11:26

“Ma Bochan ni Gub Fos, Gamed ba Fos”

Rok Elder Shayne M. Bowen

Ko Seventy

Bachan ni ir, mus ko Savior, Yesus Kristus, tini be thamiy e kirebaen’, wurengaen’, nge gafgow e ra yani bingyal’ ma yigo gara ful’ mag sug ko falfalan’.

Napan ni kug warow ko mission u Chile, gag nge companion rog e mada’ gow reb tabinaew ni medlip riy’ ulane e branch. Fare nina ko fare tabinaew nge lal e bitir rok e kar uned gubin e medenum. Kug lemnogew ni yad e chon e Galasia. Tomuren boch e medenum kug filew ni yad e dawri tawfegaed.

Kug non ngak ma kug fith ni fa’an ra rayog ni gu bow nga tabinaew roraed ngu pi’ew e guruy ngorad. Chitamangraed e daniy ba’adag ni nge fil marung’agen efare gospel, machane ke yog ni rayog ni kug filew ngak e tabinaew rok.

Sister Ramirez ke yan u fithik e guruy nib papay. Ma m’agan ni nge fil gubin e machib ni ku rogew ngak. Reb e blayal kug fil ngak marunga’gen taufe ko bitir ni ba’achichig, kug machibnagew ni bitir e ba flont ma riy’dariy’’ fan e taufe rok. Kug fith ngak ni nge biy’eg u babyor ku Mormon:

“Musap gube yoeg ngom ni ba’aray e n’en ni ngam machib nag—kalngaen’ nge tawfe ngak’ e pi’in nib bung rogon i pufthin nagraed nge ma rayog ni ngar denen gaed; arragon, mu fil ngak’ e gallabthir ni thingar kalgaed ngaen’raed min tawfe nagraed, mar sobut’ niged yaed ni boed e pi’in nib bitir nib achichig, ma rayog ni ngar thap gaed ni yaed e pi bitir roraed nib achichig.

“Ere pi bitir roraed nib achichig e de t’uf e kalngaen’ roraed, ara tawfe. Musap, tawfe u dakean e kalngaen’ e be mugu’uliy e pi motochiyel ni nge yog ni ngan n’aegfan e denen.

“Machane bitir nib achichig e yaed bafas rok’ Kristus, ya fa’anra dangay, ma Got e ba Got ni demat’aw, ma kub Got ni ma thilyeg laniyaen’, ma de ta’areb e gidii’ u waen’; ya uw urngin e bitir nib achichig ni kar m’aed ni dan tawfe nagraed!”¹

Tomuren ni ke biy’eg biney e thin, yor. Ma gub balyang nga’. Kug fith ngak, “Sister Ramirez, mang e gamew be rin’ ni ke kireb lanyinum?”

Ke yog, “Dangay, Elder, dariy’’ e ban’an ni ba kireb ni kam rin’. Nel e duw ni ko faram, bay e tir rog ni pagal. Ke yim u’mon ni rayog ni ngan tawfe ir. Padre romad ke yog ni, bachan de tawfe ir, ir e ra par u infierno ko manimus. Bang ko nel e duw, bay e mith rog nge m’ingaen’ ni gu be kol nga’. Tomuren ni ku biy’eg biney e thin, guma nang e ba riy’ul u gilingin e Kan Thothup. Gu be yor ko falfalan’, ya mith nib tomal e chuw.

Kug lem nag e machib ni ke pi’ Joseph Smith, fare Prophet, ke fil e yalen ni ba gapas laniyan: “Somol e ma fek bo’or e gidii, ma bitir nib madway, ni rayog ni nge chuw ko envy ma kirban ma tin nib kirib ko biney e faylang; yad e ba machalbog, ma rib fel’, ni yi ma par nga faylang; aramfam ngad lemnaged ni ngad e falfalan ngay ma dam yor, ni bachan yad be puf ko kireb, ma ra sul ngodad bayay.”²

Tomuren ke gafgow ma kirban ni thabi gel ko nel e duw, ke yib rok e Chitamangiy nu tharmiy ko profet rok, e machib ni ba riy’ul ni yog e gapas ngak biney pin nib kirban. Ma, Sister Ramirez ma Bitir rok ni meruk riy’ e ker uned ko tawfe.

Kug yoloy ngak e tabinaew rog, ni kug gog e magar ni kug thamiy ulan inug ko tafanay rog ni kug nang riy’ ma ko tin ni ba temilang ma riy’ul ulan e gospel rok Yesus Kristus. Dany kug lem nag ni biney e riy’ul e ra yib ngog bayay ulan e yafas rog ma ra auyuwegeg woed e fly ko Gilead.

Magaen’ nug ni gu non ngak pigidii ni ke yim e bitir rok ma ken fith, “Mangfan ke buch ngog?” fa ke marwar u wan ko mich rok ulan Chitmangiy nu Tharimy. Meybil rog riy’ ni udakaen e gilingin e Kan Thothup, ni rayog ni gu pi’ boch e athap, ma gapas, ma nangfan ngay. May gu ba’adag ni gu mang e tin e murwel ni gu ayuwegmed ni ra gel nag e mich romed ulan Chitamangiy nu Tharmiy ni ba sumunguy, ma be nang gubin e ben’an ma pi’ e magawen ngodad ni rayog ni ngad nanged ir, ma ba tuf’ rodad e ayuw Rok.

Napan e February 4 u 1990, bin dilip e bitir ni pagal ke gargel. Kug tunguy nga’ e Tyson. Re pagal ney e ba fel’ ya’an, ma tabinaew rok ke falfalan ngay. Walagen nib pagal nge pinn e pi cha’ e ke falfalan’ ngay. Kad lem naged ni ir pagal ma riy’dariy’’ e thibngin riy’.

Napan ke aw ko mereb e pul, ke ka boch e chalk ni ke piry’eg ngadaken e but. Fare chalk e dabi mithmith u k’ang rok Tyson, ma dabiyog ni nge pogofan nag. Walagen nib ilal ke pirieg Tyson, ke tulul, “Fare titiy, e de pogofan nag, titiy e de pogofan nag.” Kug tabab e CPR ma pining e 911.

Ke fek Tyson ngak e Hospital. Ulan e singgil ni yima son riy’, kug e ul’ul’ gow ko meybil nib yul’yul’, ma kug wenig gow ngak Got ko m’ang’ang riy’. Tomuren e ngiyal’ ni ba n’uw napan, ke yib e tokuta ma ke yog, “Siro ngomew. Riy’Dariy’’ e ben’an nga’ ni rayog ni gu rined. Rayog ni ngam guyed ir.” Ke yan.

Napan kug wared ulan e gin ni bay Tyson riy’, kug guyed ni riy’dariy’’ e yafas riy’. Kug lemnag ni bay e ra’an nib celestial u charen e dugur rok. Ir e ba machalbog.

Ngiyal’ nam kug thamiyew ni woed yafas romow e ke tel. Urogon ni rayog ni ngu e sulew ko bitir romow ma ngu weily fan ni Tyson e dabiy sul ngomad?

Bay ngu weily ni woed kemus ni gag. Pinn rog nge gag e ke thamiyew biney e magowen u ta’abang, machane dabiyog ni ngu gog e thamtham ko chitanangin ma dan ngu athamgil riy’.

Rib math liyiben i weily rogon e thamtham u lan inug ko ngiyal’ nam. Kug thamiy ni woed rogon ni ku mo’ ulan e lik’ay nib kireb ma kug athapag ni fa’an kug od ko fare lik’ay nib kireb ma ra tal. Bo’or e nap de yog ni gu mol. Kug wan ko singgil ko bitir ni ngu nang ni fa’an yad be fel’rogon fa danga.

Thamtham ko thibngin e yib nog. Ke kireb e laninug. Kug lemnag ni gag e ba alit. I gag chitamangin, ma rayog rog ni ngu mantangiy fa cha’. Fa’anra kug rin boch e ben’an de yim’. Bochngiyal’, ma daba’ fapi lem e ra yib ulan gumirchieg, ma ngu chuweg piney ni ba papay, ya bachan ra kireb nageg.

Napan reb e pul nga tonuren ni ke yim’ Tyson, me interview nigeg Elder Dean L. Larsen. Me fek e time rok ni nge, motoyil ngog, ma riguba falfalan’ ko counsel rok nge adag rok. I ga’ar, “Dagur lemnag ni Somoel e ba’adag ni ngam gechig nigem ni bachan e yam’’ ni ke tay e chi pagal rom nem.” Mug thamiy e adag ko Chitamag nu Tharmiy u fithik ta’areb e m’uw ni ke dugliy.

Machane, fapi thamtham e ke ul’ul’ ni nge gechig nageg, ma ke yib e demumuw Nog. “Pi’ney e de mat’aw! Ke urogon e rayog Got ni nge rin’ e pi’ney ngog? Mangfan gag? Mang e kug rin’ ni keyog e piney ngog?” Ma kug puwan’ ngak e pi gidii ni ker athamgil ni nge ayuwegmad. Ke yog e fagar ngog, “gumanang e thamiy rom”, ma kug lem riy’, “Dabiyog ni ngam nang e thamiy rog. Ma ngam chuwriy’.” Ke kireb laninug riy’. Kug tatamra’ ko tafney rog ni de gol, ma tafney nib kireb ko fagar ni ke athamgil nge ayuwegeg.

Napan kug thamiy e thibngig, ma damumuw ma kireb uwun’ nug, kug meybil ni thil e gumircheg riy’. U fithik boch e ban’an ni ba thothup ni ke buch ngog, Somol ke pi’ ngog gumirchan nib be’ech, ma ka bay e mith machane laninug e ke thil riy’. Kug nangfan ni de mororo’nageg, ma bay son nageg e ta’awaath nib yo’or, fa’an kug par nib yul’yul’.

Yafas rog e tabab e nge thil, ma ke yib e athap u wunug, ma ke yan e mulmulaniy. Gu be yog ni biney e yafas ni dathi fare tungun. Fare tefan e ya’al e ba riy’ul’. Machib rok fapi prophets marunga’gen yafas nge yam’ e ba riy’ul’. Biney yafas kemus e gin ko e woen ni rayog ni ngad suloed ko Chitamangdad nu Tharmiy.

Tyson ke par ni ir e rib t’uf ko tabinaew romad. U fithik e duw kari fel’rogon ni rayog ni guyed e murunguy rok’ nib sumunguy rok Chitamangiy nu Tharmiy, ma ke yog ni ngu thamiyed e ayuw ni be pi’ Tyson ngodad. Gube yog ni fare veil e ba thin riy’. Ma fapi thamtham ko yul’yul’, nge adag ma ta’areb laniyan ko tabinaew e dabi tal, napan be ra yim’; ma thamtham ra gel nag.

Bochngiyal’ gidii ra fith, “U nuw napan ni ke fel’ u wunum riy’?” Tin riy’ul riy’, dabiyog ni ngam pagtelin e mith riy’, ma napan ngam mada’ gow e fapi gidii ni ke yim u tabinaew rom. Dabiyog falfalan ni polo’, kemus ni napan ngu mada’ gow napan e kadbul ko Fas Ko Yam’.

“Gidii e ba ya’al. Fapi’ney ni mang e ya’al e ma par ko manimus, ma ya’al ma dugur, u ta’abang, ra yib e falfalan ni polo’;

“Napan e ma kii’, gidii dabiyog ngak e falfaln ni polo’.”³

Machane, woed e ke fil ngodad e Tathapeg, rayog da ul’uliy ko falfalan’.⁴

Kug fil ni amith nib mo’oy ma kari gel rayog nge mang e ba athibthib, napan ni ngam macheleg ko Got ma ngam wenig ngak ko ayuw ni ra yib u woen rok; Fak, Yesus Kristus; ma Tamocho’ Rok, i fare Kan ni Thothup.

Bay e tawa’ath ni rib mangil ulan e yafas rodad. Bay e kireb ngay fa’an de yib e kari kirbaen’ napan ke yim’ e bitir? Gu be pining e magar ngak Chitamangig nu Tharmiy ni yog ni ngad t’ufeg ni manimus. Ma gube pining e magar ko tabinaew ni ma par ko manimus, ma ke dag ngodad ko prophets rok e woen e bayul’.

Mu lemnag e thamtham rom tomuren ni kam tay u but fa cha’ nib t’uf rom u tabinaew rom ni ke yim’ ma kam lemnag ni fa’an gum’ircha’em ra t’aer.

Gube yog ni bachan Ir, Tathapeg rodad e Yesus Kristus, fapi thamtham ko kirbaen’, mo’owaer laniyan, ma mulmulan’uy ra mang e falfalan ni ba polo’. Gube yog ni rayog ni ngad taga’ gad ngak ir ma napan ke yog:

“Dab ngu pagmed ma dariy’ e ayuw: bay gu sul ngomed.

“Dab ki n’uw nap’an ma dab ki guyeg e fayleng, machane gamed e be guyed gag, ma bochan ni gub fos, gamed ba fos.”⁵

Gube michmicheg ni, woed kan yoloey e thin u Preach My Gospel,, “napan ngad taga’ fare Bayul’ ku Yesus Kristus, rayog rok ni Nge ayuwegdad ko fapi magowen, m’ar, nge mith. Rayog ni ngad sug gad ko falfalan’, nge gapasaen’, nge fel’ laniyaen’. Fapi’n’en ni de mat’aw ko yafas ra mang ni ba mat’aw udakaen e Bayul’ rok Yesus Kristus.”⁶

Gube micheg nap’an ko kadbul, nib ra’en nge m’ang’ang ko bin Somm’on e Fas Ko Yyam’’, pi cha’ ni ba t’uf rog nge romed e ra yib ko fapi low woed ke michmicheg Somol ma ra yib ngodad e falfalan ni polo’. Ni bachan e Ba fas, yaed nge gadad ra fas. Udakaen fithingan ni Yesus Kristus, amen.