Te faufaa o te hoê i‘oa

M. Russell Ballard

No te Pŭpŭ no te Tino Ahuru Ma Piti Aposetolo

Ia faahotu tatou… i te haapapûraa e, Te Ekalesia a Iesu Mesia i te Feia Mo‘a i te Mau Mahana Hopea Nei o te i‘oa ïa ta te Fatu Iho i faaue mai e ia itehia mai tatou.

Elder Hales, na ni‘a ia matou paatoa, te faatae atu nei matou i to matou tapa‘o here e e te haamauruuru rahi i to oe taeraa mai i teie po‘ipo‘i.

Mai te amuiraa rahi no eperera mai â, ua tae noa mai i to’u feruriraa te parau no te faufaa o te i‘oa. I teie mau ava‘e i ma‘iri a‘e nei, ua tae mai na hina e rave rahi i roto i to matou utuafare. E au ra ua vitiviti roa to ratou taeraa mai e aita roa i ti‘a ia’u i te tai‘o tano ia ratou, atira noa’tu, ua riro te hoê aiû ei haapoupouraa no to matou utuafare. Ua topahia ratou i te i‘oa taa ê o tei ma‘itihia e to ratou na metua, te i‘oa e piihia ratou i roto i to ratou oraraa, te i‘oa e faataa te tahi i te tahi. O te reira mau i roto i te mau utuafare ato‘a, e oia ato‘a i rotopu i te mau faaroo ato‘a o te ao nei.

Ua ite te Fatu o Iesu Mesia i te faufaa ia topa papû i te i‘oa no Ta’na Ekalesia i roto i teie mau mahana hopea nei. I roto i te tuhaa 115 o te Parau Haapiiraa e te Mau Parau Fafau, ua topa Oia Iho i te i‘oa o te Ekalesia : « No te mea o teie te i‘oa e topahia i nia i ta’u ekalesia i te mau mahana hopea nei, oia Te Ekalesia a Iesu Mesia i te Feia Mo‘a i te Mau Mahana Hopea Nei » (irava 4).

E teie ta te arii Beniamina i haapii i to’na nunaa i roto i te Bula a Moromona.

« I hinaaro ai au ia rave outou i te i‘oa o te Mesia i nia ia outou, outou atoa hoi o tei fafau i te faufaa i te Atua, oia hoi ia haapao maitai outou e tae noa’tu i te hopea o to outou ora nei …

« E ua hinaaro vau ia ite atoa outou e, o te i‘oa teie ta’u i parau ra e, horoa ïa vau ia outou, e e ore roa’tu te reira e paraihia, maori râ na roto i te hara ; e tena na, a ara ia ore outou ia hara, ia ore te i‘oa ra ia paraihia i to outou aau » (Mosia 5:8, 11).

E rave tatou i te i‘oa o te Mesia i ni‘a ia tatou i roto i te pape no te bapetizoraa. E faaapî tatou i te maitai o te bapetizoraa i te mau hepetoma ato‘a ia rave tatou i te oro‘a, no te faaite i to tatou hinaaro ia rave i To’na i‘oa i ni‘a ia tatou e no te fafauraa ia haamana‘o tamau noa Ia’na (a hi‘o PH&PF 20:77, 79).

Ua ite anei tatou i te haamaitairaa ia rave i ni‘a ia tatou i te i‘oa o te Tamaite Here e te Fanau Tahi a te Atua ? Ua maramarama anei tatou eaha te auraa mau o te reira ? O te i‘oa noa o te Faaora tei horo‘ahia i raro a‘e i te ra‘i no te faaora i te taata (a hi‘o 2 Nephi 31:21).

A haamana‘o na outou, ua aparau na te peresideni Boyd K. Packer i te faufaa o te i‘oa o te Ekalesia i roto i te amuiraa rahi i te ava‘e eperera i ma‘iri a‘e nei. Ua haamaramarama mai oia e « no te mea ua haapa‘o tatou i te heheuraa, te pii nei tatou ia tatou iho Te Ekalesia a Iesu Mesia i te Feia Mo‘a i te Mau Mahana Hopea Nei eiaha râ te Ekalesia Momoni » (« Arata‘ihia e te Varua Mo‘a, » Liahona, Me 2011, 30).

No te faufaa rahi o te i‘oa taatoa o te Ekalesia, te tavevo nei au i te mau heheuraa no roto mai i te mau papa‘iraa mo‘a, te mau arata‘iraa a te Peresideniraa Matamua i roto i te mau rata no 1982 e 2001, e te mau parau ho‘i a te tahi mau aposetolo o tei faaitoito mai i te mau melo o te Ekalesia ia faati‘a e ia haapii i te ao nei e, ua topahia te i‘oa o te Ekalesia ia au i te i‘oa o te Fatu ia Iesu Mesia. O teie te i‘oa ta te Fatu e pii mai ia tatou i te mahana hopea. O te i‘oa o te faataa ê i te Ekalesia i te tahi atu mau pu‘eraa.

Ua feruri rahi au i te tumu te Faaora i horo‘a mai ai i na 15 ta‘o i‘oa o Ta’na Ekalesia tei faaho‘i-faahou-hia mai. E mea roa te reira, teie râ mai te mea e feruri tatou i te reira mai te hoê puohuraa no te ti‘araa o te Ekalesia, e ite ïa tatou i to’na poto, to’na afaro, e to’na ohie. Nahea te tahi tatararaa ê atu e riro ai ei tatararaa hau atu i te afaro ti‘a e te papû maitai, ma te faaohipa i te tahi tau ta‘o rii noa mai teie te huru ?

Ua riro te ta‘o tata‘itahi ei haamaramaramaraa e e mea faufaa. Te ta‘o Te, e faaite ra i te ti‘araa hoê o te Ekalesia i faaho‘i-faahou-hia mai i rotopu i te mau faaroo o te ao nei.

Te mau ta‘o Ekalesia a Iesu Mesia, e faaite ra e, o Ta’na Ekalesia teie. I roto i te Buka a Moromona, ua haapii mai Iesu, « E nahea ïa te ekalesia na’u, ia ore ia parauhia i to’u i‘oa ? Ia parauhia hoi te ekalesia i te i‘oa no Mose, ua riro ei ekalesia na Mose ; e ia parauhia ïa te i‘oa no te taata, ua riro ïa ei ekalesia no taua taata ra i reira ; ia parauhia râ ïa i to’u ra i‘oa e ia patu-mau-hia i nia i ta’u ra evanelia, e ekalesia na’u ïa te reira » (3 Nephi 27:8).

I te Mau Mahana Hopea Nei, e haamaramarama ra e, e tu‘ati te Ekalesia i te Ekalesia ta Iesu Mesia i faati‘a i te taime o Ta’na taviniraa i te fenua nei, tera râ, ua faaho‘i-faahou-hia mai i teie mau mahana hopea nei. Ua ite tatou e, ua tupu te faaru‘eraa, e aore râ te taivaraa, e ua titauhia te faaho‘i-faahou-raa mai i Ta’na parau mau e te Ekalesia taatoa i to tatou anotau.

Feia Mo‘a, te auraa ra, e pee taua mau melo ra Ia’na e e tutava ho‘i ia rave i To’na hinaaro, ia haapa‘o i Ta’na mau faaueraa, e ia faaineine faahou â ia ora i piha‘iho i to tatou Metua i te Ao ra. Feia Mo‘a, o te feia ïa e imi ra ia haamo‘a i to ratou oraraa na roto i te fafauraa ia pee i te Mesia.

Te faaite papû maitai nei te i‘oa ta te Fatu i horo‘a no Ta’na Ekalesia ia tatou e, o vai tatou e eaha ta tatou e ti‘aturi nei. Te ti‘aturi nei tatou e o Iesu Mesia te Faaora e te Ora no te taata nei. Ua pohe oia no ratou ato‘a o tei tatarahapa i ta ratou mau hara, e ua ofati Oia i te mau tape‘a o te pohe e ua faatupu i te ti‘a-faahou-raa mai te pohe mai. Te pee nei tatou ia Iesu Mesia. E mai ta te arii Beniamina i parau i to’na ra nunaa, te haapapû faahou nei au i te reira no tatou i teie mahana, « Ia haamana‘o outou… ia tamau i [to’na] i‘oa i papai-mau-hia i roto i to outou ra aau » (Mosia 5:12).

Ua anihia tatou ia ti‘a ei ite No’na « i te mau mahana atoa, e i te mau mea atoa, e i roto i te mau vahi atoa » (Mosia 18:9). Te tahi auraa no te reira, maori râ, ia hinaaro tatou ia faaite ia vetahi o vai ta tatou e pee ra e tei roto tatou i tei hea Ekalesia : te Ekalesia a Iesu Mesia. E hinaaro ihoa tatou ia rave i te reira ma te varua o te here e te iteraa papû. Ua hinaaro tatou ia pee i te Faaora ma te ohie e te papû, ma te haehaa, ma te faaite e, e mau melo tatou no Ta’na Ekalesia. Te pee nei tatou Ia’na na roto i te riroraa ei Feia Mo‘a i te Mau Mahana Hopea Nei—te mau pĭpĭ i te mau mahana hopea nei.

E mea pinepine te mau taata e te mau faanahoraa i te piihia i te i‘oa na‘ina‘i e te tahi atu mau taata. E riro te i‘oa na‘ina‘i ei haapotoraa no te hoê i‘oa, e aore râ no roto mai paha te reira i te hoê ohipa tei tupu e aore râ mai te hoê mea i te tino e aore râ te tahi atu mea. Noa’tu aita te i‘oa pii e ti‘a roa e aore râ aita e tano roa i te auraa, e ti‘a ia faaohipa-tano-hia te reira.

Ua topahia te Ekalesia a te Fatu i te i‘oa pii i te tau tahitô ra e i to tatou nei anotau. Ua piihia te mau Feia Mo‘a i roto i te Faufaa Apî ei Keresetiano no te mea te poro ra ratou i te hoê ti‘aturiraa ia Iesu Mesia. Taua i‘oa ra, tei faaohipahia na mua roa ei i‘oa faaoo, ua riro i teie nei ei i‘oa faataa ê ; e e mea tura no tatou ia piihia tatou ei ekalesia Keresetiano.

Ua piihia to tatou mau melo e Momoni no te mea te ti‘aturi nei tatou i te Buka a Moromona : Te Tahi Faahou Ite no Iesu Mesia. Vetahi ua tamata i te faaohipa i te ta‘o Momoni no te amui e no te faatano atu i te feia tei faaru‘e i te Ekalesia e o tei faatupu atu i te tahi atu mau pŭpŭ taa ê. Te reira huru raveraa e arata‘i atu i te taa-ore-raa. Te haamauruuru nei matou no te mau tautooraa a te mau rave‘a haapareraa i te haapaeraa i te faaohipa i te ta‘o Momoni i roto i te hoê huru aehuehuraa te mana‘o o te taata i mua i te parau no te Ekalesia e te feia vahine rau aore râ te tahi atu pŭpŭ e imi ra i te mau peu tahitô. Te faaite papû atu nei au e, aita te pŭpŭ vahine rau, mai te mau pŭpŭ e pii ra ia ratou iho e Momoni Tumu e aore râ te tahi atu i‘oa mai te reira, aita to ratou e tu‘atiraa e Te Ekalesia a Iesu Mesia i te Feia Mo‘a i te Mau Mahana Hopea Nei.

E ere te i‘oa Momoni i te i‘oa taatoa e te i‘oa tano o te Ekalesia, e noa’tu e, ua topahia te reira e te feia faaoo i te mau matahiti matamua o te hamani-ino-raa, ua riro mai te reira ei i‘oa pii fariihia no te tuô atu i te mau melo eiaha râ te faanahoraa. Aita tatou e opanihia ia faaohipa i te i‘oa Momoni, ia tano ana‘e te reira, e ti‘a râ ia tatou ia tamau noa i te faaite papû i te i‘oa taato‘a e te i‘oa ti‘a o te Ekalesia iho. To’na auraa ra, e mea tano ia haapae tatou, e eiaha e faaitoito i te parau ra « Ekalesia Momoni ».

Mai te mau matahiti i terehia mai, a ohipa ai au na te ao nei, ua ani-pinepine-hia vau e, no roto anei au i te Ekalesia Momoni. Teie ta’u pahonoraa, « e melo vau no te Ekalesia a Iesu Mesia. No te mea râ te ti‘aturi nei matou i te Buka a Moromona, o tei topahia i te i‘oa o te hoê peropheta faatere tahitô Marite e o tei riro ei te tahi faahou ite no Iesu Mesia, e pii-ato‘a-hia matou i te tahi taime, e Momoni ». I te mau taime ato‘a, ua farii-maitai-hia teie pahonoraa e ua haamatara te reira i te rave‘a no’u ia haamaramarama atu i te faaho‘i-faahou-raa-hia mai o te îraa o te evanelia i teie mau mahana hopea nei.

Te mau taea‘e e te mau tuahine, a feruri i te ohipa e nehenehe e tupu mai mai te peu noa e pahono atu tatou ma te faaohipa i te i‘oa taato‘a o te Ekalesia mai ta te Fatu i parau mai. E mai te peu aita â i roaa ia outou i te faaohipa i te i‘oa taato‘a, a parau noa atu, « No te Ekalesia a Iesu Mesia vau » e i muri mai a haamaramarama atu « i te Feia Mo‘a i te Mau Mahana Hopea Nei ».

E ani paha te tahi, eaha te parau no te tahua itenati mai te Mormon.org e te tahi ato‘a mau haaparareraa ta te Ekalesia i faahaere. Mai ta’u i parau, mai te peu e parau outou no te mau melo ei Momoni, e mea tano ïa i te tahi taime. No te faaohieraa, te mau taata no rapae i to tatou faaroo, e imi ratou i te parau no tatou na roto i te imiraa i taua ta‘o ra. Ia pia mai ra taua tahua itenati Mormon.org ra, e itehia te i‘oa ti‘a o te Ekalesia e te haamaramaramaraa i te api matamua, e e pura mai te reira i ni‘a i te mau api ato‘a o te tahua. E ere i te mea ohie ia ani i te mau taata ia patapata mai i te i‘oa taatoa o te Ekalesia no te ite mai i to tatou parau e ta tatou mau tahua itenati.

Noa’tu e tamau noa teie mau faaohieraa, eiaha te reira ia tapea i te mau melo ia faaohipa i te i‘oa taato‘a o te Ekalesia ia nehenehe ana‘e. Ia faahotu tatou i roto i to tatou mau utuafare e i ta tatou mau ohiparaa na te Ekalesia e i ta tatou ato‘a ohiparaa i te mau mahana atoa, i te haapapûraa e, Te Ekalesia a Iesu Mesia i te Feia Mo‘a i te mau Mahana Hopea Nei o te i‘oa ïa ta te Fatu Iho i faaue mai e ia itehia mai tatou.

Ua faa‘ite mai te hoê titorotororaa mana‘o e, ua rahi roa te taata aita i maramarama maitai e, te parau Momoni o te mau melo ïa o ta tatou Ekalesia. E te rahiraa o te taata aita i papû atura e Keresetiano te mau Momoni. Ia tai‘o ana‘e ratou i te parau no ta tatou mau Rima Tauturu na roto i te ao nei, i muri iho i te mau vero, te mau aueueraa fenua, te mau miti faaî, e te o‘e, aita ratou e faatuati nei i ta tatou ohipa tautururaa i te taata i ni‘a ia tatou ei pŭpŭ Keretetiano. E mea papû, e mea ohie a‘e na ratou ia maramarama e, te ti‘aturi nei tatou e te pee nei tatou i te Faaora mai te mea e parau tatou iho e melo tatou no Te Ekalesia a Iesu Mesia i te Feia Mo‘a i te mau Mahana Hopea Nei. Na roto i te reira, o ratou o te faaroo i te i‘oa Momoni, e faatu‘ati ratou i taua ta‘o ra i te i‘oa heheu e i te nunaa e pee ra ia Iesu Mesia.

Mai ta te Peresideniraa Matamua i ani i roto i te rata no te 23 no fepuare 2001 : « Te faahitiraa i te i‘oa i heheuhia mai, Te Ekalesia a Iesu Mesia i te Feia Mo‘a i te Mau Mahana Hopea Nei, ua riro ïa ei mea faufaa roa i roto i ta tatou hopoi‘a i te pororaa i te i‘oa o te Faaora na roto i te ao atoa nei. No reira, te ani atu nei matou ia faahiti ana‘e tatou i te i‘oa o te Ekalesia e faahiti ïa tatou i te i‘oa taato‘a e ti‘a ai ».

Ia ho‘i mai tatou i te matahiti 1948 i te amuiraa rahi no atopa, ua parau te peresideni George Albert Smith, « Te mau taea‘e e te mau tuahine, ia faaru‘e outou i teie vahi, e farerei outou i te mau pŭpŭ faaroo taa ê o teie nei ao, ia haamana‘o râ outou e, hoê ana‘e Ekalesia i te ao ato‘a nei tei topahia, ia au i te faaueraa hanahana, i te i‘oa o Iesu Mesia, to tatou Fatu » (i roto i te Conference Report, Atopa 1948, 167).

Te mau taea‘e e te mau tuahine, ia haamana‘o ato‘a tatou i te reira a faaru‘e ai tatou i te amuiraa i teie mahana. Ia vaiho to tatou iteraa papû No’na ia faaroohia e to tatou here tamau No’na i roto i to tatou mafatu, te pure haehaa nei au na roto i To’na i‘oa, te Fatu ra o Iesu Mesia, amene.