18:7

Re Faflaen’ ni bay ko Priesthood

Rok President Dieter F. Uchtdorf

Bin L’agruw i Counselor ko Bin Somm’on e Presidency

Aygi ngad athapeged min nanged fan e taw’ath ni be yib ngodad udakaen e priesthood. Aygi athapeged min adag dakaen e muruwel ni kan ning rodad.

Faflaen’ ko Changeg

Nib yo’or e duw faram gag nge boech e captain ko skuky kug mugu’uliyed e athap romad nggu sulweg gad e sikuky ni kakrom. Kug chuway’ gad e 1928 Piper Cub ni ke kireb riy’, ma kug tabab gad nggu fulweged riy’ nib be’ech. Muruwel nem e muruwel ni gu adag dakaen riy’. Be rib fel’ rog ni bachan kug fil rogon e changeg u sikuky ni t’ab rogon u napan be fel’ yangreg.

Kan toy e sikuky nem 35 e duw tomuren pi walag yow fithingan Wright kar changeg gow ko somm’on. Fini gu lemnag riy’ gu thamiy nib kakrom.

Engine riy’ ni dariy’ e starter nib electric riy’; ya napan gabe start nag fare engine u cockpit, yug reb bee’ ran koel fare propeller ma ran chubeg riy’ nib gel mada’ ko ngiyal napan ran muruwel fare engine ni dariy’ ayuw riy’. Napan ke ta’bab urngin e engine ra ngiyal’ nem be gin’ nge faflaen’ riy’.

Napan ke chibiy ngalang u nifeng, ke tamilangeg ni fare Piper Cub e de fal’eg ni nge yaen nib papay. Ya, napan ni bay e nifeng nib gel, be amrogon ni de yaen nga m’on. Gu puguran napan gag nge pagal rog ni fel’ yangren, Guido, ku changeg gow u to’oben e kanawo nib papay u Germany, ma arrogon pi karro u but’ yad papay romow.

Machane, arragon, rib t’uf rog re sikuky ney nib achib! Ya kug rayog nggu changeg ngalang riy’ mab fel’ u wun’ug riy’. Ku rayog ni ngan rungag nge thamiy e ren’em, mab fel’ lamen mab fel’ boen riy’. Pi walag ni Wright brothers kar rognew: “Dariy’ [ban’en] ni t’ab rogon ko faflaen’’ ni be yip ngak piolot u napan be changeg u fithik e nifeng dakaen e poen nib wechwech.”¹

Mab thil rogon, de’ nuw napan biney e duw kug changeg ngalang u fithik e F-18 fighter jet nikug un picha’ nib gelbugwan ni Blue Angels, picha’ nibay ko United States Navy. Ke sulaen’nug e pi rran napan gag be fel’ yangen, ya bachane ni rigag i lal’ e duw faram, chugur ko t’ab e rran ko pul, kug mu’ e fil rog ko air force fighter pilot.

Fare changeg ko re F-18 ya be thilthil rogon ko fare changeg rog ko fare sikuky ni Piper Cub. Ke dag ngog ni changeg rayog ni ngan mang tin nib pithorang. Be ta’abrogon ni ngan lek thil e motochiyel ko changeg nib fel. Machane, ku amrogon napan ku un e Blue Angel ke sulaen’ ug ni jet fighter pilot e muruwel ko picha’ ni fel’ yangren. Nggu gog e thin ko pi walag ni Wright brothers bayay, “Bo’or ko yug reb e tham tham, re tham tham rin yib ngom ko changeg be fekey e gapas ma ran un ko faflaen’’ nib gel nib gel.”² Ma amrogon, changeg rog ko Blue Angels ke fekey reb e tafney ko pi thin mornga’agen pi “angel” ni kan un nigem ran chibiyem ngalang.

Fa’anra kam fitheg bin’ingan e changeg ni kug adag dakaen ngak, dab gu nang fa’anra rayog nggu gog riy’. Ya nriy’ul ni boech rogon be thilthil riy’, arrogon. Machane ku reb rogon, yow changeg be sana ta’abrogon.

Ko fare Piper Cub nge fare F-18, kug thamiy rib gin’, rib faflaen’, mab fel usun riy’. Ma yow ke fekey e nang fan ko pi thin ko poet ni ga’ar ran “maen nib orel ko chen nu Fayleng min [churu’] nga fithik e nifeng nga dakaen e poen.”³

T’ab Rogon e Priesthood u Gubin e Yang

Ma ere, sana ram ning, mang fan kam moeg mornga’agen pi changeg rom ni l’agurw, ma uragon be nangfan romad ko re mo’lung ney fa ko priesthood ni bay rodad fa ko muruwel nib t’uf romad riy’?

Pi walag, ba riy’ul’ ni pi muruwel romad ko ayuw rok priesthood be thil thil rogon boech bee’ ngak bee’? Ya boed rogone boech i med kan changeg riy’ nga lan e F-18 jet ma boech i med kan changeg riy’ nga lan Piper Cub. Boech i med be paer nga langin e ward nge stake u ni gubin e gil’ kan lung riy’ ko cha’ nib yul’yul’ ngay. Ya mangil ney ni kam bay ko mo’lung ko ward nib sug ko gidii’ riy’.

Ku boechi med be paer u bang ko fayleng ni bay kemus buchuw e gidii’ ko Galasia mab buchuw e gidii’ ni bay e priesthood riy’. Sana gabe thamiy kemus yigo’ gur ma bay yo’or e tin ni ngam rin’ riy’. Ya b’tuf romed nib yo’or e muruwel nib gel ni ngam tabab e muruwel ko picha’ nibay e priesthood riy’. Boech ngiyal’ sana gabe lemnag ni ward fa branch rom ke tal’ ma dani yaen nga m’on.

Machane, dem turug ko pi muruwel fa gin’nem romed, ya gimed nge gag be nangfan dad ni bay e faflaen’’ ni be yib ngom napan e muruwliy nib yul’yul’ ko priesthood.

Guba a’dag e changeg, dem turug fa’anra ni bay ko Piper Cub, F-18, fa yug reb e sikuky. Napan ni bay ko Piper Cub, dab kug nonnon ni de yaen ni bpapay; ma napan ni bay ko F-18 dab kug nonnon ni pi chel nge churu’ ko re sikuky ngalang ke dag ni gag bee’ nib elal mab sasagal.

Aarogon, dariy’ ngiyal’ ko muruwel nib machalbog. Ma arogon, be rib moem ni ngan pirieg e n’en ni ngan nonnon mornga’agen.

Machane walageg, gadad be koeled fare Priesthood nib Thothup ni’ir e Ulung ko Fak ku Got! Kan tay pa’ ngadaen loelegdad, ma kad thapeged fare priesthood rok Got. Kan pii’ ngodad matuwon nge muruwel ni ngad ngongoliyed e tin Rok ni gadad tapigpig Rok nu fayleng. Fa’anra nibay ko ward nib ga’ fa branch nib achig’chig riy’, dem turug yak an pinningdad nggu muwuliygad, taw’ath gad, min ayweg u gubin e pin’en ni fan ko urngin e n’en kan pii’ matawon Got ngodad. Ya bay e n’en nib fel’ ko ren’ey?

Ngad nanged fan, faflaen’ riy’, min thamiyed e gapas nibe yib ko muruwel rok priesthood.

Fare Faflaen’ ko Priesthood

Bachane guba’adag e changeg, ke thiliyeg e yafos rog. Machane tin ni ke buch rog ni bachan gag e chongin ko re Galasia ney mab fel’ rogon ngak pin’en ke buch ngog napan kug changeg ngalang. Ya rib faflaen’’ ngak, rib fel’ ngak, ma rib gel ngak. Napan kug upnguyeg ko muruwel u Galasia, kug thamiy e gelingin rok Got, ma amrogon e wurengaen’ Rok.

Napan kug changeg, kug peth e nifeng ngalang. Ma gag ni chongin e Galasia kug thamiy e t’ufeg nu tharimy.

Boech ngiyal, gu tawreng nggu paer nga lan e cockpit. Machane napan gu muruwliy u ta’abang ko pi walageg ko Galasia. Ya gu thamiy ni gag reb e yang ko fare gapas nge faflaen’’ ni be yib rok e muruwel ney, ma Dabug nggu dabi un riy’ ko fayleng ney.

Kug kunuy nga ta’abang ni gadad yo’or e gidii’ ko fare priesthood. Ya ni’ir e faflaen’’ nib thothup nggu pigpig gaed ngak Somoel nge pi gidii u fayleng, nggu m’ag u wun’maed nggu chibiyeg ngalang picha’ nib waer ni ngad toeyed e gil’ilingun Got.

Gadad ma nanged min nanged fan ni priesthood e gelingin nge matawon rok Got ni machalbog. Ya rayog ningag yogned e ren’ey nib moem. Machane, riy’ul’ ni gadad ma nangfaned riy’ e tin ni bad be yoeg? Ngu gog bayay: Fare priesthood e gelingin nib manemus nge matawon rok Got.

Mu lemnag riy’. Udakaen fare priesthood, ke fal’eg Got re fayleng nge tharimy ma be lung riy’.

Udakaen re gelingin ney, Be thapeg me chibiydad ngalang pifak Rok, mab fekey ngodad e “yafos ni manemus nge faflaen’ nib gel ko gidii’.”⁴

Fare priesthood, boed ni ke weliy fare Prophet ni Joseph Smith riy’, ni’ir e “kanawo’ ni udakaen Somoel ke tabab ni ngan yi’iy e fla’ab Rok napan ke … sunmiy e fayleng, ma udakaen riy’ ni Ke ul’ul’ ni ngan dag Ir ngak pifak nge yaen mada’ ko chiney, ma udakaen riy’ ni ran weliy pangiy Rok nge mada’ ko bin tomur e rran.”⁵

Chitimangdad nu Tharimy ni th’abi gel riy’ ke pa’agandad ni ke pii’ ngodad matawon priesthood rok—gadad ni piacha’ nu fayleng ni dani machalbog. Be pii’ ngodad matawon nggu ngongoliyed pi’dad u Fithingan ni fan ni nge thapeg e pi Fak. Udakaen re gelingin nib ga’ be matawdad nggu machibnag e gospel, pii’ed e gam’ing ko thapeg, ayuweg nggu toyed e gil’ilingun ko Got nga dakaen e fayleng, min taw’ath nag min ayweg pi tabinaw nge gidii’ rodad.

Gubin Rayog

Aray rogon e priesthood ni thothop rodad.

De yoeg bee’ ni nge chuway fa fonow riy’. De yoeg bee’ ni nge thiliyeg rogon ko re gelingin ney, fa liyeg rogon ko lung, fla’ab, fa gil’ riy’. Be gelingin ko ya’el nibe yaen nga rogon ko motochiyel nu tharimy. Me yaen rok e Chitimandad nu Tharimy. Gelingin kemus ran yean udaken e pin’en fa muruwel nib mataw,⁶ gathi pangiy puf oloboch.

Kristus e kengin ko gubin e matawon nge gelingin ko priesthood nib riy’ul’ ko fayleng. ⁷ Be muruwel Rok, ni ku gadad rayog nggu un gad ngay. Ma dariy’ bee’ ni rayog ni nge un ko re muruwel ney mus ni ran sobtaen’ min sug ko adag, ni bay mich, athap, nge wurengaen’, ni dani uf’anthin ko ban’en, ni dem turug ko n’en kan pii’ ngak.⁸

Dab da rin’ed e ren’ey ni fan ko fla’ab, machane gadadbe gay nggu pigpig gad min ayuweg yug bee’. Gad be powi’iy gathi dakaen e geling dad machane udakaen “pangiy nib sobutaen,… sumunguy,… gum’aen’,… athamgil nge adag nib riy’ul’ rogon riy’.”⁹

Fare priesthood ko Got nib gubin Rayog rok e rayog gubin e pum’on nib mataw ran fek riy’—dem turug e likigal rorad, dem turug fa’anra be fla’ab fab sobut’, ngara nib chuchugur fa ngaram ni borel. Gubin rayog ni ngan fek ni dariy’ e salpiy ko fayleng. Nggu gog e thin ku profet nu kakrom ni Isaiah, gubin e cha’ nib bilig rayog ni nge yib ngak pi rraen, ma dariy’ pulwon’ riy’ ni ngan yib min kay!¹⁰

Ma ni bachan ko fare Bayul nib machalbog ni dari mus bi’id rok Tathapeg rodad, Yesus Kristus, rayog e priesthood ko Got ni ngan yaen ngodad fa’anra kad dol’ gad fa kad denen gad faram. Udakaen e n’en ni ran thiliyeg min be’ech nagdad riy’ ni kalngan’ ngay, gur rayog ni ngam sakiy min yaen nga m’on”!¹¹ Bachan e adag, wurengaen’, nge n’ag fan rok Tathapeg ni Tabiyul, gur rayog ni ngam sap ngalang, mang bee’ nib be’ech nge mataw, nge mang pi gidii’ nib mataw ni gimed pi pagael rok Got—pi gidii’ nib mataw nibe koeled re priesthood nib thothup rok Got ni gubin Rayog rok.

Fare Ma’ang’ang nge Taw’ath ko e Priesthood

Gu kirebaen’ ni fan ko pi gidii’ ni dani nanged fan riy’ fa faflaen’’ ngay ni re taw’ath ko priesthood nib fel’. Yad e boed rogon e cha’ ni ke yaen nga sikukky ni ke nonnon ni bachan ke bachigchig e peanuts rok, u napan ni be yaen nga lang u dakaen e nifeng, nib tolang ko pi manilang—n’en ni pi pilung ni kakrom ran pii’ gubin ni bay rorad ni ngan buch ngorad t’ab e yay!

Pi walageg, kan taw’ath nagdad ni nge yoeg ngodad e gelingin nge matawon nib fel’ ney ko priesthood. Aygi sapgad nga lang min gu’, min nanged fan, min athapeged riy’ nib fel’ rogon.

Udakaen e paer nib thothup, ni bay adag riy’, ma dakaen e muruwel ko priesthood nib yul’yul’ rogon, ran yib ngodad e nangfan ko re thogthog ni ga’ar: “Nggu waen u’mon p’owchem. Gu bay nga barba’em nib mataw nge gilaey’, ma Kan Thothup rog ran paer nga lan gumircha’um, ma pi angel rog ran upnguyem min chibiyem ngalang.”¹²

Aygi ngad athapeged min nanged fan e taw’ath ni be yib ngodad udakaen e priesthood. Aygi athapeged min adag dakaen e muruwel ni kan ning rodad—ko pi tabinaw nge Galasia rodad, dem turug fa’anra be ga’ fa be chig’chig’ riy’. Aygi ga’ nag e mataw, yul’yul’ nge ayuw ko priesthood rodad. Aygi piriy’egned e faflaen’’ ko muruwel rok priesthood!

Rayog ni ngad mugu’uliyed riy’ napan gad be lek pi kengin ko lowan’, fol, nge mich.

Be yip fan ni, somm’on, thingarda nanged fan min tay nga lan gumircha’dad e machib ko priesthood ni bay ko thin rok Got. Be ga’fan ni ngad nanged fan pi m’ag nge motochiyel ni be liyeg nag fare priesthood.¹³

Magid, aygi gonop gad min ngongoliyed re lowaen’ ney nib yo’or mab yul’yul’ ga’ bugwan rogon. Napan gadad be fol ko pi motochiyel rok Got, liyeg nag tafney nge dowef rodad, ma fol ko pangiy nib mataw kan ma chang dad rok pi profet, ran yib ngodad e faflaen’ ni bay ko murwliy ko priesthood.

Ma tomur, aygi ga’ niged e mich u wun’dad ngak Somoel, Yesus Kristus. Ngad feked nga dakaen dad fithingan min m’ag u wun’maed gubin erran nggu lek e kanawo’ ko gachalpen rok. Pi ngongoliy rodad ran thiliyeg e mich rodad nib machalbog.¹⁴ Napan gadadra mang e gachalpen, ku rayog ni ngad machalbog gad bayil’ nga dakaen bayil’ udakaen e ayuw ngak tabinaw, gidii’ rodad, nge Got.

Napan gad be pigpig gaed udakaen fare priesthood ko gubin e gum’ircha’da, gelingdad, nge tafedad, ra paer rodad e micheg ko lowaen’, gapas, nge taw’ath nib thothup. Napan gad be liyor nag fare priesthood nib thothup, Somoel ran liyegdad, ma gad ra paer ni dariy’ e denen romad ou’mon p’owchen ko tin tomur e rran.¹⁵

Gu meybil ni nge yoeg ngodad owchen nggu guyed nge gumircha’dad ni ngad thamiyed e faflaean’ ko fare priesthood rok Got rodad nib ga’, u fithingan Yesus Kristus, amen.