Faatuatua i le Lumanai
Faigalotu i le Lalolagi Atoa mo Talavou Matutua
Me 5, 2024
Faafetai, Elder ma Sister Gilbert, mo a oulua manatua faaalia ma molimau. Ma ou te manatua lena aafiaga in Peru ma faapea foi ma au aoaoga ma le faamanuiaina o i ma’ua ma sa mo a oulua aoaoga i na aso.
Ou te fia faaiuina o’u manatu i se upu se tasi: faamoemoe.
Ou te talitonu e faigofie atu mo i tatou o tagata matutua ona iloa le aao o le Alii i o tatou olaga nai lo outou tagata talavou. Talu ai ua tele atu tausaga o tatou ola ai ma ua tele atu isi aafiaga ua tatou maua i o tatou taimi ua tuanai, ua mafai ai ona tatou vaai i tua ma vaaia aao o se Tama Faalelagi alofa o taialaina ma puipuia i tatou i o tatou olaga atoa.
O le toe tepa i tua i le taimi nei, ua ou iloa ai i le tele o taimi sa ou manatu ai ua tuua na o a’u, ae e leai. Ua mafai nei ona ou iloa ina ua tapunia nisi o faitotoa ma sa ou mafaufau pe aisea ma faitio ai, ina ua ou manatu e le’i taliina a’u tatalo, o le mea moni, o se isi faitotoa i se isi taimi po o se isi nofoaga sa tatalaina i se ala e sili atu ona lelei. Ae sa le mafai ona ou vaai i ai i na aso. Ae ua mafai nei ona ou vaai i ai, i le toe tepa ai i tua.
I tele o taimi, sa ou mafaufau ai o a’u lea sa faia na o a’u faaiuga atamai ae pe mo Monica, i le talitonu o a’u o le tagata atamai i le fausiaina o lo’u lumanai manaia. Ua mafai nei ona ou vaaia se lima e le vaaia i tua atu o le vaaiga o taialaina ma puipuia a’u mai mea sese e ono tulai mai. Ua mafai ona ou iloa sa i ai pea o Ia iina mo a’u.
O le mafuaaga lena e mafai ai ona ou molimau atu e i ai so tatou Tama oi le Lagi o lē e silafia i tatou ma e popole mo i tatou. E mafai ona ou molimau atu e i ai so tatou Faaola e alofa ia i tatou ma ua saunia e fesoasoani ia i tatou i soo se tulaga o o tatou olaga.
O nisi taimi, atonu e manatu nisi o outou e leai se tasi o iloaina mea o outou feagai ai i o outou olaga, ma atonu tou te sa’o; matou te le iloa. Ae o loo silafia e le Faaola. Na aoaoina i tatou e Elder Bednar:
“E leai se tiga faaletino, leai se ita o le loto, leai se puapuaga o le agaga, leai se ma’i po o le vaivai e te oo i ai pe ou te oo i ai i la tatou malaga i le olaga faitino e le’i oo muamua i ai le Faaola. I se taimi o le vaivai tatou te ono tagi atu ai, ‘E leai se tasi na te iloaina pe faape’i. E leai se tasi e malamalama i ai. E leai se tasi e iloa.’ Atonu e leai se tagata soifua na te iloa. Peitai o le Alo o le Atua na te silafia ma malamalama lelei lava, aua sa Ia lagonaina ma tauave a tatou avega ona faatoa tatou oo lea i ai. Ma ona ua Ia totogiina le tau faaiu ma tauaveina lena avega, ua ia te Ia le tiga-alofa atoatoa ma e mafai ona ia faaloaloa mai Lona aao o le alofa mutimutivale ia i tatou i le tele o vaega o lo tatou [olaga].”
I le Alema e 7 tatou te iloa ai le ala ma le pogai e mafai ai e le Faaola ona tuuina mai lenei ituaiga fesoasoani.
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata.”
O lea, sa mafatia ai le Faaola e le na o a tatou amioletonu, ae sa mafatia foi o Ia mo le lē tonu, tiga, o le ita, ma mafatiaga uma faalelagona e mafai ona tatou oo i ai i o tatou olaga.
Ona faaiuina mai lea e Alema:
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.”
E i ai sau molimau patino o lenei fesoasoani faalelagi. Sa ou oo i ai i lo’u talavou, la’u faaipoipoga, lo’u tulaga faamatua, ma lo’u olaga faaletaitai. Ou te iloa o loo soifua lo’u Togiola ma e ala i Lona alofa tunoa ma faamanuiaga o Lana Togiola, e mafai ai ona tatou maua le faamoemoe ma le olioli i lenei olaga ma se aiga e faavavau i le isi [olaga].
Ma ou te molimau atu ai i nei mea, ma lo’u alofa atoa, i le suafa o Iesu Keriso, amene.