Bulanan nga Mensahe sa Liahona, Mayo 2024
Magkalipay sa Dulot sang mga Yabi sang Priesthood
Ang mga yabi sang priesthood nagadumala kon paano gamiton ang priesthood sang Dios sa pagpahanabo sang mga katuyuan sang Ginuo kag sa pagbugay sang tanan nga nagabaton sang ginpanumbalik nga ebanghelyo.
Pinalangga kong mga kauturan, karon nga adlaw isa ka makasaysayan nga adlaw para sa akon kag kay Pangulong Dallin H. Oaks. 40 anyos na ang nagligad, sa ika-17 sang Abril, 1984, sang ginsakdag kami sa Korum sang Dose ka Apostoles. Nagkalipay kami sa tagsa ka pangkabilogan nga komperensya sumugod sadto, lakip ining karon. Ginbugayan naman kami liwat sang sagrado nga pagbubo sang Espiritu. Ginalauman ko nga pagasulit-suliton ninyo nga tun-an ang mga mensahe sang ini nga komperensya sa palaabuton nga binulan.
United Kingdom
Sang natawo ako, may anum ka nagaoperar nga templo sa sini nga Simbahan—tag-isa sa St. George, Logan, Manti, kag Salt Lake City, Utah; subong man sa Cardston, Alberta, Canada; kag Laie, Hawaii. May duha sadto anay ka templo nga nag-operar sing makadali sa Kirtland, Ohio, kag Nauvoo, Illinois. Sang ang kadam-an sang mga miyembro sang Simbahan nagsaylo sa nakatundan, ang mga santos napilitan sa pagbiya sining duha ka templo.
Ang Templo sang Nauvoo ginsunog sang mga arsonista. Gintukod ini liwat kag gindedikar ni Pangulong Gordon B. Hinckley. Ang Templo sang Kirtland ginpasipad-an sang mga kaaway sang Simbahan. Sang ulihi ang Templo sang Kirtland nakuha sang Community of Christ, nga nagpanag-iya sini sa madamo nga tinuig.
Sang nagligad nga bulan amon gin-anunsyu nga ginbakal sang Ang Simbahan ni Jesucristo sang mga Santos sa Ulihing mga Adlaw ang Templo sang Kirtland upod ang pila ka importante nga makasaysayan nga mga duog sa Nauvoo. Ginapasalamatan gid namon sing dako ang mainabyanon kag mapuslanon nga paghinamblanay sa magtimbang nga bahin upod ang mga lider sang Community of Christ nga naglab-ot sa sining pagsugtanay.
Ang Templo sang Kirtland
Ang Templo sang Kirtland may di-kinaandan nga importansya sa Pagpanumbalik sang Ebanghelyo ni Jesucristo. Ang pila sang mga hitabo nga nahanabo didto ginpropesiya sa madamo na nga milenyo kag importante para sa pagpanumbalik sang Simbahan sang Ginuo agud matuman ang iya sini misyon sa katapusan nga adlaw.
Ang pinakaimportante sa sining mga hitabo natabo sang Paskwa sang Pagkabanhaw, Abril 3, 1836. Sa sina nga adlaw, si Joseph Smith kag Oliver Cowdery nakaeksperiyensya sang sunod-sunod nga makahalangyag nga mga pagbisita. Una, ang Ginuong Jesucristo nagpakita. Ang Propetang Joseph Smith nagsulat nga “ang mga mata [sang Manluluwas] pareho sang dabadaba sang kalayo; ang buhok sa iya ulo puti pareho sang puraw nga niyebe; ang iya nawong nagasilak labaw pa sa kasanag sang adlaw; kag ang iya tingug pareho sang tunog sang daganas sang dalagko nga mga katubigan.”
Sa tion sining pagbisita, ang Ginuo nagpamatuod sang Iya kaugalingon. Sia nagsiling, “Ako ang una kag ang katapusan; ako sia nga nagakabuhi, ako sia nga napatay; ako ang inyo mananabang sa Amay.”
Si Jesucristo nagpahayag nga Iya ginbaton ang templo bilang Iya balay kag nagsambit sining makahalangyag nga promisa: “ Magapakita ako sa akon katawhan sa kaluoy sa sining balay.”
Ining makahulugan nga promisa para sa tagsa ka gindedikar nga templo karon. Ginaagda ko kamo nga binagbinagon kon ano ang kahulugan sang promisa sang Ginuo para sa imo mismo.
Pagkatapos sang pagbisita sang Manluluwas, si Moises nagpakita. Ginhatag ni Moises kay Joseph Smith ang mga yabi para sa pagtipon sang Israel kag sa pagbalik sang napulo ka tribo.
Sang matapos ini nga panan-awon, “Si Elias nagpakita, kag gintugyan ang dispensasyon sang ebanghelyo ni Abraham” kay Joseph.
Dayon si Elija nga Propeta nagpakita. Ang iya pagpakita nagtuman sang promisa ni Malaquias nga antes sang Ikaduhang Pagkari, ipadala sang Ginuo si Elija agud “lisuon ang tagipusuon sang mga ginikanan sa mga anak, kag ang tagipusuon sang mga anak sa ila mga ginikanan.” Ginhatag ni Elija ang mga yabi sang gahum sang pagselyo kay Joseph Smith.
Temple Square
Ang kaimportante sining mga yabi nga ginbalik sa kalibutan sang tatlo ka langitnon nga mga mensahero sa idalom sang direksyon sang Ginuo indi masobrahan sa pagpahayag. Ang mga yabi sang priesthood nagarepresentar sang awtoridad kag gahum sang pangulohan. Ang mga yabi sang priesthood ang nagadumala kon paano gamiton ang priesthood sang Dios sa pagpahanabo sang mga katuyuan sang Ginuo kag sa pagbugay sang tanan nga nagabaton sang ginpanumbalik nga ebanghelyo ni Jesucristo.
Importante nga tandaan nga antes sang pag-organisar sang Simbahan, ginhatag sang langitnon nga mga mensahero ang Aaronic kag Melchizedek Priesthood kay Joseph Smith kag ginhatagan sia sang mga yabi sining duha ka priesthood. Ining mga yabi naghatag kay Joseph Smith sang awtoridad sa pag-organisar sang Simbahan sang 1830.
Kag sa Templo sang Kirtland sang 1836, ang paghatag sining tatlo ka dugang nga mga yabi—nga amo ang, mga yabi sang pagtipon sang Israel, mga yabi sang ebanghelyo ni Abraham, kag mga yabi sang gahum sang pagselyo—kinahanglanon gid. Ining mga yabi naghatag awtoridad kay Joseph Smith—kag sa iban pa nga mga Pangulo sang Simbahan sang Ginuo nga nagsunod—sa pagtipon sang Israel sa duha ka bahin sang belo, sa pagbugay sang tanan nga mga anak-sa-kasugtanan sang mga pagpakamaayo kay Abraham, sa pagpalig-on sang selyo sa mga ordinansa kag mga kasugtanan sang priesthood, kag sa paghugpong sang mga pamilya sa wala katapusan. Ang gahum sining mga yabi sang priesthood wala sing dulonan kag makahalawhaw.
Binagbinaga kon ano ka lain ang imo kabuhi kon ang mga yabi sang priesthood wala mapanumbalik sa duta. Kon wala ang mga yabi sang Priesthood, indi ka mahatagan sang gahum sang Dios. Kon wala ang mga yabi sang priesthood, ang Simbahan wala na sing iban nga mahimo kundi magaserbe lamang nga importante nga organisasyon sa pagtudlo kag pagbulig. Kon wala ang mga yabi sang priesthood, wala sa aton ang makatigayon sang importante nga mga ordinansa kag mga kasugtanan nga nagabugkos sa aton sa aton mga pinalangga sa wala katapusan kag magatugot sa aton sa ulihi nga magpuyo upod sa Dios.
Ang mga yabi sang priesthood nagahatag sang kinatuhay sa Ang Simbahan ni Jesucristo sang mga Santos sa Ulihing mga Adlaw sa iban nga organisasyon sa duta. Madamo sang mga organisasyon ang sarang kag makahimo sang imo kabuhi nga mas maayo diri sa duta. Pero wala na sing iban nga organisasyon ang sarang kag mahimo mag-impluwensya sang imo kabuhi pagkatapos sang kamatayon.
Ang mga yabi sang priesthood nagahatag sa aton sang awtoridad sa pagpalab-ot sang tanan nga bugay nga ginpromisa kay Abrahan sa tagsa ka nagatipig-sang-kasugtunan nga lalaki kag babayi. Ang buluhaton sa templo ang nagapatigayon sining matahum nga mga bugay nga ara para sa tanan nga anak sang Dios, wala sapayan kon diin ukon san-o sila sadto nagkabuhi ukon subong nagapangabuhi. Magkalipay kita nga ang mga yabi sang priesthood ara na liwat sa duta.
Kenya
Ginaagda ko kamo nga binagbinagon sing maayo ang masunod nga tatlo ka pahayag:
-
Ang pagtipon sang Israel pamatuod nga palangga sang Dios ang tanan Niya nga kabataan sa bisan diin.
-
Ang ebanghelyo ni Abraham dugang nga pamatuod nga palangga sang Dios ang tanan Niya nga kabataan sa bisan diin. Ginaagda Niya ang tanan nga magpalapit sa Iya—““itom kag puti, ulipon kag hilway, lalaki kag babayi; … tanan palareho sa Dios.”
-
Ang nagahugpong nga gahum langitnon nga pamatuod kon ano kapalangga sang Dios ang tanan sang Iya kabataan kag luyag [Niya] nga pilion sang tagsa sa ila nga magpauli sa Iya.
Ang mga yabi sang priesthood nga ginpanumbalik paagi kay Propetang Joseph Smith nagahimo nga posible para sa kada nagatipig-sang-kasugtanan nga lalaki kag babayi nga magkalipay sa personal nga mga espiritwal nga mga prebilihiyo. Yari sa liwat, may madamo kita nga matun-an halin sa sagrado nga kasaysayan sang Templo sang Kirtland.
Ang pangamuyo ni Joseph Smith sa pagpahanungod sang Templo sang Kirtland isa ka pagtudlo parte sa kon paano ang templo espirituhanon nga nagapabaskog sa inyo kag sa akon agud maatubang ang mga hangkat sa kabuhi sa sining katapusan nga mga adlaw. Ginaagda ko kamo nga tun-an ina nga pangamuyo, nga nasulat sa Doktrina kag mga Kasugtanan seksyon 109. Ina nga pangamuyo sa pagpahanungod, nga nabaton paagi sa rebelasyon, nagatudlo nga ang templo “isa ka balay sang pagpangamuyo, balay sang pagpuasa, balay sang pagtuo, balay sang pagtuon, balay sang himaya, balay sang kahusay, balay sang Dios.”
Ining listahan sang mga kinaiya mas masobra pa sa paglaragway lang sang templo. Isa ina ka promisa sa kon ano ang matabo sa ila nga nagaalagad kag nagasimba sa balay sang Ginuo. Mahimo sila magpaabot nga makabaton sang mga sabat sa pangamuyo, personal nga rebelasyon, mas mabaskog nga pagtuo, kusog, pagpaumpaw, dugang sa ihibalo, kag dugang nga gahum.
Ang tion sa templo makabulig sa imo nga magpamensar sang selestiyal kag makilala kon sin-o ka gid bala, sin-o ka mahimo nga mangin, kag ang sahi sang kabuhi nga pwede mo maangkon sa katubtoban. Ang regular nga pagsimba sa templo magapatin-ad sang imo panulok sa imo kaugalingon kag kon paano ikaw magsanto sa matahum nga plano sang Dios. Ginapromisa ko sa inyo ina.
Ginapromisahan man kita nga sa templo mahimo naton “mabaton ang kabug-osan sang Balaan nga Espiritu.” Hunahunaa kon ano ang kahulugan sinang promisa nahanungod sa pagbukas sang mga kalangitan para sa kada isa nga hanuot nga nagapangita sang kamatuoran.
Ginatudloan kita nga ang tanan nga nagasimba sa templo makaangkon sang gahum sang Dios kag mga anghel nga “magabantay sa ila.” Paano nagadugang sa imo kompiyansa ang mahibal-an nga bilang endowed nga babayi ukon lalaki nga naarmasan sang gahum sang Dios , indi kinahanglan nga atubangon mo ang kabuhi nga nagaisahanon? Ano nga kaisog ang ginahatag sa imo nga mahibal-an nga ang mga anghel matuod nga magabulig sa imo?
Sa katapusan, ginapromisahan kita nga “wala sang padihot sang kalainan” ang magdaug sa ila nga nagasimba sa balay sang Ginuo.
Ecuador
Ang pag-intiendi sang espiritwal nga mga prebilihiyo nga matigayon sa templo importante sa kada isa sa aton karon.
Pinalangga kong mga kauturan, ari ang akon promisa. Wala sing mas labing makabulig sa imo sa paghawid sing hugot sa barandilya nga salsalon sangsa regular nga pagsimba sa templo kon ginatugot sang imo kahimtangan. Wala sing mas labing makaprotekta sa imo sa imo pag-atubang sa mga panganod sang kadudulman sang kalibutan. Wala sing mas labing makapabakod sang imo testimonya kay Ginuong Jesucristo kag sa Iya Pagbayad-Sala ukon makabulig sa imo nga maintiendihan ang dalayawon nga Plano sang Dios. Wala sing mas labing makapaumpaw sang imo espiritu sa mga tinion sang kasakit. Wala sing mas labing makapabukas sang mga kalangitan. Wala Gid!
Ang templo amo ang dalan sa pinakadako nga mga bugay nga gin-aman sang Dios para sa kada isa sa aton, kay ang templo amo gid lang ang duog nga sa diin mahimo naton mabaton ang tanan nga mga bugay nga ginpromisa kay Abraham. Amo ina kon ngaa ginahimo namon ang tanan nga amon masarangan, sa idalom sang pagtuytoy sang Ginuo, nga himuon ang mga bugay sang templo nga mas mahapos matigayon sang mga miyembro sang Simbahan. Gani, nalipay kami nga ianunsyo nga nagaplano kami nga magpatindog sang templo sa tagsa sining 15 ka lokasyon:
-
Uturoa, French Polynesia
-
Chihuahua, Mexico
-
Florianópolis, Brazil
-
Rosario, Argentina
-
Edinburgh, Scotland
-
Brisbane, Australia south area
-
Victoria, British Columbia
-
Yuma, Arizona
-
Houston, Texas south area
-
Des Moines, Iowa
-
Cincinnati, Ohio
-
Honolulu, Hawaii
-
West Jordan, Utah
-
Lehi, Utah
-
Maracaibo, Venezuela
Mahal kong mga kauturan, nagasaksi ako nga amo ini ang Simbahan ni Jesucristo sang mga Santos sa Ulihing mga Adlaw. Sia ang nagapangulo sini. Iya kita mga disipulo.
Magkalipay kita sa pagpanumbalik sang mga yabi sang priesthood, nga nagahimo nga posible para kamo kag ako magkalipay sa tagsa ka espirituhanon nga bugay nga handa kag angayan kita sa pagbaton. Ginasaksi ko ini sa sagrado nga ngalan ni Jesucristo, amen.
© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, May 2024 Hiligaynon. 19285