Pag-andam sa Kalibutan alang sa Ikaduhang Pag-anhi

Neil L. Andersen

Sa Korum sa Napulog Duha ka mga Apostoles

Ang inyong misyon mahimong usa ka sagrado nga oportunidad sa pagdala sa uban ngadto ni Kristo ug sa pagtabang sa pag-andam alang sa Ikaduhang Pag-anhi sa Manluluwas.

Mamulong ako karong gabhiona ilabi na ngadto sa mga nag-edad og 12 hangtud 25 kinsa naghupot sa priesthood sa Dios. Kami naghunahuna kaninyo sa kanunay ug kami nag-ampo alang kaninyo. Kausa ako naistoryahan kabahin sa among kwatro anyos nga apo nga lalaki nga giduot ang iyang manghud nga lalaki. Human maam-ami ang naglihak nga bata, ang akong asawa, si Kathy, miduol sa kwatro anyos ug nangutana, “Nganong imong giduot ang imong manghud?” Iyang gitan-aw ang iyang lola ug mitubag, “Mimi, pasayloa ko. Nawala ang akong CTR nga singsing, ug dili na ko makapili sa husto.” Kami nasayud nga ikaw kanunay nga naningkamot sa pagpili sa husto. Pinangga kaayo ka namo.

Naghunahuna ba kamo kon nganong gipadala kamo dinhi sa yuta niining panahona? Wala kamo natawo sa panahon nila ni Adan ug Eva o sa panahon nga ang mga paraon mao ang nagamando sa Ehipto o sa panahon sa Ming Dynasty. Mianhi kamo sa yuta niining panahona, 20 ka mga siglo human sa unang pag-anhi ni Kristo. Ang priesthood sa Dios gipahiuli dinhi sa yuta, ug ang Ginoo mipahimutang sa Iyang kamot sa pag-andam sa kalibutan alang sa Iyang mahimayaong pagbalik. Mao kini ang mga adlaw sa dagkong oportunidad ug importante nga mga responsibilidad. Mao kini ang inyong mga adlaw.

Sa inyong bunyag, inyong gipahayag ang inyong hugot nga pagtuo diha ni Jesukristo. Sa inyong ordinasyon nganha sa priesthood, ang inyong mga talento ug espirituhanon nga mga kapasidad napalambo. Usa sa inyong importante nga mga responsibilidad mao ang pagtabang sa pag-andam sa kalibutan alang sa Ikaduhang Pag-anhi sa Manluluwas.

Ang Ginoo mipili og usa ka propeta, si Presidente Thomas S. Monson, aron modumala sa buhat sa Iyang priesthood. Kaninyo, si Presidente Monson miingon: “Ang Ginoo nagkinahanglan og mga misyonaryo.”¹ “Kada takus, makahimo nga batan-ong lalaki kinahanglan mangandam sa pagserbisyo og misyon. Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo [kaninyo] kinsa gihatagan og hilabihan ka daghan.”²

Ang misyonaryo nga pagserbisyo nagkinahanglan og sakripisyo. Sa kanunay adunay butang nga inyong biyaan sa higayon nga kamo motubag sa tawag sa propeta aron moserbisyo.

Kadtong kinsa nagsunod sa dula nga rugby nahibalo nga ang All Blacks sa New Zealand, usa ka pangalan nga gihatag tungod sa kolor sa ilang uniporme, mao ang kinasikatan nga rugby team sukad.³ Ang mapili nga maapil sa All Blacks didto sa New Zealand mahimong makomparar sa pagdula sa usa ka football sa Superbowl team o sa World Cup soccer team.

Niadtong 1961, sa edad nga 18 ug naghupot sa Aaronic Priesthood, si Sidney Going, padulong na nga mahimong star sa rugby sa New Zealand. Tungod sa iyang talagsaong mga abilidad, daghan ang naghunahuna nga siya ang mapili inig sunod tuig alang sa nasyonal nga All Blacks rugby team.

Pag-edad og 19, niining kritikal nga panahon sa iyang nagkanindot nga rugby career, si Sid mipahayag nga iyang biyaan ang dula nga rugby aron magmisyon. Ang pipila mitawag kaniya og hanggaw. Ang uban mitawag kaniya og buang.⁴ Mireklamo sila nga ang iyang oportunidad sa dula nga rugby basin dili na gayud moabut pa.

Alang kang Sid dili mahinungdanon ang unsay iyang biyaan—ang mahinungdanon mao ang oportunidad ug responsibilidad nga nagpaabut. Siya adunay katungdanan sa priesthood nga mohatag og duha ka tuig sa iyang kinabuhi aron isangyaw ang katinuod ni Ginoong Jesukristo ug sa Iyang gipahiuli nga ebanghelyo. Walay bisan unsa—bisan ang kahigayunan nga makadula sa national team uban sa tanang pasidungog nga mahatag niini—ang makababag kaniya gikan niana nga katungdanan.⁵

Gitawag siya sa usa ka propeta sa Dios sa pagserbisyo didto sa Western Canada Mission. Niining bulana kwarenta ka tuig na ang milabay, ang 19 anyos nga si Elder Sidney Going mibiya sa New Zealand aron moserbisyo isip usa ka misyonaryo sa Ang Simbahan ni Jesukristo sa mga Santos sa Ulahing mga Adlaw.

Si Sid misulti kanako og usa ka kasinatian nga iyang nasinati didto sa iyang misyon. Gabii kadto, ug siya ug ang iyang kompanyon mopauli na unta sa ilang apartment. Nakahukom sila nga mobisita og usa pa ka pamilya. Ang amahan mipasulod kanila. Si Elder Going ug ang iyang kompanyon mipamatuod sa Manluluwas. Ang pamilya midawat sa Basahon ni Mormon. Ang amahan nagbasa sa tibuok gabii. Pagkahuman sa usa ka semana ug tunga nahurot niya og basa ang tibuok Basahon ni Mormon, ang Doktrina ug mga Pakigsaad, ug ang Perlas nga Labing Bililhon. Pipila ka semana ang milabay ang pamilya nabunyagan.⁶

Usa ka misyon imbis moapil sa All Blacks team sa New Zealand? Mitubag si Sid, “Ang panalangin sa [pagdala sa uban] ngadto sa ebanghelyo mas labaw ka mahinungdanon kay sa bisan unsang butang nga [inyo] gayud nga isakripisyo.”⁷

Tingali naghunahuna kamo kon unsay nahitabo ni Sid Going human sa iyang misyon? Labing importante: ang mahangturong kaminyoon ngadto sa iyang minahal, si Colleen; lima ka halangdon nga mga anak; ug ang henerasyon sa mga apo. Nagpakabuhi siya nga nagsalig sa iyang Amahan sa Langit, nagsunod sa mga sugo, ug nagserbisyo sa uban.

Ug ang rugby? Human sa iyang misyon, si Sid Going nahimong usa sa labing bantugan nga magdudula sa kasaysayan sa All Blacks, nga midula sulod sa 11 ka mga season ug nagserbisyo sulod sa daghang katuigan isip ilang captain sa team.⁸

Unsa ka maayo si Sid Going? Maayo kaayo siya nga ang mga iskedyul sa pagbansay ug pagdula nausab tungod kay dili siya modula og Dominggo.⁹ Maayo kaayo si Sid nga ang Rayna sa England miila sa iyang kontribusyon sa dula nga rugby.¹⁰ Maayo kaayo siya nga ang usa ka libro gisulat mahitungod kaniya nga giulohan og Super Sid.

Unsa kaha kon kadto nga mga pasidungog wala moabut ni Sid human sa iyang misyon? Usa sa dakong mga milagro sa misyonaryo nga pagserbisyo niini nga Simbahan mao nga si Sid Going ug ang liboan nga sama kaniya wala mangutana, “Unsay akong makuha gikan sa akong misyon?” kondili, “Unsay akong mahatag?”

Ang inyong misyon mahimong usa ka sagrado nga oportunidad sa pagdala sa uban ngadto ni Kristo ug sa pagtabang sa pag-andam alang sa Ikaduhang Pag-anhi sa Manluluwas.

Ang Ginoo dugay nang misulti kalabut sa gikinahanglan nga mga pagpangandam alang sa Iyang Ikaduhang Pag-anhi. Ngadto kang Enoch, Siya namahayag, “Pagkamatarung Ako mopakanaog gikan sa langit; ug kamatuoran Ako mopadala gikan sa yuta, … ug pagkamatarung ug kamatuoran Ako mosugo nga mosilhig sa yuta ingon sa usa ka lunop, aron pagpundok sa akong pinili gikan sa upat ka mga suok sa yuta.”¹¹ Si propeta Daniel nanagna nga sa ulahing mga adlaw ang ebanghelyo mokaylap ngadto sa mga kinatumyan sa yuta, sama sa usa ka “bukid [nga] gisapsap nga walay kamot ang [usa ka] bato.”¹² Si Nephi naghisgut mahitungod sa Simbahan sa ulahing mga adlaw ingon ang gidaghanon diyutay ra, mikatap sa tibuok yuta.¹³ Ang Ginoo namahayag niini nga dispensasyon, “Kamo gitawag sa pagpahinabo sa pagpundok sa akong pinili.”¹⁴ Akong batan-on nga mga kaigsoonan, ang inyong misyon usa ka talagsaon nga oportunidad ug responsibilidad, nga importante niining gisaad nga pagpundok ug may kalabutan sa inyong mahangturong padulngan.

Gikan sa unang mga adlaw sa Pagpahiuli, ang mga Kaigsoonan seryoso kaayo sa ilang buluhaton sa pagsangyaw sa ebanghelyo. Niadtong1837, pito pa lamang ka tuig human sa pag-organisar sa Simbahan, atol sa panahon sa kakabus ug pagpanggukod, ang mga misyonaryo gipadala aron itudlo ang ebanghelyo didto sa England. Sa nagsunod nga pipila ka katuigan, ang mga misyonaryo nagsangyaw didto sa nagkalainlaing mga dapit sama sa Austria, French Polynesia, India, Barbados, Chile, ug sa China.¹⁵

Gipanalanginan sa Ginoo kini nga buhat, ug ang Simbahan na-establisar sa tibuok kalibutan. Kini nga miting gihubad ngadto sa 92 ka mga pinulongan. Mapasalamaton kita sa 52,225 ka full time nga mga misyonaryo nga nagserbisyo sa sobra sa 150 ka mga nasud.¹⁶ Bisan asa sa kalibutan adunay matarung nga mga misyonaryo nga nagpamatuod kabahin sa Manluluwas. Hunahunaa ang espirituhanong gahum sa 52,000 ka mga misyonaryo, hinatagan sa Espiritu sa Ginoo, lig-ong namahayag nga “walay lain nga ngalan nga gihatag ni lain nga mga agianan ni mga paagi diin ang kaluwasan modangat …, lamang diha ug pinaagi sa ngalan ni Kristo.”¹⁷ Among ipahayag ang among pasalamat sa napulo ka liboan ka mga returned missionary kinsa mihatag ug padayong naghatag sa ilang kinamaayohan. Ang kalibutan giandam na alang sa Ikaduhang Pag-anhi sa Manluluwas tungod sa buhat sa Ginoo pinaagi sa Iyang mga misyonaryo.

Ang misyonaryo nga pagserbisyo usa ka espirituhanon nga buhat. Ang katakus ug pagpangandam mahinungdanon. Si Presidente Monson nag-ingon, “Batan-ong mga lalaki, ako kamong gi-awhag sa pag-andam alang sa pagserbisyo isip usa ka misyonaryo. Ipabilin ang inyong kaugalingon nga limpyo ug putli ug takus nga morepresentar sa Ginoo.”¹⁸ Sa katuigan sa dili pa kamo magmisyon, palihug hinumdumi ang sagrado nga buluhaton nga nagpaabut kaninyo. Ang inyong mga binuhatan sa dili pa kamo magmisyon dako kaayo og impluwensya sa gahum sa priesthood nga inyong dad-on ngadto sa misyon. Andama og maayo ang inyong kaugalingon.

Si Presidente Monson namulong kabahin sa “kada takus, makahimo nga batan-ong lalaki [nga nangandam] sa pagserbisyo og misyon.”¹⁹ Usahay, tungod sa panglawas o sa uban nga mga hinungdan, ang usa ka tawo tingali dili makaserbisyo. Masayran ninyo ang inyong abilidad sa pagserbisyo kon makig-istorya kamo sa inyong mga ginikanan ug sa inyong bishop. Kon ingon man niini ang inyong sitwasyon, palihug ayaw batia nga dili kaayo kamo importante diha sa mahinungdanon nga buluhaton nga nagpaabut kaninyo. Ang Ginoo manggihatagon kaayo niadtong naghigugma Kaniya, ug Siya mohatag og laing mga oportunidad alang kaninyo.

Ang uban tingali maghunahuna kon sila tigulang na ba kaayo aron moserbisyo. Usa nako ka higala gikan sa China nakakaplag sa Simbahan didto sa Cambodia sa dihang nag-edad pa siya og sobra sa 20. Naghunahuna siya kon mahimo pa ba gihapon siya nga magmisyon. Human sa pag-ampo ug pakig-istorya sa iyang bishop, gitawag siya ug matinud-anong miserbisyo didto sa Siyudad sa New York. Kon ang inyong edad mao ang inyong gikabalak-an, pag-ampo ug pakig-istorya sa inyong bishop. Siya mogiya kaninyo.

Singkwenta porsento sa tanang mga misyonaryo nagserbisyo diha sa ilang kaugalingong nasud. Sakto lamang kana. Ang Ginoo misaad nga “ang matag tawo makapaminaw sa kahingpitan sa ebanghelyo sa iyang kaugalingon nga dila, ug sa iyang kaugalingon nga pinulongan.”²⁰ Kamo pagatawgon pinaagi sa panagna ug magserbisyo sa dapit diin kamo labing gikinahanglan.

Ganahan kaayo ko nga makighimamat og mga misyonaryo sa tibuok kalibutan. Bag-ohay lang samtang nagbisita ko sa Australia Sydney Mission, kahibalo ba mo kinsa ang akong nakit-an? Si Elder Sidney Going—ang sikat sa rugby sa New Zealand. Nag-edad na og 67 karon, sa makausa pa nahimo na usab siyang usa ka misyonaryo, apan niining higayuna kauban sa usa ka kompanyon nga iyang kaugalingong pinili: si Sister Colleen Going. Gisultihan ko niya kabahin sa usa ka pamilya nga ilang natudloan. Ang mga ginikanan mga miyembro apan nahimong dili kaayo aktibo sa Simbahan sulod sa daghan na kaayong katuigan. Sila si Elder ug Sister Going mitabang nga mabalik ang hugot nga pagtuo sa pamilya. Si Elder Going misulti kanako sa gahum nga iyang gibati samtang nagbarug sa bunyaganan tupad sa amahan sa pamilya samtang ang kinamagulangan nga anak nga lalaki, nga karon naghupot na og priesthood, mibunyag sa iyang manghud nga lalaki ug babaye. Mipahayag siya sa kalipay nga makasaksi sa usa ka nagkahiusa nga pamilya nga manag-uban sa pag-angkon og kinabuhing dayon.²¹

Namulong nganha kaninyo, ang Unang Kapangulohan miingon:

“Kamo [usa] ka pinili nga [espiritu] nga natawo niining panahona nga ang mga responsibilidad ug mga kahigayunan, ingon man usab ang mga tintasyon, hilabihan kaayo. …

“Kami nag-ampo alang sa matag usa kaninyo … [nga] inyong mahimo ang mahinungdanong buhat nga nagpaabut kaninyo … nga kamo mahimong takus [ug andam] sa pagpadayon sa mga responsibilidad sa pagtukod sa gingharian sa Dios ug sa pag-andam sa kalibutan alang sa Ikaduhang Pag-anhi sa Manluluwas.”²²

Ganahan ko sa painting ni Harry Anderson sa Ikaduhang Pag-anhi sa Manluluwas. Nagpahinumdom kini kanako nga Siya moanhi diha sa pagkahalangdon ug gahum. Ang katingalahan nga mga panghitabo ipakita diha sa taas sa langit, ug sa ubos sa yuta.²³

Kadtong nagpaabut sa pag-anhi sa Manluluwas “mangita [Kaniya].” Ug Siya misaad, “Ako moabut”! Ang mga matarung makakita Kaniya “diha sa mga panganod sa langit [uban sa tanang balaan nga mga anghel], gisul-uban sa gahum ug dako nga himaya.”²⁴ “Ang anghel magpatingog sa iyang trumpeta, ug ang mga santos … gikan sa upat ka mga suok sa yuta”²⁵ “pagasakgawon aron sa pagsugat kaniya.”²⁶ Kadtong “nakatulog,” nagpasabut nga kadtong takus nga mga Santos kinsa nangamatay na, “mobangon [usab] aron sa pagsugat [Kaniya].”²⁷

Ang mga kasulatan mabasa, “Ang Ginoo [mo]tunob sa iyang tiil sa ibabaw [sa] bungtod,” ²⁸ ug “[Siya] mopadungog sa iyang tingog, ug ang tanan nga mga lumulupyo sa yuta makadungog niini.”²⁹

Akong batan-ong kaigsoonan sa priesthood, ako mopamatuod sa kahalangdon, apan labaw sa tanan, sa katinuod niining maanindot nga panghitabo. Ang Manluluwas buhi. Mobalik Siya nganhi sa yuta. Ug kon dinhi man niining kinabuhia o sa sunod nga kinabuhi, kamo ug ako magmaya sa Iyang pag-anhi ug magpasalamat sa Ginoo nga Siya mipadala kanato dinhi sa yuta niining panahona aron sa pagtuman sa atong sagrado nga katungdanan sa pagtabang og andam sa kalibutan alang sa Iyang pagbalik. Sa pangalan ni Jesukristo, amen.