Na Veivuke kei na Yalo Tabu
Sa rawa ni o vakila na Yalo Tabu ni sa bera mada ga ni o papitaiso.
A lako vata kei tamana o Mateo ki na nodratou itutu ni volitaki vuanikau vakamatavuvale. A muri rau na koli nei Mateo, o Zeus.
“O sa tarogi bisopi beka me baleta na noqu papitaiso?” A taroga o Mateo. Sa yabaki walu oti o koya, ia e sa sega ni se papitaiso ena vuku ni matedewa.
“Sa kaya o koya ni ko na sega ni rawa ni papitaiso ena vula oqo,” a kaya o Ta. “De na rairai vula mai oqo.”
“Sa donu.” A mataruburubu o Mateo. Sa via papitaiso dina tu o koya ka me ciqoma na isolisoli ni Yalo Tabu. Ia e vaka me na sega ni yaco vakakina!
A dolava o Ta na itutu ni volivolitaki. A veivuke o Mateo ena kedra kau yani na kato ni moli, moli karo, maqo, kei na jaina. Sa qai veivuke o koya ena kedra tuvai ena vatavata.
A vakasamataka tikoga o Mateo na Yalo Tabu ni rau cakacaka tiko. “E dau vakilai tu vakacava na Yalo Tabu?” a taroga o koya.
“E dau vakacegui au na Yalo Tabu ni‘u rarawa,” a kaya o Ta. “Ka dau vakayalovinakataki au o Koya ni‘u vukea e dua.”
“Au sa sega ni waraka rawa me‘u papitaiso me rawa ni‘u vakila talega na Yalo Tabu!”
“Ni sa bera mada ga ni o papitaiso ka vakadeitaki, sa rawa ni o vakila na Yalo Tabu,” a kaya o Ta. “Sa rawa ni o vakila na Nona veivakacegui ena gauna oqo. Me vaka ni o masu se cakava e dua na ka vinaka ki vua e dua. Ia ni ko sa vakadeitaki oti, sa rawa me na dau tiko vata ga kei iko na Yalo Tabu.”
A vakasamataka sara o Mateo. A sa bau vakila mada li o koya e liu na Yalo Tabu?
Sega ni dede sa talaucaki taucoko na kato. “O sa vakarau tu mo vukei rau na Sosa?” A taroga o Ta.
A deguvacu o Mateo. E dau dredre tiko vei rau na veiwatini na Sosa na taubale. Sa mani gole ki na makete o Mateo ena vukudrau. Ena so na gauna e dau vukei rau talega ena cakacaka eso.
E rau taubale ki na nodrau vale na Sosa o Mateo kei Zeus. A vakabula mai o Sosa marama ena varada e liu. “Yadra vinaka!”
“O gadreva beka na volivoli nikua?” A taroga o Mateo.
“Io. Au gadreva na madrai, pateta, kei na lewe ni bulumakau.” A wilika mai o Sosa marama eso na siliva. “Sa na rauta vinaka qori.”
Taura sara o Mateo na ilavo. A raica o koya e dua na taga ni benu e katuba. “E vinakata me‘u kauta tani vei iko oya?” a taroga o koya.
“Io. Vinaka vakalevu! A kaya o Sosa.
Ni oti na nona kauta tani na benu, a gole sara o Mateo me la‘i voli kakana. A vakasamataka o koya na veika taucoko a vakayacora ena mataka oya. A vukei Ta ena itutu ni volitaki vuanikau. A vukei rau na Sosa ena voli kakana. Ka sa vakila o koya e dua na ka vinaka e lomana. E sa vakila tiko o koya na Yalo Tabu, me vaka ga a kaya o Ta!
A nuitaka o Mateo ni na sega ni wawa vakadede me papitaiso. E sa vinakata me tiko vata kei koya na Yalo Tabu ena veigauna taucoko!
Droini mai vei Carolina Farías