Mga Sumusunod ni Kristo

Ni Elder Walter F. González

Sa Kapangulohan sa Seventy

Ang mga sumusunod ni Kristo nagsunod sa sumbanan sa Manluluwas diha sa ilang kinabuhi nga naglakaw diha sa kahayag.

Sa miaging Oktubre ang akong asawa ug ako mikuyog nila ni Elder ug Sister Neil L. Andersen alang sa groundbreaking sa bag-ong templo didto sa Córdoba, Argentina. Sama sa naandan, usa ka komperensya alang sa mga mamahayag ang misunod sa seremonya. Usa ka journalist, dili miyembro sa simbahan, mikomentaryo nga nakaobserbar siya kon unsa kanindot ang pagtagad sa mga kalalakin-an sa ilang mga asawa. Dayon wala damha siya nangutana, “Tininuod ba kana o pakaaron-ingnon lang?” Sigurado ko nga aduna siyay lahi nga nakita ug gibati diha sa atong mga miyembro. Tingali nakita niya ang tinguha sa atong mga miyembro nga mosunod ni Kristo. Ang mga miyembro sa tibuok kalibutan adunay ingon nga tinguha. Sa samang higayon, minilyon ka mga tawo kinsa dili mga miyembro sa Simbahan adunay tinguha usab nga mosunod Kaniya.

Bag-ohay lang ang akong asawa ug ako nakadayeg sa mga tawo didto sa Ghana ug sa Nigeria. Kadaghanan dili mga miyembro sa atong simbahan. Nalipay kaayo kami nga makita ang ilang tinguha sa pagsunod ni Kristo nga gipahayag diha sa kadaghanan sa ilang mga panag-istoryahanay sa ilang mga panimalay, sa ilang mga sakyanan, sa ilang mga bongbong, ug sa ilang mga billboard. Wala pa kami makakita sukad og hilabihan ka daghan nga mga simbahan sa Kristiyano nga dug-ol kaayo.

Isip mga Santos sa Ulahing mga Adlaw, katungdanan nato ang pagdapit sa minilyon nga sama niini aron moanhi ug motan-aw kon unsay madugang sa atong simbahan sa maayo nga mga butang nga anaa na kanila. Si bisan kinsa nga gikan sa bisan asa nga kontinente, klima, o kultura mahimong masayud sa iyang kaugalingon nga si Propeta Joseph Smith nakakita sa Amahan ug sa Anak diha sa usa ka panan-awon. Mahimo siyang masayud nga ang langitnong mga sinugo mipahiuli sa priesthood ug nga ang Basahon ni Mormon laing tugon ni Jesukristo. Sa mga pulong sa Ginoo ngadto kang Enoch, “Pagkamatarung [gipakanaog] gikan sa langit; ug kamatuoran [gipadala] gikan sa yuta aron sa [pagpamatuod] sa Bugtong Anak [sa Amahan].”¹

Ang Manluluwas misaad, “Siya nga magasunod kanako dili gayud magalakaw sa kangitngit, hinonoa magabaton siya sa kahayag nga magahatag og kinabuhi.”² Ang mga sumusunod ni Kristo nagsunod sa sumbanan sa Manluluwas diha sa ilang kinabuhi nga naglakaw diha sa kahayag. Duha ka mga kinaiya ang makatabang kanato sa pag-ila kon asa kutob ang atong pagsunod Kaniya. Una, ang mga sumusunod ni Kristo mahigugmaon nga mga tawo. Ikaduha, ang mga sumusunod ni Kristo naghimo ug nagtuman sa mga pakigsaad.

Ang unang kinaiya, ang pagkamahigugmaon, tingali mao ang usa ka butang nga namatikdan sa journalist didto sa Córdoba diha sa atong mga miyembro sa Simbahan. Nagsunod kita ni Kristo tungod kay naghigugma kita Kaniya. Kon kita nagsunod sa Manunubos tungod sa gugma, nagsunod kita sa Iyang kaugalingong ehemplo. Pinaagi sa gugma ang Manluluwas masulundon ngadto sa kabubut-on sa Amahan ubos sa bisan unsa pa nga kahimtang. Ang atong Manluluwas masulundon bisan kon kini nangahulugan og hilabihan nga kasakit sa pisikal ug emosyonal, bisan kon kini nangahulugan nga pagalatuson ug pagabugal-bugalan, bisan kon kini nangahulugan nga ang Iyang mga kaaway mosakit Kaniya samtang ang Iyang mga higala mobiya Kaniya. Ang maulaong sakripisyo, nga talagsaon sa misyon sa Manluluwas, mao ang talagsaon kaayo nga pagpahayag sa gugma sukad. “Ang silot sa atong pakigdait diha sa ibabaw niya; ug tungod sa iyang mga labod kita nangaayo.”³

Ingon nga si Kristo misunod sa Amahan sa bisan unsa pa man nga kahimtang, kita kinahanglan usab nga mosunod sa Iyang Anak. Kon kita mohimo sa ingon, dili kini igsapayan kon unsa nga matang sa pagpanglutos, pag-antus, kasakit, o “tunok dinhi sa lawas”⁴ ang atong atubangon. Wala kita mag-inusara. Si Kristo motabang kanato. Ang Iyang malumo nga kalooy molig-on kanato diha sa bisan unsa pa man nga kahimtang.⁵

Ang pagsunod ni Kristo mahimong mangahulugan og pagsalikway sa daghang mahal nga mga butang, sama sa gibuhat ni Ruth nga Moabihanon. Isip usa ka bag-ong kinabig, tungod sa gugma alang sa Dios ug kang Noemi, gibiyaan niya ang tanang mga butang aron mosunod sa iyang relihiyon.⁶

Kini mahimong mangahulugan usab og pagpakigbatok kalisdanan ug tintasyon. Sa iyang kabatan-on, si Jose gibaligya ngadto sa pagkaulipon. Gipalayo siya gikan sa tanan nga iyang gihigugma. Sa wala madugay gitintal siya aron makasala sa pagpanapaw. Iyang gibuntog ang tintasyon ug miingon, “Busa unsaon ko paghimo kining dakong pagkadautan, ug makasala batok sa Dios?”⁷ Ang iyang gugma sa Dios mas gamhanan kay sa bisan unsa nga kalisdanan o tintasyon.

Karon kita adunay moderno nga mga Ruth ug mga Jose sa tibuok kalibutan. Sa dihang si Brother Jimmy Olvera gikan sa Guayaquil, Ecuador, nakadawat sa iyang mission call, ang iyang pamilya naglisud og maayo. Sa adlaw nga mobiya na siya, giingnan siya nga kon molakaw siya, mawad-an siya og pamilya. Uban sa kasakit sa dughan milakaw siya. Samtang didto pa siya sa misyon, ang iyang inahan mihangyo kaniya sa pagpabilin og dugay-dugay didto sa misyon tungod kay nakadawat sila og daghan kaayong mga panalangin. Karon si Brother Olvera nagserbisyo isip usa ka patriarch sa stake

Ang tinuod nga paghigugma kang Kristo mosangkap sa gikinahanglan nga kalig-on aron sa pagsunod Kaniya. Ang Ginoo Mismo mipakita niini sa dihang gipangutana Niya si Pedro katulo ka mga higayon, “Gihigugma mo ba ako?” Human nga gipamatuod pag-usab ni Pedro ang iyang gugma alang Kaniya, ang Ginoo misulti ngadto ni Pedro mahitungod sa umaabut nga mga kalisdanan. Dayon ang panawagan miabut: “Sumunod ka kanako.” Ang pangutana sa Manluluwas ngadto kang Pedro mahimo usab nga ipangutana ngari kanato: “Gihigugma mo ba ako?” Gisundan sa panawagan sa paglihok: “Sumunod ka kanako.”⁸

Ang gugma usa ka gamhanan nga impluwensya sa atong kasingkasing diha sa atong paningkamot nga magmasulundon. Ang gugma alang sa atong Manluluwas makapadasig kanato sa pagsunod sa Iyang mga sugo. Ang gugma alang sa inahan, amahan, o kapikas makapadasig usab sa atong pagkamasulundon sa mga baruganan sa ebanghelyo. Ang paagi sa atong pagtagad sa uban mopakita kon unsa ka maayo ang atong pagsunod sa atong Manluluwas diha sa paghigugma sa usag usa.⁹ Atong mapakita ang atong gugma alang Kaniya kon kita mohunong aron sa pagtabang sa uban, kon kita “hingpit nga matinuoron ug matarung diha sa tanang mga butang,”¹⁰ ug kon kita mohimo ug motuman sa mga pakigsaad.

Ang ikaduha nga kinaiya nga anaa sa mga sumusunod ni Kristo mao ang paghimo ug pagtuman sa mga pakigsaad, sama sa Iyang gibuhat. Si Moroni mipasabut og maayo nga “ang pagpaagas sa dugo ni Kristo … anaa sa pakigsaad sa Amahan ngadto sa kapasayloan sa inyong mga sala, nga kamo mahimo nga balaan, nga walay lama.”¹¹

Si Propeta Joseph Smith mitudlo nga bisan gani sa wala pa mamugna kini nga yuta, ang mga pakigsaad gihimo na didto sa langit.¹² Ang karaan nga mga propeta ug mga patriyarka mihimo og mga pakigsaad.

Ang Manluluwas Mismo mipakita sa ehemplo. Siya gibunyagan aron sa pagtuman sa tanang pagkamatarung pinaagi sa usa ka tawo nga adunay tukma nga awtoridad. Pinaagi sa Iyang bunyag, ang Manluluwas misaksi ngadto sa Amahan nga Siya magmasulundon sa pagtuman sa tanang mga sugo sa Amahan.¹³ Sama sa karaang panahon, kita usab nagsunod ni Kristo ug naghimo og mga pakigsaad pinaagi sa mga ordinansa sa priesthood.

Ang paghimo og mga pakigsaad mao ang usa ka butang nga ang minilyon ka mga tawo kinsa dili mga miyembro sa atong simbahan mahimo nga idugang ngadto sa maayo nga mga butang nga anaa na kanila. Ang paghimo og mga pakigsaad usa ka pagpahayag sa gugma. Kini usa ka paagi sa pagpahayag ngadto Kaniya, “Oo, mosunod ko Kanimo tungod kay nahigugma ko Kanimo.”.

Ang mga pakigsaad naglakip og mga saad, “gani kinabuhing dayon.”¹⁴ Ang tanan nga mga butang molihok alang sa atong kaayohan kon kita mohinumdom sa atong mga pakigsaad.¹⁵ Kinahanglang gayud nga kini pagahimoon ug pagatumanon aron hingpit nga madawat ang mga saad nga ihatag niini. Ang gugma alang sa Manluluwas ug ang paghinumdom sa atong mga pakigsaad makatabang kanato sa pagtuman niini. Ang pag-ambit sa sakrament usa ka paagi sa paghinumdom niini.¹⁶ Ang laing paagi mao ang pagtambong kanunay sa templo. Akong nahinumduman ang bag-ong magtiayon didto sa South America nga gustong magbulag tungod kay dili sila magkasinabut.Usa ka maalamon nga lider sa priesthood mitambag kanila nga motambong sa templo ug maminaw og maayo sa mga pulong ug mga saad sa mga pakigsaad nga gihimo didto. Mibuhat sila sa ingon ug naluwas ang ilang kaminyoon. Ang gahum sa atong mga pakigsaad mas mahinungdanon kay sa bisan unsa nga hagit nga atong giatubang o mahimong atong atubangon.

Niadtong mga miyembro nga dili aktibo sa ebanghelyo, palihug balik. Batyagi ang panalangin sa paghinumdom ug pagbag-o sa mga pakigsaad pinaagi sa pagtambong sa sakrament ug sa templo. Ang pagbuhat sa ingon usa ka pagpahayag sa gugma ug nagpakita og kaandam nga mamahimong usa ka tinuod nga sumusunod ni Kristo. Makapasarang kini kaninyo sa pagdawat sa tanang gisaad nga mga panalangin.

Niadtong kinsa dili mga miyembro sa among simbahan, ako modapit kaninyo sa pagbansay og hugot nga pagtuo, paghinulsol, ug pagmahimong sarang sa pagdawat sa pakigsaad sa bunyag diha sa Ang Simbahan ni Jesukristo sa mga Santos sa Ulahing mga Adlaw. Sa pagbuhat sa ingon, inyong mapakita ang inyong gugma ngadto sa atong Langitnong Amahan ug ang inyong kaandam sa pagsunod ni Kristo.

Ako mopamatuod nga kita mas magmalipayon kon atong sundon ang mga pagtulun-an sa ebanghelyo ni Jesukristo. Samtang maningkamot kita sa pagsunod Kaniya, ang mga panalangin sa langit moabut kanato. Nasayud ko nga ang Iyang mga saad matuman samtang kita naghimo ug nagtuman sa mga pakigsaad ug mamahimong tinuod nga mga sumusunod ni Kristo. Ako mopamatuod sa Iyang dakong gugma alang sa matag usa kanato, ug ako naghimo sa ingon sa pangalan ni Jesukristo, amen.