Bulanan nga Mensahe sang Para sa Kusog sang mga Lamharon, Mayo 2024
Mga Kasugtanan kag Mga Responsibilidad
Mga Sinambit (Excerpts)
Pilipinas
Ang kasugtanan isa ka pangako nga tumanon ang pila ka mga responsibilidad. Ang personal nga mga pangako importante para sa pagsulundan sang aton indibidwal nga mga kabuhi kag sa pagpanghikot sang sosiedad. …
Sang mag-abot ang tion sang Pagpanumbalik sang kabug-osan sang ebanghelyo ni Jesucristo, ang Dios nagtawag sang isa ka propeta, si Joseph Smith. … [Ang Libro ni Mormon] amo ang mayor nga ginakuhaan sang kabug-osan sang ebanghelyo, lakip na ang plano sang Dios para sa Iya kabataan, kag ang Libro ni Mormon puno sang mga pagsambit sa mga kasugtanan. …
Ang mga kasugtanan pundasyon sa Pagpanumbalik sang ebanghelyo. Maathag ini nga makita sa pinakauna nga mga tikang nga ginsugo sang Ginuo nga himuon sang Propeta sa pag-organisar sang Iya Simbahan. …
Ang Simbahan ni Jesucristo sang mga Santos sa Ulihing mga Adlaw nagapatindog sang mga templo sa bilog nga kalibutan. Ang katuyuan sang mga ini amo nga bugayan ang mga anak-sa-kasugtanan sang Dios nga makasimba sa templo kag sang sagrado nga mga responsibilidad kag mga gahum kag pinasahi nga mga bugay sang pagkahigot kay Cristo nga ila ginabaton paagi sa kasugtanan.
Ang Simbahan ni Jesucristo nakilala bilang isa ka simbahan nga nagahatag importansya sa paghimo sang mga kasugtanan sa Dios. Ang mga kasugtanan kaupod sa tagsa ka ordinansa sang kaluwasan kag pangkahitaasan nga ginahikot sining ginpanumbalik nga Simbahan. Ang ordinansa sang bunyag kag ang iya sini kaupod nga mga kasugtanan mga rekisito sa pagsulod sa selestiyal nga ginharian. Ang mga ordinansa kag ang mga kaupod nga kasugtanan sa templo mga rekisito para sa pangkahitaasan sa selestiyal nga ginharian, nga amo ang kabuhi nga wala katapusan, “ang pinakadako sa tanan nga bugay sang Dios” [Doktrina kag mga Kasugtanan 14:7]. Amo ini ang ginatutokan sang Ang Simbahan ni Jesucristo sang mga Santos sa Ulihing mga Adlaw.
© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, May 2024. Hiligaynon. 19298 861