Na Veiwali Ca ni Basikeli
E rau kaya na nona itokani ni na lasa. Ia e a sega ni rairai dodonu.
A vodoka yani na nona basikeli o Sam ena kena totolo duadua e rawata ki na delana. A kala ki liu o koya. E tasiri ga na cagi e uluna. A qaqi tikivi koya toka na nona itokani o Liam.
“Sa oca mai?” A kaya o Liam.
“Sega sara!” A kaya o Sam.
Na nodrau itokani o Eric a sa tiko rawa ena rara ena ulu ni delana.
“Komm schon! Kusa mai!” a kailavaka o koya.
E rau a yacova yani na ulu ni delana o Sam kei Liam. Ratou a vakelea na gonetagane na nodratou basikeli ka dabe ena ruku ni dua na vunikau.
A tomika o Liam e dua na vatu ka kolotaka yani. “Au sa vucesa.” E sega ni levu tu na vanua ni gade ena nodratou koro lailai e Switzerland.
“O au talega,” a kaya o Eric. A kaliraka o koya na qele ena dua na kau.
“E rawa ni datou vodo basikeli tikoga,” a kaya o Sam.
A vakarubuya na matana o Liam. “Oqori na ka e datou sa dau cakava tu ga.”
“Tou cakava mada e dua na ka lasa!” A kaya o Eric. A duri o koya ka gole yani ki na itutu ni basikeli, ka kele tu kina e vuqa na basikeli. A muri koya o Sam kei Liam.
A vakila o Sam na tadre ni ketena. Ena so na gauna na ka e rau nanuma o Eric kei Liam ni lasa e sega ni dau lasa vua. Dau taleitaka o Eric kei Liam me rau vakalialiai ira tale eso na gone ka rau dau cavuta na vosa viavialevu ena kalasi. Ia sa na rairai duatani beka ena gauna oqo.
Me kena ikuri, e sega ni levu tu na gonetagane ena kalasi nei Sam. Kevaka e sega ni veitokani vata kei Eric kei Liam, o cei tale ena veitokani vata kaya?
“Tou kauta tani taucoko na isogo lailai ni taya,” a vakasolokakanataka o Eric. “E rawa ni tou vunitaka e yasa ni vunikau.” A tekiduru o koya ena yasa ni dua na basikeli caliva damudamu ka wirica tani na isogo palasitika lailai ni dua vei rau na taya.
A dredre o Liam. “Io! Oqori ena lasa saraga.”
A cegulevu saraga o Sam. Sega. Na gauna oqo e sega ni duatani. “Au sega ni kila,” a kaya o koya. “Me tou sa lako mada ga.”
A drigita na ligai Sam o Eric. “Seti, lako mai!” a kaya o koya. “E sega ni dua mada ga e rai tiko mai.”
“Era tiki ni yaya lalai ga,” a kaya o Liam. “E sega ni dua ena siqema ni ra sa yali.”
A saga o Sam me guilecava na lomalomaca ni ketena. Na kedra kau tani ni isogo ni taya ena sega ni vakacacana na basikeli. A vakatetaba o koya ka deguvacu yani.
Ratou a kusarawa na gonetagane ka luvata tani na isogo kece ni taya ni basikeli ka ratou cici lesu tale ki na vunikau. Ratou a vunitaka kece na isogo ena ruku ni dua na vatu ka dabe sobu me ratou vakaraica toka yani na basikeli. A dredre kubukubu voli o Liam kei Eric.
Vakalailai ga sa lako mai e dua na turaga, tadolava na nona basikeli, ka vodoka yani.
“Raica? E sega mada ga ni siqema o koya,” a kaya o Liam.
Ia au a siqema, a vakananuma o Sam.
Ena vo ni siga oya, a sega ni guilecava rawa o Sam na veisogo ni taya oya. A diva tu o koya me soli ira lesu tale, ia e sega tu na sala me na kunei ira kina na itaukei ni basikeli. A tekiduru o koya ka tukuna ki vua na Tamada Vakalomalagi.
“Au sa lomabibi,” a kaya o Sam. “Au diva me‘u a sega ni cakava. Yalovinaka ni vosoti au, Tamaqu Vakalomalagi.”
Ena siga ka tarava, a vodo basikeli tale yani o Sam kei rau na nona itokani ki na rara.
Vakadua tale, a kaya o Eric, “Tou kauta tani na isogo ni taya!”
Vakadua tale, a vakadonuya o Liam.
A nanuma tu o Sam na nona masu. Ia ena gauna oqo, sa yaloqaqa cake vakalailai o koya.
“Au nanuma me tou kakua ni kitaka vakakina,” a kaya o koya.
“Baleta na cava?” A kaya o Liam, ena mataruburubu. “E sega ni dua mada ga a siqema e nanoa.”
“Au na sega ni vinakata e dua me vakasaga na noqu basikeli,” a kaya o Sam. Ni bera ni sauma e dua vei rau na gonetagane, sa vodoka o koya na nona basikeli. “Tou veitau ki na valenibulimadrai!” e kailavaka o koya. A qai tekivu qaqi yani o koya ena kena totolo duadua e rawata.
A rau a taura talega o Eric kei Liam na nodrau basikeli.
“Sega ni dodonu! A tekivu e liu o iko,“ a kacivaka o Liam.
A matadredredre o Sam ni rau veitau muri koya yani na nona itokani. A vakasolokakanataka o koya e dua na vakavinavinaka ki vua na Tamada Vakalomalagi. A mai lomavinaka sara yani o koya.
Droini mai vei Shane Clester