Bandila ngadto sa mga Nasud

Jeffrey R. Holland

Sa Korum sa Napulog Duha ka mga Apostoles

Kon kami magtudlo pinaagi sa Espiritu ug kamo maminaw pinaagi sa Espiritu, usa kanamo mohisgut og usa ka butang nga may kalabutan sa inyong kahimtang.

Ako natandog og maayo sa matag nota sa musika nga gikanta ug sa matag pulong nga gipamulong mao nga ako nag-ampo nga ako mahimong makapamulong.

Sa wala pa mobiya sa Nauvoo niadtong tingtugnaw sa 1846, si Presidente Brigham Young nagdamgo nga iyang nakita ang usa ka anghel nga nagbarug ibabaw sa bungtod nga porma og cone, dapit sa Kasadpan, nagtudlo ngadto sa walog sa ubos. Sa dihang misulod na siya sa Salt Lake Valley paglabay sa mga 18 ka bulan, iyang nakita dinhi gayud sa ibabaw og gamay sa dapit diin kita nagpundok karon, ang sama nga bungtod nga iyang nakita sa panan-awon.

Sama sa kanunay nga gihisgutan dinhi sa pulpito, si Brother Brigham nangulo og pipila ka mga lider paingon sa kinatumyan niana nga bungtod ug mitawag niini og “Bandila sa Kinatumyan sa Bungtod,” usa ka pangalan nga puno sa balaang kahulugan alang niining moderno nga mga Israelite. Baynte singko ka gatus ka tuig ang milabay si propeta Isaias mipahayag sa katapusan nga mga adlaw, “ang bukid sa balay sa ginoo matukod diha sa ibabaw sa kabukiran, ug diha “siya magatindog og usa ka bandila alang sa mga nasud.”¹

Nakita ang ilang panahon diha sa kasaysayan isip pasiunang katumanan niana nga panagna, ang mga Kaigsoonan gusto nga mougbok og usa ka matang sa bandila aron matinuod ang ideya nga “bandila ngadto sa mga nasud”. Si Elder Heber C. Kimball mipagawas og yellow nga bandana. Si Brother Brigham mihigot niini sa sungkod nga gibitbit ni Elder Willard Richards ug giugbok ang hinimo-himo nga bandila, mideklarar sa walog sa Great Salt Lake ug sa mga kabukiran nga naglibut niini isip mao kanang dapita nga gipanagna diin ang pulong sa Ginoo mogawas sa ulahing mga adlaw.

Mga kaigsoonan, kining kinatibuk-ang komperensya ug sa uban pa nga tinuig ug tunga sa tuig nga mga kinatibuk-ang komperensya mao ang pagpadayon nianang unang pamahayag ngadto sa kalibutan. Ako mopamatuod nga ang mga kalihokan sa miaging duha ka adlaw usa lamang ka lain nga ebidensya nga, sama sa giingon sa atong mga himno, “Tan-awa, ang sumbanan sa Zion gibukhad”²—ug ang duha ka kahulugan sa pulong nga sumbanan intensyonal. Dili kini aksidente lang nga ang Iningles nga pagmantala sa atong mga mensahe sa kinatibuk-ang komperensya anaa sa magasin nga yanong giulohan og Ensign.

Samtang ang atong komperensya hapit na mahuman, hangyoon ko kamo sa pagpamalandong sa umaabut nga mga adlaw, dili lamang sa mga mensahe nga inyong nadungog apan ang katalagsaon usab sa kalihokan sa kinatibuk-ang komperensya mismo—unsa ang atong gituohan isip mga Santos sa Ulahing mga Adlaw sa ingon nga mga komperensya ug unsa ang atong gidapit nga madunggan ug maobserbahan sa kalibutan mahitungod niini. Kita mopamatuod ngadto sa tanan nga mga kanasuran, mga kaliwatan, mga pinulongan ug mga katawhan nga dili lang kay ang Dios buhi apan usab nga Siya namulong, nga alang sa atong panahon ug niining atong adlaw ang tambag nga inyong nadungog, ubos sa direksyon sa Espiritu Santo, “ang kabubut-on sa Ginoo, … ang pulong sa Ginoo, … ang tingog sa Ginoo, ug ang gahum sa Dios ngadto sa kaluwasan.”³

Tingali nahibalo na kamo (apan kon kamo wala pa mahibalo kinahanglang mahibalo kamo) nga uban sa panagsa nga eksepyon, walay usa ka lalaki o babaye kinsa namulong dinhi ang gihatagan og usa ka hilisgutan. Ang kada usa nga mamumulong kinahanglan nga magpuasa ug mag-ampo, magtuon ug magtinguha, magsige og usab sa iyang pakigpulong hangtud nga siya masaligon nga alang niini nga komperensya, niining higayuna, anaa kaniya ang hilisgutan nga gusto sa Ginoo nga iyang ipresentar nga walay pagsapayan sa personal nga kagustohan o ganahan nga hisgutan. Matag lalaki ug babaye nga inyong nadunggan sa milabayng 10 ka oras sa kinatibuk-ang komperensya naningkamot sa pagsunod niana nga pag-aghat. Matag usa mihilak, nabalaka ug kinasingkasing nga nagtinguha sa giya sa Ginoo nga mogiya sa iyang mga hunahuna ug igsusulti. Ug sama gayud sa nakita nga anghel ni Brigham Young nga nagbarug niining dapita, ako usab nakakita sa mga anghel nga nagbarug dinhi. Ang akong mga kaigsoonan diha sa mga kinatibuk-ang mga opisyales sa Simbahan mahimong dili komportable niana nga pagkahulagway, apan mao kana ang akong pagtan-aw kanila—mortal nga mga sinugo nga may mga mensahe sama sa anghel, mga lalaki ug mga babaye nga aduna nianang tanang kalisdanan sa pisikal ug pinansyal ug pamilya nga kamo ug ako aduna, apan uban sa hugot nga pagtuo mipahinungod sa ilang mga kinabuhi ngadto sa mga calling nga miabut kanila, ug sa katungdanan sa pagsangyaw sa pulong sa Dios, dili sa ilang kaugalingong mga pulong.

Ug hunahunaa ang managlahi nga mga mensahe nga inyong nadungog—nga nakapadugang pa sa milagro tungod kay walay koordinasyon sa hilisgutan kondili pinaagi lamang sa pagdasig sa kahitas-an. Apan nganong dili man kini managlahi? Kadaghanan sa atong kongregasyon, naa dinhi o sa laing dapit, mga miyembro sa Simbahan. Hinoon, tungod sa talagsaon nga bag-ong mga pamaagi sa komunikasyon, ang padayon nga nagkadako nga porsyento sa tigpaminaw sa atong mga komperensya dili mga miyembro sa Simbahan—dili pa sa pagkakaron. Busa kita kinahanglan gayud nga mamulong niadtong kinsa nakaila kaayo kanato, ug niadtong kinsa wala gayud makaila kanato. Sa Simbahan lang daan kinahanglan kita nga mamulong ngadto sa mga bata, mga kabatan-onan ug sa mga young adult, sa mga hamtong, ug sa mga tigulang. Kinahanglan kita nga mamulong ngadto sa mga pamilya ug mga ginikanan ug mga anak diha sa panimalay, ingon nga kita mamulong ngadto sa dili pa minyo, walay mga anak, ug tingali layo kaayo sa panimalay. Sa dagan sa usa ka kinatibuk-ang komperensya kanunay natong gihatagan og gibug-aton ang mahangturong mga baruganan sa hugot nga pagtuo, paglaum, gugmang putli, ⁴ug ni Kristo nga gilansang⁵ingon nga kita direktang namulong mahitungod sa piho kaayo nga mga isyu sa moral sa panahon karon. Kita gimandoan diha sa mga kasulatan sa “dili pagsulti og lain gawas sa paghinulsol ngadto niini nga kaliwatan”⁶ samtang sa samang higayon kita kinahanglan nga mosangyaw og “maayong mga balita [ngadto] sa mga maaghup [ug] pagbugkos sa mga subo og kasingkasing.” Bisan unsa pa man ang ilang hilisgutan, kini nga mga mensahe sa komperensya “nagmantala sa kagawasan sa mga binihag”⁷ ug namahayag og “dili matugkad nga mga bahandi ni Kristo.”⁸ Sa kadaghan sa nagkalainlaing mga mensahe nga gihatag gilauman nga ang tanan makadungog og usa ka butang nga makapanalangin kanila. Kalabut niini, nagtuo ko nga si Presidente Harold B.Lee maayo kaayong mihulagway niini sa milabayng mga katuigan sa dihang miingon siya, “Sa pagkatinuod ang ebanghelyo mao ang mohupay sa masakiton ug mosakit sa [komportable].”⁹

Sa kanunay gusto nato nga ang atong pagtulun-an sa kinatibuk-ang komperenya ingon ka madagayaon ug makapaawhag sama sa mga pagtulun-an ni Kristo kaniadto, mohinumdom samtang naghimo kita sa pagdisiplina nga mao kanunay ang unod sa Iyang mga mensahe. Sa labing nailhan nga wali nga gihatag sukad, si Jesus misugod pinaagi sa talagsaon nga pagsulti sa maanindot nga mga panalangin nga gustong maangkon natong tanan—mga panalangin nga gisaad ngadto sa kabus og espiritu, maputli og kasingkasing, magbubuhat og kadaitan, ug maaghop.¹⁰Unsa ka makapabayaw kadto nga mga Kabulahanan ug unsa kini ka makahupay sa kalag. Tinuod kini. Apan diha sa samang wali ang Manluluwas mipadayon, nagpakita kon unsa ka higpit sa dalan ang gikinahanglan sa magbubuhat og kadaitan ug maputli og kasingkasing. “Kamo nakadungog na niini nga gikasulti ngadto sa mga tawo sa karaan nga nagaingon, Ayaw pagbuno,” Siya miingon. “Apan Ako moingon nganha kaninyo, nga si kinsa kadto nga may kasuko sa iyang igsoon … anaa sa kakuyaw sa iyang paghukom.”¹¹

Ug sa ingon usab,

“Kamo nakadungog na niini nga gikasulti ngadto sa mga tawo sa karaan nga nagaingon, Ayaw pagpanaw:

Apan sultihan ko kamo, nga bisan kadtong magatan-awg babaye uban sa kaibog kaniya, nakapanapaw na kaniya diha sa sulod sa iyang kaugalingong kasingkasing” ¹²

Sa walay duhaduha samtang ang dalan sa pagkadisipulo mosaka, kana nga dalan nagkahagip-ut hangtud nga moabut na kita nianang makapiko sa tuhod nga kinatumyan sa sermon nga bag-o lang nahisgutan ni Elder Christofferson: “Kamo kinahanglan magmahingpit ingon nga hingpit ang inyong Amahan nga langitnon” ¹³ Kon unsa ang malumo diha sa kapatagan sa sinugdan sa pagkamaunungon mahimong mas mabudlayon ug mapugsanon diha sa kinatumyan sa tinuod nga pagkadisipulo. Klaro kaayo nga ang tawo nga naghunahuna nga si Jesus nagtudlo nga ang mga tawo dili manubag sa ilang mga sala wala magbasa sa mga kasulatan! Dili, kalabut sa pagka-disipulo, ang Simbahan dili sama sa usa ka fast-food nga kan-anan; dili nato kanunay makuha ang unsay “atong gusto.” Moabut ang adlaw nga ang matag tuhod moluhod, ug matag dila mokumpisal nga si Jesus mao ang Kristo ug nga ang kaluwasan moabut lamang sa Iyang paagi.¹⁴

Sa kagustuhan nga mosangyaw sa istrikto ug makapatuhop nga mga kamatuoran sa ebanghelyo sa tukmang paagi diha sa kinatibuk-ang komperensya, palihug ayaw kabalaka nga kon kami mamulong kabahin sa lisud nga mga hisgutanan nakasabut kami nga dili tanan ang nanan-aw og pornograpiya, o naglikay sa kaminyoon, o adunay imoral nga sekswal nga mga pakigrelasyon. Nahibalo kami nga dili tanan ang nagsupak sa Adlaw nga igpapahulay o nagsaksi og bakak o nang-abuso sa asawa. Kahibalo kami nga kadaghanan sa naminaw kanamo dili sad-an sa ingon nga mga butang, apan kami anaa ubos sa balaan nga sugo sa paghatag og pasidaan niadtong kinsa naghimo—bisan asa man sila sa kalibutan. Busa kon kamo naningkamot sa pagbuhat sa labing maayo kutob sa inyong mahimo—kon, pananglitan, naningkamot kamo sa paghimo og family home evening bisan pa man sa kagubot nga usahay pasiugdahan sa gagmayng mga bata—nan tagai ninyo ang inyong mga kaugalingon og taas nga grado kon moabot kita niana nga hilisgutan ug paminaw sa lain nga mamulong og usa ka hilisgutan diin ikaw tingali nagkulang. Kon kami magtudlo pinaagi sa Espiritu ug kamo maminaw pinaagi sa Espiritu, usa kanamo mohisgut og usa ka butang nga may kalabutan sa inyong kahimtang, magdala og personal nga mapanagnaong mensahe nga alang gayud kaninyo.

Mga kaigsoonan, sa kinatibuk-ang komperensya among idugang ang among mga pagpamatuod ngadto sa laing mga pagpamatuod nga moabut, tungod kay sa usa o laing paagi ipadungog gayud sa Dios ang Iyang tingog. “Ako mipadala kaninyo sa pagpamatuod ug pagpasidaan sa mga katawhan,” ang Ginoo nag-ingon ngadto sa Iyang mga propeta.¹⁵

“[Ug] human sa inyong pagpamatuod moabut ang pagpamatuod sa mga linog … sa mga dugdog, … sa mga kilat, ug … sa mga bagyo, ug ang tingog sa mga balud sa dagat nga mobanlas sa ilang mga kaugalingon lapas sa ilang naandan nga gilay-on. …

“Ug ang mga anghel … [mopahayag] uban sa makusog nga tingog, mopatingog sa trumpeta sa Dios.”¹⁶

Karon, kini nga mga anghel nga mianhi niini nga pulpito, matag usa sa iyang kagalingong paagi, “mipatingog sa trumpeta sa Dios.” Matag wali nga ihatag sa kanunay, sa paghulagway, usa ka pagpamatuod ug pasidaan, ingon nga ang kinaiyahan mismo mopamatuod ug mopasidaan sa ulahing mga adlaw.

Karong taud-taud si Presidente Thomas S. Monson moanhi sa pulpito aron sa pagtapos niining komperensya. Mosulti ako og usa ka personal nga butang mahitungod niining minahal nga tawo, ang senior nga apostol ug propeta sa panahon nga atong gipuy-an karon. Gitugyanan nianang mga responsibilidad nga akong gipasabut, makita gayud nga ang kinabuhi sa mga propeta dili sayon ug ang kinabuhi ni Presidente Monson dili sayon. Siya piho nga mipasabut niadtong katapusang gabii sa miting sa priesthood. Gitawag sa pagka-apostol sa edad nga 36 anyos, ang iyang mga anak nag-edad og 12 anyos, 9 anyos, ug 4 anyos. Si Sister Monson ug kadto nga mga anak mihatag sa ilang bana ug amahan ngadto sa Simbahan ug sa mga katungdanan niini sa sobra sa singkwenta na ka tuig karon. Naantus nila ang mga sakit ug ang mga panginahanglan, ang mga ginagmay nga mga problema sa pagkamortal nga giatubang sa tanan, ang pipila niini walay duha-duha nagpaabut pa sa unahan. Apan si Presidente Monson nagpabiling malipayon kanunay bisan pa man niining tanan. Wala gayuy makapawagtang sa iyang kadasig. Siya adunay talagsaong hugot nga pagtuo ug kalig-on.

President, alang ning tibuok kongregasyon, ang ania ug ang wala dinhi, ako moingon nga kami nagmahal ug nagtamud kanimo. Ang imong kamaunungon usa ka ehemplo kanamong tanan. Nagpasalamat kami kanimo sa imong pagpangulo. Laing katorse nga naghupot sa katungdanan sa pagka-apostol, pun-an sa uban pa dinhi sa ibabaw, niadtong naglingkod diha sa kongregasyon, ug dakong panon sa mga tawo nga nagpundok sa tibuok kalibutan nahigugma kanimo, nagpaluyo kanimo, ug nakigtambayayong uban kanimo niini nga buhat. Kami mopagaan sa imong kabudlay sa bisan unsang paagi nga among mahimo. Ikaw usa sa mga sinugo nga sama sa anghel nga gitawag sa wala pa matukod ang kalibutan aron ikayab ang bandila sa ebanghelyo ni Jesukristo ngadto sa tibuok kalibutan. Ikaw naghimo niini sa talagsaong paagi. Nianang ebanghelyo nga gipamahayag, sa kaluwasan nga ihatag niini, ug Kaniya nga mohatag niini, ako mopamatuod sa halangdon ug mahimayaong pangalan ni Ginoong Jesukristo, amen.