“Ko e Temipalé mo Ho Fakavaʻe Fakalaumālié,” Ki Hono Fakamālohia ʻo e Toʻu Tupú, Nōvema 2022.
Fakatahaʻanga ʻo e Pongipongi Sāpaté
Ko e Temipalé mo Ho Fakavaʻe Fakalaumālié
Ngaahi Konga Fakamatala
I Shall Not Want [ʻE ʻIkai Te u Masiva] tā fakatātaaʻi ʻe Yongsung Kim
Ko e tuʻuʻanga ʻo e langa Temipale Sōlekí
Hangē ko ia ʻoku mou meaʻí, ʻoku tau fakahoko ha fakaleleiʻi lahi ki he Temipale fakahisitōlia ʻo Sōlekí. …
ʻOku ʻikai toe tuku ha ivi ʻi he fakahoko ki he temipale maʻongoʻongá ni, ʻa ia kuo fakautuutu ʻene tuʻu uesia ngofuá, ha fakavaʻe te ne matuʻuaki ʻa e ngaahi mālohi ʻo natulá ke aʻu ki he Nofotuʻí. ʻI he meʻa tatau pē, kuo taimi ke tau takitaha fakahoko ha ngaahi ngāue lalahi—mahalo ko ha ngaahi ngāue kuo teʻeki ke tau fakahoko kimuʻa—ke fakamālohia hotau ngaahi fakavaʻe fakalaumālie fakafoʻituituí. ʻOku fiemaʻu ʻi he ngaahi taimi makehé ha ngaahi ngāue makehe.
Siʻoku kāinga ʻofeina, ko e ngaahi ʻaho fakaʻosí ʻeni. Kapau ʻe fiemaʻu ke ta matuʻuaki e ngaahi faingataʻa mo e haʻahaʻa ʻe hokó, ʻoku mahuʻinga ke tau takitaha maʻu ha fakavaʻe fakalaumālie mālohi kuo langa ʻi he maka ʻo hotau Huhuʻi, ko Sīsū Kalaisí.
Ko ia, ʻoku ou fehuʻi atu kiate kimoutolu takitaha, ko e hā hono mālohi hoʻo fakavaʻé? Pea ko e hā ha ngaahi fakaivia ʻoku fie maʻu ki hoʻo fakamoʻoní mo e mahino ki he ongoongoleleí?
ʻOku kau ʻa e temipalé ʻi he uho ʻo hono fakamālohia ʻo ʻetau tuí mo e ivi fakalaumālié he ko e Fakamoʻuí mo ʻEne tokāteliné, ko e ʻelito moʻoni ia ʻo e temipalé. …
Kapau ʻoku teʻeki ai ke ke manako ke ʻalu ki he temipalé, toutou ʻalu lahi ange ki ai—kae ʻikai siʻi ange. Tuku ke akoʻi mo tataki koe ai ʻe he ʻEikí, ʻaki Hono Laumālié. …
Kātaki ʻo tui mai ʻi he taimi ʻoku ou pehē ai ko e taimi ʻoku fokotuʻu mālohi ai ho tuʻunga fakalaumālié ʻia Sīsū Kalaisí, ʻoku ʻikai fie maʻu ke ke manavahē. ʻI hoʻo fai pau ko ia ki hoʻo ngaahi fuakava ne fakahoko ʻi he temipalé, ʻe fakamālohia koe ʻe Hono mālohí. Pea, ʻi he tō mai ʻa e ngaahi mofuike fakalaumālié, te ke lava ʻo tuʻu mālohi koeʻuhí ʻoku fefeka mo taʻeueʻia hoʻo fakavaʻe fakalaumālié.