E ore roa te aroha e mou
Silvia H. Allred
Tauturu Matamua i roto i te Peresideniraa Rahi o te Sotaiete Tauturu
Faatupu i te hinaaro ia î ratou i te horo‘a o te aroha, te hinaaro mau i te Mesia.
Ua haere maua ta’u tane e mata‘ita‘i i te oire ra no Nauvoo, i Illinois. I reira ua parahi maua i roto i te piha i te tahua i ni‘a o te fare Red Brick Store, tei reira te piha toro‘a a te peropheta Iosepha Semita e ta’na imiraa faufaa. Ua faaroo maite maua i te taata arata‘i a faahiti ai oia i te mau ohipa o te Faaho‘i-faahou-raa mai tei tupu i reira.
Ua taviri ti‘a’tu to’u feruriraa i te haamau-raa-hia te Sotaiete Tauturu e no te tahi mau haapiiraa ta te mau tuahine o te Sotaiete Tauturu i farii na roto mai i te peropheta Iosepha i roto i taua piha ra. Ua riro taua mau haapiiraa ra ei mau parau tumu niu i ni‘a i te reira te Sotaiete Tauturu i patuhia ai. Te mau opuaraa no te faarahi i te faaroo, no te haapuai i te mau utuafare no Ziona, e no te ma‘imi e no te tauturu i te feia i roto i te fifi, ua faatumuhia ïa mai te haamataraa ra. Ua tu‘ati noa te reira e te mau hinaaro matamua a te peropheta.
I roto i taua mau apooraa matamua ra, ua faahiti te peropheta Iosepha i te mau papa‘iraa a Paulo i to Korinetia. I roto i ta’na a‘oraa mana no ni‘a i te aroha, ua faahiti Paulo i te faaroo, te tia‘i, e te aroha, ua faaoti na roto « o tei hau râ i taua toru nei, o te aroha ïa ».1
Ua faataa mai oia i te mau huru ia amuihia i roto i te aroha. Ua parau oia :
« E faaoromairaa roa to te aroha, e te hamani maitai ; e ore te aroha e feii : e ore te aroha e faarahi, e ore hoi e faaahaaha,
« … Eita e imi i te maitai no’na iho, eita e riri vave, eita e mana‘o ino ia vetahi ê ;
« Eita e oaoa i te parau-tia ore, e oaoa râ i te parau mau ;
« E tapo‘i i te mau mea atoa ra, e faaroo i te mau mea atoa ra, e tiai i te mau mea atoa ra, e haamahu i te mau mea atoa ra.
« E ore roa te aroha e mou ».2
I te mau tuahine, ua parau te peropheta Iosepha e : « Eiaha e taoti‘a i to outou ite no ni‘a i te mau viretu o to outou mau taata tupu. … E ti‘a ia outou ia faarahi i to outou varua ia vetahi ê mai te mea e rave outou mai ta Iesu i rave. … A tupu ai outou i te rahi i roto i te hara ore e te parau-ti‘a, a tupu ai outou i te rahi i roto i te maitai, a vaiiho i to outou mau aau ia rahi, ia faarahihia te reira e vetahi ê, e ti‘a ia outou ia faaoroma‘i i te mau hapa e te mau hape a te taata nei. Auê ïa te faufaa rahi o te mau varua o te taata nei ! »3
I riro a‘e ra te faahitiraa « E ore roa te aroha e mou » ei tumu parau na te Sotaiete Tauturu no te mea te haapa‘o ra te reira i te mau haapiiraa e te tonoraa ta te perohpeta i tuu i ni‘a i te mau tuahine a te Sotaiete Tauturu ia « haamaitai i te feia vĕvĕ » e ia « faaora i te mau varua ».4
Ua haapa‘ohia teie mau parau tumu niu e te mau tuahine o te Sotaiete Tauturu na te ao ato‘a nei, no te mea ho‘i o teie ihoa te tumu no te ohipa a te Sotaiete Tauturu.
Eaha te aroha ? Nahea tatou ia farii i te aroha ?
Ua faataa te peropheta Moromona i te aroha mai « te hinaaro mau o te Mesia »,5 o ta Paulo i haapii mai e, « ei nia roa iho… o te aroha »,6 e o ta Nephi i faahamana‘o mai ia tatou « i tuuhia mai ai te faaue e te Fatu ra, e te Atua, a na ô mai ai ra e, ei aroha to te taata atoa, e o taua aroha ra, o te hamani maitai ïa ».7
Ia hi‘o tatou i te faaiteraa a Paulo no te aroha, te haapii mai nei tatou e, aita te aroha i te hoê raveraa noa aore râ i te hoê ohipa e horo‘a mai i muri iho, o te hoê râ huru ïa riro mai, te hoê huru no te aau, te aau maru o te faatupu mai i te mau ohipa no te aroha.
Te haapii ato‘a mai ra o Moromona e, e horo‘ahia te aroha i te mau pĭpĭ ti‘a mau o te Fatu e na te aroha e tamâ i te feia e vai ra te reira ia ratou.8 Hau atu, te haapii nei tatou e, o te aroha o te tao‘a horo‘a hanahana ïa o ta tatou e ti‘a ia imi e ia pure. E ti‘a ia tatou ia farii i te aroha i roto i to tatou aau no te noaa i te basileia tiretiera.9
No te maramarama i te aniraa a te Fatu ia tatou ia « faaahu na [tatou] iho i te ruuruu o te aroha »,10 e mea ti‘a ia ui tatou eaha te mau rave‘a o te tauturu mai ia tatou ia faananea i te aroha.
A tahi roa, e ti‘a ia vai te hiaai no te faatupu i te aroha e ia riro mai te Mesia ra te huru.
Te taahiraa piti, ia pure tatou. Ua a‘o mai Moromona e « e pure atu i te Metua ma te puai hope o te aau ia î [tatou] i teie nei aroha ». Taua here hanahana ra o te aroha ïa, e ia î tatou i tera here, e « riro tatou mai Ia’na ra te huru ».11
E horo‘a mai te tai‘oraa i te mau papa‘iraa mo‘a i te mau mahana ato‘a i to tatou feruriraa no te Faaora e i te hoê hiaai ia riro mai mai Ia’na ra te huru.
I roto i ta’u piha toro‘a, ua faatautau vau i te hoê hoho‘a peni na Minerva Teichert tei piihia, Rescue of the Lost Lamb [Faaoraraa i te Mamoe Mo‘e]. Te faaite nei te reira i te Faaora e ti‘a ra i rotopu i Ta’na nana, e te tape‘a ra i roto i To’na rima te hoê fanau‘a. Te tauturu nei te reira ia’u ia feruri i Ta’na taparuraa : « A faaamu i ta’u mau mamoe »,12 e no’u iho nei te auraa ia aupuru tatou i te feia e faaati nei ia tatou e ia ara taa ê mau i ni‘a i te feia i roto i te fifi.
O te Faaora te hi‘oraa maitai a‘e no te huru no te haaparareraa i te aroha. I te roaraa o Ta’na misioni i te tahuti nei, ua faaite Oia i te aroha no te feia poia, te feia hara, te feia i roohia i te ati, e no te feia ma‘i. Ua tavini Oia i te taata vĕvĕ e i te taata moni, i te mau vahine, te mau tamarii, e te mau tane ; i te utuafare, te mau hoa, e te feia êé. Ua faaore Oia i te hapa a te feia i faahapa Ia’na, e ua mauiui Oia e ua pohe no te mau taata ato‘a.
I te roaraa o to’na oraraa, ua faaohipa ato‘a te peropheta Iosepha Semita i te aroha a faaite ai oia i te here autaea‘eraa e te faatura no vetahi. Ua matauhia oia no ta’na hamani maitai, to’na here, to’na tauturu aroha, e to’na mana‘ona‘o i te feia e haati ra ia’na.
I teie mahana, ua haamaitaihia tatou e te hoê peropheta tei î i te aroha. E hi‘oraa te peresideni Monson no tatou e no te ao ato‘a nei. Te oomo nei oia i te pereue no te aroha. E mea mărû oia, e te aau aroha, e te opiripiri ore, hoê tavini mau no te Fatu ra ia Iesu Mesia.
Te haapii nei te peresideni Monson e : « Te aroha o te faaoroma‘iraa ïa i te tahi taata tei faainoino ia outou. O te pato‘iraa ïa ia inoino ohie noa. O te fariiraa ïa i te mau paruparu e te mau manuïa-ore-raa. O te fariiraa ïa i te taata mai to ratou iho huru mau. O te hi‘oraa ïa i ni‘a’tu i te mau huru rapae i te mau maitai o te ore roa e mohimohi na roto i te tau. O te pato‘iraa ïa ia tuu ia vetahi ê i roto i te tahi mau faito ».13
Ia vai ana‘e te aroha i roto ia tatou, e hinaaro tatou ia tavini e ia tauturu ia vetahi ê noa’tu e ere i te taime tano roa e ma te tia‘i ore i te haamauruururaa e aore râ i te faaho‘iraa no te reira. Eiaha tatou e tia‘i ia tonohia’tu tatou no te tauturu atu, no te mea, e tuhaa ihoa te reira no to tatou huru. A ma‘iti ai tatou ia vai mărû, ia aupuru atu, ia opiripiri ore, ia faaoroma‘i, ia farii noa, ia faaore i te hapa, ia faahoa, e ia ore ia feruri ia tatou iho, e ite mai tatou i te îraa o te aroha.
Te faafana‘o nei te Sotaiete Tauturu ia tatou i te mau rave‘a rau no te tavini i te tahi. O te hoê o taua mau rave‘a faufaa rahi ra no te faaite i te aroha, o te hahaereraa ïa a te mau tuahine. Na roto i te hahaereraa tano, e rave rahi ta tatou mau rave‘a no te here, no te aupururaa, e no te tavini i te tahi. Ia faaite tatou i te aroha, e aore râ te here, e tamâhia ïa tatou e e haamo‘ahia to tatou aau, e na te reira ïa e tauturu ia tatou ia riro hau atu mai te Faaora te huru.
Te faahiahia nei au a ite ai au i te mau ohipa rau o te aroha ta te mau tuahine haahaere e rave nei na te ao ato‘a nei ma te pahono-hua-raa i te hinaaro o te tuahine tata‘itahi e o to ratou utuafare. I teie mau tuahine hahaere faaroo, te parau atu nei au e, « na roto i taua mau ohipa rii ra o te aroha, te pee ra outou i te Faaora, e, te haa ra outou ei mauihaa i roto i To’na na rima a tauturu ai outou, a haapa‘o ai, a faati‘a ai, a tamahanahana ai, a faaroo ai, a faaitoito ai, a aupuru ai, a haapii ai, e a haapuai ai outou i te mau tuahine o ta outou e tia‘i nei. E faaite atu vau i te tahi mau hi‘oraa o taua mau ohipa ra.
Te mauiui nei o Rosa no te ma‘i omaha tihota e te tahi mau ma‘i rii. Ua tomo mai oia i roto i te Ekalesia tau matahi noa i teie nei. E metua vahine otahi oia e te hoê tamaiti. E mea pinepine oia i te tape‘ahia i te fare ma‘i no te tahi tau mahana. Aita to’na na tuahine hahaere e afa‘i noa ia’na i te fare ma‘i, e hahaere ato‘a râ e e tamahanahana raua ia’na i te fare ma‘i ma te haapa‘o ato‘a i ta’na tamaiti i te fare e i te haapiiraa. Ua riro to’na na tuahine hahaere ei hoa e ei utuafare no’na.
I muri mai i te tahi mau hahaereraa matamua i te hoê tuahine, ua ite o Kathy e, aita taua tuahine ra i ite i te tai‘o, te hinaaro nei râ oia ia haapii. Ua faaoti o Kathy e tauturu ia’na, ma te ite e, e titauhia te taime rahi, te faaoroma‘i, e te rave-tamau-raa.
E vahine apî o Emily, e te imi haere ra i te parau mau. Ta’na tane, o Michael, e ere oia i te mea anaanatae roa i te parau no te haapa‘oraa. A ma‘ihia ai o Emily e ua tape‘ahia oia i te fare ma‘i, o Cali, te hoê tuahine no te Sotaiete Tauturu, o te ora ra i te fare i pihai iho, na’na e tunu i te maa no te utuafare, e haapa‘o i te aiû, e tamâ i te fare, e i ani e ia farii o Emily i te haamaitairaa o te autahu‘araa. No teie mau ohipa o te aroha, ua măru mai te aau o Michael. Ua faaoti oia e haere i te mau pureraa a te Ekalesia e ia farii i te mau misionare. Aita i maora a‘e nei, ua bapetizohia o Emily e o Michael.
« E ore roa te aroha e mou. E hamani maitai te aroha, eita e imi i te maitai no’na iho, e faaoromai i te mau mea ato‘a ra e haamahu i te mau mea ato‘a ».14
Ua parau te Peresideni Henry B. Eyring e :
« Ua î te aamu o te Sotaiete Tauturu i te mau aamu no te mau ohipa taviniraa faahiahia. …
Tei roto i teie Sotaiete te mau vahine aau aroha na roto i to ratou haapa‘oraa i te mau fafauraa e itehia i roto ana‘e i te Ekalesia mau a te Fatu. To ratou aau aroha, no roto mai ïa Ia’na na roto i To’na Taraehara. Ua arata‘ihia ta ratou ohipa aroha e Ta’na hi‘oraa, no te mauruuru rahi no Ta’na horo‘a mure ore o te aroha e na roto i te Varua Mo‘a, o Ta’na i tono mai no te pee i To’na mau tavini i roto i ta ratou misioni no te aroha. No te reira, ua rave ratou e ua ti‘a ia ratou ia rave i te mau ohipa taa ê roa no vetahi ê e ia roaa te oaoa noa’tu e, ua rahi roa’toa to ratou nava‘i ore ».15
Te pûpûraa i te taviniraa e te faaiteraa i te aroha ia vetahi ê, e tauturu ia tatou ia upooti‘a i ni‘a i to tatou iho mau fifi e ia faariro te reira mai te hoê tamataraa tano noa.
Te ho‘i nei au i teie nei i te mau haapiiraa a te peropheta Iosepha i te mau tuahine i te mau mahana matamua o te Faaho‘i-faahou-raa mai. Ma te titau-rû-raa i te faaohipa i te aroha e te horo‘araa i te rima tauturu, ua parau oia : « Mai te mea e ora outou i te faito o teie mau parau tumu, auê ïa te rahi e te hanahana o te mea o ta outou e farii mai i roto i te basileia tiretiera ! Mai te mea e ora outou i te faito o ta outou mau faufaa taa ê, eita e mau ia tape‘a i te mau melahi i te ohiparaa e outou na ».16
Mai te mau mahana matamua i Nauvoo, i reira te mau tuahine i te imi-haere-raa e e tautururaa i te feia i roto i te fifi, mai teie e vai ra i teie mahana. Ua riro te mau tuahine i roto i te basileia ei mau pou papû no te puai i te pae varua, te ohipa tautururaa aroha, e no te paieti. E tere haereraa te mau tuahine hahaere e farerei e e aupuru i te tahi e te tahi. Te pee nei ratou i te hi‘oraa o te Faaora e te rave nei mai Ta’na i rave na.
E ti‘a te mau tuahine ato‘a o te Sotaiete Tauturu ia î roa i te here, ma te iteraa e, ua riro ta ratou mau ohipa no te aroha ei puai no te poihere i te tahi e ia ratou iho. E ite-papû-mai ratou e, o te aroha, o te hinaaro mau ïa o te Mesia e e ore te reira e mou.
Ia tai‘o ana‘e outou i te aamu o te Sotaiete Tauturu, e faaûru mai te reira ia outou ia ite e, o teie parau tumu faufaa roa o te evanelia o te hoê taura e nati ra i te buka taato‘a.
Te faaoti nei au e te hoê titauraa manihini i te mau tuahine ato‘a i roto i te Ekalesia, ia faatupu i te hinaaro ia î ratou i te horo‘a o te aroha, te hinaaro mau o te Mesia. A faaohipa i te mau rave‘a ato‘a no te rave i te maitai, no te hopoi atu i te tauturu e te faaora i te feia e haaati ra ia outou, oia ato‘a to outou iho utuafare. E haamanuïa te Fatu i ta outou mau tutavaraa.
Ia faatupu mai to tatou ite i te here rahi o te Metua e o te Tamaiti no tatou, e to tatou faaroo e te aau mehara no te Taraehara, ia tatou ia faananea e ia faaohipa i te aroha i ni‘a i te feia e haaati ra ia tatou. O ta’u ïa pure na roto i te i‘oa o Iesu Mesia, amene.