Inyong Potensyal, Inyong Pribilehiyo

Ni Presidente Dieter F. Uchtdorf

Ikaduhang Magtatambag sa Unang Kapangulohan

Samtang kamo mobasa sa mga kasulatan ug maminaw sa mga pulong sa mga propeta sa tibuok ninyong kasingkasing ug hunahuna, ang Ginoo mosulti kaninyo unsaon nga makapahimulos kamo sa mga pribilehiyo sa inyong priesthood.

Dihay usa ka tawo kansang pangandoy sa tibuok kinabuhi mao ang makasakay og cruise ship ug molawig sa Dagat sa Mediterranean.Nangandoy siya nga makalakaw sa mga dalan sa Rome, Athens, ug Istanbul. Nagtigum siya hangtud nga may igo na siyang kwarta alang sa iyang pag-adto. Tungod kay gamay ra ang kwarta, mipalit siya og laing maleta nga gisudlan og delata nga beans, kinarton nga krakers, ug mga bag sa powder nga lemonada, ug mao kadto ang iyang gikaon kada adlaw.

Ganahan siyang moapil sa daghang mga kalihokan nga gihimo diha sa barko—mag-ehersisyo sa gym, magdula og golf, ug mag-swimming. Nasina siya niadtong nanan-aw og sine, sa mga pasundayag, ug sa mga presentasyon sa kultura. Ug, o, naghandom siya nga makatilaw sa lamian nga pagkaon nga iyang nakita sa barko—ang kada kaon mora og pista! Pero ang tawo gusto nga gamay ra kaayo ang magasto maong wala siya moapil bisan hain niini. Nakita niya ang mga siyudad nga iyang gihandum nga bisitahan, pero sa kasagaran sa biyahe, nagpabilin ra siya sa iyang cabin ug mikaon sa iyang yanong pagkaon.

Sa katapusang adlaw sa biyahe, ang sakop sa crew nangutana niya kon unsa nga panamilit nga salo-salo ang iyang apilan. Diha lamang nahibaloan sa tawo nga dili lang ang panamilit nga salo-salo apan hapit ang tanan diha sa cruise ship—ang pagkaon, ang kalingawan, ang tanang mga kalihokan—apil na diay sa presyo sa iyang tiket. Ulahi na nga nahibaloan sa tawo nga wala niya mapahimusli ang iyang mga pribilehiyo.

Ang pangutana niini nga sambingay mao, Kita ba isip mga tighupot sa priesthood wala kaayo mopahimulos sa atong mga pribilehiyo kon kabahin na sa sagrado nga gahum, mga gasa, ug mga panalangin nga mao ang atong oportunidad ug katungod isip naghupot sa priesthood sa Dios?

Ang Himaya ug Kahalangdon sa Priesthood

Nasayud kitang tanan nga ang priesthood mas labaw pa sa ngalan o titulo lamang. Si Propeta Joseph mitudlo nga “ang Priesthood usa ka mahangturong baruganan, ug diha uban sa Dios sa kahangturan … hangtud sa kahangturan, nga walay sinugdanan sa mga panahon o katapusan sa mga katuigan.”¹ Gihuptan niini “gani ang yawe sa kahibalo sa Dios.”² Gani, pinaagi sa priesthood ang mismong “gahum sa pagka-diosnon gipakita.”³

Ang mga panalangin sa priesthood molabaw sa atong abilidad sa pagsabut. Ang matinud-anong mga tighupot sa Melchizedek Priesthood “mahimo nga … pinili sa Dios.”⁴ Sila “pagabalaanon pinaagi sa Espiritu ngadto sa pagbag-o sa ilang mga lawas”⁵ ug sa katapusan makadawat sa “tanan nga iya [sa] Amahan.”⁶ Tingali lisud kining sabton, apan maanindot kini, ug ako mopamatuod nga kini tinuod.

Ang kamatuoran nga ang atong Langitnong Amahan mihatag niini nga gahum ug responsibilidad ngadto sa tawo mao ang ebidensya sa Iyang dakong gugma kanato ug usa ka paglantaw sa atong potensyal isip mga anak sa Dios human dinhi.

Hinoon, sa kasagaran ang atong mga aksyon nagsugyot nga kita nagpakabuhi nga layo ra kaayo niini nga potensyal. Kon pangutan-on bahin sa priesthood, daghan kanato ang maka-recite sa saktong kahulugan, apan sa atong inadlaw-adlaw nga kinabuhi, tingali adunay gamay ra nga nagpakita nga ang atong pagsabut molabaw sa gidak-on sa nahibaloan na nga nasulat.

Mga kaigsoonan, nag-atubang kita og pagpili. Mahimong igo na kanato ang nagkakunhod nga kasinatian isip mga tighupot sa priesthood ug mosugot na lang sa mga kasinatian nga ubos ra kaayo kay sa atong mga pribilehiyo. O makaambit kita sa abunda nga pagbusog sa espirituhanong oportunidad ug sa daghang mga panalangin sa priesthood.

Unsay Atong Mahimo sa Pagkab-ot sa Atong Potensyal?

Ang mga pulong nga nahisulat sa mga kasulatan ug gipamulong sa kinatibuk-ang komperensya alang kanato aron “ipahisama ngadto sa [atong kaugalingon],”⁷dili lang para basahon o paminawon.⁸ Sa kasagaran, motambong kita og mga miting ug moyango-yango sa atong mga ulo; gani mopahiyum pa kita ug mouyon. Atong gisulat ang pipila ka punto, ug moingon sa atong kaugalingon, “Kanang butanga akong buhaton.” Apan tali sa pagpaminaw, sa pagsulat sa pahinumdom diha sa atong smartphone, ug sa tinuod nga pagbuhat, ang atong “buhaton kini” mobalhin ngadto sa “unya na lang” nga posisyon.Mga kaigsoonan, atong sigurohon nga ipahimutang ang atong “buhaton kini” nga anaa kanunay sa “karon” nga posisyon!

Una: Basaha ang Manwal sa Tag-iya

Kon kamo nanag-iya sa labing bag-o ug mahal nga computer, himoon ba lang ninyo kini nga dekorasyon sa lamesa? Nindot tingali tan-awon ang computer. Kini mahimong aduna sa tanang potensyal. Pero mahitabo lamang kini kon tun-an ninyo ang manwal sa tag-iya, magkat-on unsaon sa paggamit sa software, ug sa pag-on aron kamo makagamit sa hingpit nga potensyal niini.

Ang balaan nga priesthood sa Dios adunay manwal usab sa tag-iya. Mopasalig kita sa pagbasa sa mga kasulatan ug mga handbook uban sa katuyoan ug dugang nga focus. Sugdan nato pinaagi sa pagbasa og usab sa mga seksyon 20, 84, 107, ug 121 sa Doktrina ug mga Pakigsaad. Kon mas magtuon kita sa katuyoan, potensyal, ug praktikal nga paggamit sa priesthood, mas mahibulong kita sa gahum niini, ug ang Espiritu motudlo kanato unsaon sa paggamit niana nga gahum aron sa pagpanalangin sa atong mga pamilya, sa atong mga komunidad, ug sa Simbahan.

Isip mga tawo, atong gihatagan og taas nga prayoridad ang sekular nga pagkat-on ug bokasyonal nga kalamboan. Gusto kita ug kinahanglan nga molabaw kita sa kinaadman ug pagkahanas. Gidayeg ko kamo sa makugihon nga pagpaningkamot aron makaangkon og edukasyon ug mahimong eksperto sa inyong propesyon. Dapiton ko usab kamo nga mahimong mga eksperto sa mga doktrina sa ebanghelyo—labi na sa doktrina sa priesthood.

Nagpuyo kita sa panahon nga ang mga kasulatan ug ang mga pulong sa modernong mga propeta mas daling makuha kay sa bisan unsang panahon sa kasaysayan sa kalibutan. Hinoon, atong pribilehiyo ug katungdanan, ug atong responsibilidad ang pagbaton ug paghupot sa ilang mga pagtulun-an. Ang mga baruganan ug mga doktrina sa priesthood makapabayaw ug langitnon. Kon mas magtuon kita sa doktrina ug sa potensyal ug gamiton ang praktikal nga katuyoan sa priesthood, mas molambo ang atong mga kalag ug ang atong panabut molapad, ug atong makita unsa ang giandam sa Ginoo alang kanato.

Ikaduha: Tinguhaa ang mga Pagpadayag sa Espiritu

Ang sigurado nga pagpamatuod ni Jesukristo ug sa Iyang gipahiuli nga ebanghelyo mas labaw pa kay sa kahibalo—nagkinahanglan kini og personal nga pagpadayag, nga gipamatud-an pinaagi sa matinuoron ug mapahinunguron nga paggamit sa mga baruganan sa ebanghelyo. Si Propeta Joseph Smith mipasabut nga ang priesthood mao ang “agianan diin ang Makagagahum nagsugod sa pagpadayag sa Iyang himaya sa sinugdanan sa paglalang niini nga yuta, ug pinaagi niini diin Siya mipadayon sa pagpadayag sa Iyang kaugalingon ngadto sa mga anak sa tawo hangtud karon.”⁹

Kon wala kita magtinguha sa paggamit niini nga agianan sa pagpadayag, nagpuyo kita nga wala mopahimulos sa mga pribilehiyo sa priesthood. Sama pananglit, adunay nagtuo apan wala makahibalo nga sila nagtuo. Nakadawat sila og lain-laing mga tubag pinaagi sa ligdong, hinay nga tingog sa taud-taud nga panahon, pero tungod kay kini nga inspirasyon ingon og gamay kaayo ug dili importante, sila wala makaila kon para sa unsa kini. Isip resulta, sila nagtugot nga ang pagduha-duha mopugong kanila sa pagtuman sa ilang potensyal isip mga tighupot sa priesthood.

Ang pagpadayag ug pagpamatuod dili kanunay moabut uban sa dakong gahum. Kadaghanan, ang pagpamatuod moabut sa hinay-hinay—ginagmay kada higayon. Usahay moabut sa labihan ka hinay nga lisud ang paghinumdom sa ensakto nga gutlo nga kita nasayud nga ang ebanghelyo tinuod. Ang Ginoo mohatag kanato og “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto.”¹⁰

Sa pipila ka mga paagi, ang atong pagpamatuod sama sa usa ka snowball nga modako sa kada ligid. Magsugod kita sa gamay nga kahayag—bisan kon kini usa lang ka tinguha sa pagtuo. Sa hinay-hinay, “ang kahayag mounong ngadto sa kahayag,” ¹¹ ug “siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw,” ¹² nga “sa tukma nga higayon [kita] makadawat sa iyang kahingpitan.”¹³

Hunahunaa kon unsa kini ka mahimayaon nga makaabut kita lapas sa atong yutan-ong mga limitasyon, nga maabli ang atong mga mata sa pagsabut ug makadawat og kahayag ug kahibalo gikan sa celestial nga mga tinubdan! Ato kini nga pribilehiyo ug oportunidad isip mga naghupot sa priesthood sa pagtinguha sa personal nga pagpadayag ug sa pagkat-on kon unsaon aron masayud sa kamatuoran nga kita mismo pinaagi sa siguro nga pagsaksi sa Balaang Espiritu.

Matinguhaon kita nga mangita sa kahayag sa personal nga inspirasyon. Mangamuyo kita sa Ginoo sa pagtuga sa atong hunahuna ug kalag sa kidlap sa pagtuo nga makahimo kanato sa pagdawat ug pag-ila sa balaanon nga pagpangalagad sa Balaang Espiritu alang sa atong piho nga mga sitwasyon sa kinabuhi ug alang sa atong mga hagit ug mga katungdanan sa priesthood.

Ikatulo: Pagkaplag og Kalipay diha sa Priesthood nga Pagserbisyo

Sa akong pagtrabaho isip usa ka piloto sa eroplano, aduna koy oportunidad nga mahimong check ug training captain. Kabahin niini nga trabaho mao ang pagbansay ug pagtesting sa sinati na kaayo nga mga piloto aron sa pagsiguro nga sila aduna sa gikinahanglan nga kahibalo ug mga kahanas sa luwas ug sa maayo nga pagmaneho niadtong dagko nga mga jet.

Akong nabantayan nga dihay mga piloto kinsa, bisan human sa daghang mga tuig sa pagpalupad, wala mawad-i sa kaikag sa pagsaka ngadto sa kapanganuran, nga “mibiya sa mga restriksyon sa Yuta ug milatas sa kapanganuran sakay sa eroplano.” ¹⁴ Ganahan sila sa tingog sa naghaguros nga hangin, sa andar sa dagkong mga makina, ang pagbati nga “nahiusa sa hangin ug nahiusa sa ngitngit nga panganod ug sa kabitoonan sa unahan.”¹⁵ Ang ilang kadasig makatakod.

Dihay pipila usab nga ingon og nagsunod-sunod lang. Na-master nila ang mga sistema ug ang pagpalupad sa mga jet, pero wala ang ilang kalipay sa pagpalupad “diin wala malupad sa lark, o sa agila.”¹⁶Wala ang ilang pagbati sa pagdayeg sa masanag nga pagsubang sa adlaw, sa katahum sa gilalang sa Dios samtang sila mitadlas sa mga kadagatan ug mga kontinente. Kon ilang natuman ang opisyal nga mga kinahanglanon, gipapasar nako sila, apan sa samang higayon naluoy ko nila.

Mahimong mangutana kamo sa inyong kaugalingon kon kamo ba nagsunod-sunod lamang isip tighupot sa priesthood—naghimo sa unsay gilauman apan wala makasinati sa kalipay nga inyoha untang masinati. Ang paghupot sa priesthood naghatag kanato og daghang mga oportunidad nga mabati ang kalipay nga gipahayag ni Ammon: “Kita wala bay dako nga katarungan sa paglipay? … Kita nahimo nga mga himan diha sa mga kamot sa [Ginoo] sa pagbuhat niining mahinungdanon ug kahibulongan nga buhat. Busa, maghimaya kita … sa Ginoo; oo, kita maglipay.”¹⁷

Mga kaigsoonan, ang atong relihiyon usa ka malipayon nga relihiyon! Bulahan kaayo kita nga nakahupot sa priesthood sa Dios! Sa basahon sa Mga Salmo atong mabasa, “Bulahan ang katawhan nga nakaila sa tingog sa trumpeta: managlakaw sila, O Ginoo, sa kahayag sa imong pamayhon.”¹⁸ Kita makasinati niining mas dakong kalipay kon kita mangita lamang niini.

Sa kasagaran pakyas kita nga masinati ang panalangin nga moabut gikan sa inadlaw-adlaw, tinuoray nga priesthood nga pagserbisyo.Usahay ang mga buluhaton ingon og mga salagubangon. Mga kaigsoonan, dili kita motugot nga magpakabuhi nga masamok sa tulo ka K: kakapoy, kabalaka, ug kabagulbulan.Wala nato mapahimusli ang atong mga pribilehiyo kon kita motugot sa kalibutanon nga mga babag sa pagpalayo kanato gikan sa abunda nga kalipay nga nagagikan sa matinud-anon ug mapahinunguron nga priesthood nga pagserbisyo, ilabi na sulod sa mga bong-bong sa atong kaugalingong mga panimalay. Wala nato mapahimusli ang atong mga pribilehiyo kon kita mapakyas sa pag-ambit sa pista sa kalipay, kalinaw, ug kalipay nga gihatag sa Dios nga buhong ngadto sa matinud-anong mga sulugoon sa priesthood.

Batan-ong mga lalaki, kon ang pagsayo ngadto sa simbahan aron motabang sa pag-andam sa sakrament bation nga usa ka kahasol imbis usa ka panalangin, nan dapiton ko kamo sa paghunahuna unsa kaha ang kahulugan niining sagradong ordinansa ngadto sa miyembro sa ward nga tingali adunay mahagiton nga semana. Mga kaigsoonan, kon ang inyong mga paningkamot sa home teaching ingon og walay kalampusan, dapiton ko kamo sa pagtan-aw uban sa hugot nga pagtuo kon unsay mahimo sa usa ka pagbisita sa usa ka sulugoon sa Ginoo alang sa pamilya kinsa adunay dili makita nga mga problema. Kon kini mao ang focus sa inyong priesthood nga pagserbisyo, ang Espiritu sa Dios mopuno sa inyong mga kasingkasing ug mga hunahuna; modan-ag kini sa inyong mga mata ug mga nawong.

Isip mga naghupot sa priesthood, dili kita magmagahi sa kahibulongan ug katingalahan sa unsay gisalig sa Ginoo kanato.

Panapos

Akong minahal nga mga kaigsoonan, hinaut nga maningkamot kita sa pagkat-on sa doktrina sa balaan nga priesthood, hinaut nga atong palig-unon ang atong mga pagpamatuod sa hinay-hinay pinaagi sa pagdawat og mga pagpadayag sa Espiritu, ug hinaut nga kita makakaplag og tinuod nga kalipay sa kada adlaw nga priesthood nga pagserbisyo. Kon buhaton nato kining mga butanga, magsugod kita sa pagpahimulos sa atong potensyal ug mga pribilehiyo isip mga tighupot sa priesthood, ug kita makahimo sa “pagbuhat sa tanang mga butang pinaagi ni Kristo nga makapalig-on [kanato].”¹⁹ Niini ako mopamatuod isip usa ka Apostol sa Ginoo ug mobilin kaninyo sa akong panalangin sa sagrado nga pangalan ni Jesukristo, amen.