Ia rave i te mea tano i te taime tano, ma te tia‘i ore

José L. Alonso

No te Hitu Ahuru

Ua horo‘a mai te Faaora i te hoê hi‘oraa rahi no te tia‘i-ore-raa no te faatae i te tamahanahanaraa i te feia i mo‘e te anaanatae e te oaoa.

I teie tau e rave rahi taata e ora ra i roto i te ati e te aehuehu rahi. Aita ratou e ite ra i te pahonoraa i ta ratou mau uiraa e aita e tuatiraa i to ratou mau hinaaro. Ua mo‘e roa i te tahi te anaanatae e te oaoa. Ua parau te mau peropheta e, e itehia te oaoa mau i roto i te peeraa i te hi‘oraa e te mau haapiiraa a te Mesia. O Oia to tatou Faaora, o Oia to tatou haapii, e o Oia te hi‘oraa maitai roa‘e.

To’na ora, e ora taviniraa ïa. Ia tavini ana‘e tatou i to tatou taata tupu, te tauturu ra ïa tatou i te feia i roto i te fifi. Na roto i teie ohipa e ite ato‘a mai tatou i te pahonoraa i to tatou iho mau fifi. A pee ai tatou i te Faaora, te faaite ra ia tatou i to tatou here i te Metua i te Ao ra e i Ta’na Tamaiti, ia Iesu Mesia, e e riro mai a‘e tatou mai ia Raua ra te huru.

Ua parau te Arii Beniamina no te faufaa o te taviniraa, i te na-ô-raa e, « a tavini ai outou i te taata nei, te tavini ïa outou i to outou Atua ».¹ E rave‘a ta te taata tata‘itahi ia tavini e ia faaite atu i te here.

Ua ani mai te peresideni Thomas S. Monson ia haere « e faaora » e ia tavini ia vetahi ê. Ua parau oia : « E ite tatou e, te feia ta tatou e tavini, o tei ite na roto i ta tatou ohipa te rima o te Fatu, eita ïa e roaa ia ratou te parau no te faaite i te tauiraa o tei tae mai i roto i to ratou oraraa. E tupu mai te hinaaro i te tavini, i te haere ma te haehaa, e i te ora ia au i te Faaroo. Ua araara to ratou mata varua ma te hi‘o i te mau fafauraa o te tau mure ore, no reira hoê â ta ratou parau e te parau a te taata matapo no’na te mata tei faaaraarahia e Iesu: ‘Hoê roa a‘u parau i ite, e matapo to’u i mutaa ihora, e teie nei te ite nei au’ ».²

I te mau mahana ato‘a e rave‘a ta tatou no te tauturu atu e no te tavini atu—te raveraa i te mea maitai, i te taime tano, ma te tia‘i ore. A feruri na i te rahiraa taata e taime fifi no ratou no te fana‘o i te ohipa e aore râ o tei ma‘ihia, o te vai otahi nei, o te mana‘o nei e aita ta ratou e tauihaa faahou. Eaha ta outou e nehenehe e rave no te tauturu atu ? A feruri na i te taata e faaea ra i piha‘iho i to outou fare, te ua ra e ua ino to’na pereoo, e te ani ra i ta outou tauturu. Eaha te mea tano ia rave no’na ? Eaha te taime tano no te rave i te reira ?

Te haamana‘o ra vau i te hoê taime ua haere matou to’u utuafare i te oire pû no Mehiko no te hoo mai i te tahi ahu no ta maua na e piti tamarii. E mea apî roa raua. Ta maua matahiapo e tamaroa ïa e piti noa matahiti to’na, e te teina e hoê noa ïa matahiti. Ua î te taata i roto i te mau aroa. I to matou haereraa, ua tape‘a noa maua te rima o ta maua mau tamarii, ua faaea rii matou no te hi‘o i te hoê mea, e i te iteraa’tu, ua mo‘e ta maua matahiapo ! Aita maua i ite e nahea ra, aita râ oia ia maua ra. Ma te tia‘i ore, ua horo maua e imi ia’na. Ua imi maua e ua pii ia’na, ua tupu mai te pe‘ape‘a rahi, ma te mana‘o e e mo‘e roa oia ia maua. Ma to maua feruriraa, ua taparu maua i te Metua i te Ao ra ia tauturu ia maua ia ite mai ia’na.

I te hopea, ua ite maua ia’na. Tei reira oia, te mata‘ita‘i ra i te mau ha‘uti na roto i te maramarama o te fare toa. Ua tauahi maua ia’na e ua apa ia’na, e ua faaoti papû ihora maua ia hi‘o-tuutuu-ore i ta maua na tamarii ia ore te hoê ia mo‘e faahou atu. Ua haapii mai maua e, no te ite mai i ta maua tamaiti, aita e titauhia ia faatupu i te apooraa. Ua rave ohie noa maua, ua imi haere maua ia’na o tei mo‘e atu. Ua haapii ato‘a mai maua e, aita roa’tu ta maua tamaiti i ite e, ua mo‘e oia.

Te mau taea‘e e te mau tuahine, e mea rahi paha te taata, ma te tumu ore, o tei mo‘e i to tatou nei mata e o te ore i ite e ua mo‘e ratou. Mai te mea e tia‘i rii tatou, e mo‘e roa paha ratou.

No te rahiraa o ratou e hinaaro nei i ta tatou tauturu, aita e titauhia ia hamani i te hoê faanahoraa apî aore râ ia rave i te mau ohipa huru rau e te moni rahi. E hinaaro noa ratou i to tatou tamauraa ia tavini—ia rave i te mea tano i te taime tano, ma te tia‘i ore.

I to te Fatu fâraa i te nunaa o te Buka a Moromona, ua horo‘a mai Oia i te hoê hi‘oraa rahi no te tia‘i-ore-raa no te faatae i te tamahanahanaraa i te feia i mo‘e te anaanatae e te oaoa. Ma te haapii i te mau taata, ua ite Oia e aita ratou i maramarama roa i Ta’na mau parau. Ua ani atura Oia ia ratou ia ho‘i i to ratou fare e ia feruri i te mau mea Ta’na i parau ia ratou. Ua parau Oia ia ratou ia pure i te Metua e ia faaineine ia ratou no te ho‘i mai i te mahana i muri mai, e ho‘i mai Oia e haapii ia ratou.³

I te hopea o Ta’na mau parau, ua hi‘o Oia i te nunaa e ua ite ihora ia ratou i te ta‘iraa, no te mea ua hinaaro ratou ia faaea mai Oia.

« E ua na ô atura oia ia ratou, inaha, ua î to’u aau i te aroha ia outou.

« E feia ma‘i to outou, a hopoi mai i ŏ nei. E pirioi anei to outou, e matapo, e lepera, e hapepa, e vava, e feia roohia i te tahi huru ma‘i ? A hopoi mai ia ratou i ŏ nei, e na’u e faaora ia ratou, e aroha hoi to’u ia outou na ; ua î to’u aau i te aroha ».⁴

E ua hopoi mai i ta ratou mau taata ma‘i Ia’na ra, e ua faaora Oia ia ratou. E ua haapi‘o atura te mau taata ia ratou i raro i To’na pae avae e ua arua Ia’na e ua apa i Ta’na na avae, « e rarirari a‘era tana avae i to ratou roimata ». I reira, ua faaue Oia ia ratou ia hopoi mai ratou i ta ratou mau tamarii, e ua haamaitai Oia ia ratou hoê e te hoê.⁵ O teie te hi‘oraa ta te Faaora i horo‘a mai. No te mau taata ato‘a To’na here, aita a‘e râ Oia e haamo‘e i te hoê noa a‘e.

Ua ite au e, to tatou Metua i te Ao ra o te here ïa, te taa maitai e te faaoroma‘i. Ta’na Tamaiti, o Iesu Mesia, ua here ato‘a Oia ia tatou. Te faatae mai nei Raua i te tauturu na roto i ta Raua mau peropheta. Ua haapii mai au e, e te vaira te paruru rahi i roto i te peeraa i te mau peropheta. « Te faaoraraa » te vai mana noa ra. Ua parau te peresideni Monson e : « Te titau nei te Fatu i to tatou feruriraa. Te titau nei Oia i ta tatou ohipa. Te titau nei Oia i to tatou haaraa. Te titau nei Oia i to tatou iteraa papû. Te titau nei Oia i to tatou haapa‘o ».⁶

E hoê hopoia na tatou e hoê rave‘a rahi. E rave rahi o te hinaaro nei ia farii faahou mai i te iteraa no te anaanatae e te oaoa na roto mai i te ohiparaa a te Ekalesia. E tae mai taua oaoa ra na roto i te fariiraa i te mau oro‘a, na roto i te raveraa i te mau fafauraa mo‘a, e na roto i te haapa‘oraa i te reira. Ua hinaaro te Fatu ia tatou ia tauturu atu ia ratou. A mata na ia rave i te mea tano i te taime tano, ma te tia‘i ore.

Te faaite papû nei au e, te ora nei te Atua e o Oia to tatou Metua. Te ora nei Iesu Mesia e ua horo‘a Oia i To’na ora ia ho‘i tatou i mua i te aro o te Metua i te Ao ra. Ua ite au e, o Oia to tatou Faaora. Ua ite au e, te ite tamau nei â tatou i to Raua maitai. Te faaite papû nei au e, te peresideni Thomas S. Monson o ta Raua ïa peropheta e o teie ana‘e te Ekalesia mau i ni‘a i te fenua nei. Ua ite au e, o Iosepha Semita te peropheta no te Faaho‘i-faahou-raa mai. Te faaite papû nei au e, te Buka a Moromona o te parau a te Atua. Te horo‘a mai nei te reira ia tatou i te aratai‘raa e te hi‘oraa no te pee atu ia riro mai a‘e tatou mai te Atua e mai Ta’na Tamaiti Here ra te huru. E te na reira nei au i te i‘oa o to tatou Fatu ia Iesu Mesia, amene.