Kune Vakacegu
“Yalovinaka vukei au me‘u kakua ni galili.”
A tovolea o Molly me kakua ni tagi ni sa vakamoce vei tuakana, o Macy. “Au lomani iko!” A kaya o Molly. A mokoti Macy vakaukauwa o koya.
“Au na raici iko tale ena vica na vula mai oqo,” a kaya o Macy. Sa biu vale o Macy me sa gole ki na koronivuli torocake. E dua vei rau na ganei Molly e sa tiko rawa ena koronivuli torocake. Na ganena kadua e kaulotu tu. Ena calati iratou sara vakalevu o Molly!
A boboka na ligai Molly o Na. E ratou vakaraici Macy ni sa draiva yani. “Tou na calati koya,” a kaya o Na. A tonawanawa tu na matana.
A lesu ki loma ni vale o Molly. A gole ki na rumu ni moce lala i Macy ka sogota na katuba. Sa qai dabe o koya ena idavodavo i Macy ka tekivu tagi.
E dua e a tukituki ena katuba. A curu mai iloma o Na kei Ta. Rau a mokoti Molly. Ratou a dabe vata kece ena idavodavo i Macy me yacova ni sa mamaca na wai ni matai Molly.
“Au kila ni ko sa rarawa ena lako i Macy,” a kaya o Ta. “Vakacava me dua mada na nodatou masu vakamatavuvale? Sa rawa ni datou kerea vua na Tamada Vakalomalagi me vakacegui kedatou. Ke rawa ni o masu, Molly?”
“Sa donu.” Sa cuvara na uluna o Molly. “Tamai Keimami Vakalomalagi, keitou sa vakavinavinakataki Kemuni ena vukui keitou kece vakamatavuvale—me baleti Will, Parker, Macy, o au, kei Na kei Ta. Keitou sa vakavinavinakataki Kemuni ni rawa me keitou dua na matavuvale tawamudu. Yalovinaka ni vukei keitou me keitou yalo vakacegu. Ka vukei au me‘u kakua ni loma galili.”
E calata o Molly na veitalanoa kei Macy ena gauna ni moce. Ia sa kila o koya ni sa rogoca na Tamada Vakalomalagi na nona masu. Sa kila tu ni na veivuke o Koya me yalo vinaka kina.
Ena mataka ka tarava, sa vakanomodi sara na vale i Molly! Sa calata o koya na veidredrevaki kei Macy ni rau vakavakarau me rau gole ki koronivuli. Sa calata o koya na nodrau katalau vata kei na veitalanoa. Ena so na gauna e dau tukuna vua o Macy na ka e sa vulica tiko ena semineri. E dau yalovakacegu o Molly ni rau veitalanoataka na kosipeli.
Sa ikoya saraga o ya! A votu mai vei Molly e dua na vakasama.
Sa vakavakarau o Molly me gole ki koronivuli. A qai kunei Na.
“Yadra, daulomani.” A mokoti koya o Na. “O sa vakarau mo gole ki koronivuli?”
“Rawa ni daru wilika vata e dua na vosa ni koniferedi ni bera ni‘u biubiu?” A taroga o Molly. “Au kila ni na vukei au me‘u yalo vinaka.”
A matadredre o Na. “Sa dua na vakasama cecere oqori.”
Rau a veivukevuke ena wiliki ni dua na vosa ni koniferedi raraba me baleta na vakacegu. E dau taleitaka o Molly na vakayagataki gauna vata kei Na. Dau vakavu yalo vinaka na wiliwili vata kei koya.
Ni sa oti oya, a matadredredre o Molly. “Me daru na cakava tale qo!”
E sa calati Macy, Will, kei Parker tikoga o koya. Ia e sa mai galili tu ga vakalailai. Sa saumi mai na nona masu! Sa rawa ni vakayagataki gauna o koya kei tinana kei tamana. Ka sa rawa ni vukei koya na nodra vosa na parofita me kune vakacegu kina.
Droini mai vei Liz Brizzi