Finagalo Faaalia o Elder ma Sister Gilbert

Faigalotu i le Lalolagi Atoa mo Talavou Matutua

Elder Clark G. Gilbert ma Sister Christine Gilbert

Me 5, 2024

Elder Clark G. Gilbert: Faafetai lava, Elder ma Sister Godoy. I le amataga o lenei vaiaso sa ou ta’u atu ai i lo’u toalua o le a valaau mai le au Godoys ia i ma’ua e talanoa mo sina minute. Ma sa ia fai mai, “Ia, e toafia tagata o le a i ai iina?” Ma sa ou fai atu, “Oi, o ni nai afe tagata i le Tapeneko, ma le faitau selau afe i le lalolagi atoa. Leai se mamafa.”

E ese le malosi o le aoaoina o outou i le po nei. Elder ma Sister Godoy, faafetai mo le aoaoina lelei o talavou matutua. Matou te faafetai mo le tele o avanoa ua ma maua ma Christine e aoao ma fegalegaleai ai ma talavou matutua i le Ekalesia atoa. O le faalogologo i le au Godoys i lenei afiafi sa matuai matagofie lava. A tatou matutua, tatou te mananao e pei o le au Godoys. E manino lava la te lagonaina manaoga ma popolega o talavou matutua ma e la te alolofa tele ia te outou.

E ofoofogia ia te au le totonugalemu ia Keriso o a la savali ma e faavae faaperofeta. A o ou faalogologo atu ia te oulua i lenei afiafi, e pei o se i’uleo faaperofeta o savali tonu lava ia na tuuina atu i isi faigalotu a talavou matutua mai ia Peresitene Nelson, Peresitene Oaks, ma isi taitai faaaposetolo. Sei o tatou tu mo sina taimi ma tomanatu i autu na faailoa atu e le au Godoys ia te outou i le po nei:

1. Avea ma ni ō Keriso ma a tatou Feagaiga

2. Tafaoga Faamasani

3. Mauaina o Faaaliga Patino

4. Mamanu o le Auauna Atu

   • O Le Malumalu

   • O Misiona

5. Uluitino le Alofa ma Faaipoipoga

6. O Le Taua o le Auai i le Inisitituti

E le gata ina sa faasoa mai e le au Godoys la la’ua faigamalaga, ae na la faia i se ala patino ma le māfana. Ou te faamoemoe o le a e vaai i ai o se faailoaga o lo la’ua alofa ma le popole mo oe. Sa la faasoa mai le la savali i ni ala e faalolotoina ai le fautuaga faaperofeta ma faamanatu mai ai tatou te faia lenei mea uma i, ma ala i lo tatou Faaola o Iesu Keriso.

Sister Christine Gilbert: O se tasi o ata e sili ia te au mai lenei afiafi o le ata o le au Godoys o se ulugalii talavou. E matua’i foliga talitonu lava Mônica, ae fai si po’epo’e o Carlos!

Faatusa la le ata lena i le ata o le aiga atoa o le au Godoys.

Pe na mafaufauina e Carlos and Mônica talavou ia na fanau i le lumanai, fanau fou faaletulafono, ma fanau a fanau i na tausaga uma. Pe na la mafaufauina a’oga faaiunivesite, se matata, amata ma tausi se aiga, auaunaga i le Ekalesia, soifua i le salafa o le lalolagi, ma lo la valaauga i le taimi nei o ni taitai iloga i le Ekalesia? Ma te alolofa ia Elder ma Sister Godoy. Ma te vaai atu ia i la’ua o ni uo ma faataitaiga o mea e mafai ona outou faia pe a tou tausia feagaiga, ola i le talalelei, ma faaaofia ai le Alii i a outou malaga. O a’u o se molimau faapea a tatou faaaofia ai le Alii, Na Te aoao tatou manao ma faalautele a tatou taumafaiga sili.

Elder Gilbert: O le tomanatu ai i le malaga a le au Godoy ma le la mamanu o le faaaofia ai o le Alii ua ou manatua ai so ma aafiaga patino ma Elder Godoy i le ono tausaga talu ai.

O le taimi lena o o’u auauna atu o se peresitene i le BYU-Pathway Worldwide, a o Elder Godoy sa avea i le taimi lena ma Peresitene Eria o Amerika i Saute Matusisifo, o le laumua e i Lima, Peru.

O Peru o se eria ofoofogia o le Ekalesia e silia ma le 40 siteki ma ua lua nei malumalu. E faitau afe tamaiti aoga o le BYU-Pathway i Peru. O le po lena, pei foi o le po nei, na valaaulia ai Elder Godoy e talanoa i le autalavou matutua e uiga i la latou malaga faaleaoaoga.

Sa saunia le lauga a Elder Godoy, ae a o ma saofafai ai iina i luga o le tulaga ma vaavaai atu i tamaiti aoga uma, sa lofituina o ia i le mea o le a talosagaina ai i latou e fai. Sa maligi ona loimata a o mafaufau i nei talavou matutua o aoaoina le faaPeretania, ave kosi i le kolisi, i le taimi atoa a o faigaluega uma foi ma suesue i se gagana lona lua. O le lofituina ai i le lotomomomo, sa tuuese e Elder Godoy lana lauga na tapena, tu i luga, ma tautino atu ma le lototoa: “O le mea matou te talosagaina outou e fai e faigata—aemaise pe a faia na o outou. Na pau le ala e mafai ona e faia ai lenei mea o le faaaofia o le Alii ia outou aoaoga. Fai le Alii ma au paga, ona oo mai lea o mea lelei uma ia te oe i le taimi tatau ai.”

Na silafia e Elder Godoy i lena taimi le mea atonu na te lei malamalama atoa i ai i na tausaga uma a o talavou matua ma nofo ai i Pasila ma ofuina ofuvae e felea vae: na pau le ala e te avea ai ma tagata e moomia ona e avea ai, ma maua le olioli i le malaga o le faaaofia ai o le Alii. I le po nei, ua outou vaai ai i se molimau o lena mataupu faavae. O Carlos ma Mônica Godoy o faataitaiga ola o mea e mafai e i tatou uma ona faia pe a tatou tuu lo tatou faatuatuaga i le Alii ma fai o Ia ma a tatou paaga.

Ma te alolofa i lenei ulugalii, ma fautuaina atu la la’ua feau mo outou. Ma te faasoa atu ma Christine la ma molimau a e faaaofia ai le Alii i au taumafaiga, o le a Ia faia vavega i lou olaga. Ma te fai atu ai nei mea uma i le suafa o Iesu Keriso, amene.