. E manaomia pea e le lalolagi au taleni. E manaomia lou saofaga. E manaomia e le Ekalesia lou faatuatua. E manaomia lou lima malosi, ma fesoasoani. O le olaga e le o se toilalo seiloga tatou te faaigoaina ai. E toatele i latou e manaomia ou lima fesoasoani, lou ’ata’ata alofa, lou magafagafa agavaivai. Ua ou vaaia le toatele o tamaitai atamamai, aulelei, ma lelei ua laaloa e faauoga faamemelo. Ou te le malamalama i ai, ae ou te iloa i le fuafuaga a le Silisili Ese, le fuafuaga e faavavau lea tatou te taua o le fuafuaga o le fiafia a le Atua, o le a i ai le avanoa ma le taui mo i latou o e sailia.”

Elder Godoy: O se mau o loo ta’ua ai ia lava folafolaga o loo maua i le Mosaea 2:41.

“Ma e lē gata i lea, ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata. E, ia manatua, ia manatua lava ua moni nei mea; ona ua fetalai mai ai le Alii le Atua.”

I le aotelega, o le savali o le, i le faaaogaina ai o upu a Elder Bednar, tau lava o lou avea o se teine po o se tama lelei, tausi poloaiga, ma o le a taulima e le Alii ia mea uma. I le iuga, o le a tuuina atu ai faamanuiaga uma ia i latou e faamaoni.

Moni, e i ai sau tala faaiu?

Sister Godoy: Ioe. Ou te fia faaiu i la’u molimau.

Ou te iloa o i tatou o atalii ma afafine o se Tama Faalelagi alofa. Ou te iloa o Iesu o le Keriso ma o loo soifua o Ia. Ou te iloa o le olaga lenei o se taimi lea e saunia ai e fetaiai ma le Atua. Ou te iloa Na te taitaia i tatou ma saunia le ala. E le o tuua na o i tatou. Ou te iloa o le malumalu o le maota o le Alii i le lalolagi. O loo i ai se nofoaga lea e mafai ona tatou aoao uma ai e ola faatasi. Ou te iloa e i ai so tatou perofeta i o tatou aso, ma e aoaoina i tatou e ia ma taialaina i tatou.

I le suafa o Iesu Keriso, amene.

Elder Godoy: Faafetai lava. E ese lo’u fiafia ta te aoao atu faatasi. Ma ou te alofa ia te outou.

Ae faapefea le au Gilbert? E i ai ni manatu faaaliga po o ni aoaoga i lenei aofia matagofie?