Molaetsa oa Khoeli Liahona Pulungoana 2024

Morena Jesu Kreste O Tla Tla Hape

Ka Mookameli Russell M. Nelson

Mookameli oa Kereke ea Jesu Kreste ea Bahalaleli ba Mehla ea Kajeno

Joale ke nako ea hau le ´na ho itokisetsa Ho Tla Lekhetlo la Bobeli ha Morena le Mopholosi Jesu Kreste.

Bana beso ba ratehang, ke motlotlo hore Morena o ntlhohonolofalitse hore ke bue le lona.

Sebokeng sena, Morena o buile le rona ka bahlanka ba Hae. Ke le khothaletsa ho ithuta melaetsa ea bona. E sebeliseng joaloka hlahlobo ea litmus ea seo e leng ´nete, le seo e seng sona ka nako ea likhoeli tse ts´eletseng tse tlang.

Poloko le nchafatso ea Tempele ea Salt Lake le libaka tse ling tsa Temple Square e sa le li tsoelapele nako ea lilemo tse ka bang hlano. Likhakanyo tsa ha joale lisupa hore mosebetsi oona o tla fela mafelong a 2026. Re motlotlo ho bohle ba sebetsang mosebetsing o moholo ha kana.

Likhoeling tse ts´eletseng tse fetileng, re hlohonolofalitse litempele tse robong linaheng tse hlano. Lipakeng tsa hona joale le mafelo a selemo, re tla hlohonolofatsa tse ling tse hlano hape.

Kajeno re thabile ho phatlalatsa ho aha litemple tse ling tse 17. Ka kopo mamelang ka hloko ha ke phatlalatsa libaka tsena.

• Juchitán de Zaragoza, Mexico

• Santa Ana, El Salvador

• Medellín, Colombia

• Santiago, Dominican Republic

• Puerto Montt, Chile

• Dublin, Ireland

• Milan, Italy

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

Bana beso ba ratehang, na le bona se etsahalang kapel´a mahlo a lona? Ke rapela hore re se ke ra fetoa ke botlotlehi ba motsotso ona! Ruri Morena o potlakisa mosebetsi oa Hae.

Hobaneng ha re aha litempele ka sekhahla se sekale? Hobaneng? Hobane Morena o re laetse hore re etse joalo. Litlhohonolofatso tsa tempele li thusa ho bokella Israele ka mahlakore a mabeli a lesira. Litlhohonolofatso tsena hape li thusa ho lokisa batho ba tla lokisetsa lefats´e bakeng sa Ho Tla Lekhetlo la Bobeli ha Morena!

Joaloka ha Moporofeta Esaiah a porofetile, ´me ho kentsoe ka hloohong ho Handel’s Messiah, ha Jesu Kreste a khutla, “khalalelo ea Morena e tla senoloa, ´me nama eohle e tla e bona hammoho.”

Ka letsatsi leo, “´muso o tlaba mahetleng a hae: ´me lebitso la hae le tla bitsoa Moeletsi ea Hlollang, Molimo o matla, Ntate oa ka ho sa Feleng, Khosana ea Khotso.”

Jesu Kreste o tla busa Jerusalema ea khale le Jerusalema “e ahuoeng lefats´eng la Amerika.” Ho tloha libakeng tsena tse peli, O tla tsamaisa litaba tsa Kereke ea Hae.

Ka letsatsi leo Morena o tla tsebahala e le “Khosi ea Likhosi, le Morena oa Marena.” Ba tlabeng ba e-na le Eena ba tla “bitsoa, le ba khethuoeng, le ba ts´epahalang.”

Bana beso, joale ke nako eaka le lona ho lokisetsa Ho Tla Lekhetlo la Bobeli ha Morena le Mopholosi oa rona, Jesu Kreste. Joale ke nako ea rona ea ho etsa hore bosebeletsi ba rona ebe eona ntho e kaholimo-limo. Lefats’eng lena le tletseng lits’itiso tse tsietsang, re ka etsa see joang?

Ho rapela kamehla tempeleng ho tla re thusa. Ka tlung ea Morena, re tsepamisa maikutlo ho Jesu Kreste. Re ithuta ka Eena. Re etsa lilekane ho mo latela. Rea mo tseba. Ha re boloka lilekane tsa rona tsa tempele, re fumana monyetla o moholo ho matla a matlafatsang a Morena. Ka tempeleng, re fumana ts´ireletso khahlonong le litlokotsi tsa lefats´e. Re latsoa lerato le hloekileng la Jesu Kreste le Ntat´a rona ea Maholimong ka bongata bo boholo! Re utloa khotso le kholiseho ea moea, ho fapana le merusu ea lefats´e.

Ts´episo eaka ho lona ke ena: E mong le e mong ea batlang Jesu Kreste ka ´nete o tla mo fumana ka tempeleng. Le tla utloa mohau oa Hae. Le tla fumana likarabo tsa lipotso tsa lona tse le ts´oenyang haholo. Le tla utloisisa hamolemo thabo ea evangeli ea Hae.

Ke ithutile hore potso ea bohlokoa ka ho fetisisa eo e mong le e mong a lokelang ho e araba ke ena: Ke tla nehelana ka bophelo ba ka ho mang kapa ho eng?

Qeto eaka ea ho latela Jesu Kreste ke qeto ea bohlokoa ka ho fetisisa eo nkileng ka e etsa. Nakong ea sekolo sa bongaka, ke ile ka fumana bopaki ba bomolimo ba Molimo Ntate le Mora oa Hae, Jesu Kreste. Ho tloha ka nako eo Mopholosi oa rona e bile lefika leo ke ahileng bophelo baka holim´a lona. Khetho eo e entse phapang e kholo! Qeto eo e entse hore liqeto tse ling tse ngata li be bonolo. Qeto eo e mphile sepheo le tataiso. E boetse e nthusitse ho mamella lifefo tsa bophelo. Ntumelle ke fane ka mehlala e ´meli:

Taba ea pele, ha mosali oaka Dantzel a hlokahala ka ts´ohanyetso, ke ile ka sitoa ho fumana bana ba rona. Ke ne ke le mong, ke tsielehile, ke llela thuso. Ka lehlohonolo, ka Moea oa Hae, Morena o ile a nthuta hore na hobaneng Dantzel ea ratehang a ile a nkeloa hae. Ka kutloisiso eo, ke ile ka ts´eliseha. Ha nako e ntse e ea, ke ile ka khona ho sebetsana hantle le mahlomola aka. Hamorao, ke ile ka nyala mosali oaka ea ratehang Wendy. E ne e le karolo e kholo ea mohlala oaka oa bobeli.

Ha ´na le Wendy re ne re le mosebetsing naheng e hole, masholu a neng a hlometse a ile a nts´upa hloohong ka sethunya ´me a penya mokhoephetsane. Empa sethunya ha sea ka sa thunya. Har´a ketsahalo eo, bophelo ba rona ka bobeli bo ile ba ba tlokotsing. Leha ho le joalo ´na le Wendy re ile ra ikutloa re e-na le khotso e ke keng ea utloisisoa. E ne e le khotso “e fetang kutloisiso eohle.”

Bana beso, Morena o tla le ts´elisa le lona! O tla u matlafatsa. O tla le hlohonolofatsa ka khotso, le ha le le kahar´a pherekano.

Ka kopo mamela ts´episo ena ea Jesu Kreste ho lona: “Ke tla ba ka letsohong la lona le letona le ka ho le lets´ehali, ´me Moea oaka o tla ba lipelong tsa lona,´me​mangeloi aka a tla le pota-pota, ho le ts´ehetsa.

Ha ho na meeli ho bokhoni ba Mopholosi ba ho le thusa. Mahlomola a Hae Gethesemane le Golgotha a ke keng a utloisiseha e ne e le bakeng sa lona! Topollo ea Hae e sa feleng ke ea lona!

Ke le khothaletsa hore le iphe nako beke le beke—bophelo bohle ba lona—ho eketsa kutloisiso ea lona ka Topollo ea Jesu Kreste. Pelo eaka e bohloko bakeng sa ba khomaretseng ka har´a sebe ´me ba sa tsebe ho tsoa. Ke lla bakeng sa ba loanang moeeng kapa ba jereng meroalo e boima ba le bang hobane ba sa utloisise seo Jesu Kreste a se entseng bakeng sa bona.

Jesu Kreste o ile a inkela libe tsa hau mahloko, a hau mahlomola a hau le bofokoli ba hau. Ha u hloke ho li jara u le mong! O tla le ts´oarela ha le baka. O tla le hlohonolofatsa ka tseo le lihlokang. O tla folisa moea oa lona o lemetseng. Ha le itlamahanya le Eena, meroalo ea lona e tla utloahala e le bobebe. Ha le etsa le ho boloka selekane sa ho latela Jesu Kreste, le tla fumana hore linako tse bohloko tsa bophelo ba lona ke tsa nakoana. Litlhokofatso tsa lona li tla “metsoa ke thabo ea Kreste.”

Ha e so ho be kapele haholo kapa hona morao haholo hore u ka ba morutuoa ea chesehang oa Jesu Kreste. Joale u tla ba le phihlelo ea lithlohonolofatso tsa Topollo ea hae ka botlalo. U tla boela u be le ts´usumetso e kholo ho thusa ho bokella Iseraele.

Bana beso ba ratehang, ka letsatsi le tlang, Jesu Kreste o tla khutlela lefats´eng e le Mesia oa lilemo tse sekete. Kahoo kajeno ke le kopa hore le nehelane hape ka bophelo ba lona ho Jesu Kreste. Ke le kopa hore le thuse ho bokella Iseraele e qhalaneng le ho lokisetsa lefats´e bakeng sa Ho Tla ha Morena Lekhetlo la Bobeli. Ke le kopa hore le bue ka Kreste, le pake ka Kreste, le be le tumelo ho Kreste, le thabele Kreste!

Tlohong ho Kreste le “nyehele ka moea oa lona oohle ho Eena.” Sena ke sephiri sa bophelo ba thabo!

Se molemo ka ho fetesisa se tla tla, bana beso ba ratehang, hobane Mopholosi o khutla hape! Se molemo ka ho fetisisa se tla tla hobane Morena o potlakisa mosebetsi oa Hae. Se molemo ka ho fetisisa se tla tla ha re fetola lipelo tsa rona le bophelo ba rona ka botlalo ho Jesu Kreste.

Ke fana ka bopaki baka bo tiileng hore Jesu Kreste ke Mora oa Molimo. Ke morutuoa oa Hae. Ke motlotlo ho ba mohlanka oa hae. Ka Ho Tla Ha Hae Lekhetlo la Bobeli, “khanya ea Morena e tla senoloa, ´me nama eohle e tla e bona hammoho.” Letsatsi leo le tla tlala thabo bakeng sa ba lokileng!

Ka matla a linotlolo tsa boprista tse halalelang tseo ke nang le tsona, ke phatlalatsa ´nete ena ho lona le ho lefats´e lohle! Ka lebitso la Jesu Kreste, amen.

© 2024 by Intellectual Reserve, Inc. All rights reserved. E hatisitsoe USA. Tumello ea Senyesemane: 6/19. Tumello ea Phetolelo: 6/19. Phetolelo ea Monthly Liahona Message, November 2024. South Sotho. 19349 739

Lintlha

1. Tlhohonolofatso bocha ha Tempele ea Manti Utah (Mookameli Russell M. Nelson, April 21); Tempele ea Urdaneta Philippines (Mookameli Dallin H. Oaks, April 28); Tempele ea Puebla Mexico (Moholo Gerrit W. Gong, May 19); Tempele ea Taylorsville Utah (Moholo Gerrit W. Gong, June 2); Tempele ea Cobán Guatemala (Moholo Dale G. Renlund, June 9); Tempele ea Salta Argentina (Moholo D. Todd Christofferson, June 16); Tempele ea Layton Utah (Moholo David A. Bednar, June 16); Tempele ea Pittsburgh Pennsylvania (Moholo Dieter F. Uchtdorf, September 15); Tempele ea Mendoza Argentina (Moholo Ronald A. Rasband, September 22).

2. Tempele ea San Pedro Sula Honduras (Mphalane 13); Tempele ea Salvador Brazil (Mphalane 20); Tempele ea Deseret Peak Utah (Pulungoana10); Tempele ea Casper Wyoming (Pulungoane 24); Tempele ea Tallahassee Florida (Ts´itoe 8).

3. Bona Lithuto tsa Tumelo le Lilekane 88:73

4. Esaia 40:5; bona hape George Frideric Handel, “And the Glory of the Lord,” The Messiah, ed. T. Tertius Noble (1912), 16–18.

5. Esaia 9:6

6. Bona Zakararia 14:4–7; Lithuto tsa Tumelo le Lilekane 45:48–66; 133:19–21; bona hape Micah 4:2: “For the law shall go forth of Zion, and the word of the Lord from Jerusalem.”

7. Lintlha tsa Tumelo 1:10; bona hape Ethere 13:3–10; Lithuto tsa Tumelo le Lilekane 84:2–4.

8. Ts´enolo 19:16; Ts´enolo 17:14.

9. Bona Alma 34:31

10. U ka ´na ua ikutloa ho bua joalo ka Ammone, “Ke mang ea ka ithorisang haholo Moreneng? … Bona, … ke sitoa ho bolela karolo e nyenyane ka ho fetisa ea kamoo ke ikutloang” (Alma 26:16).

11. Bona Helamane 5:12.

12. Ba-Filipi 4:7.

13. Lithuto tsa Tumelo le Lilekane 84:88.

14. Bona Alma 7:11–12; bona hape Luka 4:18.

15. Bona Alma 7:12

16. Bona Pesaleme 147:3; Jakobo 2:8.

17. Bona Mosaia 24:14

18. Alma 31:38.

19. Bona 2 Nefi 25:26.

20. Omni 1:26.