Siganisucu e Mali
E vakaitikotiko mai Texas, Amerika, o vunivola.
Sa waraka dredre o Judith me marautaka na sucui Jisu ena nona tabana.
“Domo ni agilosi, serelaka tiko mai” (Sere ni Lotu, naba 118).
Oqo na Siganisucu. A vagugu o Judith ena nona taubale yani ki valenilotu. Eratou lako tiko vakaveitacini ki na nodratou soqo ni marau ni Siganisucu ni tabana.
A matadredredre o Esther, na tacina. “Sai koya beka oqori na ‘Domo ni Agilosi, serelaka tiko mai?’”
“Io! Qori noqu sere taleitaki. Au nuitaka ni da lagata nikua.” A vakasukadredre o Judith.
“Au taleitaka na sere oya!” A vakuria o Désiré, na ganena. A lagata vakadomolevu, “Ma-a-a-rau!”
Eratou dredre kece. E sega ni rawa ni wawa o Judith me marau vata kei na nodratou tabana. E sega ni vuqa na tamata e Mali era dau marautaka na Siganisucu. Ena yasai Aferika oqo, e vuqa na tamata era sega tu ni kila e levu na ka me baleti Jisu. Vei ira, na Siganisucu e dua ga na siga walega.
E sinai tu na gaunisala mai vei ira na tamata. Era volitaka na meleni drokadroka siyawa na dauvolivolitaki. O ira na cauravou kei na qase era kauta tiko na tavaya wai e uludra. A tuya e dua na cauravou lailai e dua na asa ka dreta voli e dua na kareti. A dagava cake o Judith na tawa qiqo ni dua na valenilotu ni musulomani. Oqo e dua na vale totoka ka ra sokalou kina e vuqa na musolomani era vakaitikotiko voleka.
Eratou dau lako o Judith, Esther, kei Désiré ki na lotu nei Papa. Ia ena vulaikatakata sa oti, era sa curu ki Na Lotu i Jisu Karisito ni Yalododonu Edaidai. Oqo eratou sa dau taubale vata mai ki lotu e veimacawa na lewe tolu oqo. E dau taleitaka o Judith me vulica na veika baleti Jisu ena Lalai.
Eratou sa mani yaco yani ki na soqo ni marau. E vuqa na matavuvale ena tabana era sa tiko rawa e kea. E dua na misini a vakaraitaka tiko na vidio ni Siganisucu ena lalaga ni valenilotu. A raici Josefa o Judith ni kauti Meri voli ena dua na asa mai Peceliema. Na gaunisala osooso, kuvu e vakananumi Mali vua!
Ni sa cava na vidio, a kele mai e dua na tekisi. A sobu mai o Sister Valerie, na peresitedi ni iSoqosoqo ni Veivukei.
“Au sa kauta mai na kakana!” a kaci mai.
O ira kece era veivuke ni kauta mai na iyaya ni kana ki na varada. O ya e dua na magiti levu! Pateta salad, kareti, bini drokadroka, raisi dromodromo, toa tavuteke, totoka dina!
“Vinaka vakalevu, Sister Valerie!” A kaya o Judith.
Oti era qai taura yadua na gonelalai na polo, matakau, se motoka ni vakatatalo. E sega ni veirauti na iloloma me dua na nei Judith, ia e sega ni kauwaitaka o koya. E taleitaka me raici ira na gone lalai ni ra matadredredre.
Sa mai tini na soqo ena lagasere. A matadredredre o Judith ni ra lagata “Domo niAgilosi.”
Era a lagasere vata na lewe taucoko ni tabana. A dua na ka totoka! A sucu dina o Jisu ena vica na yabaki sa oti oya! A vakavinavinaka vakalevu o Judith ni ratou kila na veika e baleti Koya, o koya, Désiré, kei Esther. Ka sa marau vakalevu o koya ni marautaka na Nona sucu.
Esther, Judith, kei Desire ena muailiu ni nodrau valenilotu.
Droini mai vei Steph Marshall